Sa kaꞌan ñayii enka daꞌan
14
Nduku ntsee ni xiꞌin sa xinimani; san kaka ni xi x-espíritu Ndios sa na taxi ia don jni, doko kaka ka ni sa niꞌi ni don sa kada profetizar ni. 2 Kuan ñayii kaꞌan enka daꞌan espiritual ti kaꞌan xi ñayii maska sa xi Ndios kaꞌan; kuan nisa en ñayii ti sakuituni xanaa xi, kuan xiꞌin espíritu kaꞌan sa yeguaꞌa. 3 Doko ñayii kida profetizar kaꞌan xi ndidaa ñayii ndasa na kukuituni ka xanaa ñayii, xiꞌin na ndundaa ñayii xiꞌin na kukaꞌnu xanaa ñayii. 4 Ñayii kaꞌan daꞌan sañaꞌan x-espíritu Ndios meni ñayii yukua saꞌnu, doko ñayii kida profetizar dakuaꞌnu ñaꞌan xi x-congregación Ndios.5 Juandiku nchoj da sa ndidaa ni na kaꞌan enka daꞌan taxi x-espíritu ia, doko nchoxka da sa na kada profetizar ni; jaꞌa kuu sa guaꞌa ka sa kuxi sa kaꞌan enka daꞌan taxi x-espíritu ia, eni ka tu io ñayii sakuituni xanaa xi, ndasa na kadaa nasa nchukachi xi x-congregación Ndios. 6 San vita, tu nakiꞌin da sa io ni ndidaa ni sa nakaꞌan da enka daꞌan jni, atuu dana sa niꞌi ni xiꞌin doko chintsee ñaꞌan jni tu na kaꞌan da xiꞌin sa dadana ñaꞌan Ndios d̶a, adi xiꞌin sa xini da, adi xiꞌin profecia adi xiꞌin sa dakuaꞌa ñaꞌan d̶a.
7 Kuan tu ndidaa en sa kantsa eni na kantsa, na modo kini ndo ncha kantsa flauta adi cítara? 8 San duꞌua, tu trompeta ti kantsa ndaa, na modo nduku-ini ndidaa ñayii kiꞌin guerra? 9 San duꞌua ni taꞌan ni ndidaa ni tuku, ora kaꞌan ni daꞌan taxi x-espíritu Ndios: Kuan tu ti en sakuituni xanaa xi nasa nchukachi san kuu en toꞌon kaꞌan duꞌua ni ni. 10 Ñuyii yaꞌa kuaꞌa ntseꞌe daꞌan io sa kaꞌan ñayii, doko io ñayii sakuituni xanaa xi nasa nchukachi daꞌan yaꞌa. 11 Doko tu dan ti xini da nasa nchu kachi daꞌan yaꞌa, san kuu da kuenta en ñayii juera xi ndidaa tsa kaꞌan daꞌan yaꞌa san mee tsa kuu tsa ñayii juera d̶a tuku. 12 Juandiku tu nchoj ni sa niꞌi ni don taxi x-espíritu Ndios, nduku ni sa niꞌi ni sa chintsee ni x-congregación ia.
13 Juandiku tu andu kaꞌan enka daꞌan sañaꞌan x-espíritu ia, na kaka tsa xi Ndios sa na kada ia sa na kuu kadaa tsa xi ñayii nása kaꞌan tsa. 14 Kuan tu dan xikataꞌvi da xiꞌin daꞌan taxi x-espíritu Ndios, san sa xikataꞌvi kuu x-espíritu da, doko ti sakuituni xanaa da nasa kaꞌan da. 15 Nasa kada da tuda?, kata da xiꞌin kakataꞌvi da xiꞌin x-espíritu da, san kata da xiꞌin kakataꞌvi da xiꞌin sa xinituni da tuku. 16 Kuan tu dini sañaꞌan ni taxaꞌvi xi Ndios xiꞌin x-espíritu ni san tsa nini ma kini tsa na ora kachi tsa duꞌua na kuu kuan ti tediki tsa sa kaꞌan ni. 17 Kuan guaꞌa sa sañaꞌan ni taxaꞌvi xi Ndios doko ti nandeꞌe xi tsa nini. 18 Sañaꞌan da taxaꞌvi xi Ndios, kuan kaꞌan da kuaꞌa ka daꞌan sa kuj ni ndidaa ni. 19 Doko ora nataka da xiꞌin ndidaa ñayii kuu x-congregación Ndios, taꞌan xanaa da sa kaꞌan da oꞌon ni toꞌon sa na kukuituni xanaa ñayii, san adi sa kaꞌan da uxi mil toꞌon xiꞌin en daꞌan ti en tediki.
20 Xanii, ma kada kuenta sani-ini nuliin kani-ini ni ndidaa ni, ku kuu ni kuenta en daꞌa yiki paꞌa ti kida nisa dana sa kuiꞌia san naꞌnu naꞌnu kani-ini ni. 21 Kuan duꞌua yodotuni: Kaꞌan ntsu xi ñuu yaꞌa san kuenchiion ntsu ñayii kaꞌan enka daꞌan. San nisa duꞌua ma kunini ñaꞌan nu, duꞌua kachi ia kuu ku Toꞌo ndo.a 22 San sa kaꞌan enka daꞌan ya, kuu en señal xi ndidaa ñayii ti xininchisa adi sa kuxi ñayii xininchisa; doko ñayii kida profetizar adi kida profetizar xi ñayii ti xininchisa, maska sa sa kuxi ñayii xininchisa. 23 San duꞌua, tu nee x-congregación Ndios nataka san meni ka daꞌan sa ti en sakuituni xanaa xi kesaꞌa kaꞌan. San tu ora yukua nasaa uu ñayii ti xininchisa ñaꞌan xi Ndios, ndidaa ñayii yaꞌa kani-ini sa ndukueꞌe ni ndidaa ni. 24 Doko tu ndidaa ni kida profetizar, san na yii en ñayii ti xininchisa ñaꞌan xi Ndios, san ñayii yaꞌa na kininchisa tsa san nata-uꞌu tsa sa saꞌa x-kuachi tsa, 25 San na kani tsa ndidaa sa ñoꞌon xanaa tsa, san nata-uꞌu tsa jnu Ndios, san kukuinxiti tsa san nontsayu tsa ntsa nuꞌu san chiñuꞌu tsa Ndios san nakininchisa tsa sa io ia sa io ni ndidaa ni.
26 Xanii, ndidaa sa kida ni ora nataka ni na chintsee ñaꞌan xi ndidaa ka xani ni nataka xiꞌin ni. Andu na kata, andu na dakuaꞌa ñaꞌan, adi na kaꞌan sa dadana ñaꞌan Ndios, andu na kaꞌan daꞌan ti en sakuituni xanaa xi, adi andu na kachi toꞌon nasa nchu kachi toꞌon yukua. 27 San ubi adi uni ñayii na kaꞌan daꞌan ti en sakuituni xanaa xi, san eni eni ñayii yaꞌa na kaꞌan, san duꞌua tuku nandeꞌe sa koo en ñayii na kachi toꞌon nasa nchukachi daꞌan yaꞌa. 28 Doko tu ti io ñayii kachi toꞌon nasa nchukachi daꞌan yaꞌa, san guaꞌa ka ma kaꞌan kadi ñayii yaꞌa, adi na kaꞌan ni mee ñayii yaꞌa xi Ndios. 29 San duꞌua ni tuku, tu io profeta san ubi adi uni tsa na kaꞌan, san dagua ka ñayii na ntsaꞌa xiꞌin na kunini guaꞌa tu Ndios kuu ia kaꞌan ña ñaꞌan. 30 Doko tu dakaa tsa intsaku na kaꞌan Ndios xi, tsa kaꞌan kuaan na kadi tsa xuꞌu tsa, san na kaꞌan enka tsa kuan ndasa na kadaa tsa sa sadaa Ndios. 31 Kuan ndidaa ni guaꞌa ni kada profetizar ni eni ni eni ni, ndasa ndidaa ni na kutuꞌua san duꞌua na niꞌi ntsee ni ndidaa ni. 32 Kuan ñayii niꞌi don sa kada profetizar xini ñayii na ora kaꞌan ñayii san xini ñayii kunini ñayii, 33 kuan Ndios ti dadana ñaꞌan ia ku ndo, kida ia sa kadi ni nakoo ndo.
Duꞌua kuenta dakuaꞌa ñaꞌan da xi ndidaa ka ñayii ndada ii Ndios xiꞌin kuu x-congregación ia, duꞌua kada ni ndidaa ni tuku, 34 Ndidaa ña deꞌe kadi ni na ku nini ña ora nataka x-congregación Ndios, kuan ti semani sa kaꞌan ña ndidaa ña, kuan ndaꞌa xee ña yeꞌe ña kuenta yodotuni ley. 35 San tu nasa kuu sa ti xini ña san na ndukutoꞌon ña xi xee ña xeꞌe ña; kuan ora nataka x-congregación Ndios ti guaꞌa sa kaꞌan ña.
36 Nakaꞌan ni sa adi sa io ni kée s-toꞌon Ndios, san nisa adi ni meni ni ndidaa ni niꞌi toꞌon yaꞌa. 37 San tu andu sani-ini sa ku x-profeta Ndios adi sani-ini sa xininchisa ñaꞌan xi x-espíritu ia, nandeꞌe sa na kininchisa sa ndidaa sa chidotuni da ya kuu sa táꞌvichiion ia kuu ku Toꞌo ndo. 38 San tu ti en nchu tediki san duꞌua ni na kookadi tuku.