Jesús ndadaguaꞌa ia en tsayee kuꞌu xi kidachiion jnu en soldadu romanu
7
San tuꞌu inini ndidaa ñayii yukua sa kaꞌan Jesús, san kuaꞌan ia san saa ia ñuu nani Capernaúm. 2 San juan io en centurión, san tsa yaꞌa io en tsa kidachiion jnu tsa en tsa kunda-ini ntseꞌe tsa doko kuꞌu s-tsa san sa io sa kuu tsa. 3 San tsaku s-tsa sa kuvaa sa kuu xiꞌin sa kida Jesús, tsandaꞌa tsa uu tonisaꞌnu kuu ñuu Israel ndasa na kukondaꞌvi tsa jnu Jesús ya sa na kixi ia san na ndadaguaꞌa ñaꞌan ia xi tsa kidachiion kuan. 4 Tsa yaꞌa saꞌan tsa sa io Jesús san sakondaꞌvi tsa, san sadaa tsa:—Nitaꞌvi tsa sa kada ni jaꞌa s-tsa; 5 kuan kida-ini tsa ku kiun ndo san mee tsa kída sa kuguaꞌa veꞌe sinagoga sa nataka da ndidaa da. 6 Jesús kuaꞌan ia xiꞌin tsa yaꞌa. San kuyachi ia jnu xeꞌe tsa yaꞌa, san centurión kuan tsandaꞌa tsa uu tsa mani xiꞌin tsa sa na kadaa: Toꞌo, ma ndiꞌi xanaa ni, kuan ti nitaꞌvi da sa yii ni xeꞌe da. 7 Juandiku, ti kuyee da sa kiꞌin mee da sa io ni. Guaꞌa ka, taꞌvichiion ni, san tsa kidachiion jnu da ya nduguaꞌa tsa. 8 Kuan dan io tsa tastuni ñaꞌan d̶a, san dan io tsa tastuni da tuku. San taꞌvichiion da s-tsa yaꞌa: Kuaꞌan san saꞌan tsa; san sadaa da s-tsa enka tsa: Naꞌa san kij s-tsa; san sadaa da xi tsa kidachiion jnu da: Kada jaꞌa, san kida tsa.
9 Kuenta tsaku xi Jesús toꞌon yaꞌa, kíxi sa sani-ini ia sa duꞌua kachi tsa yaꞌa; san naxikokagua ia, san sadaa ia xi ndidaa ñayii nchiko ñaꞌan xi ia:
—¡Kachitoꞌon ndaa da jni sa ti en naniꞌi da sa duꞌua xininchisa ñaꞌan d̶a ñuu Israel kuenta tsa yaꞌa!
10 San nasaa tsa tsandaꞌa centurión, san sa nduguaꞌa tsa kidachiion jnu centurión.
Nandoto d̶aꞌa en ñakee
11 Danduu kuaꞌan Jesús en ñuu nani Naín. Xiꞌin ndi uxi-uu tsa nchiko ñaꞌan xi ia xiꞌin kuaꞌa ntseꞌe ñayii nchiko ñaꞌan xi ia. 12 San kuyachi ia jnu ñuu san xíni ia sa ntsaka tsa ndidaa tsa en ndii sa ku chinduj s-tsa, d̶aꞌa en ñadeꞌe, nuyaꞌa kuu medii d̶aꞌa ña yaꞌa kuan kuu ña en ñakee san kuaꞌa ntseꞌe ñayii ñuu nchiko ñaꞌan kuaꞌan xi ndii. 13 San xíni ñaꞌan Jesús xan san kunda-ini ñaꞌan ia san sadaa ia:
—Ma ndaꞌyu ni.
14 Danduu kuyachi ia san kukoꞌon ia sa kaniꞌno ndii, san ndidaa tsa nchido kuan ku kuin tsa. Danduu Jesús sadaa ia:
—Yoꞌo nuyee, yoꞌo kaꞌan ntsu xi: ¡Ndukoo!
15 Danduu nu xiꞌi ndukoo nu sa kesaꞌa nu kaꞌan nu. San Jesús na kuañaꞌan ia nu xi j-nana nu. 16 San xini tsa ndidaa tsa jaꞌa sa yuꞌu ntseꞌe tsa ndidaa tsa, san kesaꞌa tsa kidakaꞌnu tsa Ndios san kachi tsa ndidaa tsa:
—¡En profeta kaꞌnu ntseꞌe tsandaꞌa Ndios sa na kaꞌan ku ndo ndidaa ndo!
kachi tsa ndidaa tsa tuku:
—¡Ndios vaxi ia sa chintsee ia xuun ia!
17 San nee Judea xiꞌin ndidaa ñuu io yachi ndidaa juan, nitoꞌon sa kída Jesús.
Ndidaa tsa tsandaꞌa Juan tsa dakuendutsa ñaꞌan
18 Ntsandeꞌe Juan tsa dakuendutsa nitoꞌon sa kida Jesús kuan ndidaa tsa nchiko ñaꞌan s-tsa nakani s-tsa. San kana tsa ubi tsa yaꞌa 19 san tsandaꞌa ñaꞌan tsa sa na kiꞌin tsa ku nduku toꞌon tsa xi Jesús san sadaa tsa: Dini kuu tsa tsa ndaꞌa Ndios sa kada sa na nanitaꞌvi ñayii, ña kuntsatu da ndidaa da xi enka tsa? 20 San saa tsa yaꞌa sa io Jesús san sadaa tsa:
—Juan tsa dakuendutsa tsandaꞌa ñaꞌan tsa d̶a san na ndukutoꞌon da jni tu dini kuu tsa tsandaꞌa Ndios sa kada sa na nanitaꞌvi ñayii, ña kuntsatu da ndidaa da xi enka tsa?
21 San ora yukua Jesús ndádaguaꞌa ia kuaꞌa ntseꞌe ñayii kuꞌu xi kii yukua, ñayii taꞌan ntseꞌe xiꞌin ñayii neꞌe tachi kuiꞌia xiꞌin kuaꞌa ntseꞌe ñayii ndada guaꞌa ia nduchinuu xi. 22 San danduu sadaa ia:
—Kuaꞌan san kadaa xi Juan sa xini yo xiꞌin sa tsaku yo: Tsa kuaa tuu jnu tsa, tsa yakua xika tsa, ndidaa ñayii tsaꞌyuniꞌno ndundoo, tsa doꞌo tsaku s-tsa, nandoto ndii, san ndidaa tsa kundaꞌvi kaꞌan toꞌon guaꞌa yaꞌa xi. 23 Na ku-iꞌni ndidaa ñayii ti dandoo sa xininchisa ñaꞌan ku ntsu.
24 Tuꞌu kunuꞌu ndidaa tsa tsandaꞌa Juan san Jesús kesaꞌa ia kaꞌan ia sa kuu Juan xi ndidaa ñayii io jukua:
—Nasa saꞌan yo sa ntsaꞌa yo desiertu kuan? En tsa yutsa kuenta en ndoo sa dakanda tachi ña? 25 San tu ñaꞌan nasa kee yo ntsaꞌa yo? En tsayee niꞌno doꞌno xaꞌvi ntseꞌe xi ña? Yoꞌo xini yo sa ndidaa ñayii sakuiꞌno doꞌno xaꞌvi ntseꞌe xi io xeꞌe rey. 26 Nasa saꞌan yo sa ntsaꞌa yo tuda? En x-profeta Ndios ña? Jon, sa ndaa kuu, ¡san en tsa kaꞌnu ntseꞌe ka sa kuxi en x-profeta Ndios! 27 Juan kuu tsa kakuneꞌe tutu sa yodotuni s-toꞌon Ndios san kachi:
Ntsuꞌu tsandaꞌa ntsu nu na kaꞌan ku toꞌon ntsu jnu yo
ndasa na danuna nu xichi yo.
28 Kachitoꞌon ntsu yo sa ndidaa ñayii káku ñuyii yaꞌa ti io ñayii xaꞌvi ka xi sa kuxi Juan ya. Doko nu ti xaꞌvi xi io sa tastuni Ndios xaꞌvi ka xi sa kuxi Juan.
29 San kuenta tsaku xi ndidaa ñayii, ntsaa ndeꞌe ndidaa tsa teyaꞌvi tuini sa kuxi Roma nakininchisa tsa sa Ndios tsandaꞌa ñaꞌan xi Juan juandiku sáꞌan tsa sa kuendutsa tsa xi Juan. 30 Doko ndidaa fariseu xiꞌin ndidaa tsa dadana ñaꞌan ley ti taꞌan xanaa tsa sa nchoxi Ndios san ti se on tsa sa dakuendutsa ñaꞌan Juan kuan s-tsa kii yukua. 31 Sadaa Jesús s-tsa ndidaa tsa tuku:
—Andu ndee ndidaa ñayii io vita? Andu ndee tsa ndidaa tsa? 32 Ndee tsa nuliin sakuntsaku jnu yaꞌvi, san kana nu xi ndidaa nu mani xiꞌin nu, sadaa nu: Tivi ntsu flauta, san ti xitasaꞌa yo; san ndaꞌvi ntseꞌe xita ntsu, san ti ndaꞌyu yo. 33 Duꞌua kida dini ndidaa ni tuku kuan kixi Juan nu dakuendutsa, san adi ndidaa xichi xu kaj nu adi koꞌo nu, san kachi ni: ¡Tachi kuiꞌia ñoꞌon nu! 34 San vaxi nu nduu ñayii ñuyii yaꞌa san xiꞌi nu saj nu san kachi ni: ¡Nu tikayoo kaꞌnu xiꞌin nu xini, nu nakuaka taꞌan xiꞌin tsa teen yaꞌvi tuini sa kuxi Roma xiꞌin nu nakuaka taꞌan xiꞌin ñayii io x-kuachi xi! 35 San ñayii kutuni xi sa kida ñayii danaꞌan sa kutuni nchisa xi ñayii.
