Saꞌni ñaꞌan xi Juan tsa xu dakuendutsa ñaꞌan
14
San ndidaa kii yukua, Herodes tsa kuu rey tsaku s-tsa sa kuu Jesús. 2 San sadaa tsa xi tsa kidachiion jnu tsa:—Tsa yaꞌa kuu Juan tsa xu dakuendutsa ñaꞌan, nándoto tsa; juandiku kida tsa ndidaa sa naꞌnu yaꞌa. Duꞌua kachi tsa.
3 Kuan Herodes távichion tsa sa na teñaꞌan xi Juan, xiꞌin sa na kiꞌni ñaꞌan s-tsa xiꞌin cadena, san na chiñaꞌa s-tsa vekaa kuan duꞌua nchoxi Herodías, ña kuu d̶eꞌe Felipe tsa kuu xani Herodes. 4 Kuan Juan sadaa tsa:
—Ti guaꞌa sa koo ni xiꞌin ña.ab
5 San kuani Herodes nchu kaꞌni ñaꞌan tsa xi Juan, doko yuꞌu tsa ndidaa ñayii io ñuu; kuan ndidaa ñayii ñuu xini sa Juan kuu en x-profeta Ndios. 6 Doko kii xíno Herodes kuia san kída tsa en viko, san d̶aꞌa deꞌe Herodías xítasaꞌa nu jnu ndidaa tsa kíxi viko san na taꞌan ntseꞌe xanaa Herodes, 7 Juandiku oni chonaꞌa tsa sa kuañaꞌan tsa nasa na kaka mee nu. 8 San nuyaꞌa táꞌvichiion jnana jnu juandiku duꞌua sadaa nu xi Herodes:
—Taxi d̶iki Juan ña dakuendutsa kuan xiti en yaxindaꞌa ku ndi.
9 San danduu rey ya ta-uꞌu ntseꞌe tsa sa duꞌua sadaa nu; Doko sa saꞌa xi sa chonaꞌa tsa xiꞌin sa tsaku xi ndidaa tsa xuku jnu mesa xiꞌin tsa, juandiku táꞌvichiion tsa sa nakua ñaꞌan sa xika nu, 10 taꞌvichiion tsa sa na kiꞌin ndidaa soldadu na ku diti tsa d̶iki Juan xiti vekaa. 11 San saꞌan tsa yukua ndidaa tsa sa kaꞌntsa tsa d̶iki Juan, san kuenta nasaa tsa, soꞌno tsa en yaxindaꞌa san danduu sañaꞌan tsa xi nudeꞌe, san nu yaꞌa sañaꞌan nu xi jnana nu.
12 Danduu saa ndidaa tsa nchiko ñaꞌan xi Juan, san nakeꞌen tsa yikikoño san saꞌan tsa sa chiduj s-tsa, san saꞌan tsa sa kadaa tsa xi Jesús.
Jesús sañaꞌan ia sa saxi oꞌon mil tsayee
13 San tuꞌu tsaku xi Jesús sa taꞌan Juan san kukee ia en barku san kuaꞌan ia en lugar io ni mee. San kuaꞌa ntseꞌe ñayii ndaꞌa ñuu nitoꞌon jaꞌa san xika tsa ndidaa tsa nchiko ñaꞌan tsa kuaꞌan. 14 Noo ia barku, san xíni ia kuaꞌa ntseꞌe ñayii san kunda-ini ñaꞌan ia xi ndidaa tsa yaꞌa, san ndadaguaꞌa ia ndidaa tsa kuꞌu xi io jukua. 15 Sa ñíni, san uu tsa nchiko ñaꞌan xi ia tuꞌua ñaꞌan tsa san sadaa tsa:
—Jaꞌa kuu en lugar atuu dana sa io, san ñini ni kuaꞌan. Kadaa ni xi ndidaa ñayii xan sa na nuꞌu tsa veꞌe io yachi san na kueen tsa sa kaj tsa.
16 Doko Jesús sadaa ia:
—Ti nandeꞌe sa nuꞌu nu. Kuañaꞌan yoꞌo ndidaa yo sa na kaj nu.
17 Danduu ndidaa tsa yaꞌa sadaa tsa:
—Ti neꞌe da nisadana vaxi oꞌon ni ita-stila xiꞌin ubi ni chaka neꞌe da.
