Sa tastuni Jesús
20
En kii dakuaꞌa ñaꞌan Jesús xiti templu, kaꞌan ia toꞌon guaꞌa san kuyachi uu dutu kunaꞌnu xiꞌin tsa dadana ñaꞌan ley xiꞌin tonisaꞌnu. 2 San sadaa tsa:—Kachitoꞌon: andu táꞌvichiion sa kada yo ndidaa jaꞌa? Ña andu taxi sa tastuni yo?
3 San Jesús sadaa ia:
—Dan na ndukutoꞌon da en sa ndukutoꞌon da ni tuku. Sa kachitoꞌon ni da: 4 Andu táꞌvichiion xi Juan sa dakuendutsa nu, Ndios ña ñayii?
5 San kesaꞌa tsa ndatoꞌon tsa san kachi tsa:
—nasa kadaa ndo s-tsa, tu nakadaa ndo sa Ndios táꞌvichiion san kachi nu, naku ti xininchisa ñaꞌan ni s-tsa tuda? 6 San tu na kadaa ndo sa ñayii san nee ñuu ya chidoyuu ñaꞌan ku ndo kuan ndidaa ñayii xini sa Juan kúu en x-profeta Ndios.
7 San sadaa tsa sa ti xini tsa andu táꞌvichiion xi Juan sa dakuendutsa tsa. 8 Danduu Jesús sadaa ia:
—Dan ma kachitoꞌon da andu táꞌvichiion da sa kada da jaꞌa tuku.
Toꞌon dadaguataꞌan sa kida ndidaa tsa ku ñayii kuiꞌia kidachiion en ñuꞌu
9 Sadaa ia en toꞌon dadaguataꞌan xi ndidaa ñayii yaꞌa:
—En tsayee choꞌon tsa yuku tinchiꞌio en ñuꞌu kaꞌnu ntseꞌe san dandoo tsa xi uu tsa na kadachiion sa kuaꞌan xika tsa naꞌan ntseꞌe. 10 San taꞌan kii sa nakeꞌen tsa ndaa kuu xaꞌan tsa san tsandaꞌa tsa yaꞌa uu tsa kidachiion jnu tsa sa nakiꞌin tsa ku nakeꞌen tsa ndaa kuu sa nakeꞌen tsa doko ndidaa tsa yaꞌa kaniaꞌa tsa s-tsa san naxikoneꞌe ñaꞌan tsa san nisadana ti neꞌe tsa yaꞌa kunuꞌu. 11 San tsandaꞌa nituku tsa uu ka tsa kidachiion jnu tsa, doko tsa yaꞌa kantseꞌe tsa s-tsa san kaniaꞌa tsa san naxikoneꞌe ñaꞌan tsa san na tsandaꞌa ñaꞌan tsa sa ti neꞌe tsa nisadana kunuꞌu 12 Tsandaꞌa nituku tsa enka tsa, doko tsa yaꞌa ndoꞌo ni tuku tsa san kineꞌen ñaꞌan tsa xiꞌin da takueꞌe ñaꞌan tsa.
13 Danduu s-toꞌo ñuꞌu kachi tsa: “Nasa kada ntsu? tsandaꞌa ntsu ku daꞌa ntsu nu nchoj ntsu gua duꞌua nika yuꞌu ñaꞌan nu.” 14 Doko ndidaa tsa kidachiion ñuꞌu xíni ñaꞌan tsa jnu san kachi tsa: “Nuyaꞌa kuu nu nakeꞌen ndidaa jaꞌa nakaꞌni ñaꞌan ndo jnu kuan na kendoo ñuꞌu ya kundo.” 15 San kineꞌen ñaꞌan tsa xiti ñuꞌu jnu san saꞌniñaꞌa tsa jnu.
—Nasa kada s-toꞌo ñuꞌu s-tsa yaꞌa ndidaa tsa? 16 Ndij s-tsa san kaꞌni tsa ndidaa tsa yaꞌa, san kuañaꞌan tsa ñuꞌu xi enka ñayii.
San tsaku s-tsa yaꞌa ndidaa tsa toꞌon yaꞌa san kachi tsa:
—Jaꞌa ma taꞌan.
17 Doko Jesús ntsáꞌa ñaꞌan ia san sadaa ia:
—Ama ti xini ni sa yodotuni s-tutu ii Ndios?
yuu sa ti nchoxi tsa kídaguaꞌa veꞌe
juan ku yuu jnu xi
18 Andu na ndugua sata yuu yukua taꞌnu san andu na koꞌio yuu yaꞌa sata xi kada ñaꞌan tiachi xi.
Sa chaꞌvi tuini
19 Ndidaa dutu kunaꞌnu xiꞌin tsa dadana ñaꞌan ley nchu teen tsa Jesús kuan xinituni tsa sa kaꞌan ia sa kuu tsa ndidaa tsa doko yuꞌu tsa nee ñuu. 20 San tsandaꞌa tsa uu tsa na koto-ini ñaꞌan xi ia, san na kada tsa sa kuu tsa ñayii guaꞌa ndasa na naniꞌi tsa en toꞌon da kuidokuachi ñaꞌan tsa jnu gobernador romanu. 21 Tsa yaꞌa ndukutoꞌon tsa san sadaa tsa:
—Toꞌo, xini da ndidaa da sa sa kaꞌan ni xiꞌin sa dadana ñaꞌan ni kuu sa guaꞌa san ti ntsaꞌa ni nasa kaa ñayii maska sa dadana ñaꞌan ni sa ndaa kuiti, sa nchoxi Ndios. 22 Guaꞌa ni sa chaꞌvi da ndidaa da tuini sa saꞌa xuꞌun da xi César kuan ña ñaꞌan?
23 Jesús xinituni ia ndidaa sa kuiꞌia sani-ini tsa yaꞌa ndidaa tsa san sadaa ia:
—Naku xitotuni ñaꞌan ni 24 Dadana ñaꞌan ni d̶a en tuini chaꞌvi ni sa saꞌa xi. Andu jnu xi kuu sa ntsaa jnu tuini ya san nasa nani tsa yodotuni tuini yaꞌa?
San ndidaa tsa yaꞌa sadaa tsa:
—Xaꞌan Cesar.
25 San Jesús sadaa ia:
—Kuañaꞌan xi Cesar sa kuu xaꞌan Cesar san kuañaꞌan xi Ndios sa kuu xaꞌan ia.
26 San ti kachi teen ñaꞌan tsa kuan nisa en toꞌon kuiꞌia ti kaꞌan Jesús juandiku ndidaa tsa yaꞌa sadi tsa xuꞌu tsa san nisadana ka ti káꞌan tsa.
Ndukutoꞌon tsa nasa ku sa nandoto ñayii
27 Danduu saa uu saduceu xininchisa sa ora xiꞌi ñayii san tuꞌu ndidaa san ti io sa nandoto ñayii san ndúkutoꞌon tsa:
28 —Toꞌo Moisés chidotuni tsa; tu en tsayee xíꞌi tsa san ti ío d̶aꞌa yee tsa, san io enka xani tsa san tsa yaꞌa na nakoo xiꞌin d̶eꞌe tsa diꞌnanuu, kuan na koo d̶aꞌa yee tsa xiꞌin ña, en nu na kunani kuenta inani ndii kuan. 29 Io usa ñani nuyee, nu diꞌna nuu niꞌi nu d̶eꞌe nu doko xiꞌi nu san ti ío d̶aꞌa nu. 30 San nu ku uu ío nu xiꞌin dii ni ñadeꞌe yukua. 31 San nu ku uni ío nu xiꞌin ñadeꞌe yukua tuku san ndii usa nu ío xiꞌin ña doko ndii usa nu xiꞌi san ti ío d̶aꞌayee nu xiꞌin ña. 32 San danduu xiꞌi ñadeꞌe kuan. 33 San kii na nandoto ndii, andu kuu tsa koo xiꞌin ña tuda, kuan ndi usa nu ío xiꞌin ña?
34 Danduu sadaa Jesús:
—Ñuyii yaꞌa ñadeꞌe xiꞌin tsie tandaꞌa; 35 Doko nu na kachi Ndios sa nakoo ñuyii vaxi san kuani nudeꞌe adi nuyee ma koo ka sa tandaꞌa. 36 Kuan ma kada ka sa kuu nu, kuan ku kuu nu kuenta ángel, san kuu nu d̶aꞌa Ndios, kuan niꞌi nu sa nandoto nu. 37 Ntsandeꞌe Moisés nakani sa nandoto ndidaa ndii kii nakani tsa sa táꞌan yuku ndikodo sa xiko san danani ñaꞌan tsa xi ia kuu ku Toꞌo ndo Ndios chiñuꞌu Abraham, Isaac xiꞌin Jacob. 38 Kuan Ndios ti kuu ia Ndios ndidaa ndii, kuu ia Ndios ñayii nchito; kuan ndidaa ñayii nchito xi Ndios.
39 San sadaa uu tsa dadana ñaꞌan ley:
—Toꞌo, guaꞌa ntseꞌe kachi ni.
40 San ti kuyee ka tsa san ndukutoꞌon tsa.
Andu xayii xi kuu Mesías
41 San Jesús ndukutoꞌon ia:
—Naku kachi yo sa xayii rey David kuu Cristu? 42 Kuan rey David kachi tsa tutu yodotuni ndidaa Salmo:
Sadaa ia kuu ku Toꞌo ndo xi s-Toꞌo da:
“Kukoo ichi ku ndaꞌa kuaꞌa ntsu ya,
43 ntsaa na taxuku ntsu ndidaa nu xini-uꞌu ñaꞌan yo saꞌa yo.”
44 Tu rey David danani ñaꞌa tsa s-Toꞌo tsa xi Cristu, naku sani-ini sa kuu ia xayii rey David tuda?
Jesús da kuidokuachi ia ndidaa tsa dadana ñaꞌan ley
45 San nee ñuu nini, san sadaa ia xi ndidaa tsa nchiko ñaꞌan xi ia:
46 —Guaꞌa yo ndidaa yo xi ndidaa tsa dadana ñaꞌan ley, kuan taꞌan xanaa tsa sa kuiꞌno tsa doꞌno nani san nchoj s-tsa sa na kaꞌan guaꞌa ñayii s-tsa ndidaa jnu yaꞌvi san taꞌan xanaa tsa sa kuntsaku tsa s-titsayu tsa kunaꞌnu io jnu viko. 47 San oni dandeꞌe tsa sa io xi ndidaa ñakee san ndasa na kaꞌan guaꞌa ñayii s-tsa san naꞌa ntseꞌe xikataꞌvi tsa doko tsa yaꞌa kuaꞌa ntseꞌe ka taꞌan tsa.