Jesús io ia xeꞌe Simón tsa kuu en fariseu
36 En fariseu sadaa tsa sa na kiꞌin Jesús ya ku kaj ia xiꞌin tsa, san Jesús kuaꞌan ia veꞌe san intsaku ia jnu mesa. 37 San en nudeꞌe diko mee ñuu yukua, tsaku jnu sa kuaꞌan Jesús ku kaxi ia xeꞌe fariseu yaꞌa, san saa nu sa neꞌe nu en yuu sandutsa io d̶uku xi san ñoꞌon ndutsa tami xaꞌvi ntseꞌe xi. 38 San ndaꞌyu ntseꞌe nu san sa kuinxiti nu saꞌa Jesús san ndutsa jnuu nu todo saꞌa ia, san ndada yichi nu xiꞌin xidi d̶iki nu, san tsayuꞌu nu saꞌa ia, san chído nu ndutsatami saꞌa ia. 39 San fariseu kána ñaꞌan xi Jesús, kuenta xini tsa jaꞌa san sani-ini tsa: Tu tsa yaꞌa kuu nchisa en x-profeta Ndios san kinituni tsa na ñadeꞌe kuu nu kituñaꞌa s-tsa ya, en ñadeꞌe kuiꞌia nu diko mee, kuu nu en nu io x-kuachi xi. 40 Danduu, sadaa Jesús:
—Simón, io en sa nchu kachitoꞌon da jni.
San tsa yaꞌa sadaa tsa:
—Nasa kuu Toꞌo.
41 San Jesús sadaa ia:
—Ubi tsayee neyeka tsa tuini xi en tsa sañaꞌanoo s-tsa: En tsa neyeka oꞌon cientu, sa enka tsa neyeka daguacientu. 42 San nduu tsa yaꞌa ti kachi na chaꞌvi tsa san tsa toꞌon yaꞌa io tsa sakaꞌnu-ini s-tsa yaꞌa nduu tsa daa tsa yaꞌa nduu tsa kada-ini ñaꞌan ka xi tsa sañaꞌan noo tuini kuaan?
43 San Simón sadaa tsa:
—Tuj da sa tsa ío ntseꞌe ka tsa sakaꞌnu-ini sa saꞌa xi kuaan. San Jesús sadaa ia: Jon, sa ndaa kuu.
44 Danduu nantsaꞌa ia nu nudeꞌe, san sadaa ia xi Simón:
—Ntsaꞌa ni nudeꞌe yaꞌa, dan kuyii da xeꞌe ni san ti taj ni ndutsa sa ndo saꞌa da, doko nudeꞌe yaꞌa dakuchi nu saꞌa da xiꞌin ndutsa jnu nu san ndada yichi nu xiꞌin xidi d̶iki nu. 45 Dini ti tsayuꞌu ñaꞌan ni d̶a, doko nuyaꞌa ntsaa kuyii nu sa ti tuꞌu tsayuꞌu nu saꞌa da ya. 46 Dini ti chído ni aceite d̶iki da, doko nuyaꞌa chído nu ndutsatami saꞌa da. 47 Kachi da sa nu io ntseꞌe x-kuachi xi yaꞌa sa io sakaꞌnu-ini sa saꞌa nu juandiku xinimani ñaꞌan ntseꞌe nu da doko ñayii taꞌni sakaꞌnu-ini niꞌi san taꞌan ni xinimani ñaꞌan da.
48 San sadaa ia xi nudeꞌe ya:
—X-kuachi yo sa ndoo jnu Ndios.
49 Ndidaa tsa intsaku jnu mesa ndaatoꞌon tsa ndidaa mee tsa:
—Andu kuu nuyaꞌa kuan dandoo nu ndidaa kuachi jnu Ndios?
50 Danduu Jesús sadaa ia xi nudeꞌe:
—kuan sa xininchisa ñaꞌan yo ku ntsu juandiku nayaa yo xi x-kuachi yo, kadi ni ku nuꞌu.