Ñakee ndaꞌa kundaꞌvi ntseꞌe
21
San ntsaꞌa ia san xini ia sa kuaꞌa ntseꞌe tsa kuika choꞌon tuini caja sa kee tuini. 2 San xíni ia en ñakee kundaꞌvi chóꞌon ña ubi tuini yiki. 3 Danduu kachi ia:—Kachitoꞌon ndaa da ni san ñakee kundaꞌvi yaꞌa chóꞌon ña vaaka sa kuxi ndidaa ka ñayii 4 Kuan ndidaa ñayii choꞌon sa kendoo xi; doko ña yaꞌa, choꞌon ña ndidaa sa io xan.
Jesús kaꞌan ia sa natani templu
5 San uu tsa ndatoꞌon sa ntseꞌe da guaꞌa kuguaꞌa templu xiꞌin ntseꞌe da vili dakastaꞌan tsa ndidaa tsa yuu, sadaa Jesús xi:
6 —Ndidaa sa ntsaꞌa yo xan ndidaa yo kixi kii sa ma kendoo yuu sata enka yuu sa ma natani.
Nasa koo diꞌnaka sa kixi sa ndeꞌe ñuyii
7 Danduu ndukutoꞌon tsa xi ia, san sadaa tsa:
—Toꞌo, na kii taꞌan ndidaa jaꞌa? Na modo kinituni da ndidaa da kii sa io sa taꞌan?
8 Dandu Jesús sadaa ia:
—Guaꞌa yo kuan na en dandaa ñaꞌan yo, kuan kixi kuaꞌa ntseꞌe nu kachi sa ntsuꞌu kuu nu san kachi nu: “Ntsuꞌu kuu Cristu tsandaꞌa Ndios sa kada sa nanitaꞌvi”; San “sa kuyachi kii” doko ma kunchiko ñaꞌan yo nu kiꞌin. 9 Tu na tsaku yo sa naa ñayii xiꞌin sa saꞌni taꞌan san ma yuꞌu yo, kuan jaꞌa nchoxi sa taꞌan diꞌna ka doko vita ñaꞌan ka saa san ndeꞌe ndidaa.
10 Danduu sadaa ia:
—En ñuu naa xiꞌin enka ñuu san en país xiꞌin enka país. 11 Koo sa kanda niꞌi ntseꞌe, koo doko xiꞌin kueꞌe kuaꞌa ntseꞌe ñuu. Kixi sa dayuꞌu ñaꞌan ntseꞌe xiꞌin kuaꞌa ntseꞌe sa danaꞌa andivi.
12 Doko antika sa taꞌan ndidaa jaꞌa san yoꞌo ndidaa yo teen ñaꞌan tsa yo san nanduku ñaꞌan tsa yo san kiꞌin tsa ku kaniaꞌa tsa yo xiti veꞌe sinagoga san chiꞌiñaꞌan tsa vekaa san kuntsaka ñaꞌan tsa jnu ndidaa rey xiꞌin ndidaa gobernador yo sa saꞌa sa xininchisa ñaꞌan yo ku ntsu. 13 San duꞌua kuu kaꞌan yo s-tsa sa kuu ntsu. 14 Ma kani-ini yo na toꞌon kaꞌan yo sa tavi yo mee yo. 15 Kuan ntsuꞌu taj ntsu toꞌon guaꞌa sa nisa en tsa xini uꞌu-ñaꞌa yo kuu naxikoneꞌe xiꞌin ma ku yakui tsa. 16 Ntsa ndeꞌe s-tata yo diko ñaꞌan yo, xani yo, ndidaa xayii yo xiꞌin nu mani xiꞌin yo san dagua yo kaꞌni nu. 17 San nee ñuyii kini uꞌu-ñaꞌa yo kuan xininchisa ñaꞌan yo ku ntsu, 18 doko nisa en idi d̶iki yo xan ma kuita. 19 Tu na kuindaa yo san kadanar x-alma yo.
20 Doko ora na kini yo Jerusalén san oni chikorra ejercito san kunaꞌa sa sa io sa ndeꞌe. 21 San ndidaa nu io Judea na kono nu ichi yuku san nu io dagua dagua ñuu na kee nu juan san nu io yuku ma nuꞌu nu ñuu. 22 Kuan kii yaꞌa ku kii nachaꞌvi ndasa na xinotaꞌan sa yodotuni. 23 ¡Ndaꞌvi ndidaa ñadeꞌe ñoꞌon daꞌa kii yukua adi ña dakadi daꞌyiki! Kuan koo kuaꞌa ntseꞌe sa uꞌu ñuu yukua xiꞌin kuaꞌa ntseꞌe sa kuiꞌia koo. 24 Dagua nu kaꞌni ñaꞌan xiꞌin espada jnu san dagua nu kuntsaka ñaꞌan kiꞌin ndidaa ñuu sa taꞌan nu san ndidaa ñayii ti ku Israel kuañuniꞌno ñaꞌan xi ñuu Jerusalén ntsa na xinotaꞌan x-kii ndidaa tsayaꞌa.
Kii ndixi ia nduu ñayii ñuyii yaꞌa
25 Danduu koo señal jnu ora, jnu yoo xiꞌin chodini; san nuꞌu ya ndidaa ñayii yuꞌu xiꞌin ma kini ka nasa kada sa tsaku sa kuiꞌia ntseꞌe neꞌe ndutsa mar kuan xiꞌin ndidaa x-ola xi. 26 San ndidaa ñayii yuꞌu ntseꞌe san oni konaa xi sa kani-ini sa taꞌan ñuyii ya kuan ntsa deꞌe ndidaa sa io andivi kanda kii yukua. 27 Dandu kini yo ia nduu ñayii ñuyii yaꞌa ndij nu xiti en viko xiꞌin sa sandutsa xiꞌin sa tastuni. 28 San kii na kesaꞌa sa duꞌua taꞌán, san kuin daa san ndaneꞌe jnu yo ichi nino kuan kii nanitaꞌvi yo sa kuyachi.
29 San sadaa ia en toꞌon dadaguataꞌan:
—Ntsaꞌa tu tichikaꞌakuxi xiꞌin ndidaa ka yutu xan. 30 Ora xini yo sa nduyutsa, xini yo sa sa kuyachi sa ndixi davi. 31 Duꞌua yoꞌo ndidaa yo tuku tu nakini yo ndidaa jaꞌa san keꞌe d̶iki yo sa sa tastuni Ndios ñayii sa kuyachi.
32 Kachitoꞌon ndaa ntsu yo, sa ndidaa jaꞌa taꞌan ndidaa ñayii tiempu yaꞌa. 33 Nuꞌu ya xiꞌin andivi ya ndeꞌe, doko ku toꞌon ntsu ma ndeꞌe.
34 Guaꞌa yo kuan na kada nduu ntsee xanaa yo sa saꞌa ndidaa sa io ñuyii yaꞌa, sa kuu sa naxini xiꞌin sa sani-ini sa koo xi ñuyii yaꞌa, kuan kii yukua kixi kii ti en yeꞌe d̶iki xi. 35 Kikii ni kixi ndidaa sa kuiꞌia yaꞌa, sa taꞌan ndidaa ñayii tiempu yaꞌa. 36 Keꞌe d̶iki yo ndidaa yo ndikii san kakataꞌvi, kuan naniꞌi kono yo sa ma taꞌan yo ndidaa sa taꞌan ya xiꞌin ndasa na niꞌi kiꞌin yo jnu ia nduu ñayii ñuyii yaꞌa.