Mateu 4

Xitotuni ñaꞌan xi Jesús

(Mr 1.12-13; Lc 4.1-13)

Danduu ntsaka ñaꞌan Espíritu xi Jesús kuaꞌan desiertu, sa na kototuni ñaꞌan sakakuiꞌia xi ia.

2 San uvidiko kii xiꞌin uvidiko niñu ñoꞌon nchitsa ia, san kuíta ia. 3 San tuꞌua ñaꞌan sakakuiꞌia xi ia san sadaa:

—Tu kuu yo D̶aꞌa Ndios, san kadaa xi yuu xan sa na nduu ita-stila.

4 Doko Jesús sadaa ia:

—Yodotuni s-tutu ii Ndios: “Adii ni xiꞌin ita-stila ku nchito ñayii, maska sa xiꞌin ndidaa toꞌon kee xuꞌu Ndios.”

5 Danduu sakakuiꞌia ntsaka ñaꞌan xi ia kuaꞌan ñuu ii Jerusalén, san danduu dakaa ñaꞌan ntsa d̶iki laviꞌi templu, 6 san sadaa:

—Tu kuu yo D̶aꞌa Ndios, san nondagua ntsa tikoꞌo xan, kuan yodotuni s-tutu ii Ndios:

Sa tsandaꞌa ia x-ángel ia ndasa na kuntsaa ñaꞌan xo.

Ndaneꞌe ñaꞌan xiꞌin ndaꞌa xi xo

ndasa ma kukodama yo yuu.

7 Jesús sadaa ia:

—Duꞌua ni yodotuni s-tutu ii Ndios tuku: “Ma kototuni yo s-Toꞌo yo Ndios.”

8 San enka guelta sakakuiꞌia ntsaka ñaꞌan kuaꞌan en tinduu duku ntseꞌe, san dadana ñaꞌan ndidaa ñuu tastuni xiꞌin ndidaa sa xaꞌvi io xi, io juan. 9 San sadaa:

—Ndidaa jaꞌa taj ntsu xo, tu na kukuinxiti yo san na chiñuꞌu ñaꞌan yo kuntsu.

10 Danduu Jesús sadaa ia xi:

—Kuaꞌan juan yoꞌo sakakuiꞌia, kuan yodotuni s-tutu ii Ndios: “Sa s-Toꞌo yo Ndios chiñuꞌu yo san ia yaꞌa ni kuinokuachi yo jnu xi.”

11 Danduu sakakuiꞌia dandoo ñaꞌan xi ia, san danduu kíxi ndidaa ángel san xínokuachi jnu ia.

Duꞌua kída sa kesaꞌa kuvaa Jesús

(Mr 1.14-20; Lc 4.14-15; 5.1-11; 6.17-19)

12 San kuenta níꞌitoꞌon Jesús sa Juan chintsadi ñaꞌan s-tsa, naxikokagua ia distritu Galilea. 13 San dandoo ia Nazaret, san saꞌan ia san ío ia Capernaúm, ñuu io yachi jnu mar Galilea, ndaꞌa ñuu Zabulón xiꞌin Neftalí, 14 ndasa na xinotaꞌan sa kachi Isaías x-profeta Ndios, kuenta kachi tsa:

15 Xuꞌun Zabulón xiꞌin xuꞌun Neftalí,

ndodo mar, sa io enka ndodo yutsa Jordán,

Galilea sa kuu xuꞌun ñayii ti kuu ñuu Israel;

16 Ñuu ío naa niñu, vita xini en sa dayeꞌe san sandutsa;

San ndidaa ñayii xika ichi io x-kondati ndii

dayeꞌe xi.

17 San danduu kesaꞌa Jesús kaꞌan ia san kachi ia:

—Nata-uꞌu, kuan sa kuyachi sa tastuni Ndios ñayii.

Jesús kana ia kumi tsa teen chaka

(Mr 1.16-20; Lc 5.1-11)

18 Neni xika yachi ia jnu mar Galilea, Jesús xíni ia ubi ñani tsayee, Simón tsa nani Pedru xiꞌin xani tsa Andrés soꞌno tsa xonochaka xiti ndutsa, kuan kuu tsa tsa teen chaka. 19 San sadaa Jesús:

—Naꞌa san kunchiko ñaꞌan ku ntsu, san kada ntsu sa duꞌua dataka yo ñayii kuenta chaka.

20 San dandoo tsa yaꞌa xonochaka san kuaꞌan tsa ndidaa tsa.

21 San taꞌa ka kanduu, xíni ia ubi ka tuku tsayee, Jacobo d̶aꞌa Zebedeu xiꞌin xani tsa tsa nani Juan, kaniꞌno tsa xiti barku xiꞌin s-tata tsa, na kiku tsa xonochaka. San Jesús kána ñaꞌan ia, 22 san dandoo tsa yaꞌa nduu tsa barku xiꞌin s-tata tsa, san kuaꞌan tsa ndidaa tsa.

Jesús dakuaꞌa ia kuaꞌa ntseꞌe ñayii

(Lc 6.17-19)

23 Jesús ndínoo ia ndidaa ndaꞌa ñuu Galilea san xu kiꞌin ia ku dakuaꞌa ñaꞌan ia ndidaa veꞌe sinagoga, san xu kaꞌan ia toꞌon guaꞌa sa kuu sa tastuni Ndios ñayii xiꞌin xu ndadaguaꞌa ia ndidaa tsa neꞌe kueꞌe xiꞌin ndidaa tsa uꞌu xi io ñuu yaꞌa. 24 San nee ndaꞌa ñuu nani Siria kuvaa sa kuu Jesús, san kintsaka tsa ndidaa tsa kuꞌu xi jnu Jesús: Tsa taꞌan nadataꞌan nadatuꞌu kueꞌe xiꞌin ñayii uꞌu xi, tsa ndukueꞌe, ñayii nakuu, ñayii ñoꞌon tachi kuiꞌia xiꞌin ñayii ti kachi kaka. San Jesús xu ndadaguaꞌa ñaꞌan ia. 25 San nchiko ñaꞌan kuaꞌa ntseꞌe ñayii xi ia, ñayii kée Galilea xiꞌin ndaꞌa ñuu Decápolis xiꞌin ñuu Jerusalén, ndidaa ka ndaꞌa ñuu Judea xiꞌin ñayii kée enka ñuu io enka ladu yutsa Jordán.