Ntsaka tsa ndidaa tsa Jesús kuaꞌan jnu Pilatu
23
San ndukuin tsa ndidaa tsa san ntsaka ñaꞌan tsa xi Jesús kuaꞌan jnu Pilatu tsa kuu en romanu tastuni. 2 San dakuidokuachi ñaꞌan tsa ndidaa tsa san sadaa tsa:—Naniꞌi da nuyaꞌa sa kaꞌan nu xi ñuu sa ma en chaꞌvi sa saꞌa xuꞌun xi xi Cesar san kachi nu sa kuu nu Cristu xiꞌin Rey.
3 San dandu ndukutoꞌon Pilatu:
—Yoꞌo ku j-Rey ndidaa ñayii Israel ya ña?
San sadaa Jesús:
—Mee ni kachi.
4 Pilatu sadaa tsa xi ndidaa dutu kunaꞌnu xiꞌin ndidaa ñayii nchiko ñaꞌan:
—Ti naniꞌi ntsu nisa en kuachi jnu yaꞌa.
5 Doko ndidaa tsa yaꞌa intsee ni tsa san sadaa tsa:
—Sa dadana ñaꞌan nu kida, san chiyutu ñaꞌan nu xi ndidaa ñayii io Judea ya san kesaꞌa nu ntsa Galilea xiꞌin ntsaa jaꞌa.
Ntsaka tsa ndidaa tsa Jesús kuaꞌan jnu Herodes
6 Danduu tsaku xi Pilatu ndidaa toꞌon yaꞌa sa ndukutoꞌon tsa tu ku ia galileu. 7 San niꞌitoꞌon tsa sa ñuu yaꞌa tastuni Herodes san tsandaꞌa ñaꞌan tsa xi ia jnu Herodes, kuan ndidaa kii yukua io Herodes kuan Jerusalén. 8 San kuenta saa ia jnu Herodes san tsa yaꞌa xíni ñaꞌan tsa xi ia, san ku-iꞌni ntseꞌe tsa kuan sa kunaꞌa nchukini ñaꞌan tsa, kuan tsaku s-tsa ndidaa sa kida ia san nchu kini tsa en señal kida Jesús. 9 Herodes ndukutoꞌon ntseꞌe tsa doko Jesús ti kaꞌan ia nisa en toꞌon. 10 San xuku ndidaa dutu kuu jnu xi xiꞌin ndidaa tsa dadana ñaꞌan ley, san ini tsa ndidaa tsa dakuidokuachi ñaꞌan tsa. 11 Dandu Herodes xiꞌin ndidaa soldadu tsa sakuntsaa ñaꞌan tsa xi ia san kaꞌan kuiꞌia tsa san danduu dakuiꞌno ñaꞌan tsa doꞌno guaꞌa. San na tsandaꞌa nituku tsa Jesús jnu Pilatu. 12 San kii yukua nduu mani Pilatu xiꞌin Herodes, kuan ti xu kinimani taꞌan tsa nduu tsa naku.
Kaꞌan Pilatu sa kuu Jesús
13 San Pilatu na kana tsa ndidaa dutu jnuu xi xiꞌin ndidaa tsa tastuni xiꞌin nee ñuu. 14 San sadaa tsa:
—Yoꞌo ntsaka yo nuyaꞌa, san kachi yo sa kida nu sa ndidaa ñayii na naxikokagua xi sa tastuni ntsu, doko ntsuꞌu sa ndúkutoꞌon ntsu jnu jnu yo ndidaa yo, san ti nániꞌi ntsu nisa en kuachi sa da kuidokuachi ñaꞌan yo jnu. 15 San nisa Herodes ti naniꞌi kuachi juandiku na tsandaꞌa nituku tsa nu jaꞌa sa xini yo sa ti kída nu nisa en sa kuiꞌia sa nandeꞌe sa kuu nu. 16 Na kaniaꞌa ntsu jnu san danduu dayaa ntsu jnu.
17 Doko ndidaa kii viko yukua Pilatu xu dayaa tsa en tsa yeꞌe vekaa. 18 San ndidaa ñayii io jukua kesaꞌa tsa kana tsa, san kachi tsa ndidaa tsa:
—¡Na kuu Jesús xan, san dayaa ni Barrabás!
19 San Barrabás ya chiñaꞌan s-tsa vekaa kuan naxikokagua tsa xi sa tastuni ndidaa romanu xiꞌin saꞌni tsa ndii tuku. 20 Danduu kaꞌan nituku Pilatu xi ñuu, kuan nchu dayaa tsa Jesús. 21 Doko ndidaa ñayii niꞌi ntseꞌe ka kana tsa san sadaa tsa:
—¡Katakaa ni nu! ¡Katakaa ni nu!
22 San guelta ku uni sadaa Pilatu:
—Nasa kuu sa kuiꞌia kida nu yaꞌa? Nisa en kuachi ti nániꞌi ntsu jnu. Na kaniaꞌa ntsu jnu danduu dayaa ntsu nu.
23 San ndidaa tsa yaꞌa kana ni-oon tsa, san xika tsa sa na katakaa ñaꞌan xi Jesús. San intsee ni tsa ndidaa tsa. 24 San danduu Pilatu kída tsa sa xika ndidaa tsa yukua. 25 San dayaa tsa tsa yeꞌe vekaa, kuan ndidaa ñayii xuku jukua xíka sa na dayaa ñaꞌan xi tsa saꞌni ndii, san nakua ñaꞌan tsa Jesús sa na kada tsa nasa nchoj s-tsa xi ia.
Duꞌua taꞌan kuenta satakaa tsa ndidaa tsa Jesús
26 Kuenta ntsaka tsa Jesús kuaꞌan sa kaꞌni ñaꞌan tsa, san tseyeka ñaꞌan tsa xi en tsayee io Cirene nani Simón tsa dika ndee yuku sa na kunchido tsa cruz san na kunchiko ñaꞌan tsa xi Jesús.
27 Kuaꞌa ntseꞌe ñayii nchiko ñaꞌan xiꞌin kuaꞌa ntseꞌe ñadeꞌe ndaꞌyu xiꞌin kani ña nchika ña nchiko ñaꞌan ña kuaꞌan xi Jesús. 28 Doko Jesús nantsaꞌa ñaꞌan ia san sadaa ia:
—Ndidaa yoꞌo nudeꞌe io Jerusalén ma ndaꞌyu yo sa saꞌa ntsuꞌu, ndaꞌyu sa saꞌa mee yo ndidaa yo xiꞌin sa saꞌa ndidaa d̶aꞌa yo. 29 Kuan koo kii sa kachi ndidaa ñayii: Guaꞌa kuxi ndidaa ñadeꞌe ti ío daꞌyiki xi xiꞌin ndidaa xiti ti ñoꞌon daꞌyiki xiꞌin ñadeꞌe ti dakadi daꞌyiki. 30 Danduu kada ndidaa ñayii xi yuku ndugua ndodo ñaꞌan kuntsu adi kadaa xi tinduu: “da daꞌvi ñaꞌan kuntsu.” 31 Kuan tu xiꞌin yutu kuii ya kida nu ndidaa nu jaꞌa Nasa ma kada nu xiꞌin yutu yichi?
32 San ntsaka ñaꞌan xi ubi tsayee kuiꞌia sa katakaa ñaꞌan s-tsa xiꞌin Jesús tuku. 33 San kuenta saa tsa ndidaa tsa xiꞌin Jesús luguar nani yiki d̶iki ndii san jukua satakaa ñaꞌan tsa cruz xi Jesús xiꞌin satakaa tsa nduu tsa kuaꞌan xiꞌin ia en tsa en cruz ichi ladu kuaꞌa, san enka tsa enka cruz ichi ladu ichi. 34 San Jesús kachi ia:
—Taa, koo ni sakaꞌnu-ini sa saꞌa nuyaꞌa ndidaa nu, kuan ti xini nu nasa kida nu.
San ndidaa soldadu choꞌon tsa suerte d̶oꞌno Jesús andu na kendoo xiꞌin. 35 San ntsaꞌa ndidaa ñayii io jukua, san ntsaa ndeꞌe ndidaa tsa tastuni kachi:
—Tu kída nu sa nánitaꞌvi enka ñayii san na kada nu sa na nanitaꞌvi mee nu, tu kuu nchisa nu Cristu, nu ndékaxi Ndios.
36 San ndidaa soldadu sakuntsaa ñaꞌan xi Jesús san sañaꞌan tsa vinagre sa na koꞌo ia. 37 San sadaa tsa:
—Tu kuu yo Rey ndidaa ñayii ñuu Israel, san kada sa nanitaꞌvi yo.
38 San kantsaa en letreru ichi d̶iki ia sa ntsaa xiꞌin daꞌan hebreu, latin xiꞌin griegu sa kachi: “Nu yaꞌa kuu j-Rey ndidaa judiu.”
39 En tsa nchitakaa, tsa kuu en ñayii kuiꞌia kaꞌan kuiꞌia tsa san sadaa tsa xi Jesús:
—Tu yoꞌo kuu Cristu? ¡Kada sa nanitaꞌvi yo san kada sa nanitaꞌvi ntsu nduu ntsu tuku!
40 Doko enka tsa nchitakaa nduden tsa xi tsa yukua:
—Ti yuꞌu yo Ndios, san dini sa uꞌu yaꞌa io yo tuku? 41 Ntso taꞌa ndo kuan chaꞌvi ndo sa kída ndo; doko tsa yaꞌa ti kída tsa nisa en sa kuiꞌia.
42 San sadaa tsa:
—Jesús, nakaꞌan ñaꞌan ni d̶a ora na ndij ni xiꞌin sa tastuni ni.
43 San danduu Jesús sadaa ia:
—Kachitoꞌon ndaa ntsu yo sa vita koo yo xiꞌin ntsu paraíso kuan.
Duꞌua taꞌan kuenta xiꞌi Jesús
44 San ntsa dagua kii xiꞌin ntsaa kaa uni sañani nee ñuyii kunaa. 45 San ora ti dayeꞌe ka, san titsaa kaꞌnu ntsadi xiti templu ndata dagua dagua. 46 San Jesús kána ia niꞌi ntseꞌe san kachi ia:
—¡Taa, na nachoꞌon da x-espíritu da ndaꞌa ni!
San tuꞌu kachi ia jaꞌa, san xíꞌi ia.
47 San kuenta xíni s-toꞌo ndidaa soldadu romanu sa taꞌan ya, san kídakaꞌnu tsa Ndios san kachi tsa:
—¡Sa ndaa kuu nchisa sa tsa yaꞌa kuu tsa en ñayii guaꞌa!
48 San ndidaa ñayii io jukua xíni sa taꞌan ya, san naxikokagua tsa ndidaa tsa san kunuꞌu tsa kani tsa ndidaa tsa nchika tsa, kuan ndaꞌvi ntseꞌe io xanaa tsa. 49 San ndidaa ñayii xini ñaꞌan xi Jesús xuku xika tsa xiꞌin ndidaa ñadeꞌe nchiko ñaꞌan ntsaa Galilea xuku ña ntsaꞌa ña ndidaa ña.
Chiduj tsa Jesús
50 Ío en tsayee nani José en tsayee guaꞌa en tsa kuu ñuu nani Arimatea xuun Judea san tsa yaꞌa kuu tsa en tsa kunaꞌnu xiꞌin kuu tsa ñayii ndaa. 51 José ya ntsatu tsa sa tastuni Ndios ñayii san ti nataꞌan xanaa tsa sa duꞌua kida ndidaa ka tsa kunaꞌnu ya xi Jesús. 52 San tsa yaꞌa saꞌan tsa sa ntsaꞌa tsa Pilatu san xíka tsa xikikoño Jesús. 53 San tuꞌu noneꞌe ñaꞌan tsa cruz san chodaꞌa ñaꞌan tsa en titsaa san ntsaka ñaꞌan tsa kuaꞌan san chiꞌiñaꞌan tsa xiti en yavi káan tsa kagua, sa nisa en ndii vitayii ka. 54 Kuenta taꞌan ndidaa jaꞌa kuu kii kidaguaꞌa tsa sa kaj tsa, kuan sa io sa kesaꞌa sabado.