S-TOꞌON GUAꞌA JESÚS IA KUU CRISTU KUENTA CHÍDOTUNI JUAN
S-toꞌon Ndios Nduu ñayii
1
Ntsaa diꞌna nuu ia kuu Toꞌon, san Toꞌon yukua ío xiꞌin Ndios, san toꞌon kuan kuu Ndios, 2 ia kuu Toꞌon ya ío xiꞌin Ndios ntsa diꞌna nuu. 3 Ndidaa kuguaꞌa sa saꞌa Toꞌon ya, san tu ti io Toꞌon ya san nisa en sa io ya ti io. 4 Sa saꞌa Toꞌon ya juandiku ndidaa sa io ñuyii ya nchito, san Toꞌon yaꞌa kuu sa dayeꞌe xi ndidaa ñayii. 5 San ia kuu sa dayeꞌe ya, dayeꞌe xiti xi sa naa, san sa naa ya ma kachi kada sa ndunaa sa dayeꞌe ya.6 Ío en tsayee tsandaꞌa Ndios, en tsa inani Juan.a 7 Tsa yaꞌa kij s-tsa ki kaꞌan tsa, ndasa na kaꞌan tsa nasa kuu sa dayeꞌe ya, ndasa ndidaa ñayii na kininchisa ñaꞌan xi sa dayeꞌe ya sa saꞌa Juan. 8 Juan kij s-tsa sa kaꞌan tsa sa kuu sa dayeꞌe, doko adi tsa kuu sa dayeꞌe. 9 Sa dayeꞌe yaꞌa kuu sa dayeꞌe nchisa, san sa dayeꞌe xi ndidaa ñayii, váxi ia ñuyii yaꞌa.
10 San ia yaꞌa ío ñuyii yaꞌa, san ñuyii ya kuguaꞌa sa saꞌa xi sa dayeꞌe ya, doko ndidaa ñayii ñuyii ya ti na kinimani ñaꞌan. 11 Kíxi ia jnu ñayii kuu xaꞌan ia, san ndidaa ñayii yaꞌa ti ta-ini ñaꞌan. 12 Doko ndidaa ñayii náta-ini ñaꞌan xi ia, ndidaa ñayii nakininchisa andu kuu ia, na kinimani ñaꞌan ia sa na ku kuu ndidaa ñayii yaꞌa d̶aꞌa Ndios, 13 adii sa kuu tsa ñayii juandiku kachi sa kuu tsa d̶aꞌa Ndios, san ti kuu tsa d̶aꞌa Ndios kuan en tsie xidi tsa xiꞌin d̶eꞌe tsa san ío d̶aꞌa tsa nduu tsa, san nisa ti kuu tsa d̶aꞌa Ndios kuan ndidaa ñayii nchu koo d̶aꞌa xi, maska sa kuu tsa d̶aꞌa Ndios kuan mee ia ndáda ñaꞌan ia d̶aꞌa ia.
14 San Toꞌon yukua nduu en tsiee san ío ia sa io ndo (san xíni ndo sa tastuni ntseꞌe io xi ia xiꞌin jaꞌa dádana ñaꞌan ia sa ia yaꞌa kuu en dini d̶aꞌa Ndios) san kutuni ntseꞌe xi ia san chítu ia gracia xiꞌin sa ndaa kuu ia. 15 Juan kuu tsa xíni sa kuu ia san kachi tsa:
—Tsa yaꞌa kuu tsa kachi da: Tsa nchiko ñaꞌan d̶a vaxi ya kuu tsa kunaꞌnu ka, kuan díꞌna ka tsa io sa kuj d̶a.
16 Kuan ndidaa sa io xi ia niꞌi ndo ndidaa ndo, san ndidaa niꞌi daa ndo gracia xiꞌin gracia. 17 Kuan ley táxi Ndios san chídotuni Moisés, doko gracia xiꞌin sa ndaa sáa sa saꞌa Jesucristo. 18 Ti en xíni ñaꞌan xi Ndios; meni ia kuu uniko D̶aꞌa ia, ia yaꞌa káchitoꞌon andu kuu Tata.
