Duꞌua kída sa ndadaguaꞌa Jesús en tsayee ti kachi kaka
9
Danduu kusaa Jesús barku, san taꞌantsa ia ndutsa san nasaa ia xuun ia. 2 Danduu kintsaka tsa ndidaa tsa en tsa kuꞌu xi ti kachi kaka, kaniꞌno tsa en kamilla. San xíni Jesús sa xininchisa ñaꞌan ndidaa tsa yaꞌa xi ia, san sadaa ia xi tsa ti kachi kaka:—Dito, x-kuachi ni sa ndoo jnu Ndios.
3 Uu tsa dadana ñaꞌan ley sani-ini tsa: “Kaꞌan kuiꞌia nuyaꞌa xi Ndios san kaꞌnu en kuachi kida nu kuan eni nchu ku kuu nu xiꞌin Ndios.” 4 San xínituni Jesús sa sani-ini tsa yaꞌa ndidaa tsa, san ndukutoꞌon ia:
—Naku duꞌua sani-ini ni ndidaa ni? 5 Nasa kama ka sa kadaa xi en tsa ti kachi kaka: “X-kuachi ni sa dandoo Ndios”, ña: “Ndukoo ni san nakeꞌen ni x-kamilla ni xan san kaka ni”? 6 Doko na dadana ñaꞌan da jni sa ia nduu ñayii ñuyii yaꞌa tastuni nu sa koo nu sa kaꞌnu-ini sa saꞌa x-kuachi ñayii nuꞌu ya.
Danduu sadaa ia xi tsa ti kachi kaka:
—Ndukuin ni; san nakeꞌen ni x-kamilla ni xan san kunuꞌu ni xeꞌe ni.
7 San tsayee yaꞌa ndukoo tsa sa kunuꞌu tsa xeꞌe tsa. 8 San kuenta xíni ndidaa ñayii ya jaꞌa san kíxi sa dayuꞌu ñaꞌan s-tsa ndidaa tsa san kídakaꞌnu tsa Ndios, kuan tsandaꞌa ia en tsa tastuni.
Jesús kana ñaꞌan ia xi Mateu
9 San yaꞌia ia en taꞌa ka kanduu, san Jesús xíni ia en tsayee nani Mateu, tsa yaꞌa intsaku tsa teyaꞌvi tsa tuini sa kuxi Roma, san sadaa ia:
—kunchiko ñaꞌan ku ntsu.
San tsa yaꞌa ndukuin tsa san kuaꞌan tsa xiꞌin ia.
10 En kii intsaku Jesús xiꞌin tsa yaꞌa xeꞌe tsa saxi ia, san jaꞌa xuku kuaꞌa ntseꞌe tsa teen yaꞌvi tuini sa kuxi Roma xiꞌin kuaꞌa ka ñayii io x-kuachi xi saa san sakuntsaku jnu mesa xiꞌin Jesús xiꞌin ndidaa tsa nchiko ñaꞌan xi ia. 11 Danduu xíni ñaꞌan ndidaa fariseu, san sadaa tsa xi ndidaa tsa nchiko ñaꞌan xi ia:
—Naku saxi Maestru yo xan xiꞌin ndidaa tsa teyaꞌvi tuini sa kuxi Roma xiꞌin tsa io x-kuachi xi xan?a
12 San tsaku xi Jesús san sadaa ia:
—Tsa io guaꞌa ti nandeꞌe doctor s-tsa, maska sa ñayii kuꞌu xi. 13 Kuaꞌan san dakuaꞌa nasa nchukachi toꞌon yaꞌa:b “Sa kunda-ini ñaꞌan nchoj ntsu adii sa doko yo en sa doko yo.”c Kuan ti vaj ntsu ki kana ntsu ñayii sani-ini sa kuu ñayii guaꞌa, vaj ntsu ki kana ntsu ñayii na kininchisa sa io x-kuachi xi.
Duꞌua dádana ñaꞌan Jesús sa nakoonchitsa ñayii
14 Danduu ndidaa tsa nchiko ñaꞌan xi Juan saꞌan tsa sa io Jesús san ndukutoꞌon tsa:
—Naku dan ndidaa da xiꞌin ndidaa fariseu ya sakoo nchitsa ntseꞌe da, doko ndidaa tsa nchiko ñaꞌan jni xan ñaꞌan?
15 Jesús sadaa ia:
—Ama sa koo ndaꞌvi ndidaa tsa io viko tandaꞌa neni io daa nuyee tandaꞌa kuaan sa io tsa ndidaa tsa ña? Doko kixi kii sa kuntsaka tsa nuyee tandaꞌa kuaan kiꞌin, san ora yukua koo nchitsa tsa ndidaa tsa.
16 Ti en na chiꞌi en titsaa saa en daꞌma tuꞌu, kuan sa na kikuntsaa taꞌan nakendii san kuiꞌia ka sa kagua. 17 San nisa ti choꞌon vinu tinchiꞌio saa xiti ñee tuꞌu, kuan ñee katu, san vinu tinchiꞌio sakuintsayu, san nee ñee kuaan tivi. Guaꞌa ka, choꞌon vinu saa xiti ñee saa, san nduu kudii.
