Duꞌua kída kuenta ndadaguaꞌa Jesús en tsayee tsaꞌyu xeen xi
8
Kuenta noo ia tinduu, kuaꞌa ntseꞌe ñayii nchiko ñaꞌan xi ia. 2 San saa en tsayee tsaꞌyu xeena xi san sakuinxiti tsa jnu Jesús, san sadaa tsa:—Toꞌo, tu nchoj ni, san ndadandoo ñaꞌan ni d̶a.
3 Jesús kítuñaꞌa ia san sadaa ia:
—Nchoj ntsu. ¡Ndundoo!
—Ntsaꞌa ka, ma kadaa yo xi nisa en ñayii; doko kuaꞌan, san dadana ñaꞌan xi dutu san doko sa táꞌvichiion Moisés,b ndasa na kunaꞌa dutu kuan.
Jesús ndada guaꞌa ia en tsayee kidachiion xi en soldadu romanu kunaꞌnu
—Toꞌo, nu kidachiion xeꞌe da katuu nu kuan kuꞌu ntseꞌe jnu, san ti kachi ka kaka nu, san uꞌu ntseꞌe jnu san taꞌan ntseꞌe nu.
7 San sadaa ia:
—Ntsuꞌu kiꞌin ntsu san ndadaguaꞌa ñaꞌan ntsu jnu.
8 San sadaa centurión kuan xi ia:
—Toꞌo, ti nitaꞌvi da sa yii ni xeꞌe da. Taꞌvichiion ni ni, san nu kidachiion jnu da nduguaꞌa nu. 9 Kuan dan io tsa tastuni ñaꞌan d̶a, san io nu tastuni da tuku. San taꞌvichiion da jnu yaꞌa: Kuaꞌan, san nu yaꞌa saꞌan nu; san tu nakadaa da xi enka nu, naꞌa, san nu yaꞌa kij jnu; san tu na kadaa da xi nu kidachiion jnu da: Kada jaꞌa, san kida nu.
10 Kuenta tsaku xi Jesús toꞌon yaꞌa, san oni sani-ini ia san sadaa ia xi ndidaa tsa nchiko ñaꞌan xi ia:
—Kachitoꞌon ndaa ntsu xo sa ti en naniꞌi ntsu sa duꞌua xininchisa ñaꞌan kuu ntsu ñuu Israel kuenta tsa yaꞌa. 11 San kachi ntsu sa kuaꞌa ntseꞌe ñayii kee ichi kana ora xiꞌin ichi daꞌvi ora san kuntsaku tsa kaj tsa xiꞌin Abraham, Isaac, Jacob sa tastuni Ndios ñayii ntsa andivi;c 12 doko ñayii nandeꞌe sa koo sa tastuni Ndios kineꞌen ñaꞌan s-tsa san dakana niꞌno ñaꞌan xiti xi sa naa s-tsa. San juan koo sa ndaꞌyu xiꞌin sa ku ruꞌu jnuꞌu ñayii.d
13 Danduu Jesús sadaa ia xi centurión kuan:
—Kunuꞌu, san ndasa xininchisa ñaꞌan yo ku ntsu san duꞌua na kada.
San tsa kidachiion jnu tsa nduguaꞌa ni tsa ora yukua.
Jesús ndada guaꞌa ia nanaxido Pedru
14 San kuyii Jesús xeꞌe Pedru, san xíni ia san j-nana xido Pedru katuu ña kuan ñoꞌon ntseꞌe ña kaꞌni. 15 San Jesús teen ia ndaꞌa ña, san danduu kuaꞌan kaꞌni ñoꞌon ñaꞌan xan, san ndukoo ña san danuu ña sa kaj s-tsa ndidaa tsa.
