Ndios xiꞌin ndidaa kustixa
13
Ndidaa ñayii nandeꞌe sa kininchisa ñaꞌan xi gobiernu xiꞌin kustixa. Kuan Ndios kida sa na koo gobiernu xiꞌin kustixa, kuan ia yaꞌa sañaꞌan sa na tastuni tsa. 2 Andu ti xininchisa ñaꞌan xi kustixa san nakaꞌnu ñaꞌan xi sa táꞌvichiion Ndios san ñayii nakaꞌnu ñaꞌan, Ndios ndakakuachi xi ñayii duꞌua kida. 3 Kuan ndidaa tsa tastuni, ti io tsa sa dayuꞌu tsa ndidaa ñayii kida sa ndaa, maska sa io tsa sa dayuꞌu tsa ndidaa ñayii kida sa kuiꞌia. San tu dini ndidaa ni ti nchoj ni sa na da yuꞌu ñaꞌan tsa jni, san kada ni sa kuu sa guaꞌa, san ndidaa tsa tastuni kaꞌan guaꞌa jni; 4 kuan ndidaa tsa yaꞌa io tsa sa kuinokuachi tsa xi Ndios xiꞌin sa nduku tsa sa guaꞌa sa kuj ni ndidaa ni, doko tu ti xininchisa ñaꞌan ni ndidaa ni, sa guaꞌa ka kesaꞌa ni yuꞌu ni, kuan chiion io tsa, adi io duꞌua tsa. Kuan io tsa sa kuinokuachi tsa xi Ndios, san io tsa sa ndaka tsa kuachi xi ndidaa ñayii kida sa kuiꞌia tuku. 5 Juandiku nandeꞌe sa kininchisa ñaꞌan ni xi tsa tastuni, adii ni sa yuꞌu ni sa ndaka tsa kuachi maska sa nakoo ndaa ni. 6 Kuan ndidaa tsa tastuni io tsa sa kuinokuachi tsa xi Ndios, xiꞌin sa kada tsa chiion sañaꞌan s-tsa, juandiku chaꞌvi ni ndidaa ni sa nani impuestu.7 Cháꞌvi ni kuenta guaꞌa io sa chaꞌvi ni: Tu kuu impuestu, san impuestu, tu kuu sa kani ni en tuini, san kani ni tuini, tu kuu sa kininchisa ñaꞌan san kininchisa ñaꞌan ni, tu kuu sa kuinokuachi ni san kuinokuachi ni san ku yeñuꞌu ni xiꞌin kueniꞌno ni tsa tastuni.a
8 Guaꞌa ni, ma ku neyeka ni xi nisa en ñayii, maska sa kinimani ñayii. Kuan andu xinimani taꞌan san sa kída ndidaa sa taꞌvichiion j-ley Ndios. 9 Kuan j-ley Ndios duꞌua yodotuni: “Ma koo s-tsani yo,b ma kaꞌni yo ndi,c ma duꞌu yo,d ma da kuido yo kuachinañu ñayii,e ma nchoj ntsaa yo sa io xi enka ñayii”;f Ndidaa sa yodotuni j-ley Ndios nduu endini ka sa táꞌvichiion ia: “Kinimani ñaꞌan xi enka ñayii kuenta xinimani yo mee yo.”g 10 Sa xinimani ti kida sa kuiꞌia xi enka ñayii; juandiku tu xinimani taꞌan ndo ndidaa ndo, san jaꞌa nchukachi sa kida ndo ndidaa sa taꞌvichiion j-ley Ndios.
11 Na kani-ini ndo na ñuyii io ndo, na ndikuu ku kuanaa ndo, kuan sa kuyachi ntseꞌe kii ndixi Jesucristu ndikuaka ñaꞌan ia ku ndo, yachi ntseꞌe ka io ia sa kuxi kii xininchisa ndo s-toꞌon guaꞌa ia. 12 Kuenta kaa tiempu vita, danaꞌa sa sa kuyachi ntseꞌe kii ndixi ia. Juandiku, na dandoo ndo ichi kuiꞌia in ndo ya, san na kunchiko ndo ichi guaꞌa na kiꞌin. 13 Na koo ndo na ñayii io nduu, san na kada ndo sa guaꞌa, ma kada sa kida sa sakoo ndo sakanuu, ma kada meni sa kaj ndo kada ndo, ma naxini ndo, ma nchoj ndo ñadeꞌe yaꞌa ñadeꞌe yukua adi tsie yaꞌa tsie yukua, ma naa ndo san nisa ma koꞌon sa kuadu ku kuanaa ndo. 14 Guaꞌa ka na choꞌon ni mee ni ndaꞌa Jesucristu san ma kada ka ni sa kuiꞌia nchoxi xikikoño ni.