Jesús ndadaguaꞌa ia en tsayee ñoꞌon kuiño
14
En sábado, Jesús kuyii ia kaxi ia xeꞌe fariseu kunaꞌnu san dagua ka fariseu xito-ini ñaꞌan tsa xi ia. 2 San juan io en tsayee taꞌan tsa en kueꞌe nani hidropesía. 3 Danduu nduku toꞌon Jesús xi fariseu:—Guaꞌani sa ndada guaꞌa da ñayii sábado ya ña ñaꞌan?
4 Doko tsa yaꞌa ti kaꞌan tsa ndidaa tsa, juandiku Jesús teen ia tsa kuꞌu xi ya san ndadaguaꞌa ñaꞌan ia, san sadaa ia sa na nuꞌu tsa 5 San sadaa ia xi tsa yaꞌa ndidaa tsa:
—Naa ñayii kuu ni tu en d̶aꞌa ni adi en ndikutu ni kikagua niꞌno te xiti en yavi san ti saꞌan ni sa tagua ni te kuani ku sábado.
6 San nisa en tsa ti kachi naxikoneꞌe.
Ndidaa ñayii kana ñaꞌan xi viko tandaꞌa
7 San ntsaꞌa Jesús ndidaa ñayii saa san kukoo ndidaa titsayu sa sakuntsaku ndidaa tsa kunaꞌnu, san sadaa ia en toꞌon dadaguataꞌan yaꞌa:
8 —Tu kana ñaꞌan en viko tandaꞌa yo, san ma kukoo yo titsayu sakuntsaku tsa kunaꞌnu, kuan na kada tsa kida viko kuan, kana tsa en tsa kunaꞌnu ka sa kuj xo, 9 san kixi tsa kána ñaꞌan xo nduu yo san kachi tsa: “kuañaꞌan s-titsayu yo xan xi nu yaꞌa” san niꞌi yo en sakanuu kaꞌnu sa kiꞌin yo ntsaa sata xi kuntsaku yo. 10 Guaꞌa ka tu kana ñaꞌan en viko yo san kukoo ntsa sata xi san ora nasa tsa kana ñaꞌan yo san kachi tsa: “xani, naꞌa ntsa jnu xi ya” san duꞌua chiñuꞌu ñaꞌan tsa yo xiꞌin ndidaa tsa yeꞌe mesa xiꞌin yo. 11 Kuan andu ntseꞌe nchu kunaꞌnu san nakaꞌnu ñaꞌan xi doko andu ku luchi san kadakaꞌnu ñaꞌan xi.
12 San sadaa ia xi tsa kána ñaꞌan xi ia:
—Tu kidaguaꞌa yo sa kaj ñayii san ma kana yo tsa mani xiꞌin yo nisa xani yo nisa xayii yo nisa tsa kuika io yachi jnu xeꞌe yo, kuan na kada tsa yaꞌa kada tsa sa kaj s-tsa san kana ñaꞌan tsa yo san duꞌua na chaꞌvi tsa yo. 13 Doko tu nchu kadaguaꞌa yo sa kaj yo san kana ndidaa tsa kundaꞌvi, ndidaa tsa atuu ndaꞌa xi, ndidaa tsa yakua xiꞌin ndidaa tsa kuaa, 14 san duꞌua Ndios taxi ia sa guaꞌa yo kuan ndidaa tsa yaꞌa ma kachi na chaꞌvi tsa yo doko kaꞌnu ntseꞌe sa niꞌi yo kii na nandoto ndidaa ñayii guaꞌa.
Toꞌon dadaguataꞌan viko kaꞌnu ntseꞌe sa ku kaj dini tsa
15 San tsaku xi en tsa intsaku saxi san sadaa tsa xi Jesús:
—¡Na ku-iꞌni tsa na kaxi ita-stila sa tastuni Ndios ñayii!
