Ndidaa ñadeꞌe xu chintsee ñaꞌan xi Jesús
8
Danduu Jesús ndinoo ia ciudad xiꞌin ciudad ñuu xiꞌi ñuu kaꞌan ia toꞌon guaꞌa sa tastuni Ndios ñayii. Xiꞌin ndi uxi-uu tsa nchiko ñaꞌan xi ia, 2 xiꞌin uu ñadeꞌe, ña ndada guaꞌa Jesús, ña ineꞌe tachi kuiꞌia xiꞌin ña kuꞌu xi: María, ña kuu ñuu magdala, ña kineꞌen ia usa tachi kuiꞌia xi; 3 Juana d̶eꞌe Cuza tsa kuu ndaꞌa saꞌa Herodes; Susana xiꞌin kuaꞌa ntseꞌe ka ña. Ña yaꞌa xu chintsee ñaꞌan ña xi Jesús xiꞌin sa xukoo xan.En tsayee ku choꞌon tata
4 Kuaꞌa ntseꞌe ñayii io ndidaa ndaꞌa ñuu kíxi ki ntsaꞌa ñaꞌan xi Jesús, san kaꞌan ia toꞌon dadaguataꞌan:
5 —En tsayee kuaꞌan tsa ku choꞌon tsa tata. San neni choꞌon tsa, uu tata koꞌio ichi san sañu nino ñaꞌan xi; san tidaa xiko andivi sas te. 6 San taꞌa ka tata koꞌio sata yuu, san kuenta kana, yichi, kuan ti niꞌi koꞌio. 7 San taꞌa ka koꞌio xiti iñu, san saꞌnu xiꞌin iñu sa dakaꞌa kida iñu. 8 San taꞌa ka koꞌio ñuꞌu guaꞌa san saꞌnu io guaꞌa ntseꞌe ni ka san io en cientu tata, xi ndiden en.
Jaꞌa kachi Jesús, sa kaꞌan ia niꞌi ntseꞌe ka:
—Andu io d̶oꞌo xi, san na kunini.
Naku xu kaꞌan ia xiꞌin toꞌon dadaguataꞌan
9 San ndi uxi-uu tsa nchiko ñaꞌan xi ia ndukutoꞌon tsa nasa nchu kachi toꞌon dadaguataꞌan yaꞌa. 10 San Jesús sadaa ia:
—Yoꞌo ndidaa yo Ndios nchu kachitoꞌon ia sa meni mee ia xini namodo tastuni ia ñayii; doko ndidaa ka ñayii yaꞌa kaꞌan ntsu toꞌon dadaguataꞌan xi kuan kuani daa na ntsaꞌa nu sa ma kini nu, san kuani daa na kunini nu ma kukuituni xanaa nu.
Jesús sadaa ia nasa nchu kachi toꞌon dadaguataꞌan sa kuu tsayee ku choꞌon tata
11 Jaꞌa, nchu kachi, toꞌon dadaguataꞌan yaꞌa: Tata kuu s-toꞌon Ndios. 12 San ndodo ichi koꞌio tata kuu kuenta ndidaa ñayii sa kunini s-toꞌon Ndios, doko kixi sakakuiꞌia san dita toꞌon yaꞌa xanaa ndidaa ñayii yaꞌa ndasa ma kininchisa tsa san ma nanitaꞌvi tsa. 13 San xiti yuu sa koꞌio taꞌa ka tata kuu kuenta ñayii tsaku xi toꞌon yaꞌa san ku-iꞌni ñayii yaꞌa. Doko ti io xoꞌo xi xanaa ñayii; san sakuni kii xininchisa ñayii yaꞌa, doko sa xitotuni ñaꞌan xi ñayii kida sa daxio ñayii jnu Ndios. 14 San tata koꞌio xiti iñu juan kuu kuenta ñayii tsaku xi, doko ti xisa san ti kee tata, kuan sani-ini ntseꞌe ka ñayii sa ku kuika ñayii, xiꞌin ndidaa sa io ñuyii yaꞌa san ti xisa guaꞌa ñayii. 15 Doko ñuꞌu guaꞌa sa koꞌio dagua ka tata kuaan jaꞌa kuu ñayii tediki toꞌon yaꞌa san kukuin ndaa san kida sa nchoxi Ndios san kee ntseꞌe tata.
Toꞌon dadaguataꞌan sa kida kandil
16 Ti en ton en kandil san chiguaꞌa adi sani x-kaꞌa xito, adi sani ndodo duku ndasa na tuu jnu ñayii yii veꞌe. 17 Kuan ti io nisadana sa yeguaꞌa san ma ndetuu, san nisa dana sa yedaꞌvi san ma en kini, san ndetuu san ku ndaa.
18 Guaꞌa ntsaꞌa ni san kunini ni kuan ñayii sakuituni xanaa xi sa kaꞌan da kukuituni ka xanaa xi, san ñayii ti sakuituni xanaa xi sa kaꞌan da san kuani taꞌa sa sakuituni xanaa xi, dita xi.
Andu ku nana, xani xiꞌin x-kuaꞌa Jesús
19 San danduu saa j-nana ia xiꞌin ndidaa xani ia, doko ti niꞌi yaꞌia ña kuan kuaꞌa ntseꞌe ñayii xuku. 20 Danduu sadaa xi ia:
—Nana ni xiꞌin xani ni nchu kaꞌan nu xiꞌin ni.
21 Doko Jesús sadaa ia:
—Ku nana ntsu xiꞌin ku kiani ntsu kuu ñayii sakunini s-toꞌon Ndios san kida.
Jesús kida ia sa na kukadi davi tachi
22 Taꞌan en kii Jesús kusaa ia en barku, xiꞌin ndi uxi-uu tsa nchiko ñaꞌan xi ia. San sadaa ia:
—Na yaꞌia ndo ntsa enka ndodo ndutsa.
San kuaꞌan tsa ndidaa tsa. 23 Doko ichi kuaꞌan tsa, xidi Jesús. Danduu kekoio en davi tachi kaꞌnu, san oni nchu daꞌvi barku san ii io sa kuu tsa ndidaa tsa. 24 San saꞌan tsa san ndaneꞌe tsa Jesús san sadaa tsa:
—¡Maestru, Maestru! ¡yachi ni kuan daꞌvi ndo ndidaa ndo vita!
san ndukoo ia san taꞌvichiion ia xi tachi xiꞌin ndutsa. San kukadi kuvii tachi. 25 Danduu ndukutoꞌon ia:
—Ami io sa xininchisa ñaꞌan yo ku ntsu?
Tsa yaꞌa yuꞌu tsa ndidaa tsa san ndatoꞌon tsa ndidaa mee tsa:
—Andu kuu tsa yaꞌa kuan ntsandeꞌe tachi ya xiꞌin ndutsa ya xininchisa ñaꞌan s-tsa?
Tsayee neꞌe tachi kuiꞌia io ñuu Gadara
26 San saa tsa xuun ñayii io Gadara sa io ntsa ndodo mar Galilea. 27 San kuenta noo Jesús barku, kee en tsayee neꞌe kuaꞌa ntseꞌe tachi kuiꞌia. Sa naꞌa ntseꞌe kuꞌu s-tsa san nisa doꞌno ti niꞌno tsa san ti xu koo tsa veꞌe, yavi sa yeꞌe ndidaa ndii xu koo tsa. 28 Doko tsa yaꞌa xíni tsa Jesús san sa kuinxiti tsa jnu ia san niꞌi ntseꞌe kána tsa:
—Nasa nchoj xo xiꞌin ntsu Jesús D̶aꞌa Ndios kaꞌnu ntseꞌe? ¡Saku ndaꞌvi ntsu xo sa ma kada ñaꞌan yo ku ntsu!
29 Kuan Jesús táꞌvichiion ia sa na kee tachi kuiꞌia yaꞌa xi tsayee yaꞌa kuan sa ku naꞌa ñoꞌon ñaꞌan s-tsa san ora xu chintsadi ñaꞌan ñayii s-tsa xu kunuꞌni tsa xiꞌin cadena doko xu diti tsa san xu kiꞌin tsa desiertu. 30 Jesús ndukutoꞌon ia san sadaa ia:
—Nasa nani yo?
San tsa yaꞌa sadaa tsa:
—Legion.
Kuan kuaꞌa ntseꞌe tachi kuiꞌia neꞌe tsa; 31 San sakondaꞌvi sa ma tsandaꞌa ñaꞌan ia xi xiti numaa sa kono naa niñu. 32 San io kuaꞌa ntseꞌe kuchi xuku jukua; san sadaa sa na tsandaꞌa ñaꞌan ia xiti ndidaa kuchi kuan xi san Jesús semani ia. 33 San ndidaa tachi kuiꞌia kee xi tsayee, san kuyii xiti ndidaa kuchi; san kikaguaniꞌno te ndidaa te xiti ndutsa ichi nchichi, san dakaꞌa te.
34 San tsa sadi kuchi ya xíni tsa sa taꞌan, san kunuꞌu tsa ñuu xiꞌin ndidaa ka ndaꞌa ñuu san nakani tsa ndidaa sa xíni tsa. 35 San kuaꞌan ñayii ñuu ya kuntsaꞌa tsa nasa kuu sa táꞌan. San saꞌan tsa sa io Jesús san naniꞌi tsa tsayee ineꞌe tachi kuiꞌia ya intsaku tsa saꞌa Jesús nino tsa doꞌno xiꞌin io guaꞌa tsa san kíxi sa dayuꞌu ñaꞌan s-tsa ndidaa tsa. 36 Ndidaa ñayii xíni juan nakani ñayii xi ndidaa ñayii ñuu sa nduguaꞌa tsa ineꞌe tachi kuiꞌia. 37 Danduu ndidaa ñayii sakondaꞌvi jnu Jesús sa na kee ia ñuu yukua, kuan yuꞌu ntseꞌe tsa ndidaa tsa, san Jesús kusaa ia barku san naxikokagua ia. 38 Tsayee kée ndidaa tachi kuiꞌia xi, sadaa tsa sa kiꞌin tsa xiꞌin Jesús, doko Jesús sadaa ia:
39 —Ku nuꞌu xeꞌe yo san nakani sa kída Ndios sa saꞌa yo.
