Na chiꞌi tsa ndidaa tsa Jesús ndaꞌa Pilatu
27
Sa datsa ntseꞌe ndidaa dutu kunaꞌnu xiꞌin ndidaa ñayii kunaꞌnu io ñuu Israel ndatoꞌon tsa sa nakua ñaꞌan tsa Jesús sa na kaꞌni ñaꞌan xi ia. 2 San tuꞌu xíꞌni ñaꞌan tsa, san náchiñaꞌan tsa ndaꞌa Poncio Pilatu, tsa kuu tsa tastuni.Duꞌua taꞌan sa saꞌni Judas kuaan mee tsa
3 Danduu Judas, tsa náchiꞌi ñaꞌan xi Jesús ndaꞌa ndidaa tsa xini-uꞌu ñaꞌan xi ia, xíni tsa sa kaꞌni ñaꞌan xi Jesús, san ta-uꞌu ntseꞌe tsa san náxikoneꞌe tsa ndi oko uxi moneda plata xi ndidaa dutu kunaꞌnu xiꞌin ndidaa tsa nisaꞌnu, 4 san sadaa tsa:
—Dan kída da kuachi nataj d̶a jniñi ñayii atuu x-kuachi xi.
Doko tsa yaꞌa sadaa tsa ndidaa tsa:
—¡Nastuni ku ntsuꞌu. Juan ku x-kuachi mee yo!
5 Danduu tsa yaꞌa dákana tsa ndidaa tuini kuan ndikeꞌe templu, san kee tsa kuaꞌan tsa, san choꞌon dayu tsa mee tsa.
6 Ndidaa dutu kunaꞌnu, nákeꞌen tsa ndidaa moneda plata san kachi tsa:
—Ti guaꞌa sa nachoꞌon ndo xiti xi sa kee sa doko ndo, kuan xaꞌvi xi sa kaꞌni en ñayii kuu.
7 San ndatoꞌon tsa, san seen tsa xuꞌun tsa kidaguaꞌa kidi ñuꞌu, san juan yinduxi ndidaa ñayii ti ku ñuu yaꞌa. 8 Juandiku yuku yukua nani: Yuku niñi, ntsa kii vita.a 9 San duꞌua xínotaꞌan sa chidotuni Jeremías x-profeta Ndios, kuenta kachi tsa: “Téen tsa ndi oko uxi moneda plata, kuan duꞌua xika ndidaa ñayii io Israel; 10 san sañaꞌan tsa sa kuxi xuꞌun tsa kidaguaꞌa kidi ñuꞌu, kuan duꞌua táꞌvichiion tsa Toꞌo.”b
Jesús in ia jnu Pilatu
11 Jesús in ia jnu tsa tastuni, san ndukutoꞌon tsa san sadaa tsa:
—Yoꞌo kuu j-rey ndidaa ñayii ñuu Israel ya ña? San Jesús sadaa ia:
—Mee ni kachi.
12 San ndidaa sa dakuidokuachi ñaꞌan ndidaa dutu xiꞌin tsa nisaꞌnu, ti naxikoneꞌe Jesús nisa en toꞌon. 13 Danduu Pilatu sadaa tsa:
—Ti tsaku xo ndidaa sa dakuidokuachi ñaꞌan tsa ndidaa tsa xo ña?
14 San Jesús ti káꞌan ia nisa en toꞌon, san kíxi sa sani-ini tsa yaꞌa sa ti kaꞌan Jesús.
Xika tsa ndidaa tsa sa na katakaa ñaꞌan xi Jesús en cruz
15 Ndiden viko pascua, tsa tastuni xu dayaa tsa xi ñuu en tsa yeꞌe vekaa, andu na kaka ndidaa tsa yaꞌa. 16 San ntsaka tsa en tsa yeꞌe vekaa nani Barrabás, san kuaꞌa ntseꞌe ñayii xini ndidaa sa kuiꞌia xidokuachi Barrabás. 17 San kuaꞌa ntseꞌe ñayii nátaka, san Pilatu ndukutoꞌon tsa:
—Andu nchoj yo sa na dayaa ntsu? dayaa ntsu Barrabás ña Jesús tsa nani Cristu ya?
18 Duꞌua kachi tsa kuan xini tsa sa sa saꞌa sa kuadu juandiku nakua ñaꞌan ndidaa dutu kunaꞌnu kuan Jesús.
19 San neni intsaku tsa sa tastuni tsa, san d̶eꞌe tsa tsandaꞌa ña en tsa sadaa: “Ma kada ni nisadana xi ña xan kuan kuu ña ñayii guaꞌa kuan kuiꞌia ntseꞌe sáni da san yuꞌu ntseꞌe da.”
20 Neni ndidaa dutu xiꞌin ndidaa tsa nisaꞌnu chitoꞌon tsa d̶iki ndidaa ñayii yaꞌa sa na kaka tsa Barrabás san nakaꞌni tsa Jesús. 21 San kaꞌan tsa tastuni san sadaa tsa:
—Daa tsa yaꞌa nduu tsa nchoj ni sa na dayaa da?
san ndidaa tsa yaꞌa kachi tsa:
—¡Barrabás xan!
