1 Corintios 1

DIꞌNA NUU CARTA CHÍDOTUNI PABLO XI NDIDAA ÑAYII XININCHISA IO CORINTO

Pablo tsa kána ñaꞌan xi sa ku kuu x-apóstol Jesucristu, kuan duꞌua nchóxi Ndios, xiꞌin Sóstenes ku kiani ndo; 2 tsaa da tutu yaꞌa sa kuxi x-congregación Ndios io Corinto, dini ñayii nduu ii sa saꞌa Jesucristu kuan kána ñaꞌan jni sa ndu ii ni, xiꞌin sa kuxi ñayii xininchisa ñaꞌan xi ku Toꞌon ndo Jesucristu ndidaa xichi, s-Toꞌo tsa xiꞌin ku Toꞌo mee ndo: 3 Ndios ia kuu ku Tata ndo xiꞌin ku Toꞌo ndo Jesucristu, na taxi ia j-gracia ia xiꞌin sa na koo kadi ni ndidaa ni.

4 Ndikii sañaꞌan da taxaꞌvi xi j-Ndios da, sa saꞌa ni ndidaa ni, san sañaꞌan da taxaꞌvi xi ia sa saꞌa gracia táxi ia jni ndidaa ni, kuan sa saꞌa Jesucristu níꞌi ni. 5 Kuan sa saꞌa ia yaꞌa juandiku vaa ntseꞌe niꞌi ni tantu sa xini ni xiꞌin toꞌon kaꞌan ni. 6 San duꞌua ni s-toꞌon Jesucristu kuu ndaa jni ndidaa ni tuku, 7 juandiku nisa en ka don ti nandeꞌe jni ndidaa ni, neni ntsatu ni sa ndixi ku Toꞌo ndo Jesucristu, 8 ia yaꞌa kada sa na kuindaa ni ndidaa ni ntsa na ndeꞌe ndidaa, ndasa ma kuidokuachi ni kii na ndixi ku Toꞌo ndo Jesucristu. 9 Ndios ti nadama ia s-toꞌon ia, san kána ñaꞌan ia sa na nduu ni eni xiꞌin D̶aꞌa ia Jesucristu, ia kuu ku Toꞌo ndo.

Eni na ku kuu ndo ndidaa ndo

10 Xanii, xiꞌin sa nani ku Toꞌo ndo Jesucristu xika da jni ndidaa ni, sa na ndatoꞌon ni ndidaa ni, sa eni na kani-ini ni ndidaa ni, san ma kada taꞌntsadagua ni ndidaa ni, guaꞌa ka eni kani-ini ni, san ndatoꞌon ndaa ni ndidaa ni, nasa sani-ini ni sa nchu kada ni. 11 Kachi da jaꞌa jni vi xanii, kuan nakani uu xayii Cloé sa da diko-ini taꞌan ni ndidaa ni. 12 San dagua ni kaꞌan: “Dan nchiko da Pablo” san uu ka tsa kaꞌan, “dan nchiko da Apolos”; san uu ka tsa kachi, “dan nchiko da Pedru”; san uu ka tsa kaꞌan “dan nchiko da Jesucristu.” 13 Ama taꞌntsadagua Jesucristu kuaan ña? Ama dan Pablo inchitakaa cruz sa saꞌa ni ndidaa ni ña? Ña sendutsa ni xiꞌin sa nani da? 14 Taxaꞌvi ñaꞌan xi Ndios sa ti dákuendutsa da nisa en ka ñayii, maska sa Crispo xiꞌin Gayo dakuendutsa da. 15 Kuan ndasa ma en kaꞌan sa séndutsa xiꞌin sa nani da 16 dakuendutsa da xayii Estéfanas tuku; doko ti naꞌa ka da tu dakuendutsa da enka ñayii. 17 Kuan Jesucristu ti tsandaꞌa ñaꞌan ia sa dakuendutsa da, tsandaꞌa ñaꞌan ia sa na kaꞌan da s-toꞌon guaꞌa ia; adi xiꞌin toꞌon vixi ntseꞌe, kuan ndasa ma kuita sa xaꞌvi xi sa xiꞌi Jesucristu sa satakaa ñaꞌan xi ia cruz.

Jesucristu kuu sa kutuni xiꞌin sa tastuni Ndios

18 Kuan ndidaa ñayii xita, s-toꞌon cruz ya kuu sa ndukueꞌe; doko xi ndidaa ntsoo ñayii nanitaꞌvi, jaꞌa dadana ña sa kuu sa tastuni Ndios. 19 Kuan duꞌua yodotuni:

Dita ntsu sa kutuni, xi ndidaa nu kutuni xi xan,

san dadana ntsu ndidaa nu sani-ini sa xini ntseꞌe.

20 Ami io ndidaa nu kutuni xi? Ami io ndidaa nu dakuaꞌa ñaꞌan? Ami io ndidaa nu ntseꞌe da guaꞌa kaꞌan? Adii sa ndaa kuu sa Ndios ndada ia en sa ndukueꞌe ndidaa sa kutuni xi ñuyii yaꞌa ña? 21 kuan xiꞌin sa kutuni xi Ndios, ti nchóxi ia sa na kini ñaꞌan ñayii xi ia xiꞌin sa kutuni xi mee ñayii maska sa kída ia sa na nanitaꞌvi ñayii xininchisa ñaꞌan xi ia sa saꞌa sa kaꞌan ñayii sa kuu sa ndukueꞌe.

22 Kuan ndidaa ñayii kuu ñuu Israel xika tsa señal, san ndidaa griegu nduku tsa sa kutuni xi; 23 Doko dan ndidaa da kaꞌan da sa Jesucristu i-nchitakaa ia cruz: San jaꞌa kida sa da diko-ini ñaꞌan xi ndidaa ñayii kuu ñuu Israel, san ndidaa ñayii ti kuu ñuu Israel sani-ini sa kuu en sa ndukueꞌe. 24 Doko sa kuxi ndidaa tsa kána Ndios, ñayii kuu ñuu Israel adi ñayii ti kuu ñuu Israel, Jesucristu dadana ñaꞌan sa kuu x-poder Ndios xiꞌin sa kutuni xi Ndios. 25 Io ñayii kaꞌan sa sa xiꞌi Jesucristu en cruz kuu en sa ndukueꞌe, doko sa duꞌua kída Ndios kutuni ka xi sa kuxi sa kida ñayii, kaꞌan ñayii sa ti ntsee Ndios doko ntsee ka ia sa kuxi ndidaa ñayii.

26 Ntsaꞌa nika xanii, sa nataka ni ndidaa ni xan ti io kuaꞌa ñayii kutuni ntseꞌe xi, ti io kuaꞌa ñayii ntseꞌe, san nisa ti io kuaꞌa ñayii toꞌo ntseꞌe ndaa, doko kuani duꞌua ndaa ni, Ndios ndekaxaꞌan ia jni ndidaa ni. 27 Maska sa Ndios teen ia sa kaꞌan ñayii sa kuu sa ndukueꞌe io ñuyii ya, ndasa na kukaꞌan jnu ndidaa tsa kutuni xi, san ndasa na kukaꞌan jnu ndidaa tsa ntsee, ndekáxi ia ndidaa tsa ti ntsee. 28 Ndios ndekaxi ia sa ti xaꞌvi xi xiꞌin sa ti en xiniguaꞌa ñaꞌan xi, san ndekaxi ia sa ti kuu nisadana ndasa na datani ia ndidaa sa kuu, 29 Ndasa ma en ku naꞌnu jnu Ndios. 30 Sa saꞌa Ndios dini ndidaa ni eni nduu ni xiꞌin Jesucristu, san Ndios kída ia sa Jesucristu na ku kuu sa kutuni ku ndo, sa io ndaa ndo, sa nakoo ndoo ndo xiꞌin sa nanitaꞌvi ndo. 31 Kuan duꞌua yodotuni: “Tu andu sani-ini sa kuu en sa kuu, na kada kaꞌnu ñaꞌan xi Jesucristu kuan mee ia kída sa kuu ñayii.”