SA KÍDA NDIDAA X-APOSTOL JESUCRISTU
Sa kachi sa kixi Espíritu Santu
1
Ta Teofilo díꞌna nuu tutu chidotuni da,a na kani da sa kesaꞌa Jesús kída ia xiꞌin sa dadana ñaꞌan ia, 2 xiꞌin ntsaa kii kunuꞌu ia nino yukua. Antika sa nuꞌu ia, ndekaxi ia tsa tsandaꞌa ia san xiꞌin Espíritu Santu táꞌvichiion ia nasa nakada tsa ndidaa tsa; 3 kuan kuenta nandoto ia saꞌan ia jnu tsa ndidaa tsa san duꞌua kuu sa ndidaa jaꞌa nchu kachi sa nandoto ia, kuan ubi diko kii xini ñaꞌan tsa yaꞌa ndidaa tsa xiꞌin xu kaꞌan ia sa kuu sa tastuni Ndios s-tsa ndidaa tsa.4 Sadaa ndaa ia:
—Ma kee yo ndidaa yo ñuu Jerusalén, ntsa na tsandaꞌa ku Tata ntsu,b sa kachi ntsu yo. 5 Sa ndaa nchisa sa Juan, xu dakuendutsa ñaꞌan nu xiꞌin ndutsa, doko yoꞌo ndidaa yo niꞌi yo sa tastuni Espíritu Santuc san ma yaꞌia kuaꞌa ka kii duꞌua sadaa ia.
Duꞌua kída kuenta kundaa Jesús andivi
6 Doko ndidaa tsa xuku juan ndukutoꞌon tsa:
—Toꞌo, nakua ñaꞌan ni sa tastuni Israel ya ndidaa kii yaꞌa ña?
7 San Jesús sadaa ia:
—Adii yoꞌo ndidaa yo nitaꞌvi sa kini kii xiꞌin ora, meni ku Tata ntsu naꞌa sa taꞌvichiion; 8 doko kii na kixi Espíritu Santu sa koo xiꞌin yo ndidaa yo san kii yukua niꞌi yo ndidaa yo sa tastuni yo, san ku kuu yo ndidaa yo nu kaꞌan ndaa ku toꞌon ntsu ñuu Jerusalén, nee distritu Judea, nee distritu Samaria, xiꞌin nee tuꞌu nee kaa ñuyii duꞌua sadaa ia.d
9 San kuenta túꞌu káꞌan ia toꞌon yaꞌa, san neni ntsaꞌa ñaꞌan tsa ndidaa tsa xi ia, san kundaa ia andivi san dáꞌvi ia xiti en viko san ti en ka xíni ñaꞌan xi ia.e 10 San neni ntsaꞌa daa tsa ndidaa tsa andivi, san nanuu ubi tsa niꞌno doꞌno kuixi kachi jnu ndidaa tsa yaꞌa, 11 san sadaa tsa:
—Ndidaa yoꞌo nu galileu, ma ntsaꞌa ka yo andivi xan ndidaa yo, kuan duꞌua ni modo kundaa Jesús andivi duꞌua ni ndij nituku ia.
Duꞌua kída sa ndekaxaꞌan xi Matias sa na kuinokuachi tsa x-kuenta Judas
12 Ntsaa tinduu nani Olivos naxikokagua tsa ndidaa tsa san ku nuꞌu tsa Jerusalén, ñuu io ndaa en kilometru. 13 San nasaa tsa ñuu, san kundaa tsa veꞌe nino sa xu kendoo Pedru, Juan, Jacobo xiꞌin Andrés, Felipe, Tomás, Bartolomé, Mateu, Jacobo d̶aꞌa Alfeu, Simón tsa kuu Zelote, xiꞌin Judas d̶aꞌa Jacobo.f 14 Ndidaa tsa yaꞌa xiꞌin uu ñadeꞌe tuku, María ña kuu j-nana Jesús xiꞌin ndidaa xani ia xu nataka tsa sa kakataꞌvi tsa xi Ndios.
15 San ndidaa kii yukua ndukuin Pedru naꞌma ndidaa ñayii xu kininchisa ñaꞌan xi Jesús xu nataka jukua (san ndidaa tsa xuku kuan kuu ndaa en cientu xiꞌin oko ñayii) san sadaa tsa:
16 —Xanii, na ndeꞌe sa xinotaꞌan sa yodotuni, sa káꞌan Espíritu Santu xi David sa taꞌan Judas, tsa ntsaka ñaꞌan xi ndidaa tsa sa kuaka ñaꞌan xi Jesús sa nakaꞌni ñaꞌan xi ia, 17 kuan Judas ñotaꞌan ndo xiꞌin tsa san ío tsa chiion kida ndo ya. 18 Doko tsa yaꞌa, seen tsa en ñuꞌu xiꞌin tuini teyaꞌvi tsa sa kída tsa sa kuiꞌia yaꞌa, danduu ndagua niꞌno tsa san diti dagua tsa san oni kée xiti tsa. 19 San niꞌitoꞌon ndidaa ñayii ío Jerusalén san danani tsa ndidaa tsa Acéldama, sa nchukachi, ñuꞌu niñi.g 20 Duꞌua xinotaꞌan sa yodotuni tutu yodotuni ndidaa Salmo:
Na kendoo ni mee xeꞌe nu sa ío nu,
san ma koo ka ñayii juan;h
San kachi tuku:
Enka nu na nakeꞌen x-chiion nu. i
21 Juandiku, nandeꞌe sa ndekaj ndo en tsa ío xiꞌin ndo ndidaa ndo ntsaa kii ío Jesús sa io ndo ndidaa ndo ya, 22 ntsaa kii dakuendutsa ñaꞌan Juan xi iaj xiꞌin ntsaa kii kundaa ia andivi,k ndasa na kaꞌan ndo xiꞌin tsa sa Jesús nandoto ia. Duꞌua kachi tsa.
23 Ndekaj tsa nduu tsa yaꞌa: José tsa nani Barsabás, tsa kaꞌan tsa xi, tsa kida sa ndaa; xiꞌin Matias. 24 Dandu xíkataꞌvi tsa xi Ndios san sadaa tsa:
—Dini, Toꞌo, kuan xini ni xanaa ndidaa ñayii, dadana ñaꞌan ni andu kuu sa ndekaj ni, 25 ndasa na teen chiion sa kunchiko ñaꞌan jni, sa dandoo Judas tsa kída kuachi san kuaꞌan xichi mee xi.
26 Choꞌon tsa suerte xi nduu tsa yaꞌa, san Matias kekagua; san nakuaka taꞌan tsa xiꞌin ndi uxi en tsa tsandaꞌa Jesús sa na kaꞌan s-toꞌon ia.