22 Pilatu sadaa tsa:
—Nasa kada da xiꞌin Jesús tsa nani Cristu ya tuda?
San ndidaa tsa yaꞌa kána tsa san kachi tsa:
—¡Katakaa ñaꞌan ni cruz s-tsa!
23 San tsa tastuni kachi tsa:
—Naku, nasa kuu sa kuiꞌia kída tsa yaꞌa?
Doko ndidaa tsa yaꞌa kána tsa niꞌi ntseꞌe ka san kachi tsa:
—¡Katakaa ñaꞌan ni cruz s-tsa!
24 San xíni Pilatu sa ti en ka tsa tsaku d̶oꞌo xi, kuan kana ni on tsa san kuiꞌia ntseꞌe kuu tsa, san Pilatu teen tsa ndutsa, san ndáꞌa tsac jnu ndidaa tsa yaꞌa san kachi tsa:
—¡Ntsuꞌu ti xidokuachi ntsu sa xiꞌi tsayee ndaa yaꞌa! ¡Jaꞌa nduu d̶iki mee yo ndidaa yo!
25 San kachi ndidaa ñayii yaꞌa:
—¡Sa xíꞌi tsa yaꞌa na kuidokuachi ndo xiꞌin ndidaa ku daꞌa ndo!
26 Danduu dayaa tsa Barrabás; san tuꞌu kaniaꞌa tsa xi Jesús, san nakuañaꞌan tsa ia sa na katakaa ñaꞌan xi ia.
27 Danduu ndidaa soldadu tsa tastuni ntsaka ñaꞌan tsa xi Jesús kuaꞌan veꞌe tastuni tsa, san na dataka tsa ndidaa ka soldadu, san nakuxuku tsa ndidaa tsa jnu ia. 28 San tuꞌu kineꞌen tsa d̶oꞌno ia, san chodaꞌa ñaꞌan tsa en titsaa kuaꞌa niñi xi Jesús, 29 san kídaguaꞌa tsa en yetu iñu san sakindodo tsa d̶iki Jesús, san ndaꞌa ia ichi ladu kuaꞌa chiꞌi tsa ndidaa tsa en ndoo. San sakuinxiti tsa jnu ia san sákuntsaa ñaꞌan tsa xi ia, san sadaa tsa:
—¡Na kukaꞌnu j-rey ndidaa ñayii ñuu Israel ya!
30 San tividen ñaꞌan tsa, san teen tsa ndoo san káni tsa d̶iki Jesús. 31 San tuꞌu sakuntsaa ñaꞌan tsa xi Jesús, díta tsa titsaa chodaꞌa ñaꞌan tsa, san nadakuiꞌno ñaꞌan tsa d̶oꞌno mee ia, san ntsaka ñaꞌan tsa sa katakaa ñaꞌan tsa xi ia.
Satakaa ñaꞌan tsa xi Jesús en cruz
32 San neni kee tsa, san naniꞌi tsa en tsayee nani Simón kuu ñuu nani Cirene. San táꞌvichiion tsa sa na kunchido tsa yaꞌa x-cruz Jesús.
33 San saa tsa luguar nani Gólgota, sa nchukachi: Luguar yiki d̶iki ndii, 34 san sañaꞌan tsa xi ia vinu tinchiꞌio dakataꞌan xiꞌin yuku ugua ntseꞌe; san xítotuni ia, sa ti nchu koꞌo ia.
35 Tuꞌu satakaa ñaꞌan tsa cruz, san nakaꞌntsa tsa s-titsaa ia, san chóꞌon tsa suerte andu na niꞌi.d Ndasa na xinotaꞌan sa kachi x-profeta Ndios: Chóꞌon nu suerte xiꞌin nákaꞌntsa nu ku doꞌno ntsu. 36 San sakuntsaku tsa ndidaa tsa, san ntsáꞌa ñaꞌan tsa. 37 San sákintsaa tsa en letreru d̶iki ia nasa xidokuachi ia, san kachi: “Tsa yaꞌa kuu Jesús, j-Rey ndidaa judiu.”
38 San sátakaa ñaꞌan tsa xi ia xiꞌin satakaa tsa ndidaa tsa ubi ñaduꞌu, en tsa ichi ladu kuaꞌa san enka tsa ichi ladu ichi. 39 San ndidaa ñayii yaꞌia ichukua sakuntsaa ñaꞌan xi Jesús, san oni dakuiko diki ñayii,e 40 san sadaa:
—Yoꞌo nu kachi sa dakana templu san uni kii ndadaguaꞌa yo,f ¡kada sa na nanitaꞌvi mee yo, tu kuu yo d̶aꞌa Ndios, san tinoo cruz xan!
41 San duꞌua ni ndidaa dutu kunaꞌnu, tsa dadana ñaꞌan ley xiꞌin ndidaa tsa nisaꞌnu sakuntsaa ñaꞌan, san kachi tsa:
42 —Tu kída nu sa nanitaꞌvi enka ñayii san na kada nu sa na nanitaꞌvi mee nu. Tu kuu nu ku rey ndo ndidaa ndo ¡San na noo nu cruz xan, san na kininchisa ñaꞌan ndo ndidaa ndo jnu! 43 Tu xininchisa nu Ndios. Na chintsee ñaꞌan ia jnu vita tu nchoxaꞌan ia jnu;g kuan kachi nu: Ntsuꞌu kuu D̶aꞌa Ndios.
