Ndidaa ñayii ñuu Israel ndekaxi Ndios
11
San vita ndukutoꞌon da: Ama ti nchú na kinimani Ndios ñuu ndekaxi ia ña? ¡Ñaꞌan, ti duꞌua kuu! kuan dan kuu da ñuu Israel tuku, san yeꞌe da j-niñi Abraham xiꞌin kée da s-tribu Benjamín.a 2 Kuan ntsa diꞌna Ndios nakini ia Israel kuenta xuun ia, san adi vita ti xinimani ñaꞌan ka ia. “Ña ti xini ni sa yodotuni sa kaꞌan sa kída Elías x-profeta Ndios, kii xikataꞌvi tsa xi Ndios san dakuidokuachi tsa ñuu Israel?” san sadaa tsa: 3 “Ndios, sáꞌni tsa ndidaa x-profeta ni, san datani tsa xito sa sakodo sa doko jni; san meni ka da kendoo, san nchu kaꞌni ñaꞌan tsa d̶a tuku.”b 4 Doko Ndios sadaa ia: “Ndekaj ntsu usa mil tsiee ti chíñuꞌu ñaꞌan xi Baal”.c 5 San duꞌua vita, Ndios ndékaxi ia uu ñayii ñuu Israel sa saꞌa j-gracia ia. 6 San tu ndekaxaꞌan ia sa saꞌa j-gracia ia san adi ka sa saꞌa sa guaꞌa kida ñayii kuu, kuan tu sa saꞌa sa guaꞌa kida ñayii na ku kuu san j-gracia Ndios ma ku kuu ka gracia.7 Nasa tuda? Sa nduku ñayii ñuu Israel ti niꞌi tsa doko ndidaa ñayii ndekaxi Ndios kuu sa dii, san dagua ka ñayii ndu ntsee d̶iki xi, 8 Kuenta yodotuni s-toꞌon Ndios: “Ndios sañaꞌan ia espíritu sa na nduntsee d̶iki ñayii, kída ia sa ma kini tsa sa ntsaꞌa tsa, sádii ia d̶oꞌo ñayii, ndasa ma kukuituni xanaa ñayii, san duꞌua ni ka daa tsa ndidaa tsa ntsa kii vita”.d 9 San David kachi tsa:
“Ndidaa viko kida tsa ndidaa tsa na nduu sa kukodama tsa,
san na ndugua tsa, ndasa ma taꞌan-ini ñaꞌan Ndios, san na kada ia sa na taꞌan ntseꞌe tsa”.
10 San nduchinuu tsa na kadi, san ma tuu ka,
San sata tsa na nduteꞌe, san ma ndundaa̱ ka.e
Sa nanitaꞌvi ndidaa ñayii ti kuu ñuu Israel
11 San kuani ndidaa ñayii kuu ñuu Israel ti kachi kada tsa sa nchoxi Ndios, doko adi ndidaa ti kachi kada tsa. Doko ndasa kída ntsee diki tsa kída sa ndidaa ñayii ti kuu ñuu Israel nanitaꞌvi kida Ndios. San jaꞌa kída sa ndidaa ñayii kuu ñuu Israel kuu kuiño tsa. 12 San tu sa kída ntsee diki ndidaa ñayii kuu ñuu Israel kída sa ndidaa ñayii ti kuu ñuu Israel niꞌi sa guaꞌa. Kaꞌnu ka bendición ku kuu tu ndidaa ñayii kuu ñuu Israel na na tuꞌua ñaꞌan xi Ndios.
13 Ndidaa toꞌon kaꞌan da kaꞌan da xi ndidaa dini ñayii ti kuu ñuu Israel, kuan Ndios tsandaꞌa ñaꞌan ia d̶a sa na kaꞌan da jni ndidaa ni, san chiion yaꞌa ntsaꞌa da sa nandeꞌe ntseꞌe, 14 jaꞌa kida da ndasa na ku kuiño ñayii xuun da ya, san duꞌua na kada sa nanitaꞌvi tsa uu tsa. 15 Kuan sa ti xínimani ñaꞌan Ndios s-tsa ndidaa tsa, duꞌua kída ia ndasa na ndumani ñayii xiꞌin ia, kani-ini ni ndidaa ni nchakada ora Ndios na na kinimani ñaꞌan nituku ia xi ndidaa ñayii kuu ñuu Israel kuan kuu kuenta en ñayii xiꞌi san io nituku. 16 Kuan tu nakuañaꞌan yusa kee diꞌnanuu xi Ndios san ndidaa ka yusa kuaan ku ii, san tu xoꞌo yutu kuan ku ii san ndidaa ka ndaꞌa xi kuaan ku ii tuku.
17 San tu en ndaꞌa yutu kuaan díti san dini ku ni olivo yuku, ndáki ntsaa ñaꞌan jni juan, san senchiion ni xoꞌo xi xiꞌin xuyii yutu kuaan, 18 Mandeꞌe naꞌnu nchu ku kuu ni, kuan eni ndaꞌa xi kuu ni. Kuan ndaꞌa yutu kuaan ti dakaxaꞌan xi xoꞌo xi, maska sa xoꞌo xi dakaxaꞌan xi ndaꞌa xi.
19 Gua sani-ini ni: “Díti ndaꞌa xi ndasa na ndaki ntsa ñaꞌan ku ndo juan.” 20 Sa ndaa kuu, kuan sa ti xininchisa ñaꞌan ndidaa ñayii ya xi Ndios juandiku duꞌua taꞌan tsa ndidaa tsa diti ñaꞌan s-tsa. Doko dini ndidaa ni sa saꞌa sa xininchisa ni Ndios juandiku in ndaa ni. Doko ma kada juan kada sa ku kunaꞌnu ni guaꞌa ka yuꞌu ni; 21 Kuan tu Ndios ti ío ia sakaꞌnu-ini xi ndidaa ndaꞌa xi sa ku xaꞌan xi san nisa dini ma koo ia sa kaꞌnu-ini xi. 22 Ntsaꞌa ni sa Ndios guaꞌa ntseꞌe ia, doko keꞌe d̶iki ni sa Ndios deen ntseꞌe ia tuku. Deen ntseꞌe ia xi ndidaa ñayii kida kuachi doko guaꞌa ntseꞌe kida ia jni ndidaa ni san duꞌua kada ia jni ndidaa ni tu na kininchisa ñaꞌan ni on ni xiꞌin na kuañaꞌan ni taxaꞌvi xi ia, kuan tu ñaꞌan sa ntsa ndeꞌe dini ndidaa ni ma kinimani ia. 23 Kuan tu ndidaa ñayii ñuu Israel na dandoo tsa sa ti xininchisa tsa, san nduu nituku tsa xuun Ndios, kuan Ndios tastuni ia sa ndakintsa ñaꞌan nituku ia s-tsa ndidaa tsa yutu kuan. 24 Kuan tu dini kuu ni en olivo yuku, san saꞌntsa ñaꞌan jni san ndakintsaa ñaꞌan jni xi olivo guaꞌa, vika tuku tsa yaꞌa ndidaa tsa, sa kuu ndaꞌa mee xi, san ndakintsaa ñaꞌan s-tsa sa kuu xoꞌo olivo mee tsa.
Ndidaa ñayii ñuu Israel nanitaꞌvi
25 Xanii, kuaꞌa ntseꞌe sa vita kini ka ni ndidaa ni, juandiku na kachi toꞌon da ndidaa sa sani-ini Ndios sa kuj ndo ndidaa ndo, ndasa ma kunaꞌnu ni ndidaa ni. kuaꞌa ntseꞌe ñayii kuu ñuu Israel nduu ntsee xanaa xi san ti nchu kininchisa tsa; doko duꞌua kada tsa, ntsa na xinotaꞌan ndidaa ñayii nandeꞌe sa kininchisa ñaꞌan xi Ndios ñayii ti kuu ñuu Israel. 26 San danduu Ndios kada ia sa nanitaꞌvi ndidaa ñayii ñuu Israel, kuan duꞌua yodotuni:
Ichi Sion kixi ia kada sa nanitaꞌvi,
Dita ia ndidaa sa kuiꞌia io xi Jacob.f
27 San jaꞌa ku kuu tratu kada ntsu xiꞌin nu ndidaa nu,
kii na koo ntsu sakaꞌnu-ini sa saꞌa x-kuachi nu ndidaa nu.g
28 Doko vita, Ndios ti mani ia xiꞌin ndidaa ñayii kuu ñuu Israel ndasa ndidaa ñayii ti kuu ñuu Israel na kininchisa toꞌon guaꞌa ya doko Ndios xinimani ni on ia ndidaa ñayii kuu ñuu Israel, kuan ndekaxaꞌan ia s-tsa ndidaa tsa xiꞌin ndidaa s-tadeꞌe tsa. 29 Kuan Ndios ti nadama ia sa sani-ini ia san ti sañaꞌan ia en sa guaꞌa san danduu dita ia san nisa ti dana ia ndidaa ñayii ndékaxi ia. 30 San duꞌua, dini ndidaa ni ti xu kininchisa ni Ndios, doko niꞌi ni sa xinimani ñaꞌan Ndios sa saꞌa ndidaa ñayii ñuu Israel ti xininchisa, 31 san duꞌua ndidaa tsa yaꞌa ti xininchisa tsa vita, kuan ndasa na niꞌi ni ndidaa ni sa kunda-ini ñaꞌan Ndios, san duꞌua ni tsa yaꞌa ndidaa tsa níꞌi tsa sa kunda-ini ñaꞌan Ndios tsa tuku. 32 Kuan Ndios kída ia sa ndidaa ñayii ma kininchisa ñaꞌan xi ia kuan ndasa na nandeꞌe sa na kunda-ini ñaꞌan ia xi ndidaa ndituꞌu ñayii.
33 Kutuni ntseꞌe xi Ndios, san ntsooo ndidaa ndo vixi ntseꞌe kuu ku ndo sa tediki ndo modo kida ia xiꞌin modo ndaka kuachi ia xi ndidaa sa io. 34 Kuan: “Andu xíni nasa sani-ini ia kuu ku Toꞌo ndo. Ama io ñayii sádaa nasa na kada ia ña?h 35 Ña daa ñayii sañaꞌan noo xi Ndios ndasa na naxikoneꞌe ia?”i 36 Kuan sa ndakuiti kuu, sa ndidaa sa io ya kídaguaꞌa Ndios sa kuxi ia. ¡San Ndios na kukaꞌnu na kuduku ia ndikii! Duꞌua na kuu.