Ñayii vita niꞌi ntsee ka xiꞌin s-toꞌon Ndios
14
Nakuaka ni ndidaa ñayii ti niꞌntsee xiꞌin sa xininchisa doko ma kada jaꞌa jukua na ndodo ni ndidaa ni. 2 Kuan io ñayii xininchisa ñaꞌan xi Jesucristu san sani-ini sa guaꞌani kaxi ndidaa sa io, doko io ñayii vita niꞌntsee ka sa xininchisa ñaꞌan xi Jesucristu saxi meni yukukuii. 3 Doko ñayii saxi ndidaa ni ka sa io, ma kukuiꞌia-ini tsa ñayii saxi ni yukukuii, san duꞌua ni na kada ñayii saxi yukukuii kuaan tuku, ma kaꞌan kuiꞌia tsa xi ñayii saxi ndidaa ni ka, kuan Ndios eni xinimani ñaꞌan ia ku ndo ndidaa ndo. 4 Dini ndidaa ni ti guaꞌa sa kaꞌan kuiꞌia ni xi ñayii kidachiion xi enka tsa toꞌo, kuan meni s-toꞌo tsa kuu tsa kaꞌan tu kuu kidachiion tsa ña ñaꞌan, san duꞌua tuku, ku Toꞌo ndo Jesucristu kuu ia tastuni sa chintsee ñaꞌan ia, ndasa na kada ndaa ndidaa tsa yaꞌa x-chiion tsa.5 Kuntsatu ni na kaꞌan da enka toꞌon jni, io ñayii sani-ini sa io kii kaꞌnu, san dagua ñayii sani-ini sa eni kuu ndidaa kii ya, doko ndiden ndiden nchoxi sa kani-ini ndaa ndo. 6 Ndidaa ñayii sani-ini sa io kii kaꞌnu, kida tsa sa na kukaꞌnu Ndios, san sañaꞌan tsa taxaꞌvi xi ia. San duꞌua ni kuu ñayii saxi yukukuii kuaan, kuan kida tsa sa na kukaꞌnu Ndios, san sañaꞌan tsa taxaꞌvi xi Ndios tuku.
7 Kuan sa nchito ndo xiꞌin sa xiꞌi ndo adi ku ndaꞌa ndo yeꞌe, ndaꞌa Ndios yeꞌe ndidaa. 8 Kuan tu nchito ndo, sa kuxi ku Toꞌo ndo Jesucristu nchito ndo; san tu na kuu ndo, sa kuxi ia kuu ndo. Juandiku tu na kunchito ndo adi na kuu ndo, kuu ndo xaꞌan ku Toꞌo ndo Jesucristu. 9 Juandiku Jesucristu xíꞌi ia xiꞌin nandoto ia, kuan ndasa na ku kuu ia s-Toꞌo ndidaa ñayii xíꞌi xiꞌin ñayii nchito.
10 Juandiku ti guaꞌa sa kaꞌan kuiꞌia ni xi ndidaa xani ni tsa xininchisa ñaꞌan xi Jesucristu nataka xiꞌin ni, san nisa sa kukuiꞌia-ini ni tsa ndidaa tsa, kuan ndidaa ndo ndaka kuachi xi jnu Jesucristu.a 11 Kuan yodotuni:
Chonaꞌa ntsu mee ntsu, kachi ku Toꞌo ndo, sa ku nuu ntsu kukuinxiti ndidaa ñayii,
san ndidaa ñayii naꞌma kuu nu ntsu. b
12 San duꞌua ndiden ndiden nakuañaꞌan ndo kuenta nasa kída ndo jnu Ndios.
Ma kada yo sa kada enka ñayii kuachi
13 San vita, ma kodondaꞌa taꞌan ndo ndidaa ñani ndo; ma kada sa saꞌa sa kida ndo, kada sa kada ku kiani ndo kuachi. 14 Sa xininchisa da Jesucristu kida sa xini ndaa da, sa ndidaa sa saj ndo ti kuu sa kuiꞌia, doko tu andu sani-ini sa dakaa sa saj ndo kuu sa kuiꞌia, san guaꞌa ka ma kaxi ñayii duꞌua sani-ini. 15 San tu xinimani ni dakaa ku kiani ndo, san guaꞌa ni xiꞌin ndidaa sa saj ni, kuan na kada juan kada sa kani-ini tsa sa kuachi kuu san kuita tsa, san Jesucristu xiꞌi ia sa saꞌa tsa yaꞌa tuku. 16 Kuani xini guaꞌa ni sa adi sa kuiꞌia kida ni, doko io ñayii sani-ini sa sa kuiꞌia kuu, juandiku ma kada ni sa kaꞌan kuiꞌia ñayii xi sa guaꞌa kida ni; 17 Kuan sa tastuni Ndios xanaa ñayii, adi sa kaj ndo adi sa koꞌo ndo xaꞌvi ka xi, sa xaꞌvi xi kuu sa guaꞌa xiꞌin sa kookadi ndo xiꞌin sa na kuu iꞌni ndo. San ndidaa jaꞌa kuu kida ndo sa saꞌa Espíritu Santu. 18 Tu duꞌua na kuinokuachi ndo xi Jesucristu, san nataꞌan xanaa Ndios, san ndidaa ñayii kaꞌan guaꞌa ku ndo.
19 Juandiku nchoxi sa nduku ndo sa kada ndo mediini sa guaꞌa, sa na kada sa kadi ni na koo ku kiani ndo xiꞌin na chintsee taꞌan ndo sa na kini ndo xichi Ndios. 20 Ma d̶ativi ni ndidaa tsa vita niꞌin ntsee ka xiꞌin sa xininchisa ñaꞌan xi Ndios sa saꞌa ndidaa sa saj ni. Doko ndidaa sa saj ndo kuaan io ndoo; sa kuiꞌia kuu sa xini ndo sa ndichiion kida ndo, san juan kida sa sakodama ñayii vita niꞌi ntsee ka. 21 Guaꞌa ka ma kaj ndo koño, xiꞌin ma koꞌo ndo vinu, xiꞌin ma kada ndo nisadana sa kada sa dakaa en ku kiani na kada kuachi. 22 Xininchisa ni ña? duꞌua ni kininchisa ni ntsa jnu Ndios. ¡Guaꞌadiko ñayii ndekaxi san ti yuꞌu-ini sa kaxi adi sa koꞌo! 23 Doko tu andu yuꞌu-ini ora ndekaxi sa kaxi, kida kuachi, kuan ti io seguro ora ndekaxi.