Nakani Jesús na modo kida en tsa choꞌon tata
13
San kii yukua kee ia veꞌe san sakuntsaku ia jnu mar. 2 San tuꞌua kuaꞌa ntseꞌe ñayii, san danduu kusaa ia en barku san kukoo ia, san ndidaa ñayii xuku ntsa ndodo mar kuan. 3 Danduu kaꞌan ia kuaꞌa ntseꞌe toꞌon dadaguataꞌan, san duꞌua sadaa ia:—En tsayee ku daka tsa tata. 4 San neni dakaa tsa, san taꞌa s-tata tsa koꞌio ndodo ichi; san kixi tidaa san sas te. 5 San taꞌa ka koꞌio xiti yuu, sa ti io vaa ñuꞌu; san kama ntseꞌe kana, kuan ti todo vaa ñuꞌu. 6 Doko kána ora, san din; kuan ti niꞌi koꞌio xoꞌo xi, san yichi. 7 San dagua koꞌio xiti iñu. San dakaꞌa kida iñu. 8 San dagua koꞌio xiti ñuꞌu guaꞌa san guaꞌa ntseꞌe io, ami kee en cientu ami kee uni diko xiꞌin ami kee oko uxi, ndiden en tata. 9 Andu io d̶oꞌo xi, san na kunini.
Naku xu kaꞌan ia toꞌon dadaguataꞌan
10 Danduu kuyachi uu tsa nchiko ñaꞌan xi ia san ndukutoꞌon tsa xi ia:
—Naku kaꞌan ni xiꞌin toꞌon dadaguataꞌan s-tsa ndidaa tsa?
11 San kaꞌan Jesús san sadaa ia:
—Yoꞌo ndidaa yo Ndios semani ia sa na kukuituni xanaa yo na modo tastuni ia ñayii, doko ndidaa ñayii yaꞌa ñaꞌan. 12 Kuan tu andu sakuituni xanaa xi, san niꞌi ka, san koo ka xi; doko nu ti io xi, san ntsa sa io nu dita jnu.a 13 Juandiku kaꞌan ntsu xiꞌin toꞌon dadaguataꞌan; kuan kuani na ntsaꞌa nu san ma kini nu, xiꞌin na kunini nu ma tsaku jnu, xiꞌin ma kukuituni xanaa nu. 14 San duꞌua xino sa kaꞌan Isaías x-profeta Ndios, sa kachi tsa:
Kuani daa na tsaku d̶oꞌo yo doko ma kukuituni xanaa yo;
san kuani daa na ntsaꞌa yo san ma kini yo.
15 Kuan xanaa ñuu yaꞌa nduu ntsee ntseꞌe,
san ti nchu ku nini nu sa guaꞌa xiꞌin d̶oꞌo nu,
nakadi nu nduchinuu nu
ndasa ma kini nu xiꞌin nduchinuu nu,
san nisa ma tsaku nu xiꞌin d̶oꞌo nu,
san nisa ma kukuituni xanaa nu
ndasa ma na kininchisa ñaꞌan nu ku ntsu. Ndasa ndada guaꞌa ñaꞌan ntsu nu.b
16 Doko ¡Naku iꞌni nduchinuu yo xan kuan xini yo; xiꞌin d̶oꞌo yo xan kuan tsaku xi! 17 Kuan kachitoꞌon ndaa ntsu xo, sa kuaꞌa ntseꞌe x-profeta Ndios xiꞌin ñayii guaꞌa nchu kini sa xini yo ndidaa yo vita san ti xíni tsa, xiꞌin sa kunini tsa sa nini yo san ti tsaku s-tsa.c
Jesús kaꞌan ia nasa nchu kachi toꞌon dadaguataꞌan tsa choꞌon tata
18 Kunini nasa nchukachi toꞌon dadaguataꞌan sa kuu tsayee choꞌon tata. 19 Tu andu tsaku xi s-toꞌon Ndios sa kaꞌan na modo tastuni ia ñayii san ti sakuituni xanaa tsa, kixi sakakuiꞌia san dita toꞌon sa kukee xanaa tsa. San tsa yaꞌa ndee tsa sa taꞌan tata koꞌio ndodo ichi. 20 San sa koꞌio xiti yuu kuu kuenta tsa tsaku xi toꞌon san nataꞌan ntseꞌe xanaa tsa; 21 doko ti io xoꞌo xi, sa ti kudii ntseꞌe, kuan ora taꞌan ntseꞌe tsa adi xikoñaꞌa sa saꞌa toꞌon ya s-tsa, san dandoo tsa. 22 Sa koꞌio xiti iñu, kuu kuenta tsa tsaku xi toꞌon, doko ndiꞌi ka xanaa tsa ndidaa sa io ñuyii yaꞌa xiꞌin sa kuika san dana tsa toꞌon yaꞌa san ti kida tsa nisa en sa guaꞌa sa kuxi Ndios. 23 Doko sa kukee xiti ñuꞌu guaꞌa, tsa yaꞌa kuu tsa sakuituni xanaa xi toꞌon yaꞌa kuan taꞌan xanaa tsa, san ndee tsa tata kee ntseꞌe ami kee en cientu ndiden en ami kee uni diko xiꞌin ami kee oko uxi ndiden en.