Juan tsa dakuendutsa ñaꞌan kaꞌan tsa andu kuu Jesús
19 Toꞌon yaꞌa kaꞌan Juan, kuenta uu judiu tastuni io Jerusalén tsandaꞌa tsa uu dutu xiꞌin levita sa na kiꞌin tsa ku ndukutoꞌon tsa: Yoꞌo andu kuu yo? 20 Tsa yaꞌa naꞌma ndaa tsa:
—Adi ntsuꞌu kuu Cristu.
21 San ndukutoꞌon tsa ndidaa tsa:
—Andu ku yo tuda? Profeta Elías kuan ña?b
Juan sadaa tsa:
—Ñaꞌan, adi tsa yukua kuu ntsu.
San nduku toꞌon tsa ndidaa tsa:
—Yoꞌo kuu profeta kixi kuan ña?c
San sadaa Juan:
—Ñaꞌan.
22 Dandu sadaa tsa ndidaa tsa:
Andu kuu yo tuda, kuan nakadaa ntsu xi ndidaa tsa tsandaꞌa ñaꞌan kuntsu. Andu kachi yo sa kuu yo?
23 Juan sadaa tsa:
—Ntsuꞌu kuu en tsa kana toꞌon yaꞌa desiertu: “Danuna xichi tsa Toꞌo” kuenta chidotuni Isaías x-profeta Ndios.d
24 San ndidaa tsa táꞌvichiion xi sa na ndukutoꞌon xi Juan ya ku ndidaa fariseu. 25 San ndukutoꞌon tsa san sadaa tsa:
—Naku dakuendutsa yo tu adi yoꞌo kuu Cristu, nisa Elías, san nisa profeta kachi sa kixi kuaan tuda?
26 Juan sadaa tsa:
—Ntsuꞌu dakuendutsa ntsu xiꞌin ndutsa, doko sa io yo ndidaa yo xan io en tsa ti xini yo ndidaa yo. 27 Tsa nchiko vaxi, tsa io diꞌna ka sa kuj ntsu, tsa nisa ti níꞌi taꞌvi ntsu sa dandatsa ntsu xeen nchisa tsa.
28 Ndidaa jaꞌa taꞌan ñuu nani Betania, enka ndodo yutsa nani Jordán, jukua xu dakuendutsa ñaꞌan Juan.
Jesús kuu Corderu Ndios
29 Ndu enka kii, Juan xíni tsa sa vaxi Jesús sa io tsa san kachi tsa:
—¡Ntsaꞌa x-Corderu Ndios dita x-kuachi ndidaa ñayii ñuyii ya yaꞌa! 30 Tsa yaꞌa kachi ntsu sa kachi ntsu xo ndidaa yo: “Ku sata ntsu vaxi en tsayee kuu diꞌnaka sa kuj ntsu; kuan diꞌnaka tsa yaꞌa io sa kuj ntsu.” 31 Ntsuꞌu ti xini ñaꞌan ntsu s-tsa; doko ndasa na kini ñaꞌan ndidaa ñayii io ñuu Israel ya s-tsa, juandiku vaj ntsu dakuendutsa ñaꞌan ntsu xiꞌin ndutsa.
32 Juan kachi tsa tuku:
—Xíni ntsu Espíritu Santu nonoo andivi kuenta en data, san índodo te x-chio tsa. 33 Ntsuꞌu ti xu kini ñaꞌan ntsu, doko ia tsandaꞌa ñaꞌan ku ntsu sa dakuendutsa ntsu kachi ia: “Nu na kini yo sa noo Espíritu x-chio xi, nuyaꞌa kuu nu dakuendutsa ñaꞌan xiꞌin Espíritu Santu.” 34 Ntsuꞌu xíni ñaꞌan ntsu juandiku kachi ntsu sa tsayaꞌa kuu D̶aꞌa Ndios.
Tsa nchiko ñaꞌan diꞌna nuu xi Jesús
35 Ndu enka kii, io nituku Juan xiꞌin ubi tsa nchiko ñaꞌan s-tsa. 36 San xíni tsa Jesús sa ndinoo ia ichukua san kachi tsa:
—¡Ntsaꞌa ni ka tsa yaꞌa kuu x-Corderu Ndios!
37 Kuenta tsáku xi nduu tsa nchiko ñaꞌan xi Juan toꞌon yaꞌa san sakuita nchiko tsa Jesús. 38 San naxikokagua Jesús san xíni ñaꞌan ia xi nduu tsa yaꞌa san sadaa ia:
—Nasa nanduku yo?
San tsa yaꞌa sadaa tsa:
—Rabí, (sa nchu kachi Maestru) ami io ni?
39 San sadaa ia:
—Naꞌa san kini yo.
San sáꞌan tsa san xíni tsa ami io ia san kendoo tsa xiꞌin ia kii yukua, kuan ku ndaa ka kumi sa ñini.
40 Andrés, xani Simón Pedru kuu en tsa tsáku xi sa káꞌan Juan san chiko tsa Jesús. 41 Tsa yaꞌa naniꞌi tsa diꞌna ka xani tsa Simón san sadaa tsa:
—Naníꞌi ntsu Mesías —(Sa nchu kachi ia kuu Cristu ia kida sa nanitaꞌvi).
42 San ntsaka ñaꞌan tsa kuaꞌan jnu Jesús, san xíni ñaꞌan Jesús san sadaa ia:
—Yoꞌo kuu Simón d̶aꞌa Jonás. San kunani yo Cefas —sa nchu kachi Pedru.
Duꞌua kída sa kana Jesús Felipe nduu tsa tsa nani Natanael
43 Ndu enka kii, Jesús kée ia sa kiꞌin ia Galilea sa na níꞌi ia Felipe. San Jesús sadaa ia:
—Kunchiko ñaꞌan ku ntsu.
44 Xuun Felipe kuu ñuu Betsaida, sa kuu xuun Andrés xiꞌin Pedru. 45 Felipe naníꞌin tsa Natanael san sadaa tsa:
—Naniꞌi da ndidaa da tsa ndaa Moisés s-toꞌon xi kuenta chidotuni tsa sa táꞌvichiion Ndios, xiꞌin sa yodotuni xi ndidaa x-profeta Ndios: Jesús tsa io Nazaret, d̶aꞌa José.
46 San sadaa Natanael:
—Ñuu Nazaret ña? Ama io sa guaꞌa juan?
san sadaa Felipe:
—Naꞌa ni sa kini ni.
47 San xíni Jesús sa kuyachi Natanael sa io ia san kachi ia:
—¡Ntsaꞌa nuyaꞌa kuu nchisa en ñayii israel en nu kida sa ndaa!
48 San sadaa Natanael:
—Ama xini ñaꞌan yo ku ntsu?
San sadaa Jesús:
—Xíni ñaꞌan ntsu yo ntsa kuenta in yo x-kaꞌa tu tichikaꞌakuxi kuan xiꞌin antika sa kana ñaꞌan Felipe xan yo.
49 San sadaa Natanael:
—Rabí, ¡Dini kuu D̶aꞌa Ndios! ¡Di ni kuu rey Israel!
50 Sadaa Jesús:
—Xininchisa yo ndasa kachi ntsu: Xíni ñaꞌan ntsu yo x-kaꞌa tu tichikaꞌakuxi kuan ña? ¡Vita kini yo sa naꞌnu ka sa kuxi jaꞌa!
51 San sadaa ia:
—Kachitoꞌon ndaa ntsu yo, sa kini yo sa nakaan andivi xiꞌin kini yo ndidaa x-ángel Ndios sa ndaa noo,e sa io ia nduu ñayii ñuyii yaꞌa.