Sa nandoto ndidaa ndii
15
San vita vi xanii, nchoj da sa na nakaꞌan ni toꞌon guaꞌa kachi toꞌon da jni, san toꞌon yaꞌa kuu sa tén ni san jaꞌa kida san in ndaa ni ntsa vita; 2 san tu na kininchisa ni on ni toꞌon guaꞌa yaꞌa san nanitaꞌvi ni, doko tu ñaꞌan san nisadana ti nandeꞌe sa xíninchisa ni.3 Kuan sa kutuꞌua da diꞌna nuu kuu sa dákuaꞌa ñaꞌan da jni: Sa Jesucristu xiꞌi ia sa saꞌa ku kuachi ndo, kuenta yodotuni s-toꞌon Ndios;a 4 san chinduxaꞌan xi ia san nandoto ia nduu uni kii kuenta yodotuni s-toꞌon Ndios;b 5 san nanuu ia jnu Cefasc san danduu nanuu ia jnu ndi uxi-uu tsa tsandaꞌa ia.d 6 San danduu nanuu ia jnu maska oꞌon cientu ku kiani ndo en kii ni, san kuaꞌa ntseꞌe tsa yukua nchito daa ntsa vita; san dagua tsa sa xiꞌi. 7 Danduu nanuu ia jnu Jacobo, sa danduu xi ndidaa apóstol.
8 San danduu ni ka nanuu ia jnu mee da na en daꞌa yiki nachido.e 9 Kuan dan kuu en apóstol ti xaꞌvi xi sa kuxi ndidaa ka apóstol, san nisa ti nitaꞌvi da sa kunani da apóstol, kuan xu kuiko da ndidaa ñayii ku x-congregación Ndios.f 10 Doko sa saꞌa j-gracia Ndios juandiku kuu da sa kuu da, san j-gracia ia ti xíta kuan kidachiion ka da sa kuxi ndidaa ka apóstol doko ndidaa kida da sa saꞌa j-gracia Ndios. 11 Atuu sa kada tu dan ña ndidaa ka apóstol kaꞌan toꞌon guaꞌa ya jni sa nandeꞌe ku sa xininchisa ni ndidaa ni.
12 San tu dan ndidaa da kaꞌan da sa Jesucristu nandoto ia, naku kaꞌan ni dagua ni sa ti io sa nandoto ndii tuda? 13 Kuan tu ti io sa nandoto ndii, san Jesucristu ti nandoto ia. 14 San tu Jesucristu ti nandoto ia, san nisadana ti nandeꞌe toꞌon kaꞌan da jni ndidaa ni; xiꞌin sa xininchisa ni ndidaa ni ti nandeꞌe tuku. 15 Kuan tu sa ndaa kuu sa ti nandoto ndii, san kida naꞌntsa da, kuan kachi da sa nándoto Jesucristu. 16 Kuan tu ndidaa ndii ti nandoto, san duꞌua ni Jesucristu ti nándoto ia tuku; 17 San tu Jesucristu ti nándoto ia san sa xininchisa ni ndidaa ni ti nandeꞌe nisadana, san da daa ni io x-kuachi ni ndidaa ni. 18 San duꞌua ndidaa ñayii xiꞌi xininchisa ñaꞌan xi Jesucristu xíta tuku. 19 Tu ñuyii yaꞌa sa ñoꞌon ku kuanaa ndo kuu meni Jesucristu, kuu ndo ñayii ndaꞌvi adi ñayii nandeꞌe sa kunda-ini ñaꞌan xi.
20 Doko sa ndaa kuu nchisa sa Jesucristu nándoto ia, san duꞌua ni nandoto ndidaa ñayii xíꞌi san xininchisa ñaꞌan xi ia, kuan Jesucristu kuu ia diꞌna nuu nandoto sa io ndidaa ndii. 21 Kuan sa xiꞌi ndo kuyii ñuyii yaꞌa sa saꞌa en tsie, san duꞌua ni sa saꞌa en tsiee vaxi sa nandoto ndidaa ndii. 22 Kuan sa saꞌa Adán kída sa xiꞌi ndidaa ñayii, doko taxaꞌvi xi Jesucristu juandiku io sa nandoto ndo ndidaa ndo. 23 Doko duꞌua nandoto ñayii, diꞌna nuu Jesucristu san danduu ora ndixi ia nandoto ndidaa ñayii xininchisa ñaꞌan xi ia. 24 San danduu juan, ora na dita Jesucristu ndidaa sa tastuni ñuyii yaꞌa, san na kuañaꞌan ia ndidaa juan xi Ndios ia kuu s-Tata ia. 25 Kuan Jesucristu tastuni ia ntsa na na yii ndidaa tsa xini uꞌu ñaꞌan xi ia ndaꞌa ia.g 26 San danduu ndeꞌe sa xini-uꞌu ñaꞌan nani muerte. 27 Ndios náchiꞌi ia ndidaa sa io ndaꞌa Jesucristu.h Ora kachi sa ndidaa, san adi ntsa ndeꞌe Ndios yeꞌe ndaꞌa Jesucristu, kuan kachi ndaa sa náchiꞌi ia ndidaa ndaꞌa Jesucristu san juan nchu kachi sa adii yeꞌe mee ia ndaꞌa Jesucristu. 28 San ora ndidaa jaꞌa na tastuni Jesucristu, san danduu Jesucristu nayii ia ndaꞌa ia sañaꞌan sa na tastuni ndidaa sa io. Ndasa duꞌua Ndios na keꞌe ndaꞌa ia ndidaa ndituꞌu sa io.
29 Naku sendutsa ñayii sa saꞌa ndii? Tu ti nandoto ndidaa ndii, naku sendutsa ñayii sa saꞌa ndii tuda?
30 San naku ndikii ii io sa taꞌan da sa kuiꞌia tuda? 31 Xanii, kachitoꞌon ndaa da jni, sa sa kuiꞌni taxi ia kuu ku Toꞌo ndo Jesucristu d̶a sa saꞌa dini ndidaa ni, guaꞌani kuu da dakaa ni kii. 32 Kuan ñuu Efeso naa da kuenta en ñayii xiꞌin kitiyuku. Nasa niꞌi da xiꞌin ndidaa jukua tuda? Tu ti nandoto ndidaa ndii, tu duꞌua san “na kaj ndo na koꞌo ndo kuan yutsa kuu ndo.”i
33 Ma d̶ana ni toꞌon duꞌua kachi, sa sakotaꞌan ndo ñayii kuiꞌia ñayii duꞌua juan kida sa xita xiꞌin dana ndidaa sa guaꞌa kida ndo. 34 Kani-ini guaꞌa ni chiion kida ni, san ma kada ka ni kuachi jnu Ndios, kuan dagua ni ti xini ni Ndios. Kaꞌan da jaꞌa ndasa na kukaꞌan jnu ni.
35 Dagua ñayii ndukutoꞌon: Na modo nandoto ndidaa ndii? nchakagua xikikoño tsa ndidaa tsa? 36 Naku ti sakuituni xanaa ni, ndidaa ndo xini sa ndidaa tata choꞌon ndo diꞌna ka xiꞌi dana kana. 37 Kuan sa daka ndo kuu en trigu adi nuni, doko sa kana kuu en trigu yiki adi en viyu yiki. 38 Doko Ndios kida ia sa nchoj ia xi ndidaa tata xiꞌin xuku xi. 39 Adi ndidaa yikikoño eni ndaa; kuan en ku xikikoño ñayii, san enka kuu xikikoño kiti tata, san enka kuu yikikoño kiti ndagua san enka kuu xikikoño ndidaa chaka. 40 Kuan tuku kaa sa io andivi san tuku kaa sa io nuꞌu ya. 41 Kuan tuku dayeꞌe ora, tuku dayeꞌe yoo san tuku dayeꞌe chodini, kuan kuani ndidaa kuu chodini doko tuku tuku dayeꞌe. 42 San duꞌua kuu sa nandoto ndidaa ndii. Chinduj ndo en sa tsaꞌyu san nandoto en sa ti tsaꞌyu. 43 Chinduxi en sa ti xaꞌvi xi san nandoto en sa xaꞌvi xi, chinduxi en sa ti ntsee san nandoto en sa ntsee ntseꞌe. 44 Sa yinduxi kuu en yikikoño ñuyii yaꞌa doko sa nandoto kuu en yikikoño espiritual. Kuan io yikikoño ñuyii yaꞌa, san io yikikoño espiritual.
45 Kuan s-toꞌon Ndios yodotuni: Ndios kídaguaꞌa ia Adán san Adán kuu diꞌnanuu tsayee ío ñuyii yaꞌa.j Doko Adán danduu, kuu sa taxi vida. 46 San duꞌua, díꞌna ka niꞌi ndo en yikikoño ñuyii yaꞌa san danduu taxi Ndios en yikikoño espiritual ku ndo ndasa na kuu kiꞌin ndo sa io ia. 47 Diꞌnanuu tsayee kuguaꞌa xiꞌin tiachi ñuyii yaꞌa, san tsayee ku uu, ia kuu ku Toꞌo ndo kée andivi. 48 San ntsoo ndidaa ndo kuu ndo na tsayee kuguaꞌa xiꞌin tiachi ñuyii yaꞌa, doko danduu ku kuu ndo kuenta tsayee kee andivi. 49 San duꞌua kuenta ndee ndo tsa kuguaꞌa xiꞌin tiachi, san duꞌua ni ndee ndo ia io andivi kuaan tuku.
50 Xanii, ndidaa sa kuu koño xiꞌin niñi ma yii sa tastuni Ndios, kuan ndidaa sa tsaꞌyu ma koo sa io sa ti tsaꞌyu. 51 Doko na nakani da en sa yeguaꞌa xi Ndios: Adi ndidaa ndo kuu, doko ndidaa ndo nadama xikikoño xi. 52 Kuan duꞌua kuenta kama nakuani ku nduchinuu ndo duꞌua kama nadama ku kikikoño ndo, san jaꞌa taꞌan kii na tivi ultimo trompeta, kuan tivi trompeta, san kii yukua nandoto ndidaa ndii xiꞌin en yikikoño ti tsaꞌyu san ntsoo nadama ku kikikoño ndo.k 53 Kuan yikikoño io kundo xiꞌi xiꞌin tsaꞌyu san nandeꞌe sa nduu en xikikoño ti xiꞌi xiꞌin ti tsaꞌyu. 54 San ora sa tsaꞌyu nanduu sa ti tsaꞌyu, sa xiꞌi nanduu sa ti xiꞌi san kii yukua xinotaꞌan sa yodotuni s-toꞌon Ndios sa kachi: Kídanar ñaꞌan xi muerte.l 55 Ami io ndidaa sa kidanar yoꞌo muerte tan? Ami io xakua yo?m 56 Kuan xakua muerte kuu kuachi, san sa tastuni kuachi kuu ley. 57 Doko taxaꞌvi ñaꞌan xi Ndios, kuan taxi ia sa kidanar ndo sa saꞌa ia kuu ku Toꞌo ndo Jesucristu.
58 Juandiku xanii, ndidaa dini tsa xinimani ntseꞌe da, kuin kutu ni ndidaa ni san kininchisa ni on ni, san ma dandoo ni sa kidachiion ni sa saꞌa ia kuu ku Toꞌon ndo Jesucristu. San kunaꞌa ni sa ndidaa chiion kida ni ti kida daa ni.