Toꞌon dadaguataꞌan sa kuu kuꞌu kuiꞌia io xiti trigu
24 San kaꞌan ia enka toꞌon dadaguataꞌan san sadaa ia:
—Sa tastuni Ndios ndee sa táꞌan en tsayee chóꞌon en tata guaꞌa xuꞌun xi. 25 Doko neni xidi ñayii, kixi tsa xini-uꞌu ñaꞌan s-tsa san choꞌon tsa ndiki kuꞌu kuiꞌia xiti trigu, san kuaꞌan tsa. 26 San kesaꞌa kána trigu san ío yoko xi, san kána kuꞌu kuiꞌia tuku. 27 San kuyachi tsa kidachiion nu s-toꞌo ñuꞌu ya san sadaa tsa: “Toꞌo, tu tata guaꞌa choꞌon ni xuꞌun ni san naku kada kuꞌu kuiꞌia kana ami kee”. 28 San tsa yaꞌa kachi tsa: “En tsa xini-uꞌu ñaꞌan kida jaꞌa”. San ndidaa tsa kidachiion kuaan sadaa tsa: “Nasa kada ndo tuda, nchoj ni sa nakiꞌin da ku toꞌon da ña?” 29 Doko s-toꞌo ñuꞌu kuaan sadaa tsa: “Ñaꞌan kuan na kada toꞌon yo trigu. 30 Kodaa na kuaꞌnu kadi nduu ntsa na nakeꞌen ndo. kuan kadaa ntsu xi ndidaa tsa nakaꞌntsa trigu ndineꞌe diꞌna ka ndidaa kuꞌu kuiꞌia xan san nakiꞌni kuan na kayu. Doko trigu xan ku na choguaꞌa ku ntsu.”
Toꞌon dadaguataꞌan sa kuu ndiki yutu yiki nani mostaza
31 San kaꞌan ia enka toꞌon dadaguataꞌan yaꞌa:
—Sa tastuni Ndios ndidaa ñayii ndee en ndiki yiki en yutu nani mostaza sa teen en tsayee san choꞌon tsa xuꞌun tsa. 32 Ndiki yutu yaꞌa ku sa yiki ntseꞌe ka kaa sa kuxi ndidaa ka tata; doko ora saꞌnu, san saꞌnu ntseꞌe ka sa kuxi dagua ka yutu io laguerta san ndidaa tidaa lin xiko andivi kidaguaꞌa te s-taka te ndaꞌa xi.
Toꞌon dadaguataꞌan sa kuu levadura
33 San kaꞌan ia enka toꞌon dadaguataꞌan yaꞌa san sadaa ia:
—Sa tastuni Ndios ndidaa ñayii ndee levadura sa nadaka taꞌan xiꞌin yusa kuguaꞌa ita-stila kuan teen ñadeꞌe san nadaka taꞌan ña xiꞌin uni yaxi xuchi trigu san duꞌua nanañu ntseꞌe.
Na modo xu kuenchiion Jesús ndidaa toꞌon dadaguataꞌan
34 Ndidaa jaꞌa káꞌan Jesús xiꞌin toꞌon dadaguataꞌan xi ndidaa ñayii san tu ti io toꞌon dadaguataꞌan san ti xu kaꞌan ia, 35 San duꞌua xínotaꞌan sa kachi x-profeta Ndios, kuenta kachi tsa:
Kaꞌan ntsu xi ku kiuꞌu ntsu xiꞌin toꞌon dadaguataꞌan;
kaꞌan ntsu toꞌon yeguaꞌa ntsa kuenta kuguaꞌa ñuyii ya.d
Jesús kaꞌan ia nasa nchukachi toꞌon dadaguataꞌan sa kuu kuꞌu kuiꞌia io xiti trigu
36 San dandoo daa ia ndidaa ñayii san kunayii ia veꞌe. San ndi uxi-uu tsa nchiko ñaꞌan xi ia kuyachi tsa san sadaa tsa xi Jesús:
—Nakani ni nasa nchukachi toꞌon dadaguataꞌan sa kuu kuꞌu kuiꞌia kuaan da.
