Toꞌon dadaguataꞌan sa kuu ndidaa tsa xinokuachi ku ñayii kuiꞌia
12
San danduu kesaꞌa ia kaꞌan ia xi ndidaa ñayii en toꞌon dadaguataꞌan:—En tsayee choꞌon tsa yuku tinchiꞌio, chikorra tsa, kidaguaꞌa tsa en lagar sa kadaguaꞌa tsa vinu tinchiꞌio, kídaguaꞌa tsa en veꞌe duku sa kuntsaa tsa ndidaa.
Danduu dandoo tsa xi uu tsa na kadachiion san kuaꞌan xika tsa. 2 San taꞌan kii sa nakeꞌen tsa ndaa kuu xaꞌan tsa san tsandaꞌa tsa en tsa kidachiion nu tsa, sa nakiꞌin tsa ku na kaꞌntsa tsa san na nakeꞌen tsa ndaa ku xaꞌan s-toꞌo ñuꞌun. 3 Doko kuenta saa tsa kidachiion kuaan juan san ndidaa tsa yaꞌa teen ñaꞌan tsa, san kaniaꞌa tsa san naxikoneꞌe ñaꞌan tsa san nisadana ti na kuañaꞌan tsa. 4 San tsandaꞌa nituku tsa enka tsa kidachiion jnu tsa, doko kuenta saa tsa juan san ndidaa tsa yaꞌa kaniaꞌa nituku tsa san taꞌvi tsa d̶iki tsa yaꞌa san kantseꞌe tsa san naxikoneꞌe ñaꞌan tsa veꞌe. 5 San tsandaꞌa tsa enka tsa, doko kuenta saa tsa juan san ndidaa tsa yukua saꞌni ñaꞌan tsa xi tsa yaꞌa. Tsandaꞌa tsa kuaꞌa ntseꞌe tsa doko kuenta saa tsa juan san dagua tsa ndoꞌo san dagua tsa saꞌni tsa yaꞌa.
6 San ayoo ka en io sa tsandaꞌa tsa meni ka d̶aꞌa tsa nu nchoj ntseꞌe tsa, san tsandaꞌa ñaꞌan tsa tuku kuan kachi tsa: Kueniꞌno ñaꞌan nu ndidaa nu xi ku daꞌa ntsu. 7 Doko kuenta saa tsa juan san ndidaa tsa yaꞌa kachi tsa: Nu yaꞌa kuu nu kendoo xiꞌin ndidaa. Naꞌa nakaꞌni ndo nu tuku, ndasa na kendoo ndidaa jaꞌa ku ndo. 8 San teen ñaꞌan tsa san saꞌni ñaꞌan tsa san kineꞌen ñaꞌan tsa xiti ñuꞌun yukua.
9 Danduu ndukutoꞌon ia:
—Kani-ini ndidaa yo nasa kada s-toꞌo ñuꞌu kuaan xi ndidaa tsa duꞌua kida? Ndij s-tsa, san kaꞌni tsa ndidaa tsa yaꞌa san kuañaꞌan tsa xuꞌun tsa xi enka ñayii.
10 Ama nisa sa yodotuni kuaan ti kaꞌvi yo ña:
—Yuu ti nchoxi ndidaa tsa kídaguaꞌa veꞌe jaꞌa
kuu yuu jnu xi sa tastuni ñaꞌan xi ndidaa;
11 Jaꞌa kida tsa Toꞌo, san jaꞌa kuu sa vili ntseꞌe kaa xíni ndo ndidaa ndo?
12 San ndidaa tsa tastuni nchu teen ñaꞌan tsa xi ia, kuan xini tsa sa ndidaa toꞌon yaꞌa kaꞌan sa kuu mee tsa ndidaa tsa, doko yuꞌu tsa ndidaa ñayii. Juandiku dandoo ñaꞌan tsa san kunuꞌu tsa ndidaa tsa.
Sa ku sa chaꞌvi tuini
13 Danduu táꞌvichiion xi uu fariseu xiꞌin uu tsa taꞌan-ini ñaꞌan xi Herodes sa na kiꞌin tsa ku ntsaꞌa tsa tu na kaꞌan Jesús en toꞌon sa na dakuidokuachi ñaꞌan xi ia. 14 Kuenta saa tsa sa io Jesús san sadaa tsa:
—Maestru, xini da ndidaa da sa sa kaꞌan ni kuu sa guaꞌa, san ti ntsaꞌa ni nasa na kaꞌan ñayii, kuan ti ndekaj ni ñayii ñotaꞌan ni, san dadana ñaꞌan ni xichi Ndios. Guaꞌa ni sa chaꞌvi da sa saꞌa xuꞌun da xi César tsa io Roma kuan ña ñaꞌan? Chaꞌvi da tuini ña ñaꞌan?
15 Danduu xinituni ia sa ndidaa tsa yaꞌa xitotuni ñaꞌa tsa xi ia, juandiku sadaa ia:
—Naku xitotuni ñaꞌan yo ku ntsu? Taxi en tuini na ntsaꞌa ntsu.
16 Sañaꞌan tsa en tuini san sadaa ia:
—Andu jnu xi xiꞌin andu stoꞌon xi kuu sa yodotuni tuini yaꞌa?
San ndidaa tsa kachi:
— Xaꞌan César.
17 Danduu sadaa Jesús:
—Kuañaꞌan xi Cesar sa kuu xaꞌan Cesar, san kuañaꞌa xi Ndios sa kuu xaꞌan ia.
San sáni-ini ntseꞌe tsa ndidaa tsa kída sa naxiko neꞌe ia.
Jaꞌa dakuaꞌa ñaꞌan Jesús sa io nchisa sa nandoto ndidaa ndii
18 San danduu kixi uu saduceu sa io ia, ndidaa tsa xininchisa sa ti nandoto ndii, san ndukutoꞌon tsa san sadaa tsa:
19 —Maestru, tutu chidotuni Moisés kachi sa tu en nuyee io d̶eꞌe xi xiꞌi nu san kendoo kee d̶eꞌe nu san tu ti ío d̶aꞌa nu nduu nu, san xani ndii kuaan na nakoo xiꞌin ñadeꞌe yukua ndasa nakoo d̶aꞌa ña san na kunani nu kuenta inani xee ña tsa diꞌnanuu. 20 Ío usa ñani nuyee. Nu diꞌnanuu ío d̶eꞌe nu san xiꞌin nu san ti ío d̶aꞌa nu. 21 San ñadeꞌe nakoo ña xiꞌin xani nu xíꞌi kuan san ti ío d̶aꞌa nu xiꞌin ña. San duꞌua ni táꞌan xani ku uni nu. 22 San duꞌua ndi usa ñani nu ío xiꞌin ña san ti ío d̶aꞌa nu xiꞌin ña. San danduu xiꞌi ñadeꞌe. 23 Kii na nandoto ndi usa nu ío xiꞌin dini ñadeꞌe yukua, andu kuu nu koo xiꞌin ña?
24 Dandu sadaa Jesús:
—Yoꞌo ndidaa yo ti io ndaa yo kuan ti xini yo sa yodotuni san nisa ti xini yo sa naꞌnu kida Ndios? 25 Kuan ora nandoto ndidaa ndii, ma tandaꞌa ka nu kuan ku kuu nu naa ángel io andivi. 26 Doko nandoto nchisa ndidaa ndii, ama ti kaꞌvi yo ley, kuenta kaꞌan Ndios xiꞌin Moisés sa io yutu ndikodo xiko sa ti kayu kuan sadaa ia: Ntsuꞌu kuu Ndios chiñuꞌu Abraham, Ndios chiñuꞌu Isaac xiꞌin Ndios chiñuꞌu Jacob? 27 Duꞌua sadaa ia kuan Ndios ti kuu ia Ndios ndidaa ndii, kuu ia Ndios ndidaa ñayii nchito. Yoꞌo ndidaa yo ti xininchisa ndaa yo kuan ti xininchisa yo sa nandoto ndidaa ndii.
Jaꞌa dakuaꞌa ñaꞌan Jesús nasa kuu sa táꞌvichiion Ndios sa kada ndo
28 San kuyachi en ndidaa tsa dadana ñaꞌan ley sa io ia san tsaku s-tsa sa sadaa Jesús xi ndidaa tsa ndukutoꞌon xi ia, san ndukutoꞌon tsa:
—Na mandamientu kuu sa diꞌna nuu.
29 San sadaa Jesús:
—Diꞌna nuu mandamientu kuu: Ku nini, Israel: Tsa Toꞌo ku Ndios ndo, endini Ndios kuu ia. 30 San kada-ini ñaꞌan xi Ndios xiꞌin nee xanaa yo, xiꞌin nee x-alma yo, xiꞌin ndidaa sa xinituni yo xiꞌin ndidaa sa ntsee yo. 31 San sa ku uu ndee sa diꞌna nuu san jaꞌa kuu: Kada-ini ñaꞌan xi enka ñayii kuenta kida-ini yo mee yo. Atuu enka sa xaꞌvi ka xi sa táꞌvichiion ia sa kuxi nduu jaꞌa.
32 Danduu sadaa tsa dadana ñaꞌan ley:
—Guaꞌa ntseꞌe Maestru. Kaꞌan ndaa ni: Ndios eni kuu ia kuan ti io enka Ndios; 33 xiꞌin sa na kada-ini ndo ia xiꞌin nee ku kuanaa ndo xiꞌin nee ku alma ndo xiꞌin ndidaa sa xinituni ndo, xiꞌin ndidaa sa ndukuntsee ndo xiꞌin sa na kada ini ndo enka ñayii kuenta kidai-ni ndo mee ndo, xaꞌvi ntseꞌe ka jnu Ndios sa kuxi sa dakayu ndo sa nataꞌan xanaa Ndios xiꞌin sa doko ndo xi ia.
34 San xíni Jesús sa kaꞌan guaꞌa tsa yaꞌa san sadaa ia:
—Taꞌni ka kida sa yii yo sa tastuni Ndios ñayii.
San nisa en ka ñayii ti ndukutoꞌon xi ia.
Ami kee Mesías tsa tsandaꞌa Ndios sa kada sa nanitaꞌvi ndo
35 San neni dakuaꞌa ñaꞌan Jesús xiti templu, san ndukutoꞌon ia:
—Naku kachi ndidaa tsa dadana ñaꞌan ley sa Cristu tsa tsandaꞌa Ndios kuu tsa xayii Davi? 36 Kuan Espiritu Santu kída sa kaꞌan David, san kachi tsa:
Tsa Toꞌo sadaa tsa xi S-toꞌo da:
“Ku koo ichi ladu kuaꞌa ya
ntsa na taxuku ntsu ndidaa ñayii xini-uꞌu ñaꞌan xo saꞌa yo, sa tastuni ñaꞌan yo.”
37 Tu David danani ñaꞌan tsa s-Toꞌo tsa, naku kachi sa xayii tsa tuda. San kuaꞌa ntseꞌe ñayii nini xuku juan nataꞌan xanaa xi ndidaa.
Jesús da kuidokuachi ia ndidaa tsa dadana ñaꞌan ley
38 San Jesús sadaa ia:
—Guaꞌa yo xiꞌin sa kida ndidaa tsa dadana ñaꞌan ley, kuan ndidaa tsa taꞌan xanaa xi sa ndinoo tsa xiꞌin doꞌno nani san taꞌan xanaa tsa sa nakaꞌan nachi s-tsa ndidaa j-nuyaꞌvi, 39 san veꞌe sinagoga, taꞌan xanaa tsa sa kuntsaku tsa titsayu io ntsa jnu xi sa sakuntsaku ndidaa tsa kunaꞌnu san enka sa kuiꞌia kida tsa taꞌan xanaa tsa sa keñuꞌu tsa ndidaa viko. 40 San dita tsa ndidaa sa io xeꞌe ndidaa ñakee san ndasa na kaꞌan guaꞌa ñayii s-tsa san nantseꞌe xikataꞌvi tsa, juandiku ndidaa tsa yaꞌa kuaꞌa ntseꞌe ka taꞌán tsa.
Sa doko ñakee
41 En kii intsaku ia ndikeꞌe templu, jnu xi sa kee ndidaa sa doko san ntsaꞌa ia sa choꞌon ndidaa ñayii tuini san kuaꞌa ntseꞌe tsa kuika choꞌon tsa kuaꞌa ntseꞌe tuini, 42 san danduu saa en ñakee kundaꞌvi, san choꞌon ña ubi tuini cobre luchi sa ti xaꞌvi ntseꞌe xi. 43 San danduu kana ia ndi uxi-uu tsa nchiko ñaꞌan xi ia san sadaa ia: