Ndatoꞌon tsa ndidaa tsa sa teen tsa Jesús
22
San kuyachi kii viko nani pascua sa xu kaj s-tsa ita-stila sa ti sa keꞌe levadura. 2 San ndidaa dutu kunaꞌnu xiꞌin tsa dadana ñaꞌan ley nduku tsa sa kaꞌni tsa Jesús doko yúꞌu tsa ñuu.3 Danduu sakakuiꞌia kuyii xanaa Judas tsa nani Iscariote en ndi uxi-uu tsa nchiko ñaꞌan xi ia, 4 san saꞌan tsa sa kaꞌan tsa xi dutu kunaꞌnu xiꞌin soldadu, tsa kunaꞌnu ntsaa templu sa nakuañaꞌan tsa Jesús. 5 San ndidaa tsa yaꞌa ku-iꞌni tsa san ndatoꞌon tsa sa kuañaꞌan tsa tuini xi Judas. 6 San Judas sen-oon tsa san nduku ichi tsa sa nakuañaꞌan tsa Jesús san ma en ñayii ñuu kuan kini.
Duꞌua taꞌan kuenta saj dini Jesús xiꞌin ndidaa tsa nchiko ñaꞌan xi ia
7 Sa kii saxi ndidaa ñayii Israel ita-stila ti sakeꞌe levadura xiꞌin kii saꞌni tsa corderu pascua, 8 Jesús tsandaꞌa ia Pedru xiꞌin Juan san sadaa ia:
—Kuaꞌan ku kadaguaꞌa sa nakaj dini ndo viko pascua.
9 San tsa yaꞌa nduu tsa ndukutoꞌon tsa xi ia:
—Ami nchoj ni sa na kadaguaꞌa da nduu da?
10 San Jesús sadaa ia:
—Saa yo nduu yo ñuu san naniꞌi yo en tsayee neꞌe tsa en yoo ndutsa, kunchiko ñaꞌan s-tsa kuaꞌa ntsa veꞌe nana yii tsa. 11 San kada xi s-toꞌo veꞌe: “Ku Toꞌo ndo kachi tsa: Ami kuntsaku ntsu kaj ntsu pascua xiꞌin ndidaa nu nchiko ñaꞌan kuntsu ya?” 12 San tsa yaꞌa dadana ñaꞌan tsa xiti veꞌe ntsaa nino san kaꞌnu san juan kadaguaꞌa sa na kaj dini ndo.
13 San saꞌan tsa yaꞌa nduu tsa sa naniꞌi tsa kuenta sadaa Jesús; san juan kídaguaꞌa tsa sa kaj dini tsa ndidaa tsa viko Pascua.
14 San saa ora, san Jesús xiꞌin ndi uxi-uu tsa nchiko ñaꞌan xi ia kukoo tsa ndidaa tsa. 15 San Jesús sadaa ia:
—Naku ntseꞌe da nchoj ntsu sa kaj ntsu Pascua ya xiꞌin yo ndidaa yo antika sa ndeꞌe ntsu. 16 Kuan kachi ntsu yo san ma kax ka ntsu ntsaa na kaj nituku ntsu sa tastuni Ndios ñayii.
17 Danduu teen ia copa san sañaꞌan ia taxaꞌvi xi Ndios san sadaa ia:
—Koꞌo san kuañaꞌan xi ndidaa ka nu xan, 18 kuan kachi ntsu yo sa ma koꞌo ka ntsu vinu tinchiꞌio ya ntsa na saa sa tastuni Ndios ñayii.
19 Dandu teen ia ita-stila san sañaꞌan ia taxaꞌvi xi Ndios san taꞌvi ia san sañaꞌan ia san sadaa ia:
—Jaꞌa kuu ku kikikoño ntsu sa kiꞌin sa kuu sa saꞌa yo. Kada jaꞌa san nakaꞌan sa kída ntsu sa saꞌa yo ndidaa yo.
