CARTA KU UU CHÍDOTUNI PABLO XI NDIDAA ÑAYII XININCHISA IO CORINTO
Duꞌua kaꞌan Pablo
1
Dan kuu Pablo, x-apóstol Jesucristu, kuan duꞌua nchóxi Ndios, dan xiꞌin ku kiani ndo Timoteu tsaa da xi x-congregación Ndios io ñuu Corinto a xiꞌin ñayii ndada ii Ndios io región Acaya: 2 Ndios ia kuu ku Tata ndo xiꞌin ku Toꞌo ndo Jesucristu, na taxi ia j-gracia ia xiꞌin sa na kookadi ni ndidaa ni.Ndios kidakaꞌnu ia ku kuanaa ndo ndidaa ndo
3 Nakuañaꞌan ndo taxaꞌvi xi Ndios, ia kuu s-tata ku Toꞌo ndo Jesucristu, kuan ia yaꞌa ku Tata guaꞌa xiꞌin ia xinimani ñaꞌan, san ndikii kidakaꞌnu ia ku kuanaa ndo ndidaa ndo ndidaa sa taꞌan ndo, 4 kuan ora taꞌan ntseꞌe da ndidaa da san ora ti xinika da nasa kada da, san ia yaꞌa kidakaꞌnu ia xanaa da ndidaa da, ndasa na kadakaꞌnu da xanaa ndidaa ñayii taꞌan ntseꞌe xiꞌin ti xini nasa kada tuku. 5 Kuan tu dan ndidaa da taꞌan ntseꞌe da sa saꞌa Jesucristu san duꞌua sa saꞌa Jesucristu kidakaꞌnu Ndios xanaa da ndidaa da. 6 Sa saꞌa dini ndidaa ni juandiku duꞌua taꞌan da ndidaa da ndasa na kukaꞌnu xanaa ni ndidaa ni xiꞌin na nanitaꞌvi ni ndidaa ni. Ndios chintsee ñaꞌan ia d̶a ndidaa da ndasa na kadakaꞌnu da xanaa ni ndidaa ni. Kuan kii duꞌua na taꞌan ni ndidaa ni, na kuyakui ni ndaa kuyakui da ndidaa da ya tuku. 7 Ñoꞌon xanaa da sa dini ndidaa ni kuyákui ni tu duꞌua na taꞌan ni, kuan Ndios kadakaꞌnu ia xanaa ni ndidaa ni.
8 Xanii, kuenta guaꞌa xininchisa ni ndidaa ni Jesucristu, na nakani da ndidaa sa taꞌan da ndidaa da kuenta saꞌan da ñuu Asia.b Kuaꞌa ntseꞌe sa taꞌan da ndidaa da, san sani-ini da sa ma en ka da ku yakui ndidaa da, san sani-ini da sa jukua ndeꞌe da ndidaa da naku. 9 Kuan saꞌntsa-ini da ndidaa da mee da, kuenta ñayii sa io sa ndeꞌe, doko juan chíntsee ñaꞌan, sa na kininchisa ka da Ndios, ia kida sa nandoto ndidaa ndii, san adi sa kukaꞌnu-ini da mee da ndidaa da, 10 kuan Ndios xu chintsee ñaꞌan ia d̶a ndidaa da ndiden xu nchu kaꞌni ñaꞌan ñayii, san xininchisa da ndidaa da sa chintsee ñaꞌan ni on ia d̶a ndidaa da xiꞌin tavi ñaꞌan ia d̶a, 11 Juandiku sakundaꞌvi da jnu ni ndidaa ni sa na kakataꞌvi ni sa saꞌa da ndidaa da, tu kuaꞌa ntseꞌe ñayii na kakataꞌvi, san duꞌua ni kuaꞌa ntseꞌe ñayii kuañaꞌan taxaꞌvi xi Ndios sa saꞌa ndidaa sa guaꞌa kida ia d̶a ndidaa da.
Naku ti sáꞌan Pablo ñuu Corinto
12 Ku-iꞌni da ndidaa da xiꞌin ndidaa sa kida da san ti kukaꞌan jnu da ndidaa da sa kaꞌan da jni ndidaa ni, kuan io ndoo xanaa da ñuyii yaꞌa, san kaꞌan ndaa da jni ndidaa ni. San ti kaꞌan da ndidaa da toꞌon io ñuyii yaꞌa, taxaꞌvi xi sa xinimani Ndios kuan taxi ia ndidaa toꞌon kaꞌan da. 13 Kuan ti chidotuni da toꞌon vixi sa ma kukuituni xanaa ni ndidaa ni, san ntsatu da sa en kii na kukuituni guaꞌa xanaa ni, 14 kuan ntsa vita kesaꞌa ni sakuituni xanaa ni. San duꞌua ora na ndixi ku Toꞌo ndo Jesucristu, kii yukua ku iꞌni ntseꞌe ni sa saꞌa da ndidaa da duꞌua kuenta mee da ku iꞌni da sa saꞌa ni vita.
15 Ñoꞌo xanaa da sa duꞌua kada, juandiku nchukiꞌin da ubi guelta ku koto ñaꞌan da jni ndasa na niꞌi ni ubi guelta toꞌon kaꞌnu-ini, 16 kuan sani-ini da sa ora na kiꞌin da Macedonia kíꞌin da ku koto ñaꞌa da jni ndidaa ni san ora na ndee da ndidaa da Macedonia yaꞌia nituku da sa io ni ndidaa ni, ndasa na na koꞌno ichi ñaꞌan ni d̶a ndidaa da sa na kiꞌin da Judea. 17 Ndidaa sa kaꞌan da sa kiꞌin da ku koto ñaꞌan da jni ndidaa ni sáni-ini guaꞌa da, kuan ti kuu da ndidaa ñayii se on san danduu nayuꞌu, juandiku ma kani-ini ni ndidaa ni sa duꞌua senchiion da ndidaa da tuku. 18 Ndios xini ia sa kida da ndidaa da toꞌon kaꞌan da. 19 Dan xiꞌin Timoteu xiꞌin Silasc kaꞌan da ndidaa da s-toꞌon Jesucristu ia kuu D̶aꞌa Ndios. San Jesucristu ti káꞌan ia en toꞌon san danduu nayuꞌu ia. Ñaꞌan, kuan Jesucristu kída ia ndidaa sa káꞌan ia. 20 Juandiku sa saꞌa Jesucristu xínotaꞌan ndidaa sa kachi Ndios sa taxi ia ku ndo ndidaa ndo. 21 Ndios kuu ia kida sa na kuin ndaa da jnu ni ndidaa ni sa saꞌa Jesucristu. San Ndios kuu ia kachi d̶a ndidaa da sa na kada da chion yaꞌa. 22 San ndasa na ku danaꞌa sa kuu ndo xuun ia, san chituni ñaꞌan ia ku ndo san tuni yukua kuu Espíritu Santu io ku kuanaa ndo san jaꞌa kuu sa ndodonuu sa niꞌi ndo ndidaa sa kachi ia sa taxi ia ku ndo.