3
Ti kaꞌan da ndidaa da jaꞌa, ndasa na kaꞌan guaꞌa d̶a. San nisa ti nandeꞌe sa taj da tutu yodo sa kaꞌan guaꞌa d̶a, sa nisa ti xika da sa na tsaa ni tutu sa kaꞌan guaꞌa d̶a jnu enka ñayii. 2 Kuan dini ndidaa ni kuu ni na tutu kaꞌan guaꞌa d̶a ndidaa da, ndidaa ñayii xini nasa kuu sa guaꞌa kída Ndios sa saꞌa ni ndidaa ni. Ndasa na kaꞌan guaꞌa ñayii d̶a ndidaa da, san nandeꞌe sa ntsaꞌa ñaꞌan ñayii jni ndidaa ni. 3 Dini ndidaa ni kuu ni kuenta en tutu kaꞌan guaꞌa d̶a ndidaa da, sa tsáa Jesucristu, san dan nakuañaꞌan da. En tutu ti yodotuni xiꞌin tinta maska sa sa saꞌa x-espíritu Ndios nchito, san ti yodotuni jnu yuu maska sa xanaa ni ndidaa ni yodotuni.4 San ñoꞌo xanaa da ndidaa da Ndios sa saꞌa Jesucristu, 5 Adii ini ni mee da ndidaa da kida da sa kida da, kuan Ndios kuu ia kida sa na kuu kada da sa kida da. 6 San Ndios kída ia sa na kuu kuinokuachi da ndidaa da xi en tratu saa,a sa ti yodotuni xiꞌin toꞌon maska sa sa saꞌa x-espíritu Ndios; kuan tratu yodotuni xiꞌin toꞌon kachi sa nandeꞌe sa kuu ndo ndidaa ndo, doko x-espíritu Ndios taxi ñuyii ku ndo ndidaa ndo.
7 Tu sa xinokuachi xi tratu chídotuni sata yuu yadi, kaꞌnu ntseꞌe sa taꞌan ora yukua, kuan oni ntsa jnu Moisés kuaan sandutsa ntseꞌe san ndidaa ñayii ñuu Israel ti xu kachi na ntsaꞌa ñaꞌan s-tsa,b san sa sandutsa yukua kueni kueni ndéꞌe. 8 Tu duꞌua nasa ma kaꞌnu ka sa xinokuachi xi espíritu. 9 Kuan tu tratu kida sa xidokuachi ndo ndidaa ndo kaꞌnu ntseꞌe, maska kaꞌnu tratu saa kida sa na koo ndaa ndo jnu Ndios. 10 Kuan sa kaꞌnu ntseꞌe kuan ti kuu ka kuan vita io en sa kaꞌnu ka sa kuxi. 11 San tu kaꞌnu ntseꞌe sa táꞌan kuenta sañaꞌan Ndios tratu xi Moisés san kuani tratu yaꞌa ma kudii ndidaa tiempu, doko kaꞌnu ntseꞌe ka sa táꞌan kuenta kída Ndios tratu saa, kuan tratu yaꞌa koo ndidaa tiempu.
12 Kuan ñoꞌon xanaa da sa Ndios kada ia ndidaa sa kachi ia s-tratu saa ia, san ti nayuꞌu da sa kaꞌan da s-toꞌon Ndios. 13 Kuan ti en da kida kuenta Moisés sa xu da tavi tsa en titsaa jnu tsac ndasa ma kini ndidaa ñayii io Israel sa sandutsa jnu tsa, kuan kueni kueni ndeꞌe. 14 Doko ti sákuituni xanaa tsa ndidaa tsa; ntsa kii vita, juandiku ora kaꞌvi tsa ndidaa tsa tratu nisaꞌnu titsaa tavi jnu tsa ndidaa tsa kida sa ti sakuituni xanaa tsa, ntsa na dita Jesucristu s-tsa. 15 Kuan ntsa kii vita ora kaꞌvi tsa sa chídotuni Moisés san titsaa yukua daꞌvini daa xanaa tsa ndidaa tsa. 16 Doko ora na naxikokagua tsa ndidaa tsa io ia kuu ku Toꞌo ndo, titsaa yukua dita. 17 Kuan ia kuu ku Toꞌo ndo kuu Espíritu san ami io x-espíritu ku Toꞌo ndo, ti en ka tastuni ñaꞌa. 18 Kuan ntso ndidaa ndo ti tavi ka titsaa ku nuu ndo. Kuan kuu ndo na en s-peju sa danaꞌa nchakaa ia, ia nadama ku kiuyii ndo. Taxaꞌvi xi sa kida x-espíritu ia ku ndo, juandiku ndikii saꞌnu ndo san ndee ndo ia kuaꞌan.