Sa ntsaka ñaꞌan xi Jesús jnu Pilatu
15
San datsa ntseꞌe, tuꞌu kaꞌan ndidaa dutu kunaꞌnu xiꞌin ndidaa ñayii kunaꞌnu io ñuu Israel xiꞌin ndidaa tsa dadana ñaꞌan ley xiꞌin ndidaa tsa io junta, san xiꞌni tsa Jesús, san nachiꞌi ñaꞌan tsa ndaꞌa Poncio Pilatu, tsa kuu tsa tastuni. 2 San Pilatu ndukutoꞌon tsa:—Yoꞌo ku j-rey ndidaa ñayii Israel ya ña?
—Mee ni kachi.
3 Ndidaa dutu kunaꞌnu kuaꞌa ntseꞌe sa dakuidokuachi ñaꞌan tsa. 4 Doko Pilatu ndukutoꞌon nituku tsa san sadaa tsa:
—Ma kaꞌan yo nisadana ña? Ntsaꞌa ndidaa sa xidokuachi yo.
5 San nisa duꞌua ti kaꞌan Jesús, san juan kída sa sani-ini ntseꞌe Pilatu.
Duꞌua taꞌan kuenta táꞌvichiion Pilatu sa na katakaa ñaꞌan xi Jesús en cruz
6 San ndiden kuia viko pascua, xu dayaa Pilatu en ñayii yeꞌe vekaa, tsa na kaka ñuu. 7 San io en tsa nani Barrabás, yeꞌe tsa vekaa xiꞌin uu ka tsa kuiꞌia, tsa saꞌni ndii xiꞌin tsa naxikokagua xi gobiernu romanu. 8 San ndidaa ñayii ndukuin, san kesaꞌa tsa xika tsa sa na kineꞌen tsa en tsa yeꞌe vekaa, kuenta ni kida tsa. 9 Danduu Pilatu sadaa tsa:
—Nchoj xo sa dayaa ntsu j-rey yo ndidaa yo ya ña?
10 Duꞌua sadaa tsa kuan xini tsa sa sa kuadu kída sa dakuidokuachi ñaꞌan ndidaa dutu kunaꞌnu ya. 11 Doko ndidaa dutu kunaꞌnu kída tsa sa na kaꞌan ndidaa ñayii yaꞌa sa na dayaa tsa Barrabás. 12 San káꞌan nituku Pilatu san sadaa tsa:
—San nasa nchoj xo sa na kada ntsu xi nu danani yo j-rey yo ndidaa yo ya?
13 San kana nituku tsa ndidaa tsa:
—Katakaa ni nu cruz.
14 Danduu Pilatu sadaa tsa:
—Nasa kuu sa kuiꞌia kída nu?
Doko kána tsa ndidaa tsa niꞌi ntseꞌe ka:
—Katakaa ni nu cruz.
15 San guaꞌa ni sa Pilatu nchu kendoo guaꞌa tsa xiꞌin ñuu, san dayaa tsa Barrabás san tuꞌu kaniaꞌa tsa xi Jesús san nakua ñaꞌan tsa ia, ndasa na katakaa ñaꞌan tsa cruz xi ia.
16 Danduu ndidaa soldadu ntsaka ñaꞌan tsa kuaꞌan ndikeꞌe san nadataka tsa ndidaa ka soldadu. 17 San dakuiꞌno ñaꞌan tsa doꞌno púrpura, san sakindodo tsa d̶iki ia en yetu iñu 18 san danduu kesaꞌa tsa sakuntsaa ñaꞌan tsa, san kachi tsa:
—¡Na kukaꞌnu j-rey ndidaa ñayii Israel ya!
19 San xiꞌin en ndoo kani tsa d̶iki ia, san tivi deen ñaꞌan tsa san sakuinxiti tsa jnu ia san chiñuꞌu ñaꞌan tsa xi ia doko sakuntsaa ñaꞌan tsa. 20 San tuꞌu sakuntsaa ñaꞌan tsa ndidaa tsa xi ia, san dita tsa doꞌno púrpura san nadakuiꞌno ñaꞌan tsa d̶oꞌno ia. San danduu kineꞌen ñaꞌan tsa sa katakaa ñaꞌan tsa cruz.
Sata kaa tsa Jesús en cruz
21 Neni niꞌno ichi tsa sa ku katakaa ñaꞌan tsa, san en tsayee dika ndee tsa yuku, en tsa nani Simón io ñuu nani Cirene s-tata Alejandru xiꞌin Rufo, kida juerza ndidaa soldadu s-tsa sa na kuido tsa x-cruz Jesús.
22 San ntsaka ñaꞌan tsa en luguar nani Gólgota, sa nchu kachi luguar yiki d̶iki ndii. 23 San sañaꞌan tsa vinu tinchiꞌio dakataꞌan xiꞌin mirra, doko ti nchu koꞌo ia. 24 San satakaa ñaꞌan tsa cruz san nakaꞌntsa tsa d̶oꞌno ia, san choꞌon tsa suerte tu andu na kendoo xiꞌin.