Duꞌua kída sa ndadaguaꞌa Jesús kuaꞌa ntseꞌe tsa kuꞌu xi
16 San kuenta kunaa, kintsaka tsa kuaꞌa ntseꞌe tsa neꞌe tachi kuiꞌia jnu Jesús. San xiꞌin s-toꞌon ia xíko ia ndidaa tachi kuiꞌia xiꞌin ndadaguaꞌa ia ndidaa tsa kuꞌu xi, 17 san duꞌua xínotaꞌan sa kachi Isaías x-profeta Ndios, kuenta kachi tsa: “Tsa yaꞌa xído ku kueꞌe ndo xiꞌin kuyakui tsa ndidaa sa uꞌu ku ndo.”e
Ndidaa tsa nchu ku nchiko ñaꞌan xi Jesús
18 Doko xíni ia sa chikorra ñaꞌan ndidaa ñayii xi ia, san Jesús táꞌvichiion ia sa na yaꞌia tsa ntsa enka ndodo ndutsa. 19 Danduu kuyachi en tsayee dadana ñaꞌan ley, san sadaa tsa:
—Maestru, kunchiko ñaꞌan da jni ami na kiꞌin ni.
20 Jesús sadaa ia:
—Ñókuii io xavi te, san tidaa xiko andivi io s-taka te, doko ia nduu ñayii ñuyii yaꞌa ti io nisa ami katuu ndodo d̶iki nu.
21 Enka tsa nchiko ñaꞌan xi ia sadaa tsa:
—Toꞌo, kuntsatu ni diꞌna ka na kiꞌin da ku chiduj d̶a s-tata da.
22 Doko Jesús sadaa ia:
—Kunchiko ñaꞌan ku ntsu, kodaa ndidaa ndii na chiduj nu ndii nu.
Jesús kida ia sa na kukadi ndutsa xiꞌin ndidaa x-ola mar
23 San kusaa Jesús barku xiꞌin ndi uxi-uu tsa nchiko ñaꞌan xi ia, san kuaꞌan tsa xiꞌin barku xiti ndutsa. 24 San kikii ni kesaꞌa en davi tachi kaꞌnu ntseꞌe, san ndidaa ndutsa ndukoo xiti mar daꞌvi barku, doko Jesús xidi ia. 25 San ndidaa tsa nchiko ñaꞌan xi ia ndaneꞌe ñaꞌan tsa xi ia san sadaa tsa:
—Toꞌo, ¡see ni chintsee ñaꞌan ni, kuan daꞌvi ndo ndidaa ndo!
26 San Jesús sadaa ia:
—Naku yuꞌu yo ndidaa yo, naku ti xininchisa ñaꞌan yo ku ntsu?
Danduu ndukoo ia san táꞌvichiion ia xi tachi xiꞌin ndutsa, san kukadi kuvii. 27 San ndidaa tsa yaꞌa dayuꞌu ñaꞌan s-tsa san kachi tsa:
—Andu kuu tsa yaꞌa, kuan ntsandeꞌe tachi ya xiꞌin ndutsa ya xininchisa ñaꞌan s-tsa?
Ubi tsa ñoꞌon tachi kuiꞌia io ñuu nani Gadara
28 San saa ia ntsa enka ndodo ndutsa, sa io región Gadara, danduu kixi ubi tsa ñoꞌon tachi kuiꞌia io tsa ndidaa xiti yavi sa yenduxi ndii. Den ntseꞌe tsa, san ti en xu kachi yaꞌia ichi yukua. 29 San kuenta saa tsa jnu Jesús niꞌi ntseꞌe kána tsa san kachi tsa:
—Nasa nchoj ni xiꞌin da ndu da, dini D̶aꞌa Ndios? Ama sa vaj ni kada ñaꞌan ni d̶a san vita taꞌan ka kii chikuꞌua Ndios?
30 San yachi sa io tsa yaꞌa xuku kuaꞌa ntseꞌe kuchi, 31 san ndidaa tachi kuiꞌia sakondaꞌvi san sadaa:
—Tu na kineꞌen ñaꞌan ni d̶a, san kuemani ni sa na kiꞌin da xiti ndidaa kuchi xuku yukua.
32 San Jesús sadaa ia:
—¡Kuaꞌan!
san ora yukua kée ndidaa tachi kuiꞌia san kuyii xiti kuchi, san ndidaa kuchi kekaguaniꞌno te ndidaa te xiti ndutsa ichi nchichi, san dakaꞌa te.