Tu yoꞌo ndidaa yo ma nata-uꞌu yo san kuu yo tuku
13
Kii yukua saꞌan uu tsa sa ntsaꞌa ñaꞌan xi Jesús sa nakani tsa, sa kii saꞌni tsa kititata sa doko xi Ndios, Pilatu nadaka taꞌan tsa j-niñi kititata xiꞌin niñi uu ñayii io Galilea. 2 San sadaa Jesús:—Sani-ini yo sa tsa duꞌua taꞌan ya io ka x-kuachi tsa sa kuxi ndidaa ka ñayii io Galilea kuaan ña? 3 Ñaꞌan, doko tu ma naxikokagua xanaa yo san duꞌua ni taꞌan yo tuku. 4 San ndi saꞌun-uni tsa tavi ñaꞌan torre Siloé xi, san saꞌni ñaꞌan s-tsa, sani-ini yo sa io ntseꞌe ka x-kuachi tsa sa kuxi ndidaa ñayii io Jerusalén ya ña? 5 Kachi ntsu sa ñaꞌan; doko tu ma naxikokagua xanaa yo ndidaa yo xi Ndios san duꞌua ni kuu yo tuku.
Toꞌon dadaguataꞌan sa kuu tu tichikaꞌakuxi ti kee kuiꞌi
6 Danduu kaꞌan ia toꞌon dadaguataꞌan yaꞌa:
—En tsayee io en tu tichikaꞌakuxi xuꞌun tsa san saꞌan tsa sa nduku tsa en kuiꞌi sa ti niꞌi tsa. 7 Danduu sadaa tsa xi tsa ntsaa kuaan: Sa kuu uni kuia kij ntsu ki nduku ntsu kuiꞌi, san ti niꞌi ntsu. Juandiku kaꞌntsa kuan in duꞌua. 8 Doko tsa ntsaa sadaa tsa: “Toꞌo na kuin kadi en kuia yaꞌa ni ka, san nakatsa da san na choꞌon da saꞌan saꞌa xi. 9 Tu enka kuia na koo x-kuiꞌi xi, san guaꞌni; doko tu ñaꞌan, san taꞌvichiion ni sa na taꞌantsa.”
Jesús ndadaguaꞌa ia en ñadeꞌe nduteꞌe sata xi en sábado
10 Jesús dakuaꞌa ñaꞌan ia xiti veꞌe sinagoga en sábado. 11 San juan io en ñadeꞌe kuꞌu xi san oni nduteꞌe sata ña kuan en tachi kuiꞌia kída sa duꞌua ka ña, san sa kuu saꞌun-uni kuia kuꞌu xan san ti nduguaꞌa ña. 12 San Jesús xini ñaꞌan ia xan, san kána ñaꞌan ia xan, san sadaa ia:
—Didi nduguaꞌa ni xi kueꞌe xan vita.
13 San sakindodo ia ndaꞌa ia sata ñadeꞌe, san nonoo ni ndundaa ña san kídakaꞌnu ña Ndios. 14 Doko tsa kunaꞌnu io veꞌe sinagoga nadiko s-tsa sa ndada guaꞌa ia ña yaꞌa sábado kuan san sadaa tsa xi ndidaa ñayii:
—Io iñu kii sa kadachiion, kij ni kii yaꞌa sa nduguaꞌa ni ndidaa ni naku kada sábado ya kij ni?
15 Dandu Jesús sadaa ia:
—¡Ndidaa dini ñayii uu jnu xi! Ti dañu ni ndikutu ni adi burru ni sa koꞌo te ndutsa kii sábado ya ña? 16 San ña yaꞌa kuu ña xayii Abraham san sakakuiꞌia xiꞌni ñaꞌan saꞌun-uni kuia sa ti guaꞌa sa nduguaꞌa ña sábado ya ña?
17 San tuꞌu kaꞌan Jesús toꞌon yaꞌa san ndidaa ñayii xini-uꞌu ñaꞌan xi ia, kukaꞌan jnu tsa ndidaa tsa, san ndidaa ñayii ku-iꞌni ntseꞌe xiꞌin sa naꞌnu kida Jesús ya.
Toꞌon dadaguataꞌan ndiki en yutu nani mostaza
18 Jesús kachi ia:
—Ncha kaa sa tastuni Ndios ndidaa ñayii? Nasa ndee? 19 Kuu na en ndiki yiki en yutu nani mostaza sa teen en tsayee san dakaa tsa xuꞌun tsa, san kana san saꞌnu ntseꞌe sa kaꞌnu ntseꞌe en yutu nduu san ndidaa tidaa xiko andivi kidaguaꞌa te s-taka te ndaꞌa xi.