25 San ka én datsa satakaa ñaꞌan tsa cruz xi ia. 26 San sakintsaa tsa en letreru d̶iki ia sa xidokuachi ia, sa kachi: “j-Rey ndidaa judiu.” 27 San satakaa tsa ubi ñaduꞌu kuenta satakaa ñaꞌan xi ia, en cruz ichi ladu kuaꞌa san enka cruz ichi ladu ichi. 28 San xínotaꞌan sa yodotuni s-tutu ii Ndios, sa kachi: San káꞌvi ñaꞌan jnu xiti ndidaa ñayii kuiꞌia.
29 San ndidaa tsa yaꞌia ichi yukua kaꞌan kuiꞌia tsa, san dakuiko d̶iki tsa san kachi tsa:
—Yoꞌo nu kachi sa dakana templu san uni ni kii ndadaguaꞌa yo, 30 kada sa na nanitaꞌvi yo san tinoo cruz xan.
31 San duꞌua ni sakuntsaa ñaꞌan ndidaa dutu kunaꞌnu xiꞌin ndidaa tsa dadana ñaꞌan ley san kachi tsa:
—Ndada guaꞌa nu enka ñayii doko ti kachi dandatsa nu mee nu. 32 Nu kachi sa kuu Cristu nu tsandaꞌa Ndios sa vaxi sa taxi ñuyii na noo nu cruz xan vita, nu kachi sa kuu ku rey ndo ndidaa ndo ndasa na kini ndo sa na kininchisa ndo. San ntsa ndeꞌe tsa nchitaka kaꞌan kuiꞌia xi ia tuku.
Xiꞌi Jesús
33 San kuu ndaa dagua kii, ku naa nee ñuyii ntsa ka uni sa ñini. 34 San ka uni sa ñini kána Jesús niꞌi ntseꞌe san kachi ia:
—Elí, Elí. Lama sabactani? Sa nchu kachi: Ndios da, Ndios da, naku dandoo ñaꞌan ni d̶a?
35 San tsaku xi ndidaa tsa xuku jukua san kachi tsa:
—Elías kana nu.
36 San en tsa io jukua xino tsa teen tsa en taꞌa esponja chotoo tsa vinagre, san chiten tsa d̶iki en ndoo san sañaꞌan tsa sa na koꞌo ia san sadaa ndidaa tsa xuku jukua:
—Kodaa nu na ntsaꞌa ndo tu na kixi Elías noneꞌe ñaꞌan tsa jnu.
37 Doko Jesús kána ia niꞌi ntseꞌe, san ndéꞌe ia. 38 San titsaa ntsadi dagua dagua xiti templu ndata dagua dagua ntsa nino xiꞌin ntsa nuꞌu. 39 San soldadu kuu naꞌnu tsa in jnu ia xíni tsa na modo ndeꞌe ia san kachi tsa:
—Sa ndaa nchisa tsa yaꞌa kuu D̶aꞌa Ndios.
40 San xika xuku uu ñadeꞌe san ntsaꞌa ña ndidaa sa taꞌan san j-naꞌma ndidaa ña yukua io ña nani María Magdalena, María j-nana Jacobo nu luchi ka sa kuxi José xiꞌin ña nani Salomé. 41 San nee ío Jesús Galilea ndidaa ña yaꞌa xu chintsee ñaꞌan ña xi ia xiꞌin kuaꞌa ka ña nchiko ñaꞌan xi ia saꞌan Jerusalén.
Chiduj xaꞌan xi Jesús
42 Sa ku ndaꞌvi, kii kidaguaꞌa ndidaa ñayii ñuu Israel sa kaj d̶ini tsa sábado, 43 saa José tsa káku ñuu nani Arimatea, kuu tsa en ñayii guaꞌa san io tsa en chiion kaꞌnu, tsa yaꞌa ntsatu tsa sa tastuni Ndios xanaa ndidaa ñayii, san saꞌan tsa sa ntsaꞌa tsa Pilatu san xíka tsa sa na kuañaꞌan Pilatu xikikoño Jesús. 44 San Pilatu kixi sa sani-ini tsa sa ntseꞌe da kama xiꞌi Jesús. San kána tsa soldadu ku naꞌnu, san ndukutoꞌon tsa tu sa xíꞌi nchisa Jesús. 45 San sadaa soldadu kunaꞌnu san xíꞌi ia, san danduu semani tsa san na nakeꞌen José xikikoño ia. 46 San tsa yaꞌa sa kuen tsa en titsaa kuixi san saꞌan tsa sa koneꞌe ñaꞌan tsa xi ia cruz, san naduku tsa ia xiꞌin titsaa san saꞌan tsa sa chiꞌiñaꞌan tsa xiti en yavi satsa tsa kagua. Danduu danchii tsa en yuu san nakadi tsa yavi. 47 María Magdalena xiꞌin María j-nana José xíni ña ami sa neꞌe tsa yikikoño.