Jesús ndada guaꞌa ia en tsayee neꞌe tachikuiꞌia io ñuu Gadara
5
Saa tsa ntsa enka ndodo ndutsa sa kuu xuꞌun ñayii io Gadara. 2 San nisa vita noo guaꞌa ka ia barku san saa en tsayee neꞌe kuaꞌa ntseꞌe tachi kuiꞌia kee sa io yavi sa sa ntsaka ñaꞌan xi ndii. 3 Tsayaꞌa xu koo tsa xiti yavi io kagua sa xu chiꞌi ñayii ndii. San ti en xu kuntsee ñaꞌan sa kiꞌni ñaꞌan xiꞌin cadena s-sta, 4 kuaꞌa ntseꞌe guelta xu kiꞌni ndaꞌa tsa xiꞌin saꞌa tsa xiꞌin cadena doko tsayee yaꞌa xu kaꞌntsa tsa san ti en xu kuntsee ñaꞌan s-tsa xiꞌin sa kada masu ñaꞌan s-tsa. 5 San nduu xiꞌin niñu xu ndinoo tsa yavi io kagua, sa yeꞌe ndidaa ndii xiꞌin ndidaa yuku xu kana tsa, san xu diti tsa mee tsa xiꞌin yuu. 6 Kuenta xini tsa Jesús sa xika vaxi ia, san xino tsa saꞌan sa kuinxiti jnu ia. 7 San niꞌi ntseꞌe kana tsa san sadaa tsa:—¡Nasa nchoj ni xiꞌin da Jesús, D̶aꞌa Ndios kaꞌnu ntseꞌe! Ma kada ñaꞌan ni d̶a ku ndo.
8 Kuan Jesús sadaa ia:
—¡Ti kee nu xan, yoꞌo tachi kuiꞌia!
9 San ndukutoꞌon ia:
—Nasa nani yo?
San sadaa:
—Legión, kuan kuaꞌa ntseꞌe da.
10 San sakondaꞌvi ntseꞌe ndidaa sa ma kineꞌen ñaꞌan ia ndaꞌa ñuu yukua xi. 11 San yachi juan xuku kuaꞌa ntseꞌe kuchi. 12 San sakondaꞌvi ndidaa san sadaa xi Jesús:
—Tsandaꞌa ñaꞌan ni sa io ndidaa kuchi yukua, san nayii da sa io te.
13 San Jesús semani ia, san kee ndidaa tachi kuiꞌia san kuyii xiti ndidaa kuchi, san ndaa ubi mil kuchi kuu te, san ndidaa kitiaꞌa kikaguaniꞌno te ndidaa te xiti ndutsa, ichi nchichi san dakaꞌa te.
14 San ndidaa tsa sadi te xini tsa sa taꞌan, san kunuꞌu tsa ñuu yukua san nakani tsa xi ndidaa ñayii sa xini tsa sa taꞌan. 15 San saꞌan tsa sa io Jesús san xíni tsa tsayee ineꞌe ndidaa tachi kuiꞌia, san tsa yaꞌa intsaku tsa, san niꞌno tsa doꞌno san io guaꞌa io diko tsa; san ndidaa tsa yaꞌa yuꞌu ntseꞌe tsa. 16 San ndidaa tsa xíni sa taꞌan tsayee ineꞌe tachi kuiꞌia ya xiꞌin sa taꞌan ndidaa kuchi, nakani tsa xi ndidaa ka ñayii, 17 danduu kesaꞌa tsa sakondaꞌvi tsa ndidaa tsa xi Jesús sa na kee ia ñuu yukua.
18 Naxikokagua Jesús sa nantsee ia barku san tsa ineꞌe tachi kuiꞌia sakondaꞌvi tsa sa na kuntsaka ñaꞌan ia na kiꞌin. 19 Doko ti semani Jesús, guaꞌa ka sadaa ia:
—Ku nuꞌun xeꞌe yo sa io ndidaa xayii yo san nakani ndidaa sa naꞌnu kida Ndios sa saꞌa yo xiꞌin sa kunda-ini ñaꞌan ia xo.
20 San kunuꞌu tsa yaꞌa san kesaꞌa tsa kaꞌan tsa xi ñayii io ñuu nani Decápolis sa naꞌnu kida Ndios sa saꞌa tsa, san ndidaa ñayii sani-ini ntseꞌe.
D̶aꞌa deꞌe luchi en tsa nani Jairo xiꞌin ñadeꞌe kukoꞌon jnu ndoo Jesús
21 Yaꞌia nituku Jesús xiꞌin barku en ndodo mar san kuenta noo ia, kuaꞌa ntseꞌe ñayii nataka jnu ia, san in ia ndodo mar. 22 San kixi en tsa io chiion naꞌnu veꞌe sinagoga, nani tsa Jairo. Xini ñaꞌan tsa san sakuinxiti tsa saꞌa ia. 23 San sakondaꞌvi ntseꞌe tsa:
—D̶aꞌa deꞌe da sa io sa ndeꞌe nu. Na kiꞌin ndo xeꞌe da kuan na kakindodo ni ndaꞌa ni sata nu san na nduguaꞌa nu.
24 Kuaꞌan Jesús xiꞌin tsa. San nchiko ñaꞌan kuaꞌa ntseꞌe ñayii xi ia, san oni chotaꞌvi ñaꞌan tsa ndidaa tsa xi ia. 25 San juan io en ñadeꞌe nayaa ñaꞌan niñi xan, san sa kuu uxi-uu kuia ti ku kuin. 26 Taꞌan ntseꞌe ña san doctor xiꞌin doctor xu kiꞌin ña, san oni dandeꞌe ña ndidaa sa io xan, san nisadana ti kida; kuan duꞌua ka xu kuꞌu xan. 27 Tsaku xan san kaꞌan sa kuu Jesús, kix xan ichi sata ndidaa ñayii san kukoꞌon ña jnu d̶oo ia, 28 kuan sani-ini ña: Tu na kukoꞌon ndo kuani d̶oꞌno ia, san nduguaꞌa ndo. 29 San nonoo ni kukadi niñi san tu tuni xan sa nduguaꞌa ña, xi sa kida uꞌu xan. 30 San xínituni ia sa kee poder xi ia san naxikokagua ia sa io ndidaa ñayii san ndukutoꞌon ia:
—Andu kukoꞌon ku doꞌno ntsu?
31 San ndi uxi-uu tsa nchiko ñaꞌan xi ia sadaa tsa:
—Ntsaꞌa ni sa ndidaa ñayii chindaꞌa ñaꞌan ku ndo san ndukutoꞌon ni, andu kukoꞌon ñaꞌan jni ña?
32 San ntsaꞌa ni on ia tu nakini ia andu kuu sa kukoꞌon ñaꞌan xi ia. 33 San ñadeꞌe yaꞌa oni kidi ñaꞌan xan sa yuꞌu ntseꞌe ña, san xíni ña sa táꞌan ña san saꞌan ña san sakuinxiti ña jnu ia san sadaa ndaa ña. 34 San Jesús sadaa ia:
—Didi kukaꞌnu xanaa ni kuan sa xininchisa ñaꞌan ni da kída sa nduguaꞌa ni. Kunuꞌu kadi ni kuan san nduguaꞌa ni.
35 Kixi uu ñayii kee xeꞌe Jairo san sadaa:
—D̶aꞌa luchi ni sa xíꞌi nu ma dandiꞌi ka ni xanaa maestru xan.
36 Doko ti choꞌon doꞌo Jesús sa kaꞌan ndidaa tsa yaꞌa, san sadaa ia xi Jairo:
—Ma yuꞌu yo kininchisa ñaꞌan ku ntsu.
37 San ti semani ia sa kunchiko ñaꞌan kuaꞌa ñayii, meni Pedru, Jacobo xiꞌin Juan xani Jacobo. 38 San saa ia xeꞌe Jairo, san xini ia ndidaa sa kuu vaa xiꞌin ndidaa san ndaꞌyu vee ñayii xiꞌin sa ta-uꞌu ndidaa ñayii. 39 San kuyii ia veꞌe san sadaa ia:
—Naku ntseꞌe da kida vaa yo ndidaa yo san ndaꞌyu yo, nudeꞌe luchi xan ti xiꞌi nu maska sa xidi nu.
40 San ndidaa ñayii yaꞌa sakuntsaa ñaꞌan tsa xi ia. Doko kineꞌen ia ndidaa ñayii yaꞌa san xika ia sa na kendoo s-tadeꞌe nudeꞌe luchi xiꞌin ndi uni tsa nchiko ñaꞌan xi ia san kuyii tsa xiꞌin ia sa io nu deꞌe luchi. 41 Teen ia ndaꞌa nudeꞌe luchi san sadaa ia:
—Talita cumi; sa nchukachi: Yoꞌo nudeꞌe luchi kaꞌan ntsu xi, ndukoo.