16 Doko Jesús sadaa ia:
—En tsayee kida tsa en viko kaꞌnu ntseꞌe sa kana tsa kuaꞌa ntseꞌe ñayii. 17 San taꞌan ora kaj s-tsa san tsandaꞌa tsa tsa kidachiion jnu tsa sa nakiꞌin tsa ku kadaa tsa: “Naꞌa ni, kuan sa io sa kaj ni.” 18 Doko ndidaa tsa yaꞌa kesaꞌa tsa xika tsa sa kaꞌnu-ini. San tsa diꞌnanuu sadaa tsa: “Dika seen ntsu en ñuꞌu san io sa kiꞌin ntsu kuntsaꞌa ntsu; xika ntsu en sakaꞌnu-ini yo.” 19 San enka tsa kachi: “Seen ntsu oꞌon yunta ndikutu san io sa kiꞌin ntsu kuntsaꞌa ntsu ncha kidachiion te. Xika ntsu sa kaꞌnu-ini yo.” 20 San enka tsa kachi: “Dika tuꞌu tandaꞌa ntsu, ma kada sa kiꞌin ntsu.” 21 Nasaa tsa kidachiion san nakani tsa ndidaa xi s-toꞌo tsa. San nadiko xi tsa yaꞌa san sadaa tsa xi tsa kidachiion jnu tsa: “Kuaꞌan sa yaꞌia kuaꞌa ñayii xiꞌin ichi xika kuaꞌa ñayii ñuu xan san kuntsaka tsa kundaꞌvi, tsa atuu ndaꞌa xi, tsa yakua xiꞌin tsa kuaa.” 22 San kuenta tuꞌu kida ndidaa tsa kidachiion jaꞌa san sadaa tsa: “Toꞌo kída da ndidaa sa táꞌvichiion ni san io kuaꞌa ka titsayu.” 23 San s-toꞌo tsa sadaa tsa: “¡Kuaꞌan ndidaa ichi xiꞌin sa taꞌntsa ichi san kuntsaka ñaꞌan naꞌa kuani ti nchoxi ndidaa ñayii kuan na nachitu ku kueꞌe ntsu ya. 24 Kuan kachi ntsu yo sa nisa en tsa kána ntsu ma kaxi sa kídaguaꞌa ntsu.”
San nakóꞌon sa kunchiko ñaꞌan xi Jesús
25 Kuaꞌa ntseꞌe ñayii nchiko ñaꞌan xi Jesús san naxikokagua ia san sadaa ia:
26 —Tu andu nchu kunchiko ñaꞌan ku ntsu san nchox ka s-tata xi, j-nana xi, d̶eꞌe xi, d̶aꞌa xi, xani xi, x-kuaꞌa xi, adi ti saꞌntsa-ini mee, san ma kada sa kunchiko ñaꞌan ku ntsu. 27 Sa andu ma kuido x-cruz xi sa ma kunchiko ñaꞌan kuntsu san ma kada sa kunchiko ñaꞌan ku ntsu. 28 Kuan Na kachi ndo sa yoꞌo ndidaa yo nchu kadaguaꞌa yo en veꞌe san adi diꞌna ka kukoo yo ntsaꞌa yo san sani-ini yo tu taꞌan sa daxino yo ña? 29 Kuan na kada dama yo saꞌa xi san ti taꞌan ka sa daxino yo san ndidaa tsa ntsaꞌa ñaꞌan yo kuakuntsaa ñaꞌan tsa, 30 san kachi tsa: “Tsayee yaꞌa kesaꞌa tsa kidaguaꞌa tsa veꞌe san ti xino s-tsa.” 31 Ña na Rey kee naa xiꞌin enka Rey ti ku koo tsa diꞌna ka ntsaꞌa tsa tu guaꞌa ni naa tsa kuan uxi mil ñayii io s-tsa san tsa vaxi kuaan kuu tsa oko mil ñayii? 32 San tu sani-ini tsa sa ma kadanar tsa san tsandaꞌa tsa ñayii na ndada mani neni io xika daa tsa. 33 Duꞌua yoꞌo tuku tu ma dandoo yo ndidaa sa io yo san ma kachi ku kuu yo nu nchiko ñaꞌan ku ntsu.
Ora xita diko ñée