37 San sadaa Jesús:
—Tsa choꞌon tata guaꞌa ku ia nduu ñayii ñuyii yaꞌa. 38 Ñuꞌu ku ñuyii ya. Tata guaꞌa kuu ndidaa ñayii kida sa nchoxi Ndios, san kuꞌu kuiꞌia kuu ndidaa ñayii kida sa nchoxi sakakuiꞌia. 39 Tsa xini-uꞌu ñaꞌan choꞌon ndiki kuꞌu kuiꞌia kuaan, kuu sakakuiꞌia. Sa taꞌantsa trigu kuu sa ndeꞌe ñuyii ya, san tsa saꞌntsa trigu kuu ndidaa ángel. 40 San duꞌua kuꞌu kuiꞌia nadataka ñaꞌa xi san dakayu ñaꞌan xi, san duꞌua taꞌan kii ultimo. 41 ia nduu ñayii ñuyii yaꞌa tsandaꞌa nu x-ángel nu, san ndineꞌe ndidaa ñayii kida sa kuiꞌia xiꞌin ndidaa ñayii kida sa na kada ñayii kuachi san kineꞌen ñaꞌan nu sa io ndidaa ñayii tastuni Ndios, 42 San koꞌno ñaꞌan xiti xitu ñuꞌu xiko. San juan koo sa ndaꞌyu xiꞌin sa ku ruꞌu nuꞌu. 43 Danduu ñayii guaꞌa io jnu Ndios dayeꞌe kuenta ora sa tastuni s-tata tsa. Andu io d̶oꞌo xi san na kunini.
Toꞌon dadaguataꞌan sa kuu sa xaꞌvi ntseꞌe xi sa yedaꞌvi
44 Sa tastuni Ndios ndidaa ñayii ndee en sa xaꞌvi ntseꞌe xi yedaꞌvi yuku, san naniꞌi en tsayee san dandu chidaꞌvi nituku tsa. San ku-iꞌni ntseꞌe tsa san sadiko tsa ndidaa sa io s-tsa san seen tsa ñuꞌu yukua.
Toꞌon dadaguataꞌan sa kuu yuu xaꞌvi ntseꞌe xi
45 Sa tastuni Ndios ndidaa ñayii ndee en tsa diko san nduku tsa yuue xaꞌvi ntseꞌe xi. 46 San naniꞌi tsa en yuuf xaꞌvi ntseꞌe xi, san saꞌan tsa sa diko tsa ndidaa sa io s-tsa san seen tsa yuu yukua.
Toꞌon dadaguataꞌan sa kuu xonochaka
47 San duꞌua tuku, sa tastuni Ndios ndidaa ñayii ndee en xonochaka sa dakananiꞌno xiti mar san tastaꞌan nadataꞌan nadatuꞌu chaka. 48 San chitu, san kineꞌen tsa ndodo ndutsa. San kukoo tsa ndekaj s-tsa kiti guaꞌa san na choꞌon tsa te yeka san kiti kuiꞌia dakana tsa. 49 San duꞌua kada sa ndeꞌe ñuyii ya: Kee ndidaa ángel san ndekaj xaꞌan xi ndidaa ñayii kuiꞌia sa io ndidaa ñayii guaꞌa, 50 San ñayii kuiꞌia choꞌon ñaꞌan xi xiti ñuꞌu. San juan koo sa ndaꞌyu xiꞌin sa ku ruꞌu nuꞌu ñayii.
Sa saa xiꞌin sa tuꞌu
51 San Jesús ndukutoꞌon ia xi ndidaa tsa nchiko ñaꞌan xi ia:
—Xinituni yo ndidaa jaꞌa ña?
San ndidaa tsa yaꞌa sadaa tsa:
—Jon.
52 San Jesús sadaa ia:
—Juandiku tu en tsa dadana ñaꞌan ley nayii tsa ndaꞌa sa tastuni Ndios ndidaa ñayii ndee tsa en tadeꞌe xini kuenchiion sa saa xiꞌin sa tuꞌu.
Jesús ia io Nazaret
53 San kuenta tuꞌu kaꞌan Jesús toꞌon dadaguataꞌan yaꞌa, san kée ia juan. 54 Núꞌu ia xuun ia san dadána ñaꞌan ia veꞌe sinagoga, san oni sanaa tsa ndidaa tsa san kachi tsa:
—Ami kee ndidaa sa kutuni jnu yaꞌa xiꞌin ndidaa sa naꞌnu kida nu? 55 Nuyaꞌa kuu d̶aꞌa carpinteru kuaan xiꞌin nana nu kuu María. San xani nu kuu Jacobo, José, Simón xiꞌin Judas. 56 San ndidaa x-kuaꞌa nu io jaꞌa, ami kineꞌen nu ndidaa jaꞌa tuda?
57 San ti xíninchisa ñaꞌan tsa xi ia. Doko Jesús sadaa ia:
—Ndidaa xichi xini guaꞌa ñaꞌan xi x-profeta Ndios doko xuun tsa xiꞌin xeꞌe tsa ñaꞌan.g
58 San ti kída ia kuaꞌa milagru jukua kuan ndidaa ñayii io juan ti xíninchisa ñaꞌan xi ia.