10
Xanii, kuenta guaꞌa xininchisa ni Jesucristu, sa nchoxi xanaa da xiꞌin sa xikataꞌvi da xi Ndios kuu sa nanitaꞌvi ndidaa ñayii kuu ñuu Israel. 2 Sa xini da sa sa kida tsa kuu sa nchu kuinokuachi ntseꞌe tsa jnu Ndios, doko ti xini tsa na modo kada tsa. 3 Kuan modo nchoj mee tsa sani-ini tsa sa na kinimani ñaꞌan Ndios s-tsa san ti nduku tsa modo nchoj mee Ndios sa na kinimani ñaꞌan ia; 4 kuan Ndios ti na kinimani ñaꞌan ia ku ndo tu kida ndo sa kachi ley; vita na kinimani ia ndidaa ñayii xininchisa ñaꞌan xi Jesucristu. Kuan xinotaꞌan ndidaa ley sa saꞌa Jesucristu.5 Kuan Moisés chídotuni tsa na modo nanitaꞌvi ñayii kida sa kachi ley, san duꞌua chídotuni tsa: Ñayii na kada ndidaa sa yodotuni ya san kunchito sa saꞌa xi.a 6 Doko duꞌua kachi xi ndidaa ñayii xininchisa ñaꞌan xi Ndios ndasa na na kinimani ñaꞌan ia: Ma duꞌua kani-ini yo ndidaa yo: “Andu ndaa andivi? (kuan jaꞌa kada sa Jesucristu noo ia andivi) 7 Ña andu nonoo sa kono naa niñu?” (kuan jaꞌa kada sa na nandoto Jesucristu sa io ndidaa ndii) 8 S-toꞌon Ndios yodotuni san kachi sa io yachi sa io ni ndidaa ni, xuꞌu ni xan xiꞌin xanaa ni xan ñoꞌon.b San toꞌon yaꞌa ku toꞌon xininchisa kaꞌan da ndidaa da: 9 kuan tu kaꞌan ni xiꞌin xuꞌu ni sa Jesucristu kuu S-toꞌo ni, san xininchisa ni xiꞌin nee xanaa ni sa Ndios ndaneꞌe ñaꞌan ia sa io ndidaa ndii, san nanitaꞌvi ni. 10 Kuan xiꞌin ku kuanaa ndo xininchisa ndo sa io Ndios sa kaꞌnu-ini sa saꞌa ku kuachi ndo, san xiꞌin ku kiuꞌu ndo kidavaa ndo sa nanitaꞌvi ndo.
11 Kuan yodotuni s-toꞌon Ndios: “Ndidaa ñayii na kininchisa ñaꞌan xi ia, ma niꞌi sakanuu”.c 12 Kuan eni Ndios kuu Ndios ndidaa ñayii kuu ñuu Israel xiꞌin ñayii ti kuu ñuu Israel kuan guaꞌa ntseꞌe Ndios xi ndidaa ñayii xika sa na chintsee ñaꞌan ia xi. 13 Kuan duꞌua yodotuni: “Ndidaa ñayii nachonaꞌan sa nani ia kuu ku Toꞌo ndo nanitaꞌvi”.d
14 San na modo nachonaꞌan ñayii sa na kada ia sa na nanitaꞌvi ñayii tu vita kininchisa ñaꞌan ka ñayii xi ia? San na modo kininchisa ñaꞌan ñayii xi ia tu ti niꞌi toꞌon ñayii andu kuu ia? San namodo nitoꞌon ñayii s-toꞌon Ndios tu ti en kaꞌan? 15 San namodo kadaa s-toꞌon Ndios xi ñayii tu ti en tsandaꞌa ñaꞌan sa na kiꞌin ku kadaa? kuenta yodotuni: “¡Naku ntseꞌe da vii kaa sa saa ñayii kaꞌan toꞌon guaꞌa sa na koo kadi ñayii!” e
16 Doko adi ndidaa ñayii tén toꞌon guaꞌa ya, kuan duꞌua kachi profeta Isaías: Ndios, “Andu xíninchisa ku toꞌon ndo ya?”f 17 “Juandiku, sa xininchisa ndo saa ichi ku doꞌo ndo san s-toꞌon Ndios kida sa sakunini ndo.”
18 Doko kachi da: Ama ti tsáku nchisa xi ñayii ña? Naku ma tsaku xi ñayii,
san nee ñuyii xitsaniꞌno s-toꞌon Ndios
ntsa sa naa ntseꞌe ka kuaan tsáku stoꞌon ia.g
19 San ndukutoꞌon nituku da: Ama ndidaa ñayii io ñuu Israel ti tédiki ña? Doko diꞌna nuu kachi Moisés:
Ntsuꞌu kada ntsu sa na ku kuiño yo xi en ñuu ti xininchisa ñaꞌan xi Ndios;
san kada ntsu sa na nadiko xo xiꞌin en ñuu ti nchu tediki.h
20 San profeta Isaías kúyee tsa kaꞌan tsa:
Ndidaa nu ti nanduku ñaꞌan ku ntsu nániꞌin ñaꞌan nu;
san nánuu ntsu jnu ndidaa nu ti ndukutoꞌon ñaꞌan ku ntsu.i
21 Doko duꞌua kachi profeta Isaías sa sadaa Ndios xi ñuu Israel: “Nee nduu ndaneꞌe ntsu ku ndaꞌa ntsu sa chintsee ntsu en ñuu ti xininchisa ñaꞌan xiꞌin ti nchu kada sa nchoj ntsu”.j