Toꞌon dadaguataꞌan sa kuu viko tandaꞌa
22
Jesús kaꞌan ia san sadaa nituku ia enka toꞌon dadaguataꞌan, san kachi ia:2 —Sa tastuni Ndios ndidaa ñayii ndee sa kída en rey kída en viko tandaꞌa d̶aꞌa xi. 3 Tsandaꞌa tsa ndidaa tsa kidachiion jnu tsa ndasa na ku kana tsa ndidaa tsa kana ñaꞌan xi viko, doko ti nchu kiꞌin ndidaa tsa kana ñaꞌan xi. 4 San tsandaꞌa nituku tsa enka tsa kidachiion jnu tsa san sadaa tsa: “Kadaa xi ndidaa tsa kana ntsu: Vita kídaguaꞌa ntsu sa kaj ndo: Ku ndikutu ntsu xiꞌin ku kititata ntsu kiti ndada nduꞌu ntsu saꞌni ntsu, san sa io. Naꞌa viko ya.” 5 Doko ndidaa tsa kana tsa ti kida kasu, en tsa kuaꞌan sa io xuꞌun tsa, enka tsa kuaꞌan ku diko; 6 dagua ka tsa teen ñaꞌan tsa xi ndidaa tsa tsandaꞌa rey san kaꞌan kuiꞌia tsa san saꞌni ñaꞌan tsa s-tsa ndidaa tsa. 7 Kuenta niꞌi toꞌon rey sa duꞌua taꞌan san nadiko s-tsa, san tsandaꞌa tsa soldadu tsa san saꞌni tsa ndidaa ñayii saꞌni tsa kidachiion jnu rey san chiñuꞌu tsa xuun tsa yukua. 8 Danduu sadaa tsa xi tsa kidachiion jnu tsa: Ndidaa comida ya sa io doko ndidaa tsa kána ñaꞌan xi ti nitaꞌvi tsa sa kij s-tsa. 9 Kuaꞌan ndidaa ichi xika ntseꞌe ka ñayii san kana ñaꞌan viko yaꞌa xi ndidaa ñayii na naniꞌi taꞌan xiꞌin yo. 10 Ndidaa tsa kidachiion ya saꞌan tsa ndidaa ichi san na dataka tsa ndidaa tsa naniꞌi taꞌan xiꞌin tsa, ñayii guaꞌa xiꞌin ñayii kuiꞌia; san duꞌua veꞌe viko kuan chitu ñayii.
11 Doko kuyii rey san ntsaꞌa tsa ndidaa ñayii io xiti viko san xini tsa en tsayee ti niꞌno tsa doꞌno viko, 12 San sadaa tsa: “Yoꞌo kin, na modo kuyi yo jaꞌa, san ti niꞌno yo doꞌno viko?” Doko tsa yaꞌa ti xíni tsa nasa kadaa tsa. 13 Danduu rey sadaa tsa xi ndidaa tsa dakaa nduu: “Kiꞌni saꞌa nu xiꞌin ndaꞌa nu san dakana ñaꞌan sa naa io ndikeꞌe kuan; san juan kuu sa ndaꞌyu nu xiꞌin sa kada ruꞌu nuꞌu nu.”a 14 Kuan kuaꞌa ntseꞌe tsa kuu sa kana ñaꞌan xi, doko uu ni tsa kuu sa ndekaxaꞌan xi.
Sa kee yaꞌvi ndidaa sa io xi ñayii
15 San danduu kunuꞌu ndidaa fariseu san ndatoꞌon tsa ndidaa tsa, nasa kada tsa ndasa na kaꞌan Jesús en toꞌon na dakuidokuachi ñaꞌan xi ia. 16 San tsandaꞌa tsa uu fariseu xiꞌin ndidaa tsa kidachiion xi Herodes san sadaa tsa:
—Toꞌo, xini da sa kuu ni en tsa kaꞌan sa ndaa, san dadana ñaꞌan ni xichi Ndios xiꞌin sa ndaa san ti nduku ni sa kendoo guaꞌa ni jnu ñayii kuan ti ndekaj ni ñayii ñotaꞌan ni. 17 Juandiku kachitoꞌon ni, nasa sani-ini ni: Guaꞌani sa chaꞌvi da sa saꞌa xuꞌun da xi César tsa tastuni ñaꞌan ku ndo kuan ña ñaꞌan?
18 Doko Jesús sa xinituni ia nasa sani-ini tsa yaꞌa, kuan ndichiion ndukutoꞌon tsa ndasa na kuu dakuidokuachi ñaꞌan tsa, doko sadaa ia:
—Naku xitotuni ñaꞌan yo ku ntsu, ndidaa yoꞌo nu uu jnu xi? 19 Dana ñaꞌan en tuini sa chaꞌvi yo xi Cesar.
—Andu jnu xi xiꞌin nasa yodotuni tuini yaꞌa?
21 Sadaa tsa ndidaa tsa:
—Xaꞌan Cesar.
Danduu sadaa Jesús:
—Kuañaꞌan xi Cesar sa kuu xaꞌan Cesar, san kuañaꞌa xi Ndios sa kuu xaꞌan Ndios.
22 San tsaku s-tsa ndidaa tsa toꞌon yaꞌa, san oni sanaa tsa ndidaa tsa; san dandoo ñaꞌan tsa, san kunuꞌu tsa.
Duꞌua dakuaꞌa ñaꞌan Jesús sa sa ndaa kuu sa nandoto ndii
23 San dini kii yukua saꞌan uu saduceu tsa xininchisa sa ti nandoto ndidaa ndiib saꞌan tsa sa ntsaꞌa tsa Jesús. San ndukutoꞌon tsa:
24 —Toꞌo, Moisés chidotuni tsa: Tu en tsayee io deꞌe xi xíꞌi tsa san ti ío daꞌayee tsa, kachi sa na nakoo ña xiꞌin xani tsa ndasa nakoo d̶aꞌayee ña san na kunani nu kuenta inani ndii ndasa ma dana sa inani tsa.c 25 Ío usa ñani tsa ío jaꞌa. Tsa diꞌnanuu ío d̶eꞌe tsa san ti ío d̶aꞌayee tsa san xíꞌi tsa, danduu xani tsa nakoo xiꞌin ñadeꞌe kendoo kee. 26 Danduu xiꞌi xani tsa, tsa ku uu xiꞌin tsa ku uni, san ti ío d̶aꞌayee tsa xiꞌin ña duꞌua ni tsa ku usa. 27 San kuenta ndeꞌe ndidaa tsa yaꞌa san ti ío d̶aꞌayee tsa xiꞌin ña san danduu xiꞌi ñadeꞌe kuaan. 28 San ora na nandoto tsa ndidaa tsa, kuan ndidaa tsa ío xiꞌin ña, da tsa yaꞌa ndi usa tsa ku kuu xee ña kuan ndi usa tsa ío xiꞌin ña?
29 Danduu kaꞌan Jesús san sadaa ia:
—Ama ti kaꞌvi yo s-toꞌon Ndios kuan kuenta ti xini yo ndidaa sa kuu kida ia; 30 Kuan ma koo ka sa tandaꞌa san nisa tadeꞌe ma kuañaꞌan tsa d̶aꞌa tsa sa tandaꞌa nu, duꞌua kada ora na nandoto ndidaa ñayii, kuan ndee nu ndidaa ángel io andivi. 31 Kachitoꞌon ntsu sa sa ndaa kuu sa nandoto ndidaa ndii, ama ti kaꞌvi yo sa kachi Ndios kuenta kachi ia? 32 Ntsuꞌu kuu Ndios chiñuꞌu Abraham, Ndios chiñuꞌu Isaac xiꞌin Ndios chiñuꞌu Jacob.d Ndios ti kuu ia Ndios ndidaa ndii, kuu ia Ndios ndidaa ñayii nchito kuan ndidaa tsa yaꞌa nchito xi ia.
33 San tsaku xi ndidaa ñayii toꞌon yaꞌa san nataꞌan ntseꞌe xanaa tsa ndidaa tsa sa dakuaꞌa ñaꞌan ia.
Sa xaꞌvi ka xi sa xika Ndios sa kada ndo
34 Danduu ndidaa fariseu tsaku s-tsa sa sadi ndidaa saduceu xuꞌu tsa xiꞌin sa sadaa Jesús, san nataka tsa san ndatoꞌon tsa. 35 San en tsa xiniguaꞌa ley xítotuni ñaꞌan tsae xi ia, san ndukutoꞌon tsa:
36 —Toꞌo, daa ndidaa sa taꞌvichiion j-ley Ndios sa na kada ndo kuu sa xaꞌvi ka xi?
37 Jesús sadaa ia:
—“Kada-ini yo Ndios xiꞌin nee xanaa yo xiꞌin nee x-alma yo xiꞌin ndidaa sa xinituni yo xiꞌin ndidaa sa ndukuntsee yo.”f 38 Jaꞌa kuu sa kaꞌnu xiꞌin sa diꞌnanuu. 39 San sa ku uu kuu kuenta sa diꞌna nuu ya tuku: Kada-ini yo enka ñayii duꞌua kuenta kida ini yo mee yo.g 40 Nduu jaꞌa kuu xoꞌo ndidaa ley ia xiꞌin ndidaa sa chidotuni ndidaa x-profeta Ndios.
Duꞌua dadana ñaꞌan Jesús andu kuu xayii Cristu ia kida sa nanitaꞌvi
—Nasa sani-ini yo xi Cristu? Andu xayii xi ku kuu tsa?
San ndidaa tsa yaꞌa sadaa tsa:
—Xayii rey David kuu tsa.
43 San Jesús ndukutoꞌon ia:
—Naku David Espíritu kida sa duꞌua na kaꞌan tsa, san kachi tsa sa Cristu kuu S-toꞌo tsa tuda? kuan kachi tsa:
44 Sadaa Ndios ia kuu s-Toꞌo da xi s-Toꞌo da:
“Ku koo ichi ku ndaꞌa kuaꞌa ntsu
ntsa na taxuku ntsu ndidaa nu xini-uꞌu ñaꞌan yo saꞌa yo sa tastuni ñaꞌan yo”h
45 San tu rey David danani ñaꞌan tsa, s-Toꞌo tsa, naku kaꞌan sa kuu ia xayii tsa tuda?
46 Nisa en tsa ti káchi naxikoneꞌe kuani en toꞌon, san nisa en ka tsa ti ndukutoꞌon ntsa kii yukua.