San tsa yaꞌa kunuꞌu tsa san káꞌan tsa xi kuaꞌa ñuu sa guaꞌa kída Jesús sa saꞌa tsa.
D̶aꞌa deꞌe Jairo xiꞌin ñadeꞌe kukoꞌon ndoo Jesús
40 Kuenta nasaa Jesús enka ndodo ndutsa kaꞌnu, san ndidaa ñayii sanatan ñaꞌan xi ia, san ku-iꞌni ntseꞌe ndidaa ñayii yaꞌa kuan ntsatu tsa ndidaa tsa xi ia. 41 Danduu kíxi en tsayee nani Jairo, tsa kuu en tsa io chiion naꞌnu veꞌe sinagoga san sa kuinxiti tsa saꞌa Jesús san sakondaꞌavi tsa sa na kiꞌin ia xeꞌe tsa, 42 kuan endii d̶aꞌa deꞌe yiki tsa ío san io nu uxi-uu kuia, san sa io sa kuu nu. San Jesús kuaꞌan ia xiꞌin Jairo, dagua dagua sa xuku ndidaa ñayii yaꞌa san oni chotaꞌvi ñaꞌan tsa ndidaa tsa xi ia.
43 San juan ío en ñadeꞌe kuꞌu xan, uxi-uu kuia nayaa ñaꞌan niñi xan san ña yaꞌa oni dandeꞌe ña ndidaa sa io xan, díko ña ndasa na nduguaꞌa ña doko nisa en doctor ti kachi ndada guaꞌa ña xan, 44 san kuyachi ña ichi sata Jesús san kukoꞌon ña doꞌno ia san nono ni ndanchita ñaꞌan niñi xan.
45 Danduu Jesús sadaa ia:
—Andu kuu sa kukoꞌon ñaꞌan ku ntsu?
San ndidaa ñayii io juan kachi, adii da kida, doko Pedru sadaa tsa:
—Toꞌo, ndidaa ñayii yaꞌa chindaꞌa ñaꞌan ku ndo sa oni ñotaꞌvi ndo san ndukutoꞌon ni andu kukoꞌon ñaꞌan jni ña.
46 Jesús sadaa ia:
—Io en ñayii ku koꞌon ñaꞌan ku ntsu kuan ntsuꞌu duꞌua tuj ntsu, sa en ñayii nduguaꞌa kída sa tastuni ntsu.
47 San ñadeꞌe yaꞌa xinituni ña sa ma kada sa chiguaꞌa ña, san oni kidi ñaꞌan xan sakuinxiti ña jnu Jesús san nakani ña xi nee ñuu naku kukoꞌon ñaꞌan ña xi ia, xiꞌin sa nonoo ni nduguaꞌa ña. 48 Jesús sadaa ia:
—Didi, kukaꞌnu xanaa ni kuan sa xininchisa ñaꞌan ni da kída sa nduguaꞌa ni. Kunuꞌu ni san ma kani-ini ka ni.
49 Nisa vita kaꞌan ndeꞌe ka Jesús san kíxi en tsayee san sadaa tsa xi Jairo:
—D̶aꞌa ni sa xiꞌi nu. Ma da ndee-ini ka ni ku Toꞌo ndo xan.
50 San tsaku xi Jesús ya sa duꞌua kachi tsa yaꞌa san sadaa ia:
—Ma yuꞌu ni; kininchisa ñaꞌan ni d̶a, san d̶aꞌa ni kuan nduguaꞌa nu.
51 Saa ia veꞌe san ti nchój ia sa yii enka ñayii meni Pedru, xiꞌin Juan, Jacobo xiꞌin s-tadeꞌe nudeꞌe luchi kuan. 52 Ndidaa ñayii io jukua ndaꞌyu xiꞌin ta-uꞌu sa saꞌa nudeꞌe luchi. Doko Jesús sadaa ia:
—Ma ndaꞌyu ni. Nuyaꞌa ti xiꞌi nu, maska sa xidi nu.
53 Ndidaa tsa yaꞌa sakuntsaa ñaꞌan tsa xi Jesús, kuan xini tsa sa sa xiꞌi nu. 54 Doko Jesús teen ia ndaꞌa nu, san sadaa ia xi nudeꞌe luchi:
—Luchi ndukoo.