Teen tsa ndidaa tsa kuaꞌa ntseꞌe chaka
5
Taꞌan sa ndidaa ñayii, oni chotaꞌvi taꞌan sa nchu kiꞌin yachi sa io ia sa kunini s-toꞌon Ndios, kuan Jesús in ia ndodo ndutsa kaꞌnu nani Genesaret, 2 san xíni ia ubi barku in ntsa ndodo ndutsa. San ndidaa tsa teen chaka noo tsaa nakatsa tsa xono chaka. 3 San Jesús kukee ia en barku, sa ku xaꞌan Simón san sadaa ia sa na kiꞌin tsa en taꞌa xiti ndutsa. San dandu kukoo ia sa dadana ñaꞌan ia xi ndidaa ñayii yaꞌa ntsaa xiti barku. 4 San tuꞌu kaꞌan ia xi ndidaa ñayii, san sadaa ia xi Simón:—Kuneꞌe barku ya ntsaa sa kono ntseꞌe, san koꞌno xonochaka xan san niꞌi yo chaka.
5 Simón káꞌan tsa san sadaa tsa:
—Toꞌo, nee niñu kídachiion da san nisa en chaka ti níꞌi da. Doko sa saꞌa s-toꞌon ni xan sa na kiꞌin da ku koꞌno da xonochaka ya.
6 San soꞌno tsa, san dataka tsa kuaꞌa ntseꞌe chaka, san oni ndáta xonochaka. 7 San dakuiko ndaꞌa tsa xi tsa io enka barku, ndasa na kiꞌin tsa chintsee ñaꞌan tsa. San tsa yaꞌa saa tsa san dachitu tsa nduu barku, san oni nchu daꞌvi. 8 San Simón Pedru xini tsa jaꞌa, san sakuinxiti tsa jnu Jesús san sadaa tsa:
—¡Xiko kuin ni sa io da ya, Toꞌo, kuan ku da en ñayii io x-kuachi xi!
9 Duꞌua sadaa tsa kuan dayuꞌu ñaꞌan ntseꞌe xi Pedru xiꞌin ndidaa tsa io xiꞌin tsa san kíxi sa sani-ini tsa, sa ntseꞌe da kuaꞌa chaka niꞌi tsa. 10 Duꞌua ni yuꞌu Jacobo xiꞌin Juan, d̶aꞌa Zebedeu, tsa kidachiion xiꞌin Simón. Doko Jesús sadaa ia xi Simón:
—Ma yuꞌu yo, ntsa vita duꞌua dataka yo ñayii kuenta chaka.
11 San tuꞌu kineꞌen tsa barku ndodo ndutsa, san dandoo tsa ndidaa ndituꞌu san kuaꞌan tsa xiꞌin Jesús.
Jesús ndadaguaꞌa ia en tsayee tsaꞌyu niꞌno mee
12 Taꞌan en kii, io Jesús en ñuu, san jaꞌa io en tsayee tsaꞌyu xeen xi. San xini tsa Jesús, san sa kuinxiti tsa jnu ia, san sakondaꞌvi tsa sadaa tsa:
—Toꞌo, tu nchoj ni, san ndadandoo ñaꞌan ni d̶a.
13 Danduu dakaa ia ndaꞌa ia san kukoꞌon ñaꞌan ia san sadaa ia:
—Nchoj da. ¡Ndundoo ni! San nonoo ni nduguaꞌa tsa. 14 San Jesús sadaa ia sa ma kadaa tsa xi nisa en ñayii, guaꞌa ka sadaa ia:
—Kuaꞌan ni jnu dutu san doko ni sa táꞌvichiion Moisés, ndasa na kini dutu, sa sa ndundoo ni.
15 Nasa juan san kuaka ku vaa sa kida Jesús, san taka kuaꞌa ntseꞌe ñayii sa kunini ñaꞌan xi ia xiꞌin sa nduguaꞌa. 16 Doko xu kiꞌin ia luguar ayoo en dana io, san xu kaꞌan ia xi Ndios.
Jesús ndadaguaꞌa ia en tsa yakua
17 San taꞌan en kii dakuaꞌa ñaꞌan Jesús, san intsaku uu fariseu xiꞌin uu tsa dadana ñaꞌan ley kée ndidaa ndaꞌa ñuu io Galilea, Judea xiꞌin Jerusalén. San sa tastuni Ndios io xi Jesús sa ndadaguaꞌa ia. 18 San uu tsayee ntsaka tsa en tsa kuꞌu xi xiꞌin en kamilla, en tsa ti kachi kaka, san nchu kuntsaka ñaꞌan tsa kiꞌin xiti veꞌe, san kakituu tsa tsa jnu Jesús. 19 Doko ti niꞌi kiꞌin tsa kuan kuaꞌa ntseꞌe ñayii io, sa ntsaa ichi d̶iki veꞌe neꞌe tsa kamilla kuaꞌan, san káan tsa en yavi d̶iki veꞌe, san ichukua noneꞌe tsa kamilla kuan, san sakituu tsa jnu Jesús. 20 San xíni ia sa ndidaa tsa yaꞌa xininchisa tsa sa guaꞌa ni ndadaguaꞌa ñaꞌan ia, san sadaa ia:
—Dito, x-kuachi ni sa ndoo jnu Ndios.
21 Danduu ndidaa tsa dadana ñaꞌan ley xiꞌin ndidaa fariseu kesaꞌa tsa kachi tsa: “Andu kuu nuyaꞌa kuan kaꞌan kuiꞌia nu xi Ndios? kuan meni Ndios kuu ia dandoo kuachi.”
22 Doko Jesús sa xini ia sa sani-ini tsa yaꞌa, san kaꞌan ia san nduku toꞌon ia:
—Naku duꞌua sani-ini ni ndidaa ni? 23 Nasa kama ka sa kadaa xi en tsa ti kachi kaka: x-kuachi ni sa dandoo Ndios, ña: Ndukoo ni san nakeꞌen ni x-kamilla ni xan san kaka ni? 24 Doko ndasa na kini ni na dadana ñaꞌan da sa nu nduu ñayii ñuyii yaꞌa io sa tastuni nu sa dandoo nu kuachi, danduu sadaa ia xi tsa kuꞌu xi:
—Dito dini kaꞌan da xi: ¡Ndukoo ni, nakeꞌen ni x-kamilla ni xan san ku nuꞌu ni xeꞌe ni!
25 San nonoo ni ndukoo tsa jnu ndidaa tsa yukua, sa nakeꞌen tsa kamilla katu ndodo tsa, san ku nuꞌu tsa xeꞌe tsa kidakaꞌnu tsa Ndios. 26 San ndidaa ñayii sani-ini, san kidakaꞌnu tsa Ndios, san dayuꞌu ñaꞌan s-tsa, san kachi tsa:
—¡Vita xini ndo en sa saa ti on taꞌan!
Jesús kana ñaꞌan ia xi en tsayee nani Leví
27 Tuꞌu jaꞌa, san kée Jesús san xíni ia en tsa teyaꞌvi tuini sa kuxi Roma nani tsa Leví, intsaku tsa sa sakuntsaku tsa teyaꞌvi. San sadaa Jesús:
—¡kunchiko ñaꞌan ku ntsu!
28 Tsa yaꞌa dandoo tsa ndidaa, san ndukuin tsa san sakuita nchiko ñaꞌan tsa.
29 Danduu Leví kídaguaꞌa tsa sa kaj d̶ee tsa xeꞌe tsa san saꞌan Jesús, san io kuaꞌa ntseꞌe tsa teyaꞌvi tuini sa kuxi Roma xiꞌin kuaꞌa ka ñayii yeꞌe mesa saxi xiꞌin ia. 30 San ndidaa fariseu xiꞌin ndidaa tsa dadana ñaꞌan ley kaꞌan kuiꞌia tsa xi ndi uxi-uu tsa nchiko ñaꞌan xi Jesús, san sadaa tsa:
—Naku saj xo xiꞌin xiꞌi yo ndidaa yo xiꞌin tsa teyaꞌvi tuini sa kuxi Roma xiꞌin ndidaa ka tsa io x-kuachi xi xan?
31 Kaꞌan Jesús san sadaa ia:
—Ñayii io guaꞌa ti nandeꞌe doctor xi, maska sa ñayii kuꞌu xi. 32 Ti vaj da ki kana da ñayii sani-ini sa kuu ñayii guaꞌa, maska sa vaj da ki kana da ñayii nakininchisa sa io x-kuachi xi san nata-uꞌu.
Ndukutoꞌon nasa kuu sa sakoo nchitsa
33 Danduu ndidaa tsa yaꞌa sadaa tsa xi Jesús:
—Naku ndidaa tsa nchiko ñaꞌan xi Juan sakoo nchitsa ntseꞌe tsa san xikataꞌvi tsa, san duꞌua ni kida ndidaa fariseu ya tuku, doko ndidaa tsa nchiko ñaꞌan xi mee-ni xan, xiꞌi saj s-tsa?
34 Jesús sadaa ia:
—Ama guaꞌa ni kada ni sa ñayii io viko tandaꞌa koo nchitsa nee io nuyee tandaꞌa kuan xiꞌin tsa ndidaa tsa ña? 35 Doko kixi kii sa dita ñaꞌan xi nuyee tandaꞌa kuan. San duꞌua, koo nchitsa ndidaa ñayii kii yukua.
36 San sadaa ia toꞌon dadaguataꞌan yaꞌa:
—Ti en diti en taꞌa titsaa daꞌma saa san na kikuntsaa taꞌan xiꞌin daꞌma tuꞌu kuan tu duꞌua na kada ñayii san daꞌma saa kuan tivi san titsaa saa kuan ti kendoo guaꞌa xiꞌin daꞌma tuꞌu kuan. 37 Nisa en ñayii ti choꞌon vinu tinchiꞌio saa xiti ñee tuꞌu. Kuan vinu tinchiꞌio ndata ñaꞌan xi ñee; san vinu tinchiꞌio kuan xita, san ndidaa ñee kuan tivi. 38 Juandiku vinu tinchiꞌio saa nchoxi sa kee xiti ñee saa. 39 Kuan ndidaa tsa xiꞌi vinu tinchiꞌio tuꞌu ti nchu koꞌo tsa sa saa, kuan kachi tsa: “Guaꞌa ka xiꞌi sa tuꞌu ya.”