Toꞌon dadaguataꞌan levadura kuguaꞌa ita-stila
(Mt 13.33)
20 San kachi nituku ia: Nasa ndee sa tastuni Ndios ndidaa ñayii? 21 Ndee levadura teen en ñadeꞌe san nadaka taꞌan ña xiꞌin xuchi trigu ntsa nanañu ntseꞌe.
Ndieꞌe kuiñi
(Mt 7.13-14; 21.23)
22 Jesús saꞌan ia ñuu xiꞌin ndaꞌa ñuu dadana ñaꞌan ia san xika ia ichi kuaꞌan Jerusalén. 23 San en tsa sadaa xi ia:
—Toꞌo, uu ni ñayii nanitaꞌvi ña?
San Jesús sadaa ia:
24 —Nduku ntsee sa yii yo ndieꞌe yiki ka; kuan kachi ndaa ntsu yo sa kuaꞌa ntseꞌe ñayii nchu yii, san ma kada. 25 Kuan s-toꞌo veꞌe kuan nakadi tsa sa yoꞌo ndidaa yo kendoo yo ndikeꞌe, san kesaꞌa yo kana yo san kachi yo ndidaa yo: “¡Toꞌo, toꞌo nakaan ni!” Doko kachi tsa toꞌo yo: “Ti xini ntsu andu kuu yo ndidaa yo.” 26 San dandu kesaꞌa yo kachi yo ndidaa yo: “Saj da ndidaa da xiꞌin ni, xiꞌi da ndidaa da xiꞌin ni, san ichi kaꞌnu xuun da dakuaꞌa ñaꞌan ni xi ñayii xuun da.” 27 San tsa yaꞌa kachi tsa: “¡Ti xini ñaꞌan ntsu yo ndidaa yo, kuaꞌan juan ndidaa yo nu kida sa kuiꞌia!” 28 San juan koo ndutsa nuu xiꞌin ku ruꞌu nuꞌu ora na kini yo Abraham, Isaac, Jacob xiꞌin ndidaa ka x-profeta Ndios io sa tastuni ia ñayii, san yoꞌo ndidaa yo kendoo yo ndikeꞌe. 29 San kixi ñayii ichi kana ora xiꞌin ichi daꞌvi ora, norte xiꞌin sur sa kuntsaku tsa ndidaa tsa sa tastuni Ndios. 30 San ndidaa ñayii ti xaꞌvi xi ñuyii yaꞌa ku kuu ñayii diꞌna nuu, san ñayii xaꞌvi xi ñuyii yaꞌa ku kuu danduu.
Jesús ndaꞌyu ia sa saꞌa ñuu Jerusalén
31 San dini kii yukua saa uu fariseu san sadaa tsa:
—Ti kee kuan Herodes nchu kaꞌni ñaꞌan tsa xo.
32 San Jesús sadaa ia: Kuaꞌan ni san kada ni xi kiti maña yukua:
—Sa kineꞌen da tachi kuiꞌia xiꞌin ndada guaꞌa da ñayii vita xiꞌin yutsa, san nduu uni kii ya tuꞌu x-chiion da. 33 Kuan nandeꞌe sa vita, yutsa xiꞌin enka kii, kiꞌin da ichi kuaꞌan Jerusalén; kuan ti guaꞌa sa en x-profeta Ndios ndeꞌe tsa enka ñuu sa ti kuu Jerusalén.
34 ¡Jerusalén, Jerusalén ndidaa ñayii io yo, saꞌni yo ñayii tsandaꞌa Ndios xiꞌin chidoyuu ñaꞌan yo xi ndidaa tsa tsandaꞌa yo sa kaꞌan s-toꞌon ia! ¡kuaꞌa guelta nchu nadataka d̶aꞌa yo ndidaa yo na en nchuxi nadataka te nchuxi yiki te xiti nchixi te, san ti táꞌan xanaa yo! 35 Doko ndaꞌvi yo vita. Kuan xeꞌe yo kendoo ni ka mee. San kachi ntsu yo sa ma kini ñaꞌan ka yo kuntsu ntsa na saa kii na kachi yo: “Na kukaꞌnu ñayii vaxi xiꞌin sa nani Ndios.”