18 San Jesús sadaa ia:
—Taxi ka.
19 San danduu táꞌvichiion ia sa na kukoo ndidaa ñayii jnu kuꞌu. San teen ia ndi oꞌon ita-stila xiꞌin nduu chaka, san ndaneꞌe ia jnu ia ichi andivi, san sañaꞌan ia taxaꞌvi xi Ndios. San taꞌvi ia ita-stila, san sañaꞌan ia xi ndidaa tsa nchiko ñaꞌan xi ia, san tsa yaꞌa sañaꞌan tsa xi ndidaa ñayii. 20 Ndidaa tsa sáxi san nachitu ntseꞌe tsa, san nakeꞌen tsa uxi-uu yeka chitu ndidaa pedasu kéndoo. 21 San ndaa oꞌon mil tsayee kuu tsa sáxi, san ti en kachi ñadeꞌe xiꞌin nuliin.
Jesús xika ndodo ia jnu ndutsa
22 San danduu sadaa Jesús xi ndi uxi-uu tsa nchiko ñaꞌan xi ia sa na kaa tsa barku sa na kundodonuu tsa ntsa enka ndodo ndutsa kaꞌnu, neni ndatoꞌon daa ia xiꞌin ndidaa ñayii. 23 San tuꞌu kaꞌan ia xi ndidaa ñayii, san kusaa ni mee ia tinduu sa kaꞌan ia xiꞌin Ndios; san kuu niñu, mediini ka ia io ntsa jukua. 24 Doko barku kuan ku dagua ntsa xiti ndutsa, kuan niꞌi ntseꞌe chindaꞌa ñaꞌan ndidaa ndutsa kuan xi, kuan niꞌi ntseꞌe kana tachi san oni naxikoneꞌe ñaꞌan xi. 25 San kuiꞌi ka kuaꞌan Jesús jnu tsa yaꞌa ndidaa tsa san xika ndodo ia jnu ndutsa. 26 San kuenta xini ñaꞌan ndi uxi-uu tsa nchiko ñaꞌan xi ia sa xika ndodo ia jnu ndutsa, san yuꞌu ntseꞌe tsa san kachi tsa:
—¡En tachi kuu!
27 San káꞌan Jesús s-tsa san sadaa ia:
—¡Kada kaꞌnu xanaa yo! ¡Ntsuꞌu kuu ntsu! ¡Ma yuꞌu yo!
28 San danduu Pedru sadaa tsa:
—Toꞌo, tu dini kuu ni, san taꞌvichiion ni san na kuu kij d̶a jnu ndutsa ya ichi vaj ni xan.
29 San Jesús sadaa ia:
—Naꞌa.
Pedru noo tsa barku san xika tsa jnu ndutsa, san kuaꞌan tsa ichi io Jesús. 30 Doko xíni tsa sa niꞌi ntseꞌe kana tachi, san yuꞌu tsa san kesaꞌa tsa daꞌvi tsa kuaꞌan. Danduu kána tsa san kachi tsa:
—¡Toꞌo, vita kuu sa ndeꞌe da!
31 San ora yukua dakaa Jesús ndaꞌa ia san na teen ñaꞌan ia san sadaa ia:
—Naku na yuꞌu yo, naku ti xininchisa ñaꞌan yo ku ntsu?
32 San kusaa tsa nduu tsa barku, san kukadi tachi. 33 Danduu ndidaa tsa ñoꞌon barku kidakaꞌnu ñaꞌan tsa xi ia san sadaa tsa:
—San ndaa kuu nchisa sa dini kuu D̶aꞌa Ndios.
Jesús ndadaguaꞌa ia ndidaa tsa kuꞌu xi io ñuu nani Genesaret
34 Saa tsa ndidaa tsa ndodo ndutsa, san saa tsa Genesaret. 35 San kuenta nakini ñaꞌan ndidaa ñayii io juan xi ia san ku vaa nee región yukua, san kintsaka tsa ndidaa tsa kuꞌu xi io jukua sa io ia. 36 San sakondaꞌvi tsa sa na kuemani ia sa na kukoꞌon tsa ndidaa tsa kuani jnu d̶oo ia, san ndidaa tsa yaꞌa kukoꞌon ñaꞌan xi ia san nduguaꞌa tsa.