Ndios ndekaxi ia ñuu Israel
9
Jesucristu xini ia sa kaꞌan da sa ndaa san ti kida naꞌntsa da. San xini da sa Espíritu Santu, 2 xini sa sa ndaa kuu sa kaꞌan da jni ndidaa ni, san ndikii ndaꞌvi ntseꞌ xiꞌin ta uꞌu ntseꞌe xanaa da. 3 Sa saꞌa ndidaa ñayii ñuu Israel, kuan kuu tsa ñayii xuun da, san nchu chintsee ñaꞌan da. Guaꞌa ni taꞌan da j-maldición Ndios san na dandoo ñaꞌan Jesucristu d̶a tu juan na kada sa na na kininchisa tsa ia. 4 Ndidaa ñayii yaꞌa kuu ñayii ñuu Israel, kuan Ndios ndekaxaꞌan ia s-tsa ndidaa tsa, san dákini ñaꞌan ia s-tsa sa kaꞌnu ia, sáñaꞌa ia j-ley ia s-tsa ndidaa tsa, sádaa ia na modo kada kaꞌnu ñaꞌan tsa ndidaa tsa xi ia, san sáñaꞌa ia sa kachi ia sa kuañaꞌa ia s-tsa ndidaa tsa. 5 Sa io ndidaa tsa yaꞌa kée ndidaa patriarca, san dii ni juan kée Jesucristu tuku, kuenta en ñayii, san ia yaá kuu j-Ndios ndidaa sa io. San Ndios na kukaꞌnu na ku duku ndikii. Duꞌua na kuu.6 Doko adi dána Ndios toꞌon káꞌan ia; kuan adi ndidaa ñayii káku ñuu Israel kuu ñuu yukua, 7 san kuani kuu tsa xayii Abraham doko adi ndidaa tsa kuu d̶aꞌa Abraham, kuan Ndios sadaa ia: “Isaac xan kada sa koo kuaꞌa ntseꞌe xayii yo”. 8 Jaꞌa nchukachi sa adi sa kuu tsa ndidaa tsa xayii Abraham juandiku kuu tsa d̶aꞌa Ndios, maska sa ndidaa ni ñayii káku xi promesa sadaa Ndios xi Abraham. 9 Kuan duꞌua kachi promesa kuan: “Ndusta kij nituku ntsu san Sara sa io en d̶aꞌa nu”.
10 San adii ni juan kuu ndidaa, kuan kuenta ñoꞌon Rebeca kuaan tineꞌe, Isaac tsa kuu ku tadeꞌe ndo 11 san antika sa kaku tineꞌe yiki kuaan, antika sa kada nu sa guaꞌa adi sa kuiꞌia, Ndios ndekáxi ia nu en nu ndasa na xinotaꞌan sa kachi ia sa kada ia san adi sa saꞌa xi sa guaꞌa adi sa kuiꞌia kida nu, maska sa duꞌua kída ia kuan duꞌua nchóxi ia. 12 Kuan duꞌua sadaa ia xi Rebeca: “D̶aꞌa yo nu kaꞌnu ka xan kuinokuachi nu xi nu ku luchi xan.”a 13 Kuenta yodotuni: Jacob xínimani ntsu, doko Esaú ti táꞌan-ini ntsu.b
14 Nasa kachi ndo tuda?, ti kida ndaa Ndios sa kida ia ña. ¡Ñaꞌan! adi duꞌua kuu. 15 Kuan sadaa ia xi Moisés: Kunda-ini ñaꞌan ntsu xi ñayii nchu kunda-ini ntsu, san kada-ini ntsu ñayii nchu kada-ini ntsu.c 16 San Ndios kunda-ini ñaꞌan ia xi andu nchu kundai-ni ñaꞌan ia san adi sa nchoxi ñayii kuu maska sa sa nchoxi mee ia. 17 Kuan yodotuni sa sadaa Ndios xi Faraon: Kída ñaꞌan ntsu rey xo kuan na kini yo sa tastuni ntsu xiꞌin ndasa nee ñuyii na kini andu kuu ntsu.d 18 San duꞌua Ndios kunda-ini ia andu nchu kunda-ini ia san ndada ntsee ia xanaa ñayii tu nchoj ia.
19 Doko kaꞌan ni: Tu duꞌua kuu san nasa da kuidokuachi ñaꞌan Ndios xi ñayii ya tuda? Andu nakaꞌnu sa nchoxi ia? 20 Ntsaꞌa ni ka, Andu ku ni juandiku ndaka ni kuenta xi Ndios? Ama kadaa kidi kuaan xi tsa kídaguaꞌa ñaꞌan xi: Naku kídaguaꞌa ñaꞌan ni duꞌua d̶a? 21 Kuan tsa kidaguaꞌa kidi ñuꞌu, tastuni tsa sa kadaguaꞌa tsa kidi guaꞌa ntseꞌe, sa kee sa kuika adi sa xaꞌvi ntseꞌe xi, san dini xiꞌin ntsaꞌyu yukua kidaguaꞌa tsa en kidi sa kuenchiion sa kada dakaa nika chiion.
22 San Ndios dadana ñaꞌan ia sa diko xi ia xiꞌin sa tastuni ia sa kada ia, juandiku kuyakui ñaꞌan ia xi ndidaa ñayii diko-ini ia xiꞌin ndidaa ñayii nandeꞌe sa ndeꞌe. 23 San duꞌua ni dadana ñaꞌan ia sa kunda-ini ñaꞌan ia ku ndo ndidaa ndo, xiꞌin sa tastuni ia sa kada ia sa nanitaꞌvi ndo. Ntsa díꞌna kunda-ini ñaꞌan ia ku ndo, san ndekaxaꞌan ia sa nakoo ndo sa io ia, 24 san adii ni ñayii kuu ñuu Israel ndekaxi ia kuan ndekaxi ia ñayii ti kuu ñuu Israel tuku. 25 Kuenta yodotuni tutu chidotuni Oseas x-profeta ia, sa kachi:
Ñayii ti kuu ku kiun ntsu danani ntsu ku kiun ntsu,
san ñayii ti xinimani ntsu, kinimani ntsu.e
26 San dini lugar kachi ntsu xo ndidaa yo: Yoꞌo ndidaa yo ti kuu yo ku kiun ntsu,
san dini lugar yukua kachi ntsu xo, yoꞌo ndidaa yo kuu yo d̶aꞌa Ndios nchito.f
27 San Isaías x-profeta ia, kaꞌan sa ku kuu ñuu Israel ya tuku: “San kuani ndidaa d̶aꞌa Israel ya na ku kuu kuenta ñuꞌu kuchi io ndodo mar, doko adii ndidaa ñayii nanitaꞌvi. 28 Kuan Ndios kada ia sa yodotuni s-toꞌon ia sa táꞌan ndidaa ñayii io ñuyii.”g 29 Kachi Isaías kuan tuku:
Tu Ndios tastuni ntseꞌe ti dandoo ia uu ñayii san xita ndo
kuan taꞌan ndo kuenta táꞌan ñuu Sodoma xiꞌin Gomorra.h
Sa ti xininchisa ñuu Israel
30 Nasa kachi ndo tuda? Sa ñayii ti kuu ñuu Israel, ñayii ti kída nisadana sa na ndumani xiꞌin Ndios, Ndios na kinimani ñaꞌan ia kuan sa xíninchisa ñaꞌan ñayii kída ña? 31 doko ñayii ñuu Israel, ti na kinimani ñaꞌan Ndios xi ndidaa ñayii yaꞌa, kuani xu kada tsa sa kachi ley. 32 San naku ti niꞌi ñayii yaꞌa sakaꞌnu-ini, kuan inchiko ka tsa sa kada tsa sa taꞌvichiion ley sa kuxi sa kininchisa tsa Ndios ndasa na koo ia sakaꞌnu-ini sa saꞌa tsa ndidaa tsa. Juandiku Jesucristu kuu ia en “yuu sa sakodama ñayii” 33 Kuenta yodotuni s-tutu ii Ndios:
Yuu na kakituu ntsu Sion ya vita, yuu yaꞌa kada sa kuaꞌa ntseꞌe ñayii kukodama san ndugua;
doko ñayii na kininchisa ñaꞌan xi ia, ma niꞌi sakanuu.i