Ndi uxi-uu tsa nchiko ñaꞌan xi ia saꞌnu tsa yoko trigu sábado ndidaa ñayii Israel
12
En sábadoa, yaꞌia Jesús xiti en itu, san ndidaa tsa nchiko ñaꞌan xi ia kuita tsa san kesaꞌa tsa saꞌnu tsa d̶iki trigu san kiñi tsab san saj s-tsa. 2 San xíni ndidaa fariseu, san sadaa tsa:—Ntsaꞌa ka, ndidaa nu nchiko ñaꞌan xo xan kida nu sa ti guaꞌa sa kada ndo sábado.c
3 San Jesús sadaa ia:
—Ama ti kaꞌvi yo nasa kida David kuenta kuíta tsa xiꞌin ndidaa tsa kuaꞌan xiꞌin tsa kuaan ña; 4 sayii tsa xeꞌe Ndios san saj s-tsa ndidaa ita-stila sa doko xi Ndios,d sa ti guaꞌa sa kaj tsa san nisa tsa kuaꞌan xiꞌin tsa, maska sa meni ndidaa dutu.e 5 Ama ti kaꞌvi yo ley sa ndidaa sábado,f ndidaa dutu kidachiion tsag san ti xidokuachi tsa ña?h 6 Doko kachi ntsu san en tsa kaꞌnu ka sa kuxi xeꞌe Ndios io jaꞌa. 7 Yoꞌo ti xini yo nasa nchukachi toꞌon yaꞌa:i “Sa taꞌan ku kuanaa ntsu kuu sa na kunda-ini taꞌan yo san adii sa doko yo en sa doko yo ku ntsu”,j kuan tu yoꞌo na kini yo nasa nchukachi toꞌon yaꞌa san ma da kuidokuachi yo ñayii ti io x-kuachi xi. 8 Kuan ia nduu ñayii ñuyii yaꞌa kuu ia s-toꞌo sábado ya tuku.k
Duꞌua kída sa ndadaguaꞌa ia en tsayee xiꞌi en ndaꞌa xi
9 Xika ia san kuaꞌan ia veꞌe sinagoga nataka ndidaa fariseu. 10 San jaꞌa io en tsayee xiꞌi en ndaꞌa xi san ti kani; ndasa na niꞌi dakuidokuachi tsa ndidaa tsa Jesús san ndukutoꞌon tsa:
—Se on ley chidotuni Moisés sa ndadaguaꞌa ndo ñayii sábado ya ña ñaꞌan.l
11 Doko Jesús sadaa ia:
—Daa yoꞌo ndidaa yo tu io en ndikachi yo san xitaniꞌno te en yavi sábado,m ti ndu kama yo sa tagua yo te?n 12 ¡Doko xaꞌvi ntseꞌe ka en ñayii sa kuxi en ndikachi! Juandiku guaꞌa ni kada ndo sa guaꞌa sábado.o
13 Danduu sadaa ia xi tsayee xíꞌi ndaꞌa xi:
—Dakaa ndaꞌa yo xan.
San tsa yaꞌa duꞌua kída tsa, san ndaꞌa tsa nduguaꞌa, nduu enuu xiꞌin enka juan. 14 Danduu kee ndidaa fariseu, san ndatoꞌon tsa na modo kaꞌni ñaꞌan tsa xi ia.
Adi nu xinokuachi ku nuu ntsu ya yaꞌa
15 Doko Jesús xini ia ndidaa sa ndatoꞌon ndidaa tsa yaꞌa, san kée ia ñuu yukua. San nchiko ñaꞌan kuaꞌa ntseꞌe ñayii, san ndidaa tsa kuꞌu xi ndádaguaꞌa ia. 16 San sadaa ia sa ma kada vaa tsa ndidaa sa kida ia, 17 ndasa na xinotaꞌan sa kachi Isaías x-profeta Ndios:
18 Adi nu xinokuachi ku nuu ntsu ya yaꞌa, nu ndekaj ntsu;
nu xinimani ntsu, nu taꞌan-ini ku alma ntsu.
Kuañaꞌan ntsu ku Espíritu ntsu jnu,
san kaꞌan nu sa ndaka ntsu kuachi xi ndidaa ñayii, san kada ndaa ntsu.
19 Ma nandodo tsa, nisa ma kanandodo tsa,
xiꞌin nisa ma en tsaku s-tachi tsa ndidaa ichi.
20 Ma kaꞌnu ndeꞌe nu ndoo sa yekueꞌe,
nisa yuꞌua iti dika kana ñuꞌma ma dandaꞌua nu,
ntsa na ku kagua sa ndaa tastuni nu.
21 San sa nani nuyaꞌa koꞌon xanaa kuaꞌa ntseꞌe ñayii ti kuu ñuu Israel.p
Da kuidokuachi ñaꞌan xi Jesús sa niꞌi ia sa tastuni sa saꞌa Sakakuiꞌia
22 San danduu kixi uu ñayii kintsaka ñaꞌan xi en nu ñoꞌon tachi kuiꞌia xi ia, ti tuu jnu nu xiꞌin ñeꞌe nu; san ndadaguaꞌa ñaꞌan ia, san natuu nduchinuu nu xiꞌin kúu kaꞌan nu. 23 Oni sanaa ndidaa ñayii san kachi tsa ndidaa tsa:
—Ama tsa yaꞌa kuu j-raza rey David, tsa kachi sa tsandaꞌa Ndios kuan ña?
24 Doko kuenta tsaku xi ndidaa fariseu san kachi tsa ndidaa tsa:
—Beelzebú sa tastuni ñaꞌan xi ndidaa tachi kuiꞌia, sañaꞌan sa na kuu kada nuyaꞌa ndidaa jaꞌa.q
25 San Jesús xini ia sa sani-ini tsa yaꞌa ndidaa tsa, san sadaa ia:
—Ndidaa tsa tastuni taꞌntsadagua san naa ndidaa mee xita. San en ñuu adi veꞌe taꞌntsadagua ti sa kuin ndaa ka. 26 San tu sakakuiꞌia kineꞌen sakakuiꞌia, saꞌntsadagua ñaꞌan xi mee. Namodo koo ndaa sa tastuni tuda? 27 San tu dan kineꞌen da ndidaa tachi kuiꞌia xiꞌin sa tastuni Beelzebú, San xiꞌin nasa tastuni kineꞌen ndidaa ñayii xuun ni xan tachi kuiꞌia tuda? Juandiku ndidaa sa kida ndidaa nuyaꞌa nchu kachi sa adi sa ndaa kuu ndidaa sa kaꞌan ni. 28 Doko tu xiꞌin Espíritu Ndios kineꞌen da ndidaa tachi kuiꞌia, san sa ndaa kuu sa sa tastuni Ndios xanaa ndidaa ñayii sa io yachi sa io ni ndidaa ni.
29 Kuan, namodo yii en ñayii xeꞌe en tsa ntsee san teen tsa ndidaa sa io s-tsa yaꞌa tu ma diꞌnaka yii tsa kiꞌni ñaꞌan tsa? San duꞌua kuu teen tsa ndidaa sa io veꞌe.
30 Nu ti io ku ladu ntsu san xini-uꞌu ñaꞌan ku ntsu;r san nu ti nakeꞌen xiꞌin ntsu chintsayu nu.
31 Juandiku kachi ntsu sa ndidaa sa kaꞌan kuiꞌia ñayii xi Ndios koo sa kaꞌnu-ini sa saꞌa xi, doko andu nakaꞌan kuiꞌia xi Espíritu Santu ma koo sakaꞌnu-ini xi. 32 San dakaa nu na kaꞌan kuiꞌia ku ntsu, Ndios koo sa kaꞌnu-ini sa saꞌa xi; doko dakaa nu nakaꞌan kuiꞌia xi Espíritu Santu Ndios ma koo ia sa kaꞌnu-ini sa saꞌa xi, nisa ñuyii yaꞌa san nisa ñuyii vaxi.s
Sa saꞌa kuiꞌi nakini na tu kuiꞌi kuu
33 Tu en tukuiꞌi kuu sa guaꞌa san kee kuiꞌi guaꞌa, san tuu kuu tukuiꞌi kuiꞌia san kee kuiꞌi kuiꞌia; kuan xini ñaꞌan xi sa saꞌa x-kuiꞌi xi.t 34 ¡Ndidaa yoꞌo, raza koo!u Naskada kaꞌan yo sa guaꞌa tu nu kuiꞌia kuu yo? Kuan sa ñoꞌon xanaa yo kuu sa kana xuꞌu yo.v 35 Ñayii guaꞌa kaꞌan toꞌon guaꞌa kuan toꞌon guaꞌa ñoꞌon xanaa ñayii, san ñayii kuiꞌia kaꞌan toꞌon kuiꞌia kuan toꞌon kuiꞌia ñoꞌon xanaa ñayii. 36 Doko ntsuꞌu kachi ntsu sa kii na ndaka Ndios kuachi xi ndidaa ñayii, ndidaa ñayii naꞌma ndidaa toꞌon kuiꞌi káꞌan ñayii. 37 Kuan s-toꞌon yo xan kada sa kendoo guaꞌa yo jnu Ndios, san xiꞌin s-toꞌon yo xan kada sa kuidokuachi yo jnu Ndios.
Ndidaa ñayii kuiꞌia xika señal kachi Jesús
38 Danduu kaꞌan uu fariseu xiꞌin uu tsa dadana ñaꞌan ley san sadaa tsa:
—Maestru, nchu kini da ndidaa da sa na kada ni en milagru.w
39 San Jesús sadaa ia:
—Ndidaa ñayii io vita, ndee ñadeꞌe chitaꞌan xiꞌin enka tsie, kuan nchu kini ñayii en señal,x doko ma kada ntsu nisadana, kuan señal kida Ndios xi profeta Jonás juan kini ñayii yaꞌa. 40 Kuan duꞌua kuenta Jonás io tsa uni kii xiꞌin uni niñu xiti en chaka kaꞌnu,y duꞌua koo ia nduu ñayii ñuyii yaꞌa xiti nuꞌu ya uni kii xiꞌin uni niñu. 41 Ndidaa ñayii ío Nínive ndukoo kii ndaka kuachi san da kuidokuachi ñaꞌan tsa xi ndidaa tsa yaꞌa, kuan ndidaa ñayii ío Nínive na ta-uꞌu tsa kuenta tsaku s-tsa sa káꞌan Jonás,z san jaꞌa io en tsa kaꞌnu ka sa kuxi Jonás. 42 Reina ío ichi sur dakuidokuachi ñaꞌan xi ndidaa ñayii yaꞌa kii ndaka kuachi, kuan xika ntseꞌe kee ña sa kunini ña sa kutuni xi Salomón,a san jaꞌa io en tsa kaꞌnu ka sa kuxi Salomón.
Tu en tachi kuiꞌia naxikokagua
43 Duꞌua kida sa kee tachi kuiꞌia xiti en ñayii, ndinoo ñukaꞌni san nduku ami ndexavi, san ti niꞌi. 44 Danduu kaꞌan: “Nanuꞌu ntsu ku kueꞌe ntsu ami kee ntsu.” San naxikokagua xi ñayii yaꞌa, sa xini sa ti en io, guaꞌa ntseꞌe tiꞌvi xiꞌin io ndoo. 45 Danduu saꞌan sa kuaka usa ka tachi kuiꞌia ka sa kuxi. San ora yii veꞌe yukua, san sakoo juan; san kuiꞌia ka nduu ñayii yukua sa kuxi diꞌna. Duꞌua taꞌán ndidaa ñayii kuiꞌia io vita.
Ndidaa x-kuaꞌa Jesús xiꞌin ndidaa xani ia xiꞌin nana ia
46 San neni kaꞌan da ia xi ndidaa ñayii, san j-nana ia xiꞌin ndidaa xani ia xuku ña ndikeꞌe, san nchu ndatoꞌon ña xiꞌin ia. 47 San en tsa sadaa:
—Nana ni xiꞌin ndidaa xani ni in ña ndikeꞌe, san nchu ndatoꞌon ña xiꞌi ni.
48 Doko Jesús sadaa ia xi tsa duꞌua sadaa:
—Andu kuu ku kiani ntsu xiꞌin ku nana ntsu?
49 Danduu dakaa ia ndaꞌa ia ichi jnu ndidaa tsa nchiko ñaꞌan xi ia san sadaa ia: