CARTA CHÍDOTUNI PABLO XI NDIDAA ÑAYII XININCHISA IO ÑUU ROMA
Ntseꞌe na kada ntsee ini ni ndidaa ni
1
Tutu yaꞌa chidotuni da xi ndidaa ku kiani ndo io Roma, dan kuu Pablo tsa xinokuachi jnu Jesucristu, kana ñaꞌan sa ku kuu da tsa tsandaꞌa Jesús; san ndekaxaꞌan ia sa kaꞌan da s-toꞌon guaꞌa ia, 2 toꞌon káꞌan ia xuꞌu ndidaa x-profeta ia sa yodotuni s-tutu ii ia, 3 san toꞌon guaꞌa yaꞌa kuu sa kaꞌan sa Jesucristu d̶aꞌa ia, káku ia ñuyii yaꞌa san kúu ia xayii rey David, 4 doko kuenta nandoto Jesucristu sa xiꞌi ia, san juan nchu kachi sa kuu ia d̶aꞌa Ndios, duꞌua kachi Espíritu Santu. 5 Sa saꞌa Jesucristu, juandiku níꞌi da sa ku kuu da tsa tsandaꞌa Jesús, kuan kunda-ini ñaꞌan ia d̶a, san nchoxi ia sa ndidaa ñayii na na kininchisa ñaꞌan xi ia, xiꞌin na kada sa nchoxi ia, 6 san juan nchoxi ia sa na kada ni ndidaa ni tuku, kuenta guaꞌa io ni ñuu Roma.7 San tutu yaꞌa chidotuni da xi ndidaa dini ñayii io ñuu kaꞌnu Roma, ndidaa dini ñayii xinimani Ndios, kuan kána ñaꞌan ia sa na nduu ii ni, xiꞌin na ku kuu ni ñayii xuun ia, xika da xi Ndios ia kuu ku Tata ndo, xiꞌin ku Toꞌo ndo Jesucristu, sa na taxi ia sa xinimani ñaꞌan ia jni, xiꞌin sa na koo kadi ni ndidaa ni.
Pablo sañaꞌan tsa taxaꞌvi xi Ndios
8 Diꞌnanuu, sa saꞌa Jesucristu sañaꞌan da taxaꞌvi xi Ndios sa saꞌa da en da en ni, kuan ndidaa xichi kuvaa sa xininchisa ni. 9 Dan xinokuachi da xi Ndios, san kaꞌan da toꞌon guaꞌa sa kuu d̶aꞌa ia, san xiꞌin nee xanaa da kida da. San Ndios xini ia, sa ndikii xikataꞌvi da sa saꞌa ni ndidaa ni, 10 san ndikii xikataꞌvi da xi ia, sa na kuemani ia sa na kiꞌin da ku koto ñaꞌan da jni ndidaa ni. 11 Kuan nchu kini ñaꞌan da jni, xiꞌin nchu taj da en ayuda espiritual, kuan ndasa nakuin ndaa ni ndidaa ni xi s-toꞌon Ndios. 12 San ndasa duꞌua na chintsee taꞌan ndo en ndo en ndo sa saꞌa sa xininchisa ndo.
13 Xanii, keꞌen guelta kachi da sa kiꞌin da sa io ni ndidaa nia, doko deen deen ni chiion ndaku, doko nchu kiꞌin da sa io ni, ndasa na kaꞌan da s-toꞌon Ndios san duꞌua na kininchisa ñayii, kuenta kída da ndidaa ka ñuu sáꞌan da. 14 Nandeꞌe sa kaꞌan da toꞌon guaꞌa yaꞌa xi ndidaa ñayii, san atuu dana sa kada tu kuu ñayii griegu ña ñaꞌan, adi ñayii kutuni xi adi ñayii ti kutuni xi kuan nandeꞌe sa kaꞌan da. 15 Juandiku ntseꞌe nchu kiꞌin da ku kaꞌan da toꞌon guaꞌa yaꞌa jni ndidaa ni ñayii io ñuu Roma.
Duꞌua kida sa tastuni s-toꞌon guaꞌa Ndios
16 Kuan ti kukaꞌan jnu da sa kaꞌan da toꞌon guaꞌa ya; kuan kuu sa tastuni Ndios sa kuu sa nanitaꞌvi ndidaa ñayii na kininchisa, diꞌnanuu kaꞌan xi ndidaa ñayii kuu ñuu Israel san danduu xi ndidaa ñayii ti kuu ñuu Israel. 17 San toꞌon guaꞌa yaꞌa dadana ñaꞌan ku ndo sa sa saꞌa sa xininchisa ndo Jesucristu juandiku na kinimani ñaꞌan Ndios ku ndo, kuan duꞌua yodotuni: “Ndidaa ñayii xininchisa ñaꞌan xi Jesucristu kunchito”.b
X-kuachi ndidaa ñayii io ñuyii
18 Doko sa diko-ini Ndios kixi ntsa andivi sa taꞌan ndidaa ñayii kuiꞌia dadana sa ndaa. 19 Kuan sa xini ndidaa ñayii sa io Ndios, san Ndios kída ia sa na kini ndidaa ñayii sa io ia. 20 San kuani ti en xini ñaꞌan xi Ndios doko ndidaa sa kidaguaꞌa ia ñuyii, ndidaa jaꞌa nchu kachi sa ndidaa ñayii xini sa ndidaa kuu kida ia, sa saꞌa sa tastuni ia xiꞌin sa kuu ia Ndios. San jaꞌa nchukachi sa ma en kaꞌan sa ti sakuituni xanaa xi sa io Ndios. 21 Kuan xíni ñaꞌan tsa xi Ndios, san ti nchú kadakaꞌnu ñaꞌan tsa, san nisa taxaꞌvi xi ia ti sañaꞌan tsa. Mediini sa kuiꞌia sáni-ini tsa ndidaa tsa xiꞌin kída tsa, san duꞌua ndú ntsee xanaa tsa. 22 San kída tsa sa kutuni ntseꞌe s-tsa, doko sa ndaa kuu sa nisa dana ti kutuni s-tsa, 23 San nadama tsa sa kuu Ndios kaꞌnu ntseꞌe ia io ndikii, san ti nchu kunchiko tsa sa ndaa kada sa naꞌntsa nchiko tsa, ndidaa sa ndee ñayii sa kídaguaꞌa mee tsa chíñuꞌu tsa, sa ndee kititata, kiti ndagua, kiti io kumi ndaꞌa xi xiꞌin kiti ndiñuꞌu mee.
24 Juandiku Ndios dándoo ia sa na kada tsa ndidaa sa nchoj s-tsa, san ndidaa sa kuiꞌia sáni-ini tsa kída sa kída tsa sa kuiꞌia sa duꞌua xiꞌin xikikoño tsa. 25 Lugar sa na kunchiko tsa ndidaa tsa sa ndaa, sa kada na naꞌntsa nchiko tsa ndidaa tsa; san chíñuꞌu tsa ndidaa sa kídaguaꞌa Ndios, san ti chíñuꞌu tsa Ndios ia kídaguaꞌa ndidaa jaꞌa, ia nandeꞌe sa kadakaꞌnu ñaꞌan xi ndikii. Duꞌua na kuu.
26 Sa saꞌa xi jaꞌa juandiku Ndios dandoo ñaꞌan ia sa na kada ndidaa ñayii yaꞌa ndidaa sa kuiꞌia; kuan sa ío ndidaa ñayii yaꞌa ío ñadeꞌe ti nchukoo xiꞌin tsie kuan kada ndidaa deꞌe mee ña ío. 27 San duꞌua ni ndidaa tsie kuan tuku, dándoo tsa d̶eꞌe tsa san ío tsa ndidaa yee tsa, san kída tsa sakanuu ndidaa yee tsa, san juandiku vita mee tsa na taꞌan ndidaa sa kuiꞌia kída tsa.
28 Doko sa ti nchu kininchisa tsa Ndios dandoo ia sa meni sa kuiꞌia sa duꞌua na koꞌon d̶iki tsa san na kada tsa sa kuiꞌia sa duꞌua. 29 Kúu tsa ñayii kuiꞌia, mee ni sa kuiꞌia sa duꞌua kída tsa, kúu tsa ñayii ío xiꞌin ñayii ti kuu d̶eꞌe xi adi xee xi, kúu tsa tsa nchoj ntsaa ntseꞌe. Kúu tsa ñayii kuadu, ñayii saꞌni ndii, kúu tsa ñayii taꞌan xanaa xi sa naa, kúu tsa ñayii ndantsa xiꞌin ñayii sani-ini sa kada mediini sa kuiꞌia. 30 San xu taꞌan xanaa tsa sa kaꞌan kuiꞌia tsa xi ndidaa ñayii, kúu tsa ñayii xini-uꞌu ñaꞌan xi Ndios, ñayii ndadi, ñayii deen, ñayii iꞌni, ñayii sani-ini sa kuiꞌia, ñayii ti xíninchisa s-tadeꞌe xi, 31 ñayii ntsee d̶iki xi, ti xu nchu kininchisa tsa sa ndaa, ñayii ti xu kada sa kaꞌan, ñayii ti sákuituni xanaa xi, xiꞌin kúu tsa ñayii ti ñoꞌon sa ndaa-ini xanaa xi. 32 San xini guaꞌa ñayii sa ndidaa ñayii kida ndidaa sa kuiꞌia yaꞌa nandeꞌe sa kuu, san adi ni kida nayii maska sa ku-iꞌni tsa xiꞌin ñayii kida sa kuiꞌia yaꞌa tuku.