44 San ntsandeꞌe ñaduꞌu nchitakaa enka cruz kuan duꞌua sadaa tuku.
Xíꞌi Jesús
45 San ntsa dagua kii xiꞌin ntsa ka uni sañini kunaa andivi. 46 San taꞌan ka uni sa ñini kána Jesús niꞌi ntseꞌe san kachi ia:
—Elí, Elí Lama sabactani? Sa nchu kachi: Ndios, Ndios, Naku dandoo ñaꞌan ni d̶a?h
47 San tsáku xi uu tsa io jukua, san kachi tsa:
—Tsa yaꞌa kana tsa Elías.
48 San kee kono en tsa io jukua, san téen tsa en esponja, san chído tsa vinagre, san chíten tsa en ndoo san sáñaꞌan tsa sa na koꞌo ia.i 49 Doko dagua ka tsa kachi:
—Kodaa, na ntsaꞌa ndo tu nakixi Elías noneꞌe ñaꞌan s-tsa.
50 Doko Jesús kána nituku ia niꞌi ntseꞌe, san nakua ñaꞌan ia x-espíritu ia san xíꞌi ia.
51 San ora yukua, titsaaj ntsadi xiti templu ndata dagua dagua, ntsa nino xiꞌin ntsaa nuꞌu. Nuꞌu kánda, san ndidaa kagua kuan ndáta. 52 Nákaan ndidaa yavi, san kuaꞌa ntseꞌe xikikoño ndidaa ñayii ndu ii jnu Ndios nandoto; 53 san kée tsa yavi doko jaꞌa taꞌan danduu kuenta nandoto Jesús, san saꞌan tsa ndidaa tsa ñuu ii kuu Jerusalén san kuaꞌa ñayii nánuu ñayii yaꞌa xi.
54 San centurión xiꞌin ndidaa tsa ntsaa xikikoño Jesús xíni tsa sa kánda ya xiꞌin ndidaa sa táꞌan ya, san yúꞌu ntseꞌe tsa san kachi tsa:
—¡Sa ndaa kuu sa tsa yaꞌa kuu D̶aꞌa Ndios!
55 San xika xuku kuaꞌa ntseꞌe ñadeꞌe ntsaꞌa ña, ndidaa ña yaꞌa inchikoñaꞌa xi Jesús ntsaa kée ia Galilea, kuan xu kuinokuachi ña xi ia. 56 San jaꞌa io ña nani María Magdalena, María j-nana Jacobo xiꞌin José, xiꞌin j-nana ndidaa d̶aꞌa Zebedeu.k
Chiduj xaꞌan xi Jesús
57 San sa kundaꞌvi kii yukua, kíxi en tsayee kuika io ñuu nani Arimatea nani tsa José, tsa kuu en tsa xu kunchiko ñaꞌan xi Jesús. 58 Tsa yaꞌa saꞌan tsa jnu Pilatu, san xíka tsa xikikoño Jesús. Danduu Pilatu táꞌvichiion tsa sa na na kuañaꞌan xikikoño Jesús xi tsa yaꞌa. 59 José noneꞌe tsa xikikoño ia, san naduku ñaꞌan tsa en titsaa kuixi, 60 san saꞌan tsa san chiꞌiñaꞌan tsa en yavi saa, sa káan tsa kagua. San danduu danchii tsa en yuu kaꞌnu ntseꞌe san nakadi tsa yavi, san kunuꞌu tsa. 61 San jukua intsaku María Magdalena xiꞌin enka María jnu yavi.
Duꞌua taꞌan ndidaa tsa ntsaa yavi
62 San nduu enka kii, kii yaꞌa kuu sábado, ndidaa dutu kunaꞌnu xiꞌin fariseu nátaka tsa jnu pilatu, 63 san sadaa tsa:
—Toꞌo, nakaꞌan da ndidaa da sa kii ío daa tsa naꞌntsa yaꞌa san kachi tsa sa ndu uni kii nandoto tsa.l 64 Taꞌvichiion ni sa nakiꞌin uu soldadu sa na kuntsaa yavi ntsa nayaꞌia ndi uni kii, kuan na kada kiꞌin ndidaa tsa nchiko ñaꞌan s-tsa san na duꞌu tsa ndii, san kadaa tsa xi ñuu ya: Sa Nandoto tsa. San sa naꞌntsa yaꞌa kuiꞌia ku kuu sa kuxi sa dika taꞌan ya.
65 Pilatu sadaa tsa:
—Adi soldadu kuntsaa io xan. Kuaꞌan san kada kutu sa xini yo kada yo.
66 Tsa yaꞌa saꞌan tsa ndidaa tsa, san tuꞌu saꞌa tsa sellu yuu kuan, kída kutu tsa yavi xiꞌin dandoo tsa soldadu na kuntsaa.