Ndatoꞌon tsa ndidaa tsa nasa kada tsa sa teen tsa Jesús
14
Kida ka ubi kii sa ku kuu viko Pascua, sa kuu viko ita-stila ti sakeꞌe levadura. San ndidaa dutu kunaꞌnu xiꞌin ndidaa tsa dadana ñaꞌan ley nduku ichi tsa sa teen tsa Jesús xiꞌin sa naꞌntsa san duꞌua na niꞌi kaꞌni ñaꞌan tsa, 2 san dagua tsa kachi:—Ma kada ndo jaꞌa ndidaa kii viko ya kuan na kada naxikokagua ndidaa ñayii ñuu ya ku ndo.
En ñadeꞌe chido ndutsa tami d̶iki Jesús
3 Neni ío Jesús ñuu nani Betania, san ío ia xeꞌe Simón tsa tsaꞌyu niꞌno x-koño xi san ndádaguaꞌa ñaꞌan ia; san neni intsaku ia jnu mesa, saa en nudeꞌe san neꞌe nu en sa kuguaꞌa xiꞌin yuu san oni sandutsa san ñoꞌon ndutsatami nani nardu, san xaꞌvi ntseꞌe xi, san saꞌnu nu d̶uku xi san chido nu ndutsa tami kuan d̶iki ia. 4 Uu tsa intsaku juan nadiko s-tsa san ndatoꞌon tsa ndidaa tsa:
—Naku dativi nudeꞌe yaꞌa ndutsa tami yaꞌa? 5 Kuan guaꞌa ni niꞌi ndaa teyaꞌvi en ñayii uni cientu kii san chintsee ndidaa ñayii kundaꞌvi. San kaꞌan kuiꞌia tsa nudeꞌe.
6 Doko Jesús sadaa ia:
—Kodaa nu. Naku nadiko yo sa kida nu? Nu yaꞌa kida nu sa guaꞌa kuntsu. 7 Kuan ndikii koo nu kundaꞌvi xiꞌi yo ndidaa yo, san guaꞌani kada yo sa guaꞌa yukua nu; doko ntsuꞌu adi ndidaa kii koo ntsu xiꞌin yo ndidaa yo. 8 Nudeꞌe yaꞌa kída nu san kuu kada nu, kuan chido nu ndutsatami ku kikikoño ntsu antika sa yinduj ntsu. 9 Kachitoꞌon ndaa ntsu yo sa nee ñuyii ami kuu mee sa na kaꞌan toꞌonguaꞌa yaꞌa, sa kída nuyaꞌa kuvaa ndasa na nakaꞌan ñaꞌan ñayii nu.
Judas diko ñaꞌan tsa xi Jesús
10 San danduu Judas Iscariote, tsa ku en ndi uxi-uu tsa nchiko ñaꞌan xi ia, saꞌan tsa sa io dutu kunaꞌnu san sadaa tsa sa nakuañaꞌan tsa Jesús. 11 San ndidaa tsa yaꞌa tsaku s-tsa toꞌon yaꞌa, san ku-iꞌni tsa san sadaa tsa sa kuañaꞌan tsa tuini xi Judas. San Judas kesaꞌa tsa nduku ichi tsa sa nakuañaꞌan tsa Jesús xi ndidaa tsa yaꞌa.
Duꞌua taꞌan kii saj dini Jesús xiꞌin ndi uxi-uu tsa nchiko ñaꞌan xi ia antika sa ndeꞌe ia
12 Ndidaa kii viko ita-stila sa ti sakeꞌe levadura, kii saꞌni tsa corderu Pascua, sadaa ndi uxi-uu tsa nchiko ñaꞌan xi ia:
—Ami nchoj ni sa kadaguaꞌa da sa saj ndo sa kadakaꞌnu ndo viko Pascua.
13 San tsandaꞌa ñaꞌan ia xi ubi tsa nchiko ñaꞌan xi ia, san sadaa ia:
—Kuaꞌan ñuu yukua, san naniꞌi yo en tsayee san neꞌe tsa en yoo ndutsa. Kunchiko ñaꞌan s-tsa kuaꞌan, 14 san ami na nayii tsa, kadaa xi s-toꞌo veꞌe io juan: “Ku Maestru ndo kuaan kachi tsa: Ami io veꞌe sa kuntsaku ntsu kaj ntsu sa kuguaꞌa sa kadakaꞌnu ntsu viko Pascua xiꞌin ndi uxi-uu nu nchiko ñaꞌan ku ntsu ya?” 15 San dadana ñaꞌan tsa en veꞌe kaꞌnu ntseꞌe yo ntsa nino san sa io ndoo xiꞌin sa kukutu. San juan kadaguaꞌa sa na kaj dini ndo ndidaa ndo.
16 Kee nduu tsa nchiko ñaꞌan xi ia sa kuaꞌan tsa, san kuyii tsa ñuu, san naniꞌi tsa ndidaa sa sadaa ia san kídaguaꞌa tsa sa kaj dini tsa sa kadakaꞌnu tsa viko Pascua yukua.
17 San sa ñini saa ia xiꞌin ndi uxi-uu tsa nchiko ñaꞌan xi ia; 18 san intsaku tsa ndidaa tsa jnu mesa saj tsa san kachi Jesús:
—Kachitoꞌon ndaa ntsu sa en yoꞌo nu saxi xiꞌin ntsu, nachiꞌi ñaꞌan kuntsu ndaꞌa ndidaa tsa xini-uꞌu ñaꞌan kuntsu.
19 San danduu ndidaa tsa ta-uꞌu ntseꞌe san da en da en tsa ndukutoꞌon:
—Dan kuu ña?
20 San sadaa ia:
—Uxi uu yo san en yoꞌo kuu, nu na chotoo xita s-tila xi xiꞌin ntsu eni koꞌo. 21 Sa ndaa, ia nduu ñayii ñuyii yaꞌa, taꞌan nu kuenta yodotuni s-tutu ii Ndios sa taꞌan nu. Doko ndaꞌvi nu na nachiꞌi ñaꞌan ndaꞌa ndidaa tsa xini-uꞌu ñaꞌan nu. Guaꞌa tu ti kaku nu.
22 San neni saj s-tsa ndidaa tsa, san teen ia ita-stila san sañaꞌan ia taxaꞌvi xi Ndios, san sañaꞌan ia san sadaa ia:
—Teen, jaꞌa kuu ku kikikoño ntsu.
23 San teen ia copa san sañaꞌan ia taxaꞌvi xi Ndios san sañaꞌan ia s-tsa ndidaa tsa san ndidaa tsa xiꞌi. 24 San sadaa Jesús:
—Jaꞌa kuu ku niñi ntsu sa kuu tratu saa sa kachi Ndios sa kada ia xiꞌin yo ndidaa yo, ku niñi ntsu sa kee ndasa na ndoo x-kuachi kuaꞌa ntseꞌe ñayii. 25 Kachitoꞌon ndaa ntsu yo sa ma koꞌo ka ntsu vinu tinchiꞌio ya enka guelta, ntsa kii na koꞌo nituku ntsu vinu tinchiꞌio sa tastuni Ndios xanaa ñayii.
Jesús kaꞌan ia sa kada naꞌntsa Pedru sa xini ñaꞌan tsa xi ia
26 San tuꞌu xita ia en himno xiꞌin tsa ndidaa tsa, san kee ia xiꞌin tsa ndidaa tsa, san kuaꞌan ia tinduu nani Olivos xiꞌin tsa ndidaa tsa. 27 San danduu Jesús sadaa ia:
—Ndidaa yo dandoo ñaꞌan kuntsu vita, kuan duꞌua yodotuni s-tutu ii Ndios: “Kaꞌni ñaꞌan xi tsa sadi ndikachi san dana nuu taꞌan te ndidaa te.” 28 Doko diꞌna ka ntsu kiꞌin ntsaa Galilea sa kuj yo ndidaa yo san ntsa juan naniꞌi taꞌan ndo ndidaa ndo kii na nandoto ntsu.
29 Danduu Pedru sadaa tsa:
—Kuani ndidaa tsa yaꞌa na dandoo ñaꞌan tsa jni, doko dan ñaꞌan.
30 San Jesús sadaa ia:
—Kachitoꞌon ndaa ntsu yo sa vita, niñu vita, antika sa kana liꞌi ubi guelta, san yoꞌo sa kida naꞌntsa yo uni guelta sa ti xini ñaꞌan yo kuntsu.
31 Doko kaꞌan ni on tsa san kachi tsa:
—Kuani juan na kada sa na kuu da doko ma kaꞌan da sa ti xini ñaꞌan da ni.
San duꞌua ni kachi ndidaa ka tsa kuan tuku.
Jesús xikataꞌvi ia en laguerta nani Getsemani
32 Saa ia xiꞌin ndi uxi-uu tsa nchiko ñaꞌan xi ia ntsa Getsemaní, san sadaa ia s-tsa ndidaa tsa:
—Kuntsaku jaꞌa neni na kiꞌin ntsu ku kaꞌan ntsu xiꞌin Ndios.
33 San ntsaka ia Pedru, Jacobo xiꞌin Juan taꞌa ka ntsa jnu xi, san kesaꞌa xanaa ia taꞌan ntseꞌe. 34 San sadaa ia:
—Ndaꞌvi ntseꞌe io ku kuanaa ntsu, san tuj ntsu sa sa xiꞌi ntsu. Kendoo jaꞌa san kunchito.
35 San kuaꞌan ia en taꞌa ka kanduu san sa kuinxiti ia san kesaꞌa ia kaꞌan ia xi Ndios, san xíka ia sa tu guaꞌa ni na dita sa duꞌua taꞌán ia. 36 San kachi ia:
—Taa, ndidaa sa kuu kida ni san atuu sa ma kachi kada ni, dita ni copa ñoꞌon sa ugua sa kuu ndidaa sa taꞌan da, doko ma kada sa kachi mee da na kada sa kachi mee ni.
37 San naxikokagua ia san naniꞌi ñaꞌan ia xi ndi uni tsa yaꞌa xidi tsa, san sadaa ia xi Pedru:
—Simón, xidi yo ña, ti kachi ku nchito yo kuani en ora ña? 38 Kunchito san kakataꞌvi, kuan ii sa kikagua yo kuachi. Kuan espíritu yo ndidaa yo io listo sa kada sa nchoxi Ndios doko xikikoño yo ndidaa yo kuu sa ti yakui.
39 San kuaꞌan nituku ia san kaꞌan nituku ia xi Ndios san xíka ia dini sa xika ia. 40 San naxikokagua nituku ia, san naniꞌi ñaꞌan ia sa xidi tsa ndidaa tsa, kuan ndadi duꞌua nika nduchinuu tsa kida viaꞌna. San nisa ti xini tsa nasa kadaa tsa xi ia. 41 San naxikokagua ia guelta ku uni sa káꞌan ia xi Ndios san sadaa ia:
—Xidi daa yo ndidaa yo xiꞌin ndexavi daa yo ndidaa yo ña. Tuꞌu ndukoo. Kuan sa taꞌan ora sa nachiꞌi ñaꞌan ñayii kuntsu ndaꞌa ñayii xini-uꞌu ñaꞌan kuntsu. Kuan vita san ia nduu ñayii ñuyii yaꞌa nachiꞌi ñaꞌan nu ndaꞌa ndidaa ñayii kuiꞌia. 42 Ndukoo, na nuꞌu ndo, kuan sa kuyachi nu nachiꞌi ñaꞌan kuntsu ndaꞌa ndidaa ñayii io x-kuachi xi.
Duꞌua taꞌan kuenta teen ñaꞌan tsa ndidaa tsa xi Jesús san ntsaka ñaꞌan tsa kuaꞌan jnu ndidaa tsa tastuni
43 San neni kaꞌan daa ia, san saa Judas, en tsa ku ndi uxi-uu tsa nchiko ñaꞌan xi ia, san ntsaka tsa kuaꞌan ntseꞌe ñayii, san ndidaa ñayii yaꞌa neꞌe tsa espada xiꞌin tunduku. Kuan ndidaa tsa yaꞌa tsandaꞌa ndidaa dutu kunaꞌnu, ndidaa tsa dadana ñaꞌan ley xiꞌin ndidaa tsa nisaꞌnu. 44 San Judas ndátoꞌon tsa xiꞌin ndidaa tsa kuaꞌan xiꞌin tsa na modo nakuaꞌa ñaꞌan tsa Jesús:
—Tsa na tsayuꞌu da x-koño jnu xi tsa yukua teen ni san kiꞌni ñaꞌan kutu ni san kuntsaka ni tsa kiꞌin.
45 San saa tsa san tuꞌua ñaꞌa tsa san sadaa tsa:
—¡Kaꞌan da jni Maestru!
47 Doko en tsa io juan, kineꞌen tsa espada, san diti tsa d̶oꞌo en tsa kidachiion xi dutu kunaꞌnu. 48 San sadaa Jesús:
—Naku ñaduꞌu ku ntsu juandiku neꞌe yo tunduku xiꞌin espada sa teen ñaꞌan yo ku ntsu ña? 49 Ndikii ío ntsu jnu yo ndidaa yo xiti templu san ti teen ñaꞌan yo. Doko duꞌua nchoxi sa koo, ndasa na xinotaꞌan sa yodotuni s-tutu ii Ndios.
50 San danduu ndi uxi-uu tsa nchiko ñaꞌan xi ia, dandoo ñaꞌan tsa xi ia, san xíno tsa ndidaa tsa.
51 Doko en nuyee nchiko ñaꞌan xi ia san ñodaꞌa nu en titsaa nchiko nu ia; san teen ñaꞌan jnu tuku, 52 doko nuyaꞌa, kexioniꞌni nu san dandoo da nu titsaa sa io nchala kuaꞌan.
Danaꞌma ñaꞌan ndidaa tonisaꞌnu xi Jesús
53 Sa ntsaka tsa ndidaa tsa Jesús jnu dutu kunaꞌnu; san nataka ndidaa ka dutu, ndidaa tsa nisaꞌnu xiꞌin ndidaa tsa dadana ñaꞌan ley. 54 San Pedru xika nchiko ñaꞌan tsa saa ntsa ndieꞌe dutu kunaꞌnu, san intsaku tsa xiꞌin ndidaa tsa ntsaa veꞌe, tsa nakuidi jnu ñuꞌu ñoꞌon juan.
55 Ndidaa dutu kunaꞌnu xiꞌin ndidaa tsa io junta, nduku tsa en sa dakuidokuachi tsa Jesús, san duꞌua na dakuidokuachi ñaꞌan tsa sa na kaꞌni ñaꞌan ndidaa romanu kuan, doko ti naniꞌi tsa nisa en kuachi. 56 Kuan kuaꞌa ntseꞌe tsa kída naꞌntsa sa dakuidokuachi ñaꞌan xi ia, doko ndidaa sa naꞌntsa ti nanitaꞌan ndaa ndidaa. 57 Danduu ndukuin tsa uu tsa, sa dakuidokuachi tsa ia san kachi tsa:
58 —Ndidaa da tsaku xi sa kachi nu: Ntsuꞌu dakana ntsu templu sa kuguaꞌa xiꞌin ndaꞌa ñayii, san uni ni kii kadaguaꞌa ntsu enka san ma kuguaꞌa xiꞌin ndaꞌa ñayii.
59 San nisa duꞌua ti nanitaꞌan sa kida naꞌntsa ndidaa tsa yaꞌa.
60 Danduu dutu kunaꞌnu ndukuin tsa san ndukutoꞌon tsa xi Jesús san sadaa tsa:
—Tsaku xo ndidaa sa xidokuachi yo ya ña? natavi mee yo, kaꞌan kuani en toꞌon.
61 Doko ti kaꞌan ia, san nisadana ti sadaa ia, ndukutoꞌon nituku dutu kunaꞌnu san sadaa tsa:
—Yoꞌo kuu Cristu, ia kuu D̶aꞌa Ndios kuan ña?
62 Sadaa Jesús:
—Ntsuꞌu kuu. San kini yo ia nduu ñayii ñuyii yaꞌa kuntsaku nu ichi j-ladu kuaꞌa s-Tata nu san ndij nu xiti viko andivi.
63 San danduu dutu kunaꞌnu káchi tsa d̶oꞌno tsa san kachi tsa:
—Nasa ka kada ndo ñayii kaꞌan ndaa sa dakuidokuachi ndo nuyaꞌa sa na kuu nu. 64 Ndidaa ni tsaku xi sa kaꞌan kuiꞌia nu yaꞌa xi Ndios. Nasa kachi ni ndidaa ni?
San ndidaa tsa yaꞌa dakuidokuachi ñaꞌan tsa sa na kuu ia.
65 San dagua tsa kesaꞌa tsa tividen ñaꞌan tsa, san sadi tsa jnu ia san kaniaꞌa tsa, san sadaa tsa:
—¡Kachitoꞌon andu kaniaꞌa yo!
San ndidaa tsa ntsaa ñaꞌan kaniaꞌa tsa tuku.
Pedru kida naꞌntsa tsa sa ti xini ñaꞌan tsa xi Jesús
66 San neni duꞌua taꞌan ia, san Pedru io tsa tikoꞌo sa kuu ndikeꞌe xeꞌe dutu kunaꞌnu, san kíxi en ñadeꞌe kidachiion jnu dutu kunaꞌnu. 67 San xíni ña sa nakuidi Pedru, san ntsaꞌa ñaꞌan ña san kachi ña:
—Dini kuu en ña ndinoo xiꞌin Jesús io Nazaret kuaan tuku.
68 Doko kida naꞌntsa tsa san sadaa tsa:
—Ti xini ñaꞌan da s-tsa, san nisa ti xini da nasa kaꞌan ni.
San kee tsa ichi ndikeꞌe, san kana liꞌi. 69 San xíni ñaꞌan nituku ña xi Pedru, san sadaa nituku ña xi ndidaa tsa io juan:
—Ña yaꞌa kuu en ña nchiko ñaꞌan xi Jesús kuan tuku.
70 Doko kida naꞌntsa nituku Pedru. Sa nisa ti kuu naꞌa sa duꞌua sadaa tsa, danduu ndidaa tsa io jukua sadaa tsa xi Pedru:
—Sa ndaa sa yoꞌo kuu en nu yukua tuku kuan kuenta kaꞌan en galileu kaꞌan yo.
71 Doko Pedru kesaꞌa tsa kaꞌan kuiꞌia tsa san kesaꞌa tsa nachonaꞌa tsa Ndios:
—¡Ti xini da tsayee ndaa ni s-toꞌon xi ya!
72 San danduu kana nituku liꞌi guelta ku uu, san nakaꞌan Pedru ndidaa toꞌon sadaa Jesús: “Antika sa na kana liꞌi kuaan ubi viaji, yoꞌo sa kida naꞌntsa yo uni guelta sa ti xini ñaꞌan yo kuntsu.” San sáni-ini ntseꞌe tsa ndidaa toꞌon yaꞌa san kondaꞌyu ntseꞌe tsa.