Modo nchoxi Espíritu Ndios sa koo ndo
8
San duꞌua, ñayii xininchisa ñaꞌan xi Jesucristu ti xidokuachi ka tsa ndidaa tsa jnu Ndios, kuan ndidaa ñayii yaꞌa ti ndinoo ka xiꞌin sa nchoxi xikikoño ñayii, kuan ndinoo ñayii modo nchoxi Espíritu. 2 Kuan j-ley x-Espíritu Ndios, sa taxi ñuyii, kíneꞌe ñaꞌan d̶a ndaꞌa ley kuáchi xiꞌin sa xiꞌi. 3 Kuan sa ti káchi kada ley, kuan xikikoño da ti yakui, Ndios kída ia ora tsandaꞌa ia Jesucristu kuenta en ñayii ñuyii yaꞌa, san xiꞌi ia sa saꞌa ku kuachi ndo ndasa ma taꞌan ka ndo kada sa xiꞌi. 4 Duꞌua kída ia, ndasa na kuu kada ndo sa kachi j-ley Ndios, ndidaa ntso ñayii io kuenta taꞌvichion x-espíritu Ndios san adi kuenta nchoxi yikikoño.5 Kuan ndidaa ñayii io kuenta nchoxi yikikoño kida sa nchoxi xikikoño xi. Doko ndidaa ñayii ñoꞌon xanaa xi x-espíritu Ndios kida sa nchoxi x-espíritu Ndios. 6 Kuan ñayii kida ndidaa sa nchoxi xikikoño xi sa niꞌi kuu sa ndeꞌe, doko ñayii kida sa nchoxi x-espíritu Ndios ñayii yaꞌa niꞌi ñuyii xiꞌin sa kookadi. 7 Kuan ndidaa sa kuiꞌia sani-ini yikikoño ti taꞌan-ini ñaꞌan xi Ndios; kuan ti xininchisa sa taꞌvichiion j-ley Ndios, san nisa ti kachi kada. 8 Kuan ñayii kida sa nchoxi xikikoño xi, Ndios ti taꞌan-ini ia ñayii duꞌua kida ya.
9 Doko dini ndidaa ni ti tastuni ñaꞌa xikikoño ni jni maska sa x-espíritu Ndios, tu kída sa io jni, kuan ñayii ti io x-espíritu Cristu xi ti kuu xaꞌan ia. 10 Doko tu Jesucristu io jni ndidaa ni, san kuani na kuu xikikoño ni sa saꞌa kuachi, doko Espíritu kada sa ku nchito ni kuan Ndios ti dakuidokuachi ñaꞌan ka ia jni ndidaa ni. 11 San tu io x-espíritu Ndios jni ndidaa ni, san dini ia kída sa nandoto Jesucristu, ia yaꞌa taxi ñuyii xi xikikoño ni sa sa xíꞌi, sa saꞌa x-espíritu Ndios io jni ndidaa ni.
12 Juandiku xanii, ku kikikoño ndo ti nandeꞌe ka sa tastuni ñaꞌan ku ndo xiꞌin ndidaa sa kuiꞌia nchoxi; 13 kuan tu ndidaa sa kuiꞌia nchoxi xikikoño ni kida ni, san ndeꞌe ni oni oni; doko tu xiꞌin x-espíritu Ndios na dandoo ni ndidaa sa nchoxi xikikoño ni, san niꞌi ni ñuyii ma ndeꞌe.
14 Kuan ndidaa ni ñayii tastuni ñaꞌan x-espíritu Ndios xi, ñayii yaꞌa ku d̶aꞌa Ndios. 15 Kuan Espíritu táxi Ndios jni, io ndasa ma yuꞌu ni xiꞌin kida sa na nduu ni d̶aꞌa Ndios, ndasa na kuu kadaa ni ¡Taa! xi ia. 16 San dini x-espíritu Ndios sadaa xi ku espíritu ndo sa kuu ndo d̶aꞌa Ndios. 17 San tu kuu ndo d̶aꞌa Ndios sa niꞌi ndo ndidaa sa guaꞌa taxi ia ku ndo.a Ndidaa jaꞌa koo ku ndo xiꞌin Jesucristu. Tu taꞌan ndo xiꞌin ia, kadakaꞌnu ñaꞌan kuu ndo xiꞌin ia tuku.
18 Kuan xini guaꞌa da sa sa taꞌan ndo ñuyii yaꞌa ti ndutaꞌan xiꞌin sa naꞌnu niꞌi ndo, sa taxi Ndios ku ndo. 19 Kuan ndidaa sa kídaguaꞌa Ndios ñuyii yaꞌa ntsatu vii sa na ketuu andu kuu ndidaa d̶aꞌa Ndios. 20 Kuan ndidaa sa kuguaꞌa ñuyii yaꞌa, kikagua maldicