Na kada ntse-ini xi ndiden en ñayii
16
San vita tsandaꞌa da ku kuaꞌa ndo Febe ña kuu en ña xininchisa ñaꞌan xi Jesucristu, san kuu ña diaconisa x-congregacion Ndios io ñuu Cencrea; 2 xika da jni ndidaa ni sa kii nasaa ña, natan ñaꞌan ni xan kuenta kida ni xi ndidaa ka ñayii kuu d̶aꞌa Ndios. San chintsee ñaꞌan ni xan xiꞌin ndidaa sa nandeꞌe xan, kuan kuaꞌa ntseꞌe ñayii chíntsee ña, san chíntsee ñaꞌan ña xi mee da tuku.3 Na kada ntse-ini xi ta Aquila xiꞌin d̶eꞌe tsa na Priscila,a ndiaꞌan tsa yaꞌa kidachiion xiꞌin da sa xinokuachi da xi Jesucristu, 4 tsa yaꞌa ndiaꞌan tsa taꞌan ntseꞌe tsa sa saꞌa da, taxaꞌvi ñaꞌan s-tsa yaꞌa juandiku io da. Ndidaa ñayii xininchisa kuu ndidaa x-congregación Ndios, san ti kuu ñuu Israel sañaꞌan tsa taxaꞌvi s-tsa yaꞌa ndiaꞌan tsa tuku. 5 Na kada ntse-ini xi ndidaa ñayii nataka xeꞌe ku kiani ndo ta Aquila xan ndiaꞌan tsa. Na kada ntse-ini xi xani da tsa kida-ini ntseꞌe da nani Epeneto, tsa io en ndaꞌa ñuu Asia kuan kuu tsa tsa diꞌna nuu xíninchisa ñaꞌan xi Jesucristu. 6 Na kada ntse-ini xi María, ña kídachiion ntseꞌe sa saꞌa ni ndidaa ni. 7 Na kada ntse-ini xi Andrónico xiꞌin Junias, tsa kuu xayii da, san yéꞌe da vekaa xiꞌin tsa. San tsa yaꞌa nduu tsa xinimani ñaꞌan ntseꞌe ndidaa apóstol kuan s-tsa, san díꞌna ka tsa nduu tsa xíninchisa ñaꞌan xi Jesucristu sa kuj d̶a.
8 Na kada ntse-ini xi Amplias, tsa xinimani da kuenta ndidaa ñayii xininchisa ñaꞌan xi Jesucristu. 9 Na kada ntse-ini xi Urbanu, tsa xinokuachi xiꞌin da xi Jesucristu xiꞌin xani da tsa xinimani da nani Estaquis. 10 Na kada ntse-ini xi Apeles, tsa xítotuni ñaꞌan ntseꞌe xi doko kuyakui tsa ndidaa sa taꞌan tsa, sa saꞌa sa xininchisa tsa Jesucristu. Na kada ntse-ini xi ndidaa xayii Aristóbulo. 11 Na kada ntse-ini xi Herodión tsa kuu xayii da, xiꞌin na kada ntse-ini xi ndidaa xayii Narcisu, tsa xininchisa ñaꞌan xi Jesucristu. 12 Na kada ntse-ini xi Trifena xiꞌin Trifosa, ña xinokuachi xi ku Toꞌo ndo Jesucristu. Na kada ntse-ini xi ku kuaꞌa ndo ña xinimani ndo nani Pérsida, ña xínokuachi ntseꞌe xi ku Toꞌo ndo Jesucristu. 13 Na kada ntse-ini xi Rufo,b tsa ndékaxi ia, na kada ntse-ini xi j-nana tsa, ña xu koto ñaꞌan d̶a na d̶aꞌa ña. 14 Na kada ntse-ini xi Asíncrito, Flegonte, Hermas, Patrobas, Hermes xiꞌin ndidaa ku kiani ndo io sa io tsa ndidaa tsa. 15 Na kada ntse-ini xi Filólogo xiꞌin Julia, Nereo xiꞌin x-kuaꞌa tsa, na kada ntse-ini xi Olimpas xiꞌin ndidaa tsa ndáda ii Ndios io sa io tsa ndidaa tsa.
16 San xiꞌin nee xanaa ni ndidaa ni kaꞌan taꞌan ni. Ndidaa x-congregación Cristu kachi sa na kada ntse-ini jni.
17 Xanii, guaꞌa ni xiꞌin ndidaa ñayii kida sa taꞌntsa dagua ni ndidaa ni, kuan dakuaꞌa ñaꞌan tsa ndidaa tsa enka modo jni, san dadana ñaꞌan tsa jni ndidaa ni. Ma kotaꞌan ni ndidaa ñayii duꞌua kida ya. 18 Kuan ti xinokuachi tsa xi ku Toꞌo ndo Jesucristu, maska sa kida tsa sa nchoj mee tsa, san xiꞌin toꞌon vita dandaa tsa ndidaa ñayii vita kukuituni guaꞌa ka xanaa xi s-toꞌon Ndios. 19 Ndidaa ñayii xini sa dini ndidaa ni xininchisa ni Ndios, sa juan kida sa ku-iꞌni ntseꞌe da. San nchoj d̶a sa na dadana ñaꞌan ni, sa kutuni jni sa kada ni sa guaꞌa san adi sa kuiꞌia. 20 San duꞌua Ndios taxi sa kadi ni nakoo ndo ndidaa ndo, kada ia sa na kadanar ni sakakuiꞌia. Ku Toꞌo ndo Jesucristu na taxi ia j-gracia ia jni ndidaa ni.
21 Kada ntse-ini jni ndidaa ni kachi Timoteu nu kidachiion xiꞌin da. Kada ntse-ini jni kachi Luciu, Jasón xiꞌin Sosípater, tsa kuu xayii da.
22 Dan Terciu chídotuni da tutu yaꞌa ndidaa toꞌon kachi Pablo, san kuenta ñayii xininchisa ia xininchisa ni ndidaa ni, kachi da sa na kada ntse-ini jni ndidaa ni.
23 Kada ntse-ini jni kachi Gayo ya,c kuan xeꞌe tsa yaꞌa kendoo da, san jaꞌa nataka ndidaa ñayii kuu x-congregacion Jesucristu tuku. Kada ntse-ini jni kachi Erastu ya,d tsa yeꞌe tuini ndaꞌa xi ñuu yaꞌa, kada ntse-ini jni kachi ku kiani ndo tsa nani Cuartu.
24 J-gracia ku Toꞌo Jesucristu na koo xiꞌin ni ndidaa ni. Duꞌua na kuu.
Na kadakaꞌnu ndo Ndios
25 Na kukaꞌnu ia ku kida sa sa saꞌa s-toꞌon guaꞌa Jesucristu, dakuañaꞌan da jni ndidaa ni, na kuiin kutu ni, sa saꞌa toꞌo guaꞌa yedaꞌvi ntsa antika sa kuguaꞌa ñuyii. 26 Doko vita sa saꞌa sa táꞌvichiion Ndios ia ma ndeꞌe, sa yeguaꞌa yaꞌa dádana ñaꞌan Ndios xi nee ñuyii sa saꞌa sa chidotuni ndidaa x-profeta ia, ndasa ndidaa ñayii na kininchisa ñaꞌan xi Jesucristu.
27 San vita sa saꞌa Jesucristu, meni Ndios ia kutuni ntseꞌe xi na kukaꞌnu na kuduku ndidaa ndituꞌu tiempu. Duꞌua na kuu.