Mateu 10

Jesús ndekaxi ia ndi uxi-uu tsa tsandaꞌa ia

(Mr 3.13-19; Lc 6.12-16)

Danduu kána ia ndi uxi-uu tsa nchiko ñaꞌan xi ia, san sañaꞌan ia sa na tastuni ndidaa tsa yaꞌa sa kineꞌen tsa ndidaa tachi kuiꞌia, xiꞌin sa ndada guaꞌa tsa ndidaa ñayii kuꞌu xi xiꞌin sa dita tsa sa uꞌu.

2 San duꞌua nani ndi uxi-uu tsa tsandaꞌa ia: Diꞌnanuu Simón, tsa danani ia Pedru, xiꞌin xani tsa Andrés; Jacobo d̶aꞌa Zebedeu, xiꞌin Juan xani Jacobo; 3 Felipe xiꞌin Bartolomé; Tomás xiꞌin Mateu tsa xu teen yaꞌvi tuini sa kuxi Roma; Jacobo d̶aꞌa Alfeu, xiꞌin Tadeu; 4 Simón tsa kuu Zelote xiꞌin Judas Iscariote, tsa na kuañaꞌan Jesús xi ndidaa ñayii xini-uꞌu ñaꞌan xi ia.

Sa kída ndi uxi-uu tsa nchiko ñaꞌan xi Jesús

(Mr 6.7-13; Lc 9.1-6)

5 Ndi uxi-uu tsa yaꞌa tsandaꞌa Jesús, san sadaa ia:

—Ma kiꞌin yo xichi ndidaa ñayii ti kuu ñuu Israel, nisa ma yii yo xuun ndidaa ñayii kuu Samaria. 6 Guaꞌa ka kuaꞌan ku nanduku ndidaa ñayii kuu ñuu Israel ndee ndikachi xíta. 7 San ami nakiꞌin yo san kaꞌan, sa kadaa: “Sa tastuni Ndios ñayii kuyachi sa io ni”. 8 Ndadaguaꞌa ñayii kuꞌu xi, ndaneꞌe ndii, ndadandoo ndidaa ñayii tsaꞌyu xeen xi, san kuiko tachi kuiꞌia. Sa taj daa Ndios xo, kuañaꞌan daa tuku.

9 Ma kuneꞌe yo mediu, oro, nisa plata, san nisa cobre. 10 Nisa ma kuneꞌe yo ñono ita sa kaj xo ichi, nisa ubi doꞌno, nisa ubi nchisa, nisa ubi yutu sa ketuu yo; kuan tsa kidachiion nitaꞌvi tsa sa niꞌi tsa sa kaj s-tsa.

11 Dakaa veꞌe adi ñuu na yii yo nduku tu io en veꞌe sa guaꞌa ni kendoo yo san kendoo juan ntsa na kee yo kiꞌin yo enka xichi. 12 San ora yii yo veꞌe kadaa sa Ndios na kuañaꞌan sa na koo kadi xi ndidaa ñayii io juan. 13 Tu veꞌe yukua na kinimani ñaꞌan xo san toꞌon kida sa na koo kadi ñayii koo juan. Doko tu ma kuemani ñaꞌan xo san toꞌon kida sa koo kadi ñayii naxikokagua xiꞌin yo. 14 San tu ti semani ñayii san nisa ti en nchukunini ñaꞌan xo, san tikee veꞌe yukua adi ñuu yukua san kidi tiachi ndaꞌa saꞌa yo ndasa na kini sa Ndios diko-ini ñaꞌan ia xi ñuu yukua. 15 Kuan kachitoꞌon ndaa ntsu xo sa kii ndakakuachi taꞌa ni kuu sa táꞌan ndidaa ñayii ío Sodoma xiꞌin Gomorra, sa kuxi sa taꞌan ndidaa ñayii yaꞌa.

Kixi sa kuiko ñaꞌan xi ñayii

16 San vita ntsuꞌu tsandaꞌa ñaꞌan ntsu xo na en ndikachi sa io ndidaa ndikuaan. Mii ku kuu kuenta ndidaa koo xiꞌin ku kuu masu kuenta en data. 17 Guaꞌa yo xiꞌin ndidaa ñayii, kuan nachiñaꞌan tsa ndaꞌa tsa tastuni xo san xiti veꞌe sinagoga ndoꞌo yo. 18 Na chiñaꞌan tsa ndaꞌa gobernador xiꞌin rey xo sa saꞌa sa xininchisa ñaꞌan yo ku ntsu, duꞌua taꞌan yo san kaꞌan yo sa kuu ntsu xi ndidaa tsa yaꞌa xiꞌin kaꞌan yo xi ndidaa ñayii ti kuu ñuu Israel. 19 San ora na nachiꞌi ñaꞌan ndaꞌa ndidaa tsa yaꞌa xo, san ma kani-ini yo nasa kaꞌan yo, kuan Ndios taxi ia toꞌon kaꞌan yo ora yukua. 20 Kuan adii yoꞌo kuu sa kaꞌan, x-Espíritu ku Ndios ndo kaꞌan sa saꞌa yo.

21 Nuyee kuan nakuañaꞌan nu xani nu ndasa na kaꞌni ñaꞌan jnu, tata kuaan nakuañaꞌan tsa d̶aꞌa tsa. San ndidaa daꞌa naxikokagua nu xi s-tadeꞌe nu san ntsaꞌa vii nu kuu tsa. 22 San kini uꞌu ñaꞌan ñayii xo sa saꞌa sa xininchisa ñaꞌan yo ku ntsu. Doko nu nakuin ndaa xiꞌin ku toꞌon ntsu ntsaa na ndeꞌe ndidaa, nuyaꞌa kuu nu niꞌi ñuyii ma ndeꞌe. 23 San tu na kuiko ñaꞌan xo en ñuu san kuaꞌan enka ñuu. Kuan kachi ndaa ntsu xo sa nisa ma ndeꞌe ndinoo yo nee Israel ya antika sa ndixi ia nduu ñayii ñuyii yaꞌa.

24 Nu dakuaꞌa ti kaꞌnu ka nu sa kuxi tsa dakuaꞌa ñaꞌan jnu, nisa tsa kidachiion ti kunaꞌnu ka tsa sa kuxi s-toꞌo tsa. 25 Nu dakuaꞌa ku kuu nu kuenta tsa dakuaꞌa ñaꞌan jnu, san tsa kidachiion kuenta s-toꞌo tsa. Tu Beelzebú s-toꞌo ndidaa tachi kuiꞌia danani ñaꞌan tsa ndidaa tsa ku ntsuꞌu, ¡nasa ka ma danani ñaꞌan tsa ndidaa tsa xoꞌo nu xininchisa ñaꞌan ku ntsu!

Andu na ndeꞌe sa yuꞌu ñaꞌan xi

(Lc 12.2-7)

26 Juandiku ma yuꞌu yo. Kuan ndidaa sa yedaꞌvi ndetuu, san sa yeguaꞌa ketuu san nitoꞌon. 27 Sa kaꞌan yuꞌu ntsu xo, kaꞌan xi ndidaa ñayii; san sa kaꞌan yaa ntsu d̶oꞌo yo, kana ntsa d̶iki veꞌe. 28 Ma yuꞌu yo ñayii saꞌni yikikoño kuan ma kachi kaꞌni nu alma. Guaꞌa ka yuꞌu ia tastuni ia guaꞌani kada sa taꞌan ntseꞌe yo xiꞌin koꞌno x-alma yo xiꞌin xikikoño yo xiti antsaya.

29 Ama kuyaꞌvi ubi tidaa yiki sa saꞌa en tuini yiki ña? Doko nisa en kitiaꞌa ti koꞌio nuꞌu tu ti semani s-Tata yo Ndios. 30 Kuan ntsandeꞌe ndidaa xidi d̶iki yo kaꞌvi Ndios nadaa io. 31 Juandiku ma yuꞌu yo, kuan xaꞌvi ka yo sa kuxi kuaꞌa ntseꞌe tidaa yiki.

Andu ti nayuꞌu sa xininchisa ñaꞌan xi Jesús jnu ñayii

(Lc 12.8-9)

32 Ndidaa nu na kaꞌan sa ntsuꞌu kuu s-toꞌo xi jnu ndidaa ñayii, san ntsuꞌu kaꞌan ntsu sa kuu nu nu ndekaj ntsu jnu Tata ntsu ia io andivi. 33 San nu na kaꞌan sa ti xini ñaꞌan ku ntsu jnu ndidaa ñayii, ntsuꞌu kadaa ntsu sa ti xini ñaꞌan ntsu jnu, jnu ku Tata ntsu ia io andivi.

Vaj ntsu kada ntsu sa na taꞌntsadagua ñayii duꞌua kachi Jesús

(Lc 12.51-53; 14.26-27)

34 Ma kani-ini yo sa vaj ntsu kada ntsu sa kadi ni na koo ñayii. Adii vaj ntsu sa kada ntsu sa duꞌua na koo, kuan vaj ntsu sa taꞌntsadagua ñayii. 35 Vaj ntsu sa kada ntsu sa na naa nuyee xiꞌin s-tata nu, nudeꞌe xiꞌin jnana nu san sono xiꞌin jnanaxido nu. 36 San ndidaa nu io eni veꞌe kini uꞌu taꞌan nu.

37 Andu nchoj ntseꞌe ka s-tadeꞌe xi sa kuj ntsu, ti nandeꞌe sa kunani nu ku kiaꞌan ntsu, san nu nchoj ntseꞌe ka d̶aꞌa yee xi adi d̶aꞌa deꞌe xi, ti nandeꞌe sa kunani nu ku kiaꞌan ntsu. 38 Nu ti io listo sa kuu sa saꞌa ntsu san ti sa kunchiko ñaꞌan ku ntsu ti natavi nu sa kunani nu ku kiaꞌan ntsu. 39 Nu io modo nchoj mee dakuita nu xuyii nu, doko nu nakuaꞌa ñaꞌan xuyii xi sa saꞌa ntsu san na niꞌi nu.

Sa guaꞌa niꞌi

(Mr 9.41)

40 Nu taꞌan-ini ñaꞌan xo san ntsuꞌu taꞌan-ini nu, san andu taꞌan-ini ñaꞌan ku ntsu san taꞌan-ini ñaꞌan xi ia tsandaꞌa ñaꞌan ku ntsu. 41 San andu taꞌan-ini ñaꞌan xi en tsa kuu x-profeta Ndios, san niꞌi tsa sa niꞌi en tsa kuu x-profeta Ndios; san andu taꞌan-ini ñaꞌan xi en ñayii kida sa ndaakuiti, san niꞌi en sa niꞌi ñayii kida sa ndakuiti. 42 San andu na kuañaꞌan en yaxi ndutsa vixi xi en nuyiki yaꞌa kuan kuu nu en nu xininchisa ñaꞌan ku ntsu, kachitoꞌon ndaa ntsu san ma kuita sa guaꞌa niꞌi nu.