Jesús dadana ñaꞌan ia sa ma koo ñayii uu jnu xi
12
Danduu kueni kueni taka ñayii san nonoo ni san kuaꞌa ntseꞌe ñayii táka, san oni xikaniꞌno taꞌan tsa ndidaa tsa, san Jesús diꞌna ka sadaa ia xi ndi uxi-uu tsa nchiko ñaꞌan xi ia:—Guaꞌa ni xi ndidaa fariseu xan xiꞌin sa kida tsa, kuan kida tsa sa kunda-ini ñaꞌan tsa doko ñayii uu jnu xi kuu tsa. 2 Kuan ndidaa sa yeguaꞌa ketuu, san ndidaa sa yedaꞌvi ketuu san nitoꞌon. 3 Kuan sa kaꞌan yo sa naa, san tsaku jnu ndidaa ñayii, san sa kaꞌan yuꞌu yo xiti veꞌe, ntsa d̶iki veꞌe kana ñayii.
Jesús dadana ñaꞌan ia andu na yuꞌu ndo
4 Kaꞌan ntsu xoꞌo ndidaa yo nu mani xiꞌin ntsu: Ma yuꞌu yo ñayii saꞌni yikikoño kuan danduu ma kachi ka kada ñayii nisadana. 5 Na kachitoꞌon ntsu andu yuꞌu yo: Yuꞌu ia dita vida yo san tuꞌu sani ñaꞌan ia, san tastuni ia sa dakana niꞌno ñaꞌan ia sa uꞌu sa ndaꞌvi, ia yukua yuꞌu.
6 Ti kuyaꞌvi oꞌon tidaa yiki sa saꞌa ubi tuini yiki? Doko nisa en te ti dana Ndios. 7 Ma yuꞌu yo kuan Ndios xini guaꞌa ia na daa xidi d̶iki yo io. Ma yuꞌu yo; kuan xaꞌvi ntseꞌe ka yo xi ia sa kuxi kuaꞌa ntseꞌe tidaa.
Ma yuꞌu ndo sa kaꞌan ndo sa kuu ndo xaꞌan Jesucristu
8 Na kachitoꞌon da en toꞌon ni, andu na kaꞌan sa kuu da S-toꞌo xi jnu ndidaa ñayii, san ia nduu ñayii ñuyii yaꞌa kaꞌan sa ñayii yaꞌa kuu xaꞌan nu jnu ndidaa ángel xinokuachi xi Ndios; 9 san andu na kukaꞌan jnu xi sa kuu da s-toꞌo xi jnu ndidaa ñayii, san dan kukaꞌan jnu da ñayii yaꞌa jnu ndidaa ángel xinokuachi xi Ndios.
10 Andu kuu mee ñayii na kaꞌan kuiꞌia xi ia nduu ñayii ñuyii yaꞌa, koo sakaꞌnu-ini xi, doko andu na kaꞌan kuiꞌia xi Espíritu Santu, ma koo sakaꞌnu-ini xi.
11 San tu na kuntsaka ñaꞌan tsa jnu ndidaa tsa nataka veꞌe sinagoga xiꞌin jnu ndidaa tsa tastuni san ma kani-ini ni nasa kaꞌan ni adi nasa kadaa ni. 12 Kuan Espíritu Santu taxi toꞌon kaꞌan ni.
Tsa kuika ti kixi d̶iki xi
13 Sa xuku ndidaa ñayii káꞌan en tsa kaꞌan xi ia:
—Toꞌo, kadaa ni xi xani da ya, sa na kaꞌntsa tsa sa dandoo s-tadeꞌe da d̶a.
14 San Jesús sadaa ia:
—Andu kachi sa kuu da tsa saꞌntsa dagua, adi tsa saꞌntsa sa io jni ndidaa ni?
15 San dandu sadaa Jesús:
—Ma nchoj ntsaa ni sa ti io ni, kuan sakookadi ni ñuyii ti nandeꞌe sa koo kuaꞌa ntseꞌe sa koo ni.
16 Danduu sadaa ia en toꞌon dadaguataꞌan:
—Ío en tsayee kuika ntseꞌe san ío en xuꞌun tsa san xukoo ntseꞌe s-tsa. 17 Sáni-ini tsa sa kachi tsa: “Nasa kada ndo? Kuan ti io ami choguaꞌa ndo ndidaa tata nakeꞌen ndo ya.” 18 Danduu kachi tsa “¡Jaꞌa kada ndo! Dakana ndo ndidaa yaka ya san kadaguaꞌa ndo enka yaka kaꞌnu ka. San jukua choguaꞌa ndo ndidaa tata na nakeꞌen ndo ya, 19 san ku katuu ndo sa kadaa ndo xi ku kuanaa ndo, sa io kuaꞌa ntseꞌe sa kaj yo kuaꞌa ntseꞌe kuia, ndexavi, kaxi, koꞌo, san ku-iꞌni.” 20 Doko sadaa Ndios: “¡nu chuu! niñu yaꞌa ndeꞌe yo; san ndidaa sa choguaꞌa yo xan andu kendoo xi?” 21 Duꞌua taꞌan tsa choguaꞌa sa kuika sa kuxi mee, doko tsa yaꞌa kuu tsa en tsa kundaꞌvi ntseꞌe jnu Ndios.
Ndios ntsaa ñaꞌan ia xi ndidaa d̶aꞌa ia
22 Danduu Jesús sadaa ia xi ndidaa tsa nchiko ñaꞌan xi ia:
—Ma keꞌe d̶iki ni xuyii ni adi nasa kaj ni adi sa saꞌa sa ndukutu xikikoño ni. 23 Kuan vida xaꞌvi ka xi sa kuxi sa kaxi ñayii xiꞌin doꞌno. 24 Ntsaꞌa ni ndidaa tokaka ti choꞌon te nisa ti nakeꞌen te san nisa ti io xaka te sa na choguaꞌa te, san Ndios sañaꞌan ia sa saj s-te. ¡San dini ndidaa ni xaꞌvi ntseꞌe ka ni jnu Ndios sa kuxi ndidaa tidaa ya! 25 San nasa niꞌi ni sa kani-ini ntseꞌe ni Ama guaꞌa ni kuaꞌnu ka ni en babu tu na kani-ini ni ña? 26 Tu ti kachi kada ni sa ti vixi, Naku sani-ini ni sa ntseꞌe da vixi tuda?
27 Ntsaꞌa ni ita io yuku na modo saꞌnu ti kidachiion san nisa ti kiku doꞌno san nisa rey Salomón xiꞌin ndidaa sa kuika tsa ti kachi ndukutu tsa duꞌua. 28 San tu Ndios duꞌua da ndukutu ia ita io yuku ya vita san nduyutsa dakayu ñaꞌan xi xiti ñuꞌu ¡Ti sani-ini ni nasa kuu sa kada ia sa saꞌa ni ndidaa ni, ¡dini ñayii taꞌa dii xininchisa! 29 Ma kani-ini ni nasa kaj ni adi nasa koꞌo ni. 30 Kuan ndidaa jaꞌa nduku ñayii ti kuu ñuu Israel; doko ku Tata ndo Ndios xini ia sa nandeꞌe ndidaa jaꞌa ni. 31 Diꞌna ka nduku ni sa tastuni Ndios ñayii xiꞌin kada ni sa nchoxi ia san ndidaa ka sa nandeꞌe ni taxi ia.
Sa kuika io andivi
32 Ma yuꞌu ni ndidaa ni, kuan umiꞌi ni doko ku Tata ndo taxi ia sa koo ni sa tastuni ia. 33 Diko ni ndidaa sa io ni san kuañaꞌan ni xi ñayii nandeꞌe xi, kadaguaꞌa ni ñono sa ti ndachi xiꞌin choguaꞌa ni sa kuika ti ndeꞌe andivi, sa ti yii tikidi san nisa ñaduꞌu ma yii. 34 Kuan ami io sa nchoj ntseꞌe ni juan koo xanaa ni ndidaa ni tuku.
Nandeꞌe sa kuu nchito ñayii
35 Kuiꞌno ni d̶oꞌno ni ndidaa ni san koo listo ni sa kiꞌin ni xiꞌin na kuiko ni x-kandil ni 36 San kada ni sa kida ndidaa tsa xinokuachi, ntsatu tsa xi s-toꞌo tsa sa ndij s-tsa ndee tsa viko tandaꞌa, san i-ntsaa ni tsa ndieꞌe ntsaa na kaꞌan s-toꞌo tsa sa na nakaan tsa. 37 Guaꞌadiko ndidaa ñayii xinokuachi tu na nasaa s-toꞌo tsa san na naniꞌi ñaꞌan tsa sa ntsatu tsa. Kuan kachindaa da sa nakuiꞌno tsa doꞌno tsa san kuntsaka ñaꞌan tsa sa kuañaꞌan tsa sa kaj s-tsa. 38 San kuani na nasaa tsa dagua niñu adi kuani na nasaa tsa kuiꞌi ka ¡san guaꞌadiko tsa ntsatu! 39 Doko kani-ini ni toꞌon yaꞌa, tu s-toꞌo veꞌe xini tsa na ora saa ñaduꞌu kiduꞌu tsa, san ma kachi tsa yii ñaduꞌu sa duꞌu tsa xeꞌe tsa. 40 Duꞌua dini ndidaa ni tuku koo listo ni kuan ia nduu ñayii ñuyii yaꞌa ndij s-tsa kii ti en yeꞌe d̶iki xi.
Tsa ti xinokuachi ndaa
41 Danduu Pedru sadaa tsa xi Jesús:
—Toꞌo, andu kaꞌan ni xi, mee da ndidaa da ña, ña kaꞌan ni xi ndidaa ñayii?
42 San sadaa Jesús:
—Daa tsa kuu en tsa xinokuachi ndaa, sani ñaꞌan s-toꞌo tsa s-tsa sana kuntsaka tsa ndidaa ka tsa xinokuachi san na kuañaꞌan tsa sa na kaj tsa ndiden kuita tsa xiꞌin yichi tsa. 43 Naku iꞌni tsa xinokuachi ya tu s-toꞌo tsa na nasaa tsa sa na naniꞌi ñaꞌan tsa sa kida tsa yaꞌa sa táꞌvichiion s-tsa. 44 Kachitoꞌon ndaa da jni sa tsa yaꞌa keꞌe ndaꞌa xi ndidaa sa io xi s-toꞌo tsa. 45 Doko tu tsa yaꞌa kachi tsa ku toꞌo ntsu ku kuee tsa san kesaꞌa tsa kani tsa ndidaa ka tsa xinokuachi xiꞌin ndidaa ka ña xinokuachi, san kesaꞌa tsa saj s-tsa, xiꞌi tsa, xiꞌin naxini tsa, 46 ki kii ni ndixi s-toꞌo tsa yaꞌa ora ti yeꞌe d̶iki tsa, san kaniaꞌa ntseꞌe tsa san taxuku ñaꞌan tsa xiꞌin ndidaa tsa kuiꞌia ti xininchisa.
47 Kuan tu tsa yaꞌa tediki tsa sa sadaa s-toꞌo tsa, san ti kida tsa ndoꞌo ntseꞌe tsa. 48 Doko tu tsa xinokuachi ya ti xini tsa sa nchoxi s-toꞌon tsa, taꞌa ni ndoꞌo tsa. Kuan andu niꞌi vaa san xika vaa xi, san andu kuaꞌa ntseꞌe kukaꞌnu-ini ñaꞌan xi san kuaꞌa ntseꞌe nandaka xi.
Jesús saꞌntsadagua ia ñayii
49 Vaj ntsu san neꞌe ntsu ñuꞌu ñuyii yaꞌa. ¡Doko naku ntseꞌe da nchoj ntsu sa na kuiko! 50 Doko ntsatu en sa kuendutsa ntsu en sa kaꞌnu taꞌan ntseꞌe ntsu, ¡san naku ntseꞌe nchoj ntsu sa na taꞌan ni kii! 51 Sani-ini yo sa neꞌe ntsu sa koo kadi ñayii ñuyii yaꞌa ña? ¡kachi ntsu sa ñaꞌan sa taꞌntsadagua ñayii neꞌe ntsu vaxi! 52 San ntsaa vita oꞌon ñayii koo en veꞌe san uni tsa ma kiniguaꞌa ñaꞌan xi ubi tsa, san ubi tsa ma kinimani ñaꞌan xi uni tsa. 53 Tata naa tsa xiꞌin d̶aꞌa yee tsa san d̶aꞌa yee tsa naa nu xiꞌin s-tata nu, san duꞌua ni nana xiꞌin d̶aꞌa deꞌe ña san duꞌua ni nudeꞌe xiꞌin j-nana nu san nana xido naa ña xiꞌin sono ña san duꞌua ni sono xiꞌin j-nana xido nu.
Na modo nakini ndidaa kii
54 San sadaa Jesús xi ndidaa ñayii:
—Tu xini yo nakagua viko ichi daꞌvi ora, kaꞌan yo koon davi san duꞌua kida. 55 San duꞌua tuku ora kana tachi ichi sur san kaꞌan yo ndidaa yo, nayeꞌe ntseꞌe san duꞌua kida. 56 ¡Yoꞌo ñayii uu jnu xi! nakini yo sa taꞌan andivi ya xiꞌin nuꞌu ya, Naku ti tediki yo ndidaa sa xini yo ya?
Nduku sa ndada ndaa yo xiꞌin ñayii xini-uꞌu ñaꞌan yo
57 Naku ti tediki yo nasa kuu sa guaꞌa nandeꞌe sa kada? 58 Tu nani taꞌan yo xiꞌin tsa na chiꞌiñaꞌan ndaꞌa kustixa yo, san guaꞌa ka kada ndaa xiꞌin tsa ichi kuaꞌan yo, kuan na kuntsaka ñaꞌan tsa jnu tsa saꞌntsa kuachi san tsa yaꞌa nachiꞌi ñaꞌan tsa ndaꞌa tsa yeꞌe ndaꞌa xi vekaa, san tsa yaꞌa chiꞌiñaꞌan tsa vekaa yo. 59 San kachi ntsu yo sa ma kee yo jukua ntsa na chaꞌvi yo ndidaa.