15
Ntso ndidaa ndo kuenta guaꞌa sa in ndaa ndo xiꞌin sa xininchisa ndo Jesucristu, sa xini ndo nasa nataꞌan xanaa ia, nandeꞌe sa chintsee ñaꞌan ndo xi ndidaa ñayii vita niꞌntsee ka xiꞌin sa xininchisa ñaꞌan xi Jesucristu san adi meni sa guaꞌa ku mee ndo nduku ndo. 2 Nandeꞌe sa chintsee ndo ñayii, sa na kada tsa sa guaꞌa san duꞌua na kutuꞌua ka ñayii yaꞌa sa kuu Ndios. 3 Kuan ia kuu Cristu ti ndúku ia sa guaꞌa ni xi mee ia; san duꞌua kachi s-toꞌon Ndios: “Ndidaa sa kaꞌan kuiꞌia ñayii xo ntsuꞌu xído.”a 4 Ndidaa sa yodotuni s-toꞌon Ndios kuu sa na kutuꞌua ndo. San ndidaa sa kachi s-toꞌon Ndios ku ndo kuu sa na ndukuntsee ndo xiꞌin na kuntsatu ndo, san taxi toꞌon kaꞌnu-ini ku ndo san xininchisa ndo. 5 Doko Ndios kuu ia kida sa kukaꞌnu ku kuanaa ndo xiꞌin chintsee ñaꞌan ia, san xika da xi ia sa na chintsee ñaꞌan ia jni ndidaa ni, ndasa en dini modo na kani-ini ni, san na kunchiko ni sa kída Jesucristu. 6 San duꞌua dini ndidaa ni eni na kadakaꞌnu ni Ndios ia kuu s-Tata ku Toꞌo ndo Jesucristu.Toꞌon guaꞌa sa kuxi ndidaa ñayii ti kuu ñuu Israel
7 Kini guaꞌa taꞌan ni ndidaa ni kuani ncha ndaa ni, kuan duꞌua xiniguaꞌa ñaꞌan ia kuu Jesucristu jni ndidaa ni, san duꞌua ndidaa ni kadakaꞌnu ñaꞌan xi Ndios. 8 Kuan ia kuu Jesucristu kíxi ia xínokuachi ia xi ndidaa ñayii kuu ñuu Israel, ndasa na kini tsa ndidaa tsa sa Ndios ti naꞌntsa ia sa kada ia sa xinotaꞌan ndidaa sa sadaa ia xi ndidaa ku tadeꞌe ndo ío díꞌna, 9 san kíxi ia tuku ndasa ndidaa ñayii ti kuu ñuu Israel na kadakaꞌnu ñaꞌan xi Ndios sa saꞌa sa guaꞌa kída ia. Kuan duꞌua yodotuni:
Kada kaꞌnu ñaꞌan da jni jnu ndidaa ñayii ti kuu ñuu Israel,
san kata da sa saꞌa sa nani ni.b
10 San kachi tuku:
Ku iꞌni, ndidaa ñayii ti kuu ñuu Israel xiꞌin ñuu Israel.c
11 San kachi nituku:
Ndidaa ñayii ti kuu ñuu Israel na kadakaꞌnu ñaꞌan xi Ndios,
San kadakaꞌnu ñaꞌan ndidaa yoꞌo ñayii io ndidaa ñuu.d
12 San Isaías x-profeta Ndios chídotuni tsa tuku:
Kixi en xayii Isaí,
San tastuni ntseꞌe tsa; san tastuni tsa ndidaa ñuu ti kuu ñuu Israel
San ndidaa ñuu ti kuu ñuu Israel kininchisa ñaꞌan s-tsa.e
13 Kuan Ndios ia taxi sa nakoo guaꞌa ndo na taxi ia sa na ku-iꞌni ni ndidaa ni, san na kadakaꞌnu ia xanaa ni san xiꞌin sa tastuni Espíritu Santu na dachitu ñaꞌan jni san duꞌua na koꞌon xanaa ni sa kachi ia.
14 Doko xini guaꞌa da sa ndidaa ni vi xanii, guaꞌa ntseꞌe io ni ndidaa mee ni, san kutuni ntseꞌe jni, san guaꞌa ni nakani taꞌan ndaa ni ndidaa mee ni. 15 Juandiku ku yee da chidotuni da ndidaa toꞌon deen yaꞌa jni ndidaa ni, ndasa ma en ni dana, san kida da ndidaa jaꞌa kuan sa kunda-ini ñaꞌan Ndios juandiku táxi ia sa tastuni da, 16 kuan ndekaxaꞌan ia d̶a sa kuinokuachi da xi ia xiꞌin na kaꞌan da s-toꞌon guaꞌa ia xi ndidaa ñayii ti kuu ñuu Israel. San duꞌua ndidaa ñayii yaꞌa na ku kuu en sa taꞌan xanaa ia, kuenta en sa doko kuan ndundoo ñayii jnu Ndios sa saꞌa Espíritu Santu.
