Sa doko xi ndidaa ñayii xininchisa ñaꞌan xi Jesucristu
16
San sa saꞌa sa dataki ni sa kuxi ndidaa ñayii ndada ii Ndios io Jerusalén,a kada ni kuenta ni taꞌvichiion da xi ndidaa x-congregación Ndios io Galacia. 2 Ndiden diꞌna nuu sábado, ndiden en ni xeꞌe ni koꞌno guaꞌa deen ni tuini niꞌi, kuenta guaꞌa chintsee ñaꞌan Ndios sa niꞌin ni. Kuan ma kada ora saa da sa io ni kesaꞌa ni dataka ni tuini. 3 San ora nasaa da sa io ni ndidaa ni, san tsandaꞌa da tsa ndekaj ni, sa na kiꞌin tsa xiꞌin carta na ku neꞌe tsa tuini dataka ni ntsa Jerusalén. 4 San tu nandeꞌe sa kiꞌin da tuku san kiꞌin tsa ndidaa tsa xiꞌin da.Ndidaa sa sani-ini Pablo sa kada tsa
5 Sani-ini da sa kiꞌin da ku koto ñaꞌan da jni doko diꞌna ka yaꞌia da Macedoniab kuan ichukua yaꞌia da. 6 Tu ncha nakada sa kendoo da xiꞌin ni ntsa na yaꞌia sa vixi, san duꞌua koꞌno ichi ñaꞌan ni d̶a. 7 Kuan ti nchu yaꞌia duꞌua ni da, maska sa naꞌa nchu koo da sa io ni ndidaa ni, tu Ndios na kachi ia. 8 Doko kendoo da Efeso ya ntsa na kesaꞌa viko Pentecostés;c 9 Kuan kuaꞌa ntseꞌe ñayii nchu kunini stoꞌon Ndios doko kuaꞌa ñayii xini uꞌu ñaꞌan.d
10 Tu na saa Timoteu kuane sa io ni xan, san kuañaꞌan ni sa nandeꞌe jnu; kuan kidachiion nu x-chiion Ndios kuenta dan. 11 San guaꞌa guaꞌa ku kuu ni jnu, ma kada ku kuu saini ni jnu, sa chintsee ni nu na kij nu sa io da ya, kuan kuntsatu da jnu xiꞌin ndidaa ka ku kiani ndo ya.
12 San ku kiani ndo Apolos, saku ndaꞌvi ntseꞌe da jnu tsa sa na kiꞌin tsa xiꞌin ndidaa ku kiani ndo na ku koto ñaꞌan tsa jni, doko kachi tsa sa ma kiꞌin tsa vita kudi. Doko kuee ka kiꞌin tsa kachi tsa.
Ndidaa toꞌo guaꞌa sadaa Pablo xi ndiden en ñayii
13 Guaꞌa ni ndidaa ni, san kuin kutu ni xiꞌin sa xininchisa ni Jesucristu, san kuyakui ni san nduku ntsee ni. 14 San ndidaa sa na kada ni, kada ni xiꞌin sa xinimani.
15 Xanii, xini ni sa xayii Estéfanasf kuu tsa diꞌnanuu xíninchisa toꞌon guaꞌa ya, region Acaya, san tsa yukua ndidaa tsa kuu tsa kesaꞌa kidachiion sa saꞌa ndidaa ñayii ndada ii Ndios. 16 Sakundaꞌvi da jni ndidaa ni, sa na kininchisa ni ndidaa ñayii duꞌua xinokuachi xi Ndios xiꞌin ndidaa ñayii chintsee ñaꞌan xiꞌin kidachiion. 17 Ku-iꞌni da sa sáa Estéfanas, Fortunatu xiꞌin Acaico, kuan tsa yaꞌa ndidaa tsa io tsa xiꞌin da jluguar ni ndidaa ni, kuan dini io xika ni; 18 San kídakaꞌnu tsa xanaa da xiꞌin xanaa ni ndidaa ni tuku. San kada ni sa guaꞌa xi ndidaa ñayii duꞌua kida kuenta tsa yaꞌa.
19 Ndidaa x-congregación Ndios io Asia ya kachi sa na kada ntse-ini jni ndidaa ni. San duꞌua ni kachi Aquila xiꞌin Priscila,g xiꞌin x-congregación Ndios nataka xeꞌe tsa, Kachi tsa sa na kada ntse-ini jni ndidaa ni xiꞌin sa nani ia kuu ku Toꞌo ndo Jesucristu. 20 Ndidaa ku kiani ndo kachi sa na kada ntse-ini jni. San xiꞌin nee xanaa ni ndidaa ni kaꞌan taꞌan ni.
21 Dan Pablo tsaa da ndidaa toꞌon yaꞌa xiꞌin ndaꞌa mee da.
22 San tu andu ti xinimani ñaꞌan xi ku Toꞌo ndo Jesucristu san na taꞌnu ntsatu. h “Ndixi ia kuu ku Toꞌo ndo.”