Sa nandeꞌe sa kada ñayii xininchisa ñaꞌan xi Jesucristu
12
Juandiku vi xanii, ntsaꞌa ni sa guaꞌa ntseꞌe Ndios, xika da jni ndidaa ni sa na kuañaꞌan ni nee xuyii ni xi ia, san kuinokuachi ni, san kada ni ndidaa sa nataꞌan xanaa ia. Kuan ndasa na koo ndo modo nchoxi ia, san na ku kuu en sa chiñuꞌu ñaꞌan xi ia. 2 San ma koo ni kuenta io ndidaa ka ñayii ti xini ñaꞌan xi Ndios. Guaꞌa ka nadama ni sa sani-ini ni xiꞌin sa kida ni ndidaa ni. San duꞌua kini ni sa nataꞌan xanaa Ndios, sa kuu ndidaa sa guaꞌa xiꞌin sa ndaa.3 Ndios táꞌan-ini ñaꞌan ia d̶a, juandiku kána ñaꞌan ia d̶a, san xika da jni ndidaa ni sa ma kani-ini ni sa kutuni ka jni sa kuxi dagua ka ñayii. Kada ni kuenta guaꞌa taxi Ndios sa na kininchisa ni. 4 Kuan en yikikoño io kuaꞌa sa io xi, doko tuku tuku sa kida sa io xi, 5 san duꞌua kuu ntsoo ndidaa ndo kuenta guaꞌa xininchisa ndo Jesucristu kuu ndo eni yikikoño xiꞌin ia kuani kuaꞌa ntseꞌe ndo doko deen deen sa kuu kida ndo ndasa na chintsee taꞌan ndo ndidaa ndo.
6 San tuku tuku sa taxi ia sa kada ndo ndidee en ndo, duꞌua kuenta nchoj mee ia,a juandiku tu Ndios taxi ia sa na kuu kaꞌan ndo s-toꞌon ia, san na kaꞌan ndo sa nchoxi ia kuenta ñayii xininchisa ñaꞌan xi Jesucristu; 7 san tu taxi ia sa na kuu kuinokuachi ndo xi enka ñayii, na kuinokuachi guaꞌa ndo, san tu taxi ia sa na kuu dakuaꞌa ñaꞌan ndo, san na dakuaꞌa ñaꞌan ndaa ndo; 8 san tu taxi ia sa na kuu kadakaꞌnu ndo xanaa ñayii, san duꞌua na kada ndo, san tu taxi ia sa na kuu chintsee ñaꞌan ndo xiꞌin sa io ku ndo, sa ma ku kuu kini ndo. San tu taxi ia sa na kuu ku ndo ñayii jnu xi, san guaꞌa guaꞌa na ku kuu ndo, san tu nandeꞌe sa chintsee ñaꞌan ndo xi ñayii nandeꞌe xi, san na kada ndo, san oni na ku-iꞌni ndo na kada ndo.
9 Kinimani nchisa ni ndidaa ni ñayii, san kini uꞌu ni ndidaa sa kuiꞌia san ma dandoo ni ndidaa sa guaꞌa. 10 Kini mani taꞌan ni ndidaa ñani ni, san kininchisa taꞌan ni ndidaa ni xiꞌin chiñuꞌu taꞌan ni ndidaa ni.
11 San ndukuntsee ni ndidaa ni sa ma ku kuu dusa ni; san oni iꞌni ku kuu ni sa xinokuachi ni xi Ndios.
12 Neni ntsatu ni ndidaa ni xi Ndios ku-iꞌni ni ndidaa ni, san tu taꞌan ntseꞌe ni sa saꞌa Ndios kuyakui ni, san ora xikataꞌvi ni xi Ndios san kakataꞌvi ni on ni.
13 Chintsee ñaꞌan ni xiꞌin sa io jni xi ndidaa ñayii xininchisa kundaꞌvi nataka sa nataka ni ndidaa ni; san ndidaa ñayii kee xika nandeꞌe lugar kendoo, kuañaꞌan noo ni xeꞌe ni sa na kendoo ñayii.
14 Kakataꞌvi ni xi Ndios sa na kada ia sa guaꞌa xi ndidaa ñayii xiko ñaꞌan jni;b san ma kada kaka ni sa kuiꞌia sa saꞌa ñayii yaꞌa.
15 Ku-iꞌni ni xiꞌin ndidaa ñayii ku-iꞌni. San ndaꞌyu ni xiꞌin ñayii ndaꞌyu.
16 Koo mani ni ndidaa ni, san ma kukuiꞌia-ini ni ñayii ndaꞌvi, ma kani-ini ni sa kutuni ka jni sa kuxi ndidaa ka ñayii.c
17 Tu andu kida sa kuiꞌia jni, san ma naxikoneꞌe ni. Guaꞌa ka nduku ni sa kada ni sa guaꞌa xi ndidaa ñayii. 18 Nduku ni sa kadivii ni na koo ni xiꞌin ndidaa ñayii. 19 Xanii, ma naa ni xiꞌin ñayii, guaꞌaka na choꞌon ni ndaꞌa Ndios, kuan Ndios kuañaꞌan xaꞌvi ndidaa ñayii kida sa kuiꞌia jni; kuan duꞌua yodotuni s-toꞌon Ndios: “Ntsuꞌu ndakakuachi, san ntsuꞌu kuañaꞌan xaꞌvi ndidaa ñayii, duꞌua kachi ia kuu ku Toꞌo ndo.”d 20 San duꞌua kachi s-toꞌon ia tuku: “Tu ñayii xini-uꞌu ñaꞌan yo kuita, kuañaꞌan sa nakaj nu, san tu yichi nu ndutsa, kuañaꞌan ndutsa na koꞌo nu. Kuan ora duꞌua kida yo kuu kuenta modo chido yo ñuꞌu d̶iki nu”.e 21 Ma kueen on yo sa na kadanar ñaꞌan sa kuiꞌia yo, guaꞌa ka xiꞌin sa guaꞌa kadanar ñaꞌan xi sa kuiꞌia.