17 Kuan ndidaa sa kída Jesucristu sa saꞌa da, juan kída sa ku-iꞌni da san xinokuachi da xi Ndios. 18 Ma nakani da ndidaa sa kída da, sa nakani da kuu na modo senchiion ñaꞌan Jesucristu d̶a, sa kída sa ndidaa ñayii ti kuu ñuu Israel na kininchisa ñaꞌan xi Ndios, san ndidaa jaꞌa táꞌan sa saꞌa ndidaa toꞌon káꞌan da, xiꞌin ndidaa sa kída da, 19 Kuan xiꞌin sa tastuni Espíritu Santu kída da kuaꞌa ntseꞌe milagru xiꞌin kuaꞌa ntseꞌe señal, san ndidaa xichi káꞌan da toꞌon guaꞌa ya, ntsa Jerusalén xiꞌin ndidaa ñuu, ntsa ñuu Ilírico. 20 Kuan duꞌua sáni-ini da sa kada da, sa na tsaku s-toꞌon guaꞌa Jesucristu. Doko ti kída vaa da ami sa kaꞌan ñayii toꞌon guaꞌa yaꞌa maska sa kaꞌan da ami vita tsaku ka sa kuu Jesucristu, 21 duꞌua kuenta yodotuni s-toꞌon Ndios:
Ndidaa ñayii ti tsáku xi andu kuu ia, kini ñaꞌan xi ia.
San ndidaa ñayii ti sakuituni xanaa xi san kukuituni xanaa ñayii kada ia.f
Pablo sani-ini tsa sa kiꞌin tsa Roma
22 Nchu kiꞌin ntseꞌe da Roma, sa ku koto ñaꞌan da jni ndidaa ni san ti kida sa kiꞌin da, kuan ora sani-ini da sa kiꞌin da san ti kida.g 23 Doko vita tuꞌu x-chiion da ndidaa ñuu yaꞌa san sa kunaꞌa nchu kini ñaꞌan da jni ndidaa ni, 24 sani-ini da sa ku koto ñaꞌan da jni ndidaa ni kii na kiꞌin da España. San duꞌua na kuiꞌni ntseꞌe ndo ndidaa ndo, san danduu kiꞌin ni ku dayaꞌia ñaꞌan ni ndidaa ni d̶a. 25 Doko vita kiꞌin da Jerusalén kuneꞌe da en mediu sa kuxi ndidaa ku kiani ndo io jukua. 26 Mediu yaꞌa dataka ndidaa ku kiani ndo io Macedonia xiꞌin ndidaa ku kiani ndo io Acaya sa kuxi ndidaa ku kiani ndo kundaꞌvi io Jerusalén.h 27 Kuan mee tsa ndidaa tsa duꞌua sani-ini sa chintsee ñaꞌan tsa, san ndidaa sa kida tsa kuu sa guaꞌa kuan neyeka tsa xi ndidaa ñayii Israel. Kuan sa saꞌa ndidaa ñayii Israel juandiku niꞌi tsa s-toꞌon Ndios juandiku guaꞌa sa ndidaa ñayii ti kuu ñuu Israel na chintsee tsa xiꞌin sa io s-tsa xi ñayii kuu ñuu Israel. i 28 San duꞌua na tuꞌu kuneꞌe da mandadu yaꞌa, san na tuꞌu nakuañaꞌan da sa chintsee ñaꞌan s-tsa san kee da kiꞌin da sa io ni, ora kiꞌin da España. 29 San xini da sa kii na ku koto ñaꞌan d̶a jni san nakani ka da jni ndidaa ni s-toꞌon guaꞌa Jesucristu.
30 Doko xika da jni vi xanii, sa saꞌa ku Toꞌo ndo Jesucristu xiꞌin sa xinimani ñaꞌan Espíritu Ndios, sa na kakataꞌvi ni xi ia sa saꞌa da, 31 káka ni xi Ndios sa na chintsee ñaꞌan ia d̶a ñuu Judea ndasa ma kikagua da ndaꞌa ndidaa ñayii ti xininchisa ñaꞌan xi ia io juan, xiꞌin ndasa sa ndidaa sa kuneꞌe da kiꞌin sa kuxi ndidaa ku kiani ndo io Jerusalén na teen tsa xiꞌin nee xanaa tsa; 32 Kuan tu Ndios na kachi ia sa nasaa da sa io ni xan, san na kuu kaꞌnu xanaa da xiꞌin na ndexavi da. 33 San Ndios na taxi ia sa kadivii ni nakoo ni ndiden en ni. Duꞌua na ku.