Juan tsa dakuendutsa io tsa desiertu
—Nata-uꞌu ni ndidaa ni, kuan sa tastuni Ndios ñayiia sa kú yachi.b
3 Juan yaꞌa kuu tsa káku neꞌe Isaías x-profeta Ndios, kuenta kachi tsa:
En tsa kana desiertu:
Danuu ni xichi Ndios xanaa ni ndidaa ni;
Ndada ndaa ichi.c
4 D̶oꞌno Juan kuguaꞌa xiꞌin xidi camellu xiꞌin en ñee xu kunuꞌni ndodo tsa,d san xu kaj s-tsa cheka xiꞌin ndudi timii io yuku. 5 Ñayii io Jerusalén xiꞌin ndidaa ka ñayii io nee distritu Judea xiꞌin ndidaa ñuu io yachi yutsa Jordán xu kunini ñaꞌan s-tsa, 6 san xu naꞌma tsa x-kuachi tsa xiꞌin xu kuendutsa tsa kada Juan, yutsa Jordán.
7 Doko kuenta xíni Juan sa kuaꞌa ntseꞌe fariseu xiꞌin saduceu vaxi sa kuendutsa, sadaa tsa:
—¡Ndidaa dini ñayii kuiꞌia kuu kuenta koo!e Andu kachitoꞌon tuku d̶ini sa ma taꞌan ka ni sa uꞌu vaxi tsandaꞌa Ndios? 8 Kada ni sa guaꞌa san oni na danaꞌa sa na ta-uꞌu nchisa ni. 9 San ma kada kani-ini ni ndidaa ni: “Abraham kuu ku tadeꞌe ndo”;f kuan dan kachi da sa yuu yaꞌa guaꞌani kineꞌen Ndios ñayii ku kuu d̶aꞌa Abraham. 10 Sa ntsatu vii kaa sa diti xoꞌo yutu. Juandiku ndidaa yutu ti kee kuiꞌi guaꞌa, kaꞌntsa ñaꞌan xi san dakananiꞌno ñaꞌan xi xiti ñuꞌu.g 11 Dan sa ndaa kuu sa dakuendutsa ñaꞌan da xiꞌin ndutsa xi ñayii nata-uꞌu san naxikokagua sa io Ndios; doko tsa nchiko vaxi, san nisa ti nitaꞌvi da sa dandatsa da xeen nchisa tsa, kuan kaꞌnu ntseꞌe ka tsa sa kuj d̶a. Tsa yaꞌa taj s-tsa sa tastuni Espiritu Santu xiꞌin ñuꞌu. 12 Nundaꞌa tsa s-tutindagua tsa sa ndadandoo tsa s-trigu tsa, san nachoꞌon guaꞌa tsa, san dakayu tsa paja xiꞌin ñuꞌu ti ndaꞌua.
Duꞌua kída kuenta sendutsa Jesús
13 Danduu Jesús kée ia ntsa Galilea san saa ia yutsa Jordán, saꞌan ia sa io Juan ndasa na dakuendutsa ñaꞌan tsa. 14 Doko Juan ti nchu dakuendutsa ñaꞌan tsa san sadaa tsa:
—Dan nandeꞌe sa dakuendutsa ñaꞌan ni d̶a, naku mee ni vaxi sa io da?
15 Doko Jesús sadaa ia:
—Duꞌua nakoo vita, kuan nandeꞌe sa kada ndo sa nchoxi Ndios.
Danduu semani Juan. 16 San kuenta tuꞌu sendutsa Jesús, san nána ia xiti ndutsa, san ora yukua nakaan andivi, san xíni ia x-Espíritu Ndios nónoo kuenta en data san sakuindodo te x-chio ia. 17 San káꞌan en tsa káꞌan ntsa andivi san kachi tsa:
—Nuyaꞌa kuu ku Daꞌa ntsu nu xinimani ntsu xiꞌin taꞌan-ini ntsu.h