En nudeꞌe luchi xiꞌi xiꞌin en Ñadeꞌe kukoꞌon d̶oo Jesús
18 San neni kaꞌan ia toꞌon yaꞌa, kíxi en tsa kunaꞌnu san sakuinxiti tsa jnu Jesús, san sadaa tsa:
—D̶aꞌa deꞌe da dika xiꞌi nu. Doko naꞌa ni san kakindodo ni ndaꞌa ni sata nu, san na nandoto nu.
19 San Jesús ndukuin ia san nchiko ñaꞌan ia kuaꞌan xiꞌin ndidaa tsa nchiko ñaꞌan xi ia. 20 San en ñadeꞌe nayaa ñaꞌan niñi xan san ti kukuin san sa kuu uxi-uu kuia duꞌua kuꞌu xan, san tuꞌua ña ichi sata ia san kukoꞌon ña jnu d̶oo Jesús; 21 kuan sani-ini ña: “Tu na kukoꞌon ndo kuani taꞌa dii d̶oꞌno ia, san nduguaꞌa ndo”. 22 Doko Jesús, naxikokagua ia san ntsaꞌa ñaꞌan ia xan, san sadaa ia:
—Didi kukaꞌnu xanaa ni kuan sa xininchisa ñaꞌan ni d̶a kída sa nduguaꞌa ni.
San nonoo ni nduguaꞌa ña.
23 Kuenta saa Jesús xeꞌe tsa kunaꞌnu san xíni ia ndidaa tsa tivi flauta xiꞌin ndidaa ñayii ndaꞌyu ntseꞌe, 24 san sadaa ia:
—Tikee, kuan nudeꞌe luchi ya xidi nu, adii xiꞌi nu. San sakuntsaa ñaꞌan tsa ndidaa tsa xi ia. 25 Tuꞌu kee ndidaa ñayii, san kuyii ia san teen ia ndaꞌa nu; san nudeꞌe luchi ndukoo nu. 26 San ndidaa sa taꞌan kúvaa ntseꞌe nee ñuu yukua.
Jesús ndada guaꞌa ia nduchinuu ubi tsa kuaa
27 Neni yaꞌia Jesús ichi yukua, nchiko ñaꞌan ubi tsa kuaa san kana ntseꞌe tsa san kachi tsa:
—¡Jesús, j-raza rey David, kunda-ini ñaꞌan ni d̶a!
28 San nasaa ia veꞌe, san nduu tsa kuaa saꞌan tsa sa io ia. San Jesús sadaa ia:
—Xininchisa yo sa guaꞌani kada ntsu jaꞌa ña?
san tsa yaꞌa nduu tsa sadaa tsa:
—Jon, Toꞌo.
29 Danduu kukoꞌon ia nduchinuu tsa yaꞌa san sadaa ia:
—Sa xíninchisa ñaꞌan yo ku ntsu san duꞌua na kada.
30 San nduchinuu tsa nakaan san kúu tuu jnu tsa. Danduu Jesús deen ntseꞌe sadaa ia toꞌon yaꞌa:
—Ntsaꞌa ka nisa en ñayii ma kini jaꞌa.
31 Doko nduu tsa yaꞌa kée tsa san kída vaa tsa sa kuu Jesús nee ñuu yukua.
Duꞌua taꞌan kuenta ndada guaꞌa Jesús en tsa ñeꞌe
32 Neni kee tsa yaꞌa nduu tsa, san kintsaka tsa en tsa ñeꞌe xiꞌin ñoꞌon tsa tachi kuiꞌia. 33 San kuenta kee tachi kuiꞌia, tsa ñeꞌe kaꞌan tsa. San ndidaa ndituꞌu ñayii oni sanaa tsa san kachi tsa ndidaa tsa:
—Ti on xini ndo jaꞌa ñuu Israel ya.
34 Doko ndidaa fariseu kachi tsa:
—Sa saꞌa sa tastuni ñaꞌan xi ndidaa tachi kuiꞌia kineꞌen nu tachi kuiꞌia.d
Jesús kunda-ini ñaꞌan ia xi ndidaa ñayii
35 Jesús ndinoo ia dakuaꞌa ñaꞌan ia ndidaa ñuu, xiꞌin ndidaa ndaꞌa ñuu, xiꞌin ndidaa veꞌe sinagoga xu nataka ñayii, káꞌan ia toꞌon sa tastuni Ndios ñayii xiꞌin xu ndadaguaꞌa ia ndidaa tsa taꞌan nadataꞌan nadatuꞌu kueꞌe xiꞌin tsa uꞌu xi.e 36 San xíni ia ndidaa ñayii, san kunda-ini ñaꞌan ia; kuan xavi tsa xiꞌin kundaꞌvi xanaa tsa ndidaa tsa san ndee tsa ndidaa tsa ndikachi ti io s-toꞌo xi.f 37 Danduu sadaa ia xi ndidaa tsa nchiko ñaꞌan xi ia: