Jesús da kuidokuachi ñaꞌan ia xi ndidaa fariseu xiꞌin ndidaa tsa dadana ñaꞌan ley
23
Danduu káꞌan Jesús xi ndidaa ñayii xiꞌin ndi uxi-uu tsa nchiko ñaꞌan xi ia, san sadaa ia.2 —Ndidaa tsa dadana ñaꞌan ley xiꞌin ndidaa fariseu io tsa sa dadana ñaꞌan tsa ley. 3 San duꞌua ndidaa sa dakuaꞌa ñaꞌan tsa kada xiꞌin chodoꞌo; doko ma dandee naꞌa yo sa kida tsa, kuan tsa yaꞌa kaꞌan tsa sa kada tsa doko ti kida tsa. 4 Kuan taꞌvichiion tsa sa na kada ñayii sa vixi ntseꞌe, san vee ntseꞌe sa sakindodo tsa sata ndidaa ñayii; doko ndidaa tsa yaꞌa nisa en d̶ikindaꞌa tsa ti nchu dakani tsa sa chintsee ñaꞌan tsa. 5 Guaꞌa ka, kida tsa ndidaa sa kida tsa ndasa na kini ndidaa ñayii.a Taꞌan xanaa tsa sa kuntsaa s-toꞌon Ndios jnu tsab xiꞌin ndaꞌa d̶oꞌno tsa xiꞌin sa dandoo nani tsac jnu d̶oo tsa. 6 Taꞌan xanaa tsa diꞌnanuu titsayu guaꞌa io jnu ndidaa viko xiꞌin diꞌnanuu titsayu guaꞌa io veꞌe sinagoga, 7 san taꞌan xanaa tsa sa guaꞌa guaꞌa na kaꞌan s-tsa ndidaa jnu xaꞌvi san na danani ñaꞌan Maestru s-tsa.
8 Doko yoꞌo ma kuemani yo sa kunani yo Maestru; kuan endini tsa kuu Maestru yo, san ndidaa ñani yo xiꞌin ndidaa kuꞌua yo. 9 San ma danani yo nisa en tsa io nuꞌu ya tata, kuan s-Tata yo ia io andivi kuu eni ia. 10 San ma kuemani yo sa danani ñaꞌan yo tsa toꞌo, kuan S-toꞌo yo kuu eni tsa, tsa kuu Cristu. 11 Doko nu na kunaꞌnu sa io yo kuu nu na kuinokuachi yo.d 12 Kuan andu ti nchu kunaꞌnu san kunaꞌnu san andu nchu kadakaꞌnu ñaꞌan xi mee san nakaꞌnu ñaꞌan xi.e
13 ¡Ndaꞌvi ndidaa yoꞌo fariseu xiꞌin tsa dadana ñaꞌan ley kuan kuu yo ñayii uu jnu xi! Dadaꞌan yo sa na kini ñayii na modo tastuni ñaꞌan Ndios xi ndidaa ñayii. San nisa mee yo ndidaa yo ti na kini nchisa sa tastuni Ndios ndidaa ñayii.
14 ¡Ndaꞌvi yoꞌo, tsa dadana ñaꞌan ley xiꞌin fariseu uu jnu xi! Kuan dandeꞌe yo sa io xeꞌe ndidaa ñakee san ndasa na ku danaꞌa sa kunaꞌnu yo san naꞌa ntseꞌe kaꞌan yo xi Ndios. Sa saꞌa xi jaꞌa juandiku kuaꞌa ntseꞌe ka táꞌan yo.
15 ¡Ndaꞌvi yoꞌo tsa dadana ñaꞌan ley xiꞌin fariseu uu jnu xi! kuan ndinoo yo mar xiꞌin nuꞌu ndasa naniꞌi yo eni ñayii na kininchisa sa xininchisa yo; san niꞌi yo nu san kida yo sa na kuidokuachi ka nu sa kiꞌin nu sa uꞌu sa ndaꞌvi.
16 ¡Ndaꞌvi ndidaa yoꞌo nu ndodo nu kuan kuaa yo! Kuan kachi yo: “Tu andu na na chonaꞌa sa saꞌa templu, kuani ma kada sa chonaꞌa; doko tu sa saꞌa oro io xiti templu, san juan kuu sa nchoxi sa kada sa chonaꞌa.” 17 ¡Ntseꞌe chuu yo! Nasa kuu sa xaꞌvi ka xi: Oro ña templu sa kida ii ñaꞌan xi oro kuaan? 18 San kaꞌan yo ndidaa yo tuku: “Tu andu na chonaꞌa sa saꞌa altar san kuani ma kada sa chonaꞌa; doko tu na chonaꞌa sa saꞌa xi sa doko yodo jnu altar, juan kuu sa na chonaꞌa san na kada.” 19 ¡Nu kuaa! Nasa xaꞌvi ka xi: Sa doko ña altar sa kida ii ñaꞌan xi sa doko? 20 San duꞌua nu na chonaꞌa sa saꞌa altar, na chonaꞌa nu sa saꞌa altar xiꞌin sa yodo jnu altar. 21 San nu na chonaꞌa sa saꞌa templu, na chonaꞌa nu sa saꞌa xi xiꞌin ndidaa sa io xiti xi. 22 San nu na chonaꞌa sa saꞌa andivi, na chonaꞌa nu sa saꞌa sa intsaku ndodo Ndiosf xiꞌin sa saꞌa ia intsakundodo sata xi jaꞌa.
23 ¡Ndaꞌvi yoꞌo nu dadana ñaꞌan ley xiꞌin fariseu, uu jnu xi! Kuan sañaꞌan yo en ndiden uxi sa io yo ntsandeꞌe menta, cominu xiꞌin anís;g doko dandoo yo sa nandeꞌe ntseꞌe ka ley, sa koo yo modo nchoxi Ndios xiꞌin sa kunda-ini yo xiꞌin sa kini nchisa yo Ndios. Nandeꞌe sa kada jaꞌa doko ma dana sa doko xi Ndios. 24 ¡Nu kuaa, kuan da keniꞌni yo en chuku san koko yo en camellu!
25 ¡Ndaꞌvi yoꞌo nu dadana ñaꞌan ley xiꞌin fariseu, uu jnu xi! Kuan ndee yo en vasu adi en koꞌo sa ndundoo sata ni xi doko xanaa yo ñoꞌon daa ndidaa sa duꞌu xi ñayii xiꞌin ndidaa sa kuiꞌia nchoj yo. 26 ¡Fariseu kuaa! ¡Ndada ndoo diꞌna ka xiti vasu kuan ndasa sata xi na ndundoo tuku! 27 ¡Ndaꞌvi yoꞌo nu dadana ñaꞌan ley xiꞌin fariseu uu jnu xi! kuan ndee yo yavi yenduxi ndii,h kuan vili ntseꞌe ka ichi sata xi; doko xiti xi chitu yiki tsaꞌyu xiꞌin sa kuiꞌia. 28 San duꞌua ni yoꞌo tuku, sa ndaa sa danaꞌa yo sa kuu yo ñayii guaꞌa xi ndidaa ñayii; doko xanaa yo chitu sa kuiꞌia xiꞌin sa uu jnu yo.
29 ¡Ndaꞌvi yoꞌo nu dadana ñaꞌan ley xiꞌin fariseu uu jnu xi! kuan kídaguaꞌa yo capilla xi ndidaa x-profeta Ndios san kida kutu yo xavi ndidaa ndii kúu ñayii guaꞌa, 30 San kaꞌan yo: Tu ío ndo ndidaa kii ío ku tadeꞌe ndo, san ma kaꞌni ndo ndidaa x-profeta Ndios. 31 San duꞌua da kuidokuachi yo mee yo sa kuu yo d̶aꞌa ndidaa tsa saꞌni ndidaa x-profeta Ndios. 32 ¡Daxino ndidaa yo sa kesaꞌa s-tadeꞌe yo kída tsa!
33 ¡Yoꞌo koo! ¡D̶aꞌa koo kuu yo ndidaa yo!i Sani-ini yo sa yaꞌia duꞌua ni sa xidokuachi yo sa kiꞌin yo antsaya kuaan ña? 34 Juandiku taꞌvichiion ntsu sa na kixi x-profeta Ndios xiꞌin tsa kutuni xi xiꞌin tsa dadana ñaꞌan ley; san ndidaa tsa yaꞌa, uu tsa kaꞌni yo xiꞌin katakaa yo cruz, san uu ka tsa kaniaꞌa yo xiti veꞌe sinagoga xi san kuiko ñaꞌan yo ñuu xiꞌin ñuu s-tsa, 35 san duꞌua xidokuachi yo ndidaa yo niñi ndidaa ñayii guaꞌa sa koꞌio nuꞌu ya, ntsa niñi Abelj xiꞌin ntsa niñi Zacaríask d̶aꞌa Berequías, tsa saꞌni yo ndidaa yo j-naꞌma templu xiꞌin altar. 36 Kachi ndaa ntsu yo, sa ndidaa jaꞌa xidokuachi ndidaa ñayii io ntsa vita.
Jesús ndáꞌyu ia sa saꞌa Jerusalén
37 ¡Jerusalén, Jerusalén, saꞌni yo ndidaa x-profeta Ndios xiꞌin chidoyuu ñaꞌan yo xi ndidaa tsa kaꞌan stoꞌon ia kixi sa io yo! ¡Nada guelta nchu na dataka ñaꞌan ntsu yo, kuenta nchuxi na dataka te nchuxi yiki te xiti nchixi te, san ti nchoj yo! 38 San vita xeꞌe yo ndidaa yo meni ka kendoo. 39 Kuan kachi ntsu yo sa ntsa vita ma kini ñaꞌan ka yo kuntsu ntsa na kachi yo: “Na kuu kaꞌnu tsa vaxi xiꞌin sa nani Ndios.”l