2
Juandiku ti nchu kiꞌin nituku da ku koto ñaꞌan d̶a jni ndidaa ni, ndasa ma kendoo ndaꞌvi xanaa ni ndidaa ni. 2 Kuan tu dan na kada da sa na kuin ndaꞌvi xanaa ni ndidaa ni, andu kada sa ku kuu iꞌni xanaa da, tu adi dini ndidaa ni 3 Juandiku tsáa da carta sa káꞌvi ni. San sa xininchisa ni sa tsaa da, juandiku ora na kij da kikotoñaꞌan da jni san ma kada ka ni sa ta uꞌu da, kada ni sa na ku iꞌni da san ñoꞌon xanaa da sa tu ku iꞌni da, san ku iꞌni ni ndidaa ni tuku. 4 Doko kuenta tsáa da carta yukua jni, sáni-ini ntseꞌe da san tá-uꞌu ntseꞌe da xiꞌin ndáꞌyu da. Doko adi tsáa da ndasa na ta-uꞌu ni ndidaa ni, kuan sa nchoj da kuu sa na kini ni ndidaa ni sa kida-ini ñaꞌan ntseꞌe da jni ndidaa ni.Na koo ndo sakaꞌnu-ini xi ndidaa ñayii kaꞌan kuiꞌia ku ndo
5 San ti nchu dayaꞌia da ndaa kaꞌan da ya, doko ñayii kída sa tá-uꞌu xanaa da adii ni dan kída ñayii xi kuan ntsa ndeꞌeka dini ndidaa ni kída ñayii xi. 6 Sa kuaꞌa nayaꞌia tsa yaꞌa kída ni ndidaa ni. 7 Sa nandeꞌe sa kada ni vita kuu, sa koo ni sakaꞌnu-ini sa saꞌa tsa xiꞌin kada kaꞌnu ni xanaa tsa, kuan na kada kada dañu s-tsa sa ntseꞌe da ndaꞌvi io xanaa tsa. 8 Juandiku sakundaꞌvi da jnu ni ndidaa ni sa na na kinimani ni tsa. 9 Carta tsándaꞌa da jni, tsándaꞌa da ndasa na kini da tu xininchisa ni ndidaa sa táꞌvichiion da jni. 10 Tsa io ni sakanu-ini sa saꞌa xi, san dan io da sa kaꞌnu-ini s-tsa tuku. San ndidaa sa io dan sakaꞌnu-ini sa saꞌa xi, tu duꞌua kuu, san sa saꞌa dini sakoo da sakaꞌnu-ini, san Cristu kuu ia naꞌa, 11 ndasa ma dandaa ñaꞌan sakakuiꞌia ku ndo, kuan xiniguaꞌa ndo maña xi.
Pablo ndiꞌi xanaa tsa sa saꞌa Tito
12 Kuenta sáꞌan da ñuu nani Troas sa káꞌan da s-toꞌon Jesucristu, san kuaꞌa ntseꞌe ñayii nchú kunini s-toꞌon Jesucristu ñuu yukua, 13 doko ti kúkaꞌnu xanaa da kuan ti naniꞌin da Tito, juandiku dandoo da ndidaa ñayii io ñuu yukua san kundij nituku da Macedonia.a
Pablo sañaꞌan tsa taxaꞌvi xi Ndios
14 Doko taxaꞌvi xi Ndios, kuan ndikii chintsee ñaꞌan ia sa na kadanar da ndidaa da sa saꞌa Jesucristu, kuan senchiion ñaꞌan ia d̶a ndidaa da sa na kaꞌan da s-toꞌon ia, sa kuu na en diko tami nakaꞌñu ndidaa xichi. 15 Kuan ntso ndidaa ndo ñayii nanitaꞌvi kuu ndo kuenta en diko nataꞌan xanaa Ndios kuan neꞌe ndo d̶iko Jesucristu, san sa kuxi ndidaa ñayii ti nanitaꞌvi, 16 diko yaꞌa kuu na en d̶iko ndii xiꞌin sa xidokuachi, doko sa kuxi ndidaa ñayii nanitaꞌvi sa saꞌan tami kuu sa sañaꞌan ñuyii ma ndeꞌe, san andu kuu sa guaꞌa ni kada ndidaa x-chiion Ndios. 17 Doko dan ndidaa da kaꞌan ndaa da s-toꞌon Ndios, san ti kuu da kuenta dagua ka ñayii ku kuika sa sa saꞌa sa dadana Stoꞌon Ndios, kuan Ndios xini ia sa kidachiion ndaa da xiꞌin kaꞌan ndaa da, san mee ia tsandaꞌa ñaꞌan d̶a ndidaa da, san kuu da ndidaa da xaꞌan Jesucristu.