20 San duꞌua ni kída ia xiꞌin copa kuenta tuꞌu sáxi ia san sadaa ia:
—Jaꞌa kuu ku niñi ntsu sa kee sa saꞌa yo san jaꞌa kuu tratu saa sa sadaa ia xi xuun ia.
21 Doko ndaꞌa nu na chiñaꞌan kuntsu ndaꞌa ndidaa tsa xini uꞌu ñaꞌan kuntsu io xiꞌin ku ndaꞌa ntsu ya jaꞌa 22 Kuan ia nduu ñayii ñuyii yaꞌa yaꞌia nu ichi kachi Ndios sa kiꞌin nu, doko ¡ndaꞌvi nu na nachiꞌi ñaꞌan jnu ndaꞌa ndidaa ñayii juera!
23 San kesaꞌa ndidaa tsa yaꞌa ndukutoꞌon tsa ndidaa mee tsa andu ku tsa duꞌua kada ya.
Andu kuu sa kunaꞌnu
—j-rey ndidaa ñayii juera tastuni tsa san kunaꞌnu ntseꞌe tsa xuun tsa, san ndidaa tsa kunaꞌnu kaꞌan tsa sa kida tsa sa guaꞌa. 26 Doko yoꞌo ma duꞌua ku kuu yo, guaꞌa ka nu na kunaꞌnu na ku kuu nu naa en nu ku luchi ka san nu taꞌvichiion na ku kuu nu naa en nu xinokuachi. 27 Kuan andu kuu sa kaꞌnu ka, nu sakuntsaku saxi ña nu xinokuachi? Adi nu sa kuntsaku saxi kuan ña? san ntsuꞌu io ntsu naa nu xinokuachi.
28 San yoꞌo ndidaa yo kuu nu intsaka taꞌan xiꞌin ntsu ndidaa kii xitotuni ñaꞌan ku ntsu 29 Juandiku ntsuꞌu taj ntsu sa tastuni yo kuenta ku tata ntsu taj s-tsa ku ntsu; 30 san sa tastuni ntsu koꞌo yo kaj yo jnu ku mesa ntsu san kuntsaku yo sa kaꞌntsa yo kuachi xi ndi uxi-uu tribu Israel.
Jesús sadaa ia xi Pedru sa kada naꞌntsa tsa sa ti xini ñaꞌan tsa xi Jesús
31 San duꞌua kachi Jesús:
—Simón, Simón, ntsaꞌa sa sakakuiꞌia xíka ñaꞌan yo sa kidiniꞌno ñaꞌan yo naa trigu. 32 Doko ntsuꞌu xikataꞌvi ntsu sa saꞌa yo ndasa ma dana yo sa xininchisa ñaꞌan yo ku ntsu san kii na naxikokagua yo sa io ntsu san chintsee ñaꞌan xi ndidaa ka xani yo ya sa na kuin ndaa nu xiꞌin sa xininchisa ñaꞌan nu ku ntsu.
33 San Simón kachi tsa:
—Toꞌo, ti nayuꞌu da sa kiꞌin da xiꞌin ni tu vekaa ña sa kuu da xiꞌin ni.
34 Doko Jesús sadaa ia:
—Pedru kachi ntsu yo sa ma kana liꞌi ntsaa na kada naꞌntsa yo sa ti xini ñaꞌan yo kuntsu uni guelta.
Kuyachi ora sa kototuni ñaꞌan
35 San sadaa Jesús xi ndi uxi-uu tsa nchiko ñaꞌan xi ia:
—Kii tsandaꞌa ñaꞌan ntsu sa na kiꞌin yo ku dadana ñaꞌan yo ndidaa yo ti neꞌe yo tuini san nisa ñono san nisa nchisa san nandeꞌe sa nandeꞌe xo ña?
San sadaa tsa yaꞌa ndidaa tsa:
—Ñaꞌan nisadana.
36 San sadaa ia:
—Doko vita andu io s-tuini xi san na kuneꞌe, san andu io xono xi san na kuneꞌe tuku san andu ti io x-espada xi san na diko doo xi san na kueen en. 37 Kuan kachi ntsu yo sa nandeꞌe sa xinotaꞌan sa yodotuni s-tutu ii Ndios sa taꞌan ntsu kuan duꞌua kachi: san kaꞌvi ñaꞌan s-tsa na en ndidaa tsa kuiꞌia, san ndidaa sa yodotuni sa taꞌan ntsu taꞌan.
38 San tsa yaꞌa sadaa tsa ndidaa tsa:
—Toꞌo, adi ubi espada yaꞌa.
San Jesús sadaa ia: Tuꞌu sa io.
Jesús xikataꞌvi ia xiti laguerta nani Getsemani
39 San tuꞌu kaꞌan Jesús san kee ia kuaꞌan ia yuku duꞌua ni xu kiꞌin ia tinduu nani Olivos san ndidaa tsa nchiko ñaꞌan xi ia nchiko ñaꞌan tsa ndidaa tsa kuaꞌan. 40 San saa ia tinduu yukua san sadaa ia xi ndidaa tsa yaꞌa:
—Kakataꞌvi kuan na kototuni ñaꞌan xo.
41 San kee deen ia ndaa saa en yuu dakana ñayii, san sakuinxiti ia san kesaꞌa ia kaꞌan ia xi Ndios 42 san kachi ia:
—Taa, tu nchoj ni san dita ni copa ugua sa taꞌan da ya; doko ma kada sa nchoj mee da na kada sa nchoj mee ni.
43 Danduu nanuu en ángel kee andivi, sa kuañaꞌan toꞌon kaꞌnu-ini xi ia. 44 San taꞌan ntseꞌe ia neni xikataꞌvi ia. San s-teen ia kuu na gota niñi naꞌnu ntseꞌe koꞌio ntsa nuꞌu.
45 San tuꞌu xíkataꞌvi ia san kunuꞌu ia sa io ndidaa tsa nchiko ñaꞌan xi ia san nani ñaꞌan ia s-tsa yaꞌa ndidaa tsa xidi tsa kuan ndaꞌvi ntseꞌe io xanaa tsa ndidaa tsa. 46 San sadaa ia:
—Naku xidi yo? Ndukoo san kakataꞌvi kuan na kototuni ñaꞌan sa kuiꞌia xo san kada yo kuachi.
Duꞌua taꞌan kuenta teen ñaꞌan tsa ndidaa tsa xi Jesús
47 San neni kaꞌan daa ia san saa kuaꞌa ntseꞌe ñayii san tsa nani Judas en tsa xu kunchiko ñaꞌan xi ia ndodo nu tsa jnu ndidaa ñayii yaꞌa, san tuꞌua ñaꞌan tsa san tsayuꞌu tsa x-koño jnu Jesús. 48 San danduu Jesús sadaa ia:
—Judas, ama xiꞌin en besu na kuañaꞌan yo ia nduu ñayii ñuyii yaꞌa ña?
49 San ndidaa tsa xuku xiꞌin Jesús xíni tsa sa táꞌan ya san sadaa tsa:
—Toꞌo naa da xiꞌin espada ña?
50 San en tsa yaꞌa díti tsa d̶oꞌo ladu kuaꞌa en tsa xinokuachi jnu dutu kunaꞌnu. 51 San sadaa Jesús:
—¡Tuꞌu, kodaa nu!
San kukoꞌon ia d̶oꞌo tsa yaꞌa, san nduguaꞌa. 52 San sadaa ia xi ndidaa dutu kuu jnu xi, xiꞌin ndidaa tsa tastuni ñaꞌan xi ndidaa tsa ntsaa templu xiꞌin ndidaa tonisaꞌnu ku kuaka ñaꞌan xi ia:
—Naku vaj yo xiꞌin espada xiꞌin tunduku kuenta sa en ñaduꞌu vaj xo ki teen yo? 53 Ndidaa kii ío ntsu templu xiꞌin yo ndidaa yo, san ti kuyee yo teen ñaꞌan yo kuntsu. Doko ora yaꞌa ku hora kuu kada yo ndidaa jaꞌa, ora tastuni sakakuiꞌia.
Pedru kida naꞌntsa tsa sa ti xini ñaꞌan tsa xi Jesús
54 San teen ñaꞌan tsa xi ia san ntsaka ñaꞌan tsa xeꞌe dutu kunaꞌnu kuaꞌan, doko Pedru nchiko ñaꞌan tsa xika ni xika ni. 55 San tívi tsa ndidaa tsa ñuꞌu dagua dagua ndikeꞌe san kukoo tsa ndidaa tsa nakuidi tsa, Pedru kukoo tsa sa intsaku ndidaa tsa yaꞌa tuku. 56 San en ñadeꞌe xinokuachi xi dutu kuan, nakini ñaꞌan ña xi Pedru ya, san ntsaꞌa ñaꞌan ntseꞌe ña san kachi ña:
—¡Ñayee yaꞌa kuu en ña nchiko ñaꞌan xi Jesús!
57 Doko Pedru kída naꞌntsa tsa san sadaa tsa:
—ti xini ñaꞌan da s-tsa.
58 San yaꞌia ndaa en ora san nakini ñaꞌan enka tsayee san sadaa tsa:
—¡Yoꞌo kuu yo en nu yukua tuku!
Doko Pedru sadaa tsa:
—Ñaꞌan, adi da kuu.
59 San yaꞌia enka ora san enka tsa sadaa:
—Sa ndaa kuu sa nuyaꞌa kuu en nu yukua kuan kuu nu galileu.
60 Pedru sadaa tsa:
—Ti xini da nasa kuu sa kaꞌan ni. San neni kaꞌan daa tsa san kana liꞌi. 61 Danduu Jesús naxikokagua ia san ntsáꞌa ia Pedru danduu Pedru nakaꞌan tsa sa sadaa Jesús: “Antika sa kana liꞌi san sa kída naꞌntsa yo uni viaji sa ti xini ñaꞌan yo kuntsu.” 62 San kee Pedru ndikeꞌe san ndaꞌyu tsa kuan ta-uꞌu ntseꞌe tsa.
Sakuntsaa ñaꞌan tsa ndidaa tsa xi Jesús
63 San ndidaa tsa ntsaa ñaꞌan xi Jesús sakuntsaa ñaꞌan tsa xiꞌin kaniaꞌan tsa. 64 San xíꞌni tsa jnu ia san katu ñaꞌan tsa san sadaa tsa:
—¡Kachitoꞌon! Andu kániaꞌa yo?
65 San sakuntsaa ñaꞌan tsa xiꞌin sadaa tsa kuaꞌa ntseꞌe ka toꞌon kuiꞌia.
Sa ntsaka tsa ndidaa tsa Jesús jnu junta kaꞌnu
66 San kuenta yeꞌe, nataka ndidaa tonisaꞌnu xiꞌin ndidaa tsa dadana ñaꞌan ley san ntsaka ñaꞌan xi Jesús ya jnu ndidaa tsa yaꞌa, sa danaꞌma ñaꞌan tsa.
67 —Yoꞌo kuu Cristu ia kada sa nanitaꞌvi ñayii ña ¡Kachitoꞌon kuntsu ndidaa ntsu!
San Jesús sadaa ia:
—Tu na kachitoꞌon da jni sa ma kininchisa ni ndidaa ni. 68 San tu na ndukutoꞌon da jni san ma kachi naxikoneꞌe ni d̶a. 69 Doko vita san ia nduu ñayii ñuyii yaꞌa kuntsaku nu j-ladu kuaꞌa Ndios.
70 San ndidaa tsa sadaa:
—¡Aan! Yoꞌo ku D̶aꞌa Ndios ña?
San Jesús sadaa ia:
—Dini ndidaa ni kachi sa kuu da.
71 Danduu kachi tsa ndidaa tsa:
—Ti nandeꞌe ka sa nduku toꞌon ndo; kuan ndidaa ndo tsaku xi sakuiꞌia káꞌan nu xiꞌin xuꞌu nu.