Kaꞌan Jesús toꞌon dadaguataꞌan xiꞌin tsa choꞌon tata
4
Kesaꞌa nituku ia dakuaꞌa ñaꞌan ia ndodo mar, san nataka kuaꞌa ntseꞌe ñayii, juandiku kukee ia xiti en barku san kuaꞌan ia taꞌa xiti ndutsa san kukoo ia, san ndidaa ñayii xuku ntsa ndodo mar kuan. 2 San dakuaꞌa ñaꞌan ia kuaꞌa ntseꞌe toꞌon dadaguataꞌan. San sadaa ia:3 —Kunini ndidaa yo: En tsayee kuaꞌan tsa ku dakaa tsa tata. 4 San neni dakaa tsa, uu koꞌio ndodo ichi, san naniꞌi tidaa san saj ste. 5 San taꞌa ka tata koꞌio xiti yuu sa ti io vaa ñuꞌu, san kama ni kana kuan taꞌa ni ñuꞌu todo. 6 San kana ora san din sa yichi kuan xoꞌo xi ti niꞌi koꞌio. 7 San taꞌa ka koꞌio xiti iñu. San saꞌnu xiꞌin iñu san dakaꞌa kida iñu san ti io. 8 San taꞌa ka tata kuaan koꞌio ñuꞌu koko san saꞌnu, san guaꞌa ntseꞌe io, ami yeꞌe oko uxi, ami yeꞌe unidiko, ami yeꞌe en cientu ndiden en.
9 San sadaa Jesús:
—Andu io d̶oꞌo xi san na kunini.
Nasa nchukachi ndidaa toꞌon dadaguataꞌan
10 San kendoo nika mee Jesús xiꞌin ndi uxi-uu tsa nchiko ñaꞌan xi ia san ndukutoꞌon tsa ndidaa tsa nasa nchukachi ndidaa toꞌon dadaguataꞌan yaꞌa. 11 San sadaa ia:
—Yoꞌo ndidaa yo semani Ndios sa na kini yo sa meni mee ia xini na modo tastuni ia ñayii kuu xaꞌan ia, doko ndidaa nu ti yeꞌe ndaꞌa ia, san ndidaa toꞌon yaꞌa kaꞌan xiꞌin toꞌon dadaguataꞌan, 12 ndasa na ntsaꞌa nu sa ma kini nu san na kunini nu san ma kukuituni xanaa nu; san ma na nata-uꞌu nu san duꞌua ma koo sa sakaꞌnu-ini sa saꞌa x-kuachi nu.
Jesús sadaa ia nasa nchu kachi sa kachi ia xi tsa dakaa trigu
13 Danduu sadaa ia:
—Ti sakuituni xanaa yo ndidaa yo sa nakani ntsu ya ña? Nasa kada yo sa na kukuituni xanaa yo ndidaa ka sa na nakani ntsu tuda? 14 Tsa choꞌon tata kuu tsa kaꞌan toꞌon guaꞌa yaꞌa. 15 Dagua ñayii taꞌan kuenta taꞌan tata koꞌio ichi kuan tuꞌu sakunini tsa toꞌon guaꞌa yaꞌa. San kixi sakakuiꞌia san dita toꞌon guaꞌa kaꞌan xi ñayii yaꞌa. 16 San dagua ñayii taꞌan kuenta taꞌan sa koꞌio xiti yuu kuan tsaku xi ñayii toꞌo guaꞌa ya, san ku-iꞌni ntseꞌe ñayii 17 doko ti saa toꞌon ya xanaa ñayii kuan kuenta kida en tata ti teyoꞌo guaꞌa duꞌua kida, san taꞌa ni ku yakui. Kuan kixi sa sa kodondaꞌa ñaꞌan ñayii adi sa xikoñaꞌa ñayii sa saꞌa toꞌon guaꞌa ya, san danduu nayuꞌu ñayii yaꞌa. 18 San dagua ñayii taꞌan sa taꞌan tata koꞌio xiti iñu. Ñayii yaꞌa xiꞌin nee xanaa xi sa kunini tsa toꞌon guaꞌa ya, 19 doko ndiꞌi ka xanaa tsa sa koo tsa modo nchoj s-tsa, ndiꞌi ka xanaa tsa ndidaa sa kuika io ñuyii yaꞌa, xiꞌin na modo koo ka ndidaa sa nchoj, san dana xanaa tsa san ti en senchiion ñaꞌan s-tsa kuenta taꞌan tata kuan dakaꞌa san ti sakoo. 20 San dagua ka ñayii kuu kuenta tata koꞌio ñuꞌu koko kuan sakunini ñayii yaꞌa toꞌon guaꞌa ya, san xininchisa ñayii san ñayii yaꞌa ndee tata sakoo s-tata xi, ami yeꞌe oko uxi, ami yeꞌe uni diko xiꞌin ami yeꞌe en cientu ndiden en.
Ti en kachi chiguaꞌa sa ndaa
21 Sadaa ia: Ama sa kuneꞌe en kandil xiko ndasa na kuin x-kaꞌa en makila ña x-kaꞌa xito? Adi sakuindodo duku ña? 22 Kuan ti io nisadana sa yeguaꞌa san ma ndetuu; san nisadana sa yedaꞌvi, kuan ndetuu san ku ndaa. 23 Andu io d̶oꞌo xi san na kunini. 24 Sadaa ia tuku: Kunini guaꞌa sa tsaku yo ndidaa yo, Kuan xiꞌin sa tekuꞌua yo duꞌua tekuꞌua ñaꞌan yo, san vaa ka tsaku yo ndidaa yo. 25 Kuan nu sakuituni xanaa xi sa kaꞌan ntsu kukuituni ka xanaa nu, san nu ti sakuituni xanaa xi sa kaꞌan ntsu san kuani taꞌa sa sakuituni xanaa nu, dita nu.
Tata saꞌnu ni mee
26 Duꞌua kachi ia:
—Duꞌua kaa sa tastuni Ndios ñayii, ndee sa taꞌan en tsayee choꞌon tata ñuꞌu ya. 27 Xidi tsa niñu san sa kunchito tsa nduu, san tata kana san saꞌnu san tsayee ya nisa ti xinituni tsa na modo saꞌnu. 28 Kuan ñuꞌu ya sakoo nimee x-kuiꞌi xi: Diꞌna ka kana xuku xi san kana yoko xi san danduu chitu nuni xoko xi. 29 San ora yichi trigu san saꞌntsa tsa ndidaa tsa xiꞌin yuchitrigu, kuan saa kii taꞌantsa.
Nasa ndee ndiki en yutu nani mostaza
30 Kachi ia tuku: Nasa ndee sa tastuni Ndios ñayii nasa dadaguataꞌan ntsu xiꞌin ndasa na kukuituni xanaa yo ndidaa yo? 31 Ndee ndiki en yutu nani mostaza sa koꞌio nuꞌu san viꞌi ndaa tata kuu. 32 Doko ora tuꞌu daka san kana saꞌnu san nduu en yuku kaꞌnu ntseꞌe ka sa kuxi ndidaa ka yuku, san kuaꞌa ntseꞌe ndaꞌa xi san kuyakui sa ndidaa tidaa xiko andivi kidaguaꞌa te s-taka te ndaꞌa xi.
Ncha xu kuenchiion Jesús ndidaa toꞌon dadaguataꞌan
33 Kuaꞌa ntseꞌe toꞌon dadaguataꞌan xu kaꞌan ia kuenta guaꞌa xu kukuituni xanaa ndidaa ñayii. 34 Meni xiꞌin toꞌon dadaguataꞌan xu kaꞌan ia, doko ora xu kendoo ni mee ia xiꞌin ndi uxi-uu tsa nchiko ñaꞌan xi ia san xu kadaa ia nasa nchukachi.
Jesús kida ia sa na kukadi davitachi
35 Sa niñu yukua sadaa ia xi ndi uxi-uu tsa nchiko ñaꞌan xi ia:
—Na yaꞌia ndo ntsa enka ndodo ndutsa.
36 San dandoo ia ndidaa ñayii, san kusaa ia barku san kuaꞌan ia, san io uu ka barku juan tuku. 37 San koon en davi tachi kaꞌnu ntseꞌe san ndukoo ndutsa san kukee xiti barku, san chitu ni ndutsa kuaꞌan. 38 Doko Jesús xidi ia ichi sata barcu san yetsayu d̶iki ia. San ndaneꞌe ñaꞌan xi ia san sadaa:
—¡Maestru! Ti tuni jni tu na daꞌvi ndo ndidaa ndo ña?
39 San ndukoo ia san nduden ia xi tachi san sadaa ia xi mar:
—Kadinii ni koo nduu yo.
—Naku yuꞌu yo ndidaa yo? Naku ti xininchisa ñaꞌan yo ku ntsu?
41 San ndidaa tsa yaꞌa yuꞌu ntseꞌe tsa san ndatoꞌon tsa ndidaa mee tsa:
—Andu kuu tsa yaꞌa kuan ntsandeꞌe tachi ya xiꞌin ndutsa ya xininchisa ñaꞌan s-tsa?