Jesús sañaꞌan ia sa kaxi oꞌon mil tsayee
6
San kuenta tuꞌu ndidaa jaꞌa san Jesús kuaꞌan ia enka ndodo ndutsa Galilea, sa nani Tiberias. 2 San kuaꞌa ntseꞌe ñayii nchiko ñaꞌan xi ia, kuan xu kini tsa ndidaa tsa ndidaa señal xu kada ia xi ndidaa tsa kuꞌu xi. 3 Jesús kusaa ia en tinduu san kukoo ia jukua xiꞌin ndidaa tsa nchiko ñaꞌan xi ia. 4 San sa kuyachi viko nani pascua, sa kuu viko ndidaa judiu. 5 San na ntsáꞌa Jesús san xíni ia sa kuaꞌa ntseꞌe ñayii kuyachi sa io ia, san sadaa ia xi Felipe:—Ami kueen ndo ita-stila sa kaxi ndidaa ñayii yaꞌa?
6 Doko kachi ia jaꞌa kuan nchu ntsaꞌa ia nasa na kada tsa, kuan Jesús xini ia sa kada ia. 7 Felipe sadaa tsa:
—Nisa tuini sa teyaꞌvi en tsa kidachiion una yoo ma taꞌan sa niꞌi tsa yaꞌa ndidaa tsa en taꞌa ita-stila kaj s-tsa.
8 Sa en tsa nchiko ñaꞌan xi ia tsa nani Andrés xani Simón Pedru sadaa tsa:
9 —Jaꞌa io en nuyee san neꞌe nu oꞌon ita-stila cebada xiꞌin ubi chaka yiki. Doko naskada taꞌan sa kaxi ndidaa ñayii yaꞌa?
10 Dandu Jesús sadaa ia:
—Kadaa xi ndidaa ñayii xan sa na kukoo tsa.
San io ntseꞌe kuꞌu jukua. Kukoo tsa ndidaa tsa, san kuu tsa ndaa oꞌon mil tsayee. 11 Danduu Jesús teen ia ndidaa ita-stila, san tuꞌu sañaꞌan ia taxaꞌvi xi Ndios, sañaꞌan ia xi ndi uxi-uu tsa nchiko ñaꞌan xi ia san daka nduu tsa xi ndidaa ñayii xuku jukua. San duꞌua ni kida ia xiꞌin chaka san saj tsa ndidaa tsa ndaa nataꞌan saj tsa. 12 San nachitu tsa ndidaa tsa, san sadaa ia xi ndidaa tsa nchiko ñaꞌan xi ia:
—Nakeꞌen ndidaa pedasu ita-stila kendoo, ndasa ma tivi nisadana.
13 San uxi-uu yeka dachitu tsa pedasu ita-stila kendoo sa saxi ndidaa ñayii sa kúu ndi oꞌon ita-stila cebada. 14 Danduu xíni ndidaa tsa yaꞌa señal kída Jesús ya, san kachi tsa ndidaa tsa:
—¡Sa ndaa kuu nchisa, tsa yaꞌa kuu x-profeta Ndios tsa kachi sa kixi ñuyii ya!
15 San Jesús xíni ia sa nchu kada ñaꞌan tsa rey xi ia, san kée ia san kuaꞌan ia en tinduu, san kuaꞌan ni mee ia.
Jesús xika ndodo ia jnu ndutsa
16 San kunaa san ndidaa tsa nchiko ñaꞌan xi ia kuaꞌan tsa sa io ndutsa kaꞌnu, 17 San kukee tsa en barku san taꞌantsa tsa ndutsa san kuaꞌan tsa ñuu Capernaúm. San sa kunaa, san Jesús ti kuaꞌan ia xiꞌin tsa ndidaa tsa. 18 San kana en tachi kaꞌnu san oni nadaka ndutsa kuan. 19 San kuenta oꞌon iñu kilometru ku xika tsa, san xini tsa Jesús sa xika ndodo ia jnu ndutsa san kuyachi ia jnu barku, san ndidaa tsa yaꞌa yuꞌu ntseꞌe tsa. 20 Doko sadaa ia:
—¡Ntsuꞌu ku ntsu; ma yuꞌu yo!
21 Ndidaa tsa yaꞌa ku-iꞌni tsa san kukee ia barku, san nonoo ni saa tsa ndidaa tsa ñuu kuaꞌan tsa.
Ndidaa ñayii nanduku ñaꞌan xi Jesús
22 Ndu enka kii ndidaa ñayii io enka ndodo ndutsa xíni tsa ndidaa tsa sa en dii ni barku io jukua san ndidaa tsa nchiko ñaꞌan xi ia kuaꞌan ni mee tsa, san Jesús ti kuaꞌan ia xiꞌin tsa ndidaa tsa. 23 Doko saa uu ka barku kée ñuu nani Tiberias saa yachi sa ío Jesús kii sañaꞌan ia taxaꞌvi xi Ndios san danduu i-xuku tsa ndidaa tsa saj s-tsa ita-stila cebada 24 Danduu xini ndidaa ñayii yaꞌa sa ayoo ka Jesús xiꞌin ndidaa tsa nchiko ñaꞌan xi ia, san kusaa tsa ndidaa tsa barku kuan san kuaꞌan tsa ntsa Capernaúm ku nanduku ñaꞌan tsa ndidaa tsa xi Jesús.
Jesús ku ia ita-stila taxi ñuyii
25 San naniꞌi ñaꞌan tsa ndidaa ntsa enka ndodo ndutsa, san ndúkutoꞌon tsa:
—Maestru, na kii saa ni jaꞌa?
26 Jesús kaꞌan ia san sadaa ia:
—Kachi toꞌon ndaa ntsu yo sa nanduku ñaꞌan yo ku ntsu, kuan sa saj yo ita-stila san oni nachitu yo, doko adii sa sakuituni xanaa yo ndidaa señal kida ntsu. 27 Kadachiion doko adi sa saꞌa ita-stila ndeꞌe, guaꞌa ka kadachiion sa saꞌa ita-stila ti ndeꞌe sa taxi vida ma ndeꞌe, ita-stila yaꞌa taxi ia nduu ñayii ñuyii yaꞌa; kuan Ndios duꞌua táꞌvichiion ia sa duꞌua na kada nu.
28 Danduu sadaa xi ia:
—Nasa kada da ndidaa da ndasa na kada da sa nchoxi Ndios?
29 San sadaa Jesús:
—Nasa kuu ndidaa sa naꞌnu kida ni ndasa na kini da san na kininchisa ñaꞌan da ni? Ña nasa kuu enka sa kida ni? 31 Ku tadeꞌe ndo saj tsa maná kuenta ío tsa ndidaa tsa desiertu ,a kuan duꞌua kachi sa yodotuni s-toꞌon Ndios: “Ndios sañaꞌan ia ita-stila noo andivi sa kaj s-tsa ndidaa tsa.”b
32 San sadaa Jesús:
—Kachitoꞌon ndaa ntsu yo sa adi Moisés sañaꞌan ita-stila noo andivi, meni ku Tata ntsu sañaꞌan nchisa ita-stila noo andivi. 33 Kuan tsa noo andivi ya kuu xita-stila Ndios, san sañaꞌan vida xi ñayii ñuyii ya.
34 Sadaa tsa ndidaa tsa:
—Toꞌo, ndikii taj ni ita-stila yaꞌa, na kaj da ndidaa da.
35 Jesús sadaa ia:
—Ntsuꞌu ku ita-stila taxi vida ma ndeꞌe. Andu na kixi sa io ntsu ya san ma kuita ka, san andu xininchisa ñaꞌan ku ntsu ma yichi ka ndutsa. 36 Doko kachi ntsu yo sa ndidaa yo xini ñaꞌan ku ntsu san ti xininchisa ñaꞌan yo. 37 Ndidaa ñayii taxi ku Tata ntsu kuntsu kixi sa io ntsu; san andu na kunchiko ñaꞌan ku ntsu, ntsuꞌu ma dandoo ñaꞌan ntsu xi. 38 Kuan ntsuꞌu noo ntsu andivi, san adi sa kada ntsu sa nchoj ntsu, vaj ntsu kada ntsu sa nchoxi ia tsandaꞌa ñaꞌan ku ntsu. 39 San jaꞌa kuu sa nchoxi ia tsandaꞌa ñaꞌan ku ntsu: Sa ma dakuita ntsu nisa en ñayii taxi ia kuntsu, maska sa kada ntsu sa na nandoto ñayii nasaa kii yukua 40 Jaꞌa kuu sa nchoxi ku Tata ntsu: San ndidaa ñayii na nantsaꞌa ñaꞌan xi ia nduu ñayii ñuyii yaꞌa xiꞌin na kininchisa ñaꞌan jnu san koo vida ma ndeꞌe xi, san ntsuꞌu kada ntsu sa na nandoto nu na saa kii yukua.
41 San kesaꞌa ndidaa ñayii kaꞌan kuiꞌia tsa sa kachi Jesús: “Ntsuꞌu ku ita-stila noo andivi.” 42 San kachi tsa:
—Adi nuyaꞌa kuu Jesús d̶aꞌa José kuan ña? Adi xini ndo s-tata nu xiꞌin j-nana nu ve? Naku kachi nu sa noo nu andivi tuda?
43 Jesús kaꞌan ia san sadaa ia:
—Nasa sani toꞌon toꞌon yo ndidaa yo. 44 Nisa en ñayii ma kachi kunchiko ñaꞌan ku ntsu, tu ku Tata ntsu ia tsandaꞌa ñaꞌan kuntsu ma kuntsaka ñaꞌan xi ñayii yaꞌa kixi; san ntsuꞌu kada ntsu sa na nadandoto kii ndeꞌe ñuyii. 45 Duꞌua yodotuni s-toꞌon Ndios sa chidotuni ndidaa x-profeta ia: “Dadana ñaꞌan Ndios xi ndidaa ñayii”,c san ndidaa nu sa kunini san kutuꞌua sa kachi Ndios sa kunchiko ñaꞌan ku ntsu.
46 Ti en xini ñaꞌan xi Tata, meni nu kée sa io Tata, nu yaꞌa xini ñaꞌan xi ia. 47 Kachitoꞌon ndaa ntsu yo: Andu xininchisa ñaꞌan ku ntsu san io vida ma ndeꞌe xi. 48 Ntsuꞌu ku ita-stila sa taxi vida ma ndeꞌe. 49 S-tadeꞌe yo saj tsa ndidaa tsa maná desiertu san dini kee kuan xíꞌi tsa ndidaa tsa. 50 Doko ntsuꞌu kuu ita-stila noo andivi, andu na kaxi ita-stila yaꞌa san ma kuu. 51 Ntsuꞌu ku ita-stila sañaꞌan vida noo andivi; san tu andu na kaxi ita-stila yaꞌa, ma kuu. San ita-stila kuañaꞌan ntsu kuu ku kikikoño ntsu sa kuañaꞌan ntsu sa saꞌa vida ñayii io ñuyii ya.
52 Danduu ndidaa judiu naa tsa ndidaa mee tsa san kachi tsa:
—Naku kachi nuyaꞌa sa taj nu xikikoño nu sa kaj ndo.
53 San sadaa Jesús:
—Kachitoꞌon ndaa ntsu yo sa tu ma kaj yo xikikoño ia nduu ñayii ñuyii yaꞌa xiꞌin ma koꞌo yo j-niñi nu, san ma koo vida ma ndeꞌe xo. 54 Nu saxi ku kikikoño ntsu xiꞌin xiꞌi ku niñi ntsu io vida ma ndeꞌe jnu, san ntsuꞌu kada ntsu sa nandoto nu kii ndeꞌe ñuyii. 55 Kuan ku kikikoño ntsu ku ita-stila nchisa sa kaj yo san ku niñi ntsu kuu ndutsa nchisa sa koꞌo yo. 56 Nu saxi ku koño ntsu xiꞌin xiꞌi ku niñi ntsu io xiꞌin ntsu san ntsuꞌu io ntsu xiꞌin nu tuku. 57 Tata ia tsandaꞌa ñaꞌan kuntsu nchito ia, san ntsuꞌu nchito ntsu sa saꞌa ia; duꞌua ni tuku nu na kaxi ku koño ntsu ku nchito nu sa saꞌa ntsuꞌu. 58 Jaꞌa ku ita-stila noo andivi. Adi maná saxi s-tadeꞌe yo sa ío tsa desiertu san xiꞌi tsa, doko andu na kaxi ita-stila sa taxi vida ma deꞌe ya san kunchito san ma ndeꞌe ka.
59 Ndidaa toꞌon yaꞌa kaꞌan ia xiti veꞌe sinagoga, kii dakuaꞌa ñaꞌan ia ñuu Capernaúm.
Jesús kaꞌan ia nasa kuu toꞌon neꞌe ñuyii ma ndeꞌe
60 Danduu kuenta tsaku s-tsa ndidaa tsa sa dakuaꞌa ñaꞌan Jesús san kuaꞌa ñayii nchiko ñaꞌan xi ia kachi tsa:
—Ndidaa sa kaꞌan tsa ntseꞌe vixi io; andu kuyakui sa kunini?
61 Xíni Jesús sa ñayii nchiko ñaꞌan xi ia ndatoꞌon tsa ndidaa toꞌon yaꞌa san sadaa ia:
—Ama jaꞌa ma kachi kada yo ndidaa yo? 62 Tu nakini yo ia nduu ñayii ñuyii yaꞌa na ndaa ni tuku nu andivi sa ío nu diꞌna kuan kin? 63 x-Espíritu Ndios ku sa taxi vida; san yikikoño ya ti taxi nisadana. Ndidaa toꞌon káꞌan ntsu yo ku s-toꞌon Espíritu Santu sa taxi vida mandeꞌe 64 Doko dagua yo ti xininchisa ñaꞌan ku ntsu. Kuan ntsa diꞌna xini Jesús andu kuu tsa ma kininchisa ñaꞌan xi ia xiꞌin andu kuu tsa nachiꞌi ñaꞌan xi ia ndaꞌa ndidaa ñayii xini uꞌu ñaꞌan xi ia, 65 san kachi ia:
—Juandiku kachi ntsu yo sa nisa en ñayii ma kunchiko ñaꞌan ku ntsu, tu ma tsandaꞌa ñaꞌan ku Tata ntsu xi.
66 San ora yukua, kuaꞌa ntseꞌe tsa nchiko ñaꞌan xi ia naxikokagua tsa, san ti xu ndinoka tsa xiꞌin ia. 67 San danduu Jesús sadaa ia xi ndi uxi-uu tsa yaꞌa:
—Nchu nuꞌu yo ndidaa yo tuku ña?
68 San sadaa Simón Pedru:
—Toꞌo, ami kiꞌin da ndidaa da? San dini ku ia neꞌe Toꞌon vida ma ndeꞌe. 69 San ndidaa da xini xiꞌin xininchisa da sa dini kuu Cristu D̶aꞌa Ndios nchito.d
70 Jesús sadaa ia:
—Adi ntsuꞌu ndekaxaꞌan yo ndi uxi-uu yo ña? doko en yo kuu kuenta sakakuiꞌia.
71 Ndaa ia s-toꞌon Judas d̶aꞌa Simón Iscariote; kuan tsa yaꞌa, kúu en tsa nchiko ñaꞌan xi ia, san tsa yaꞌa kuu tsa nachiꞌi ñaꞌan xi ia ndaꞌa ndidaa tsa xini-uꞌu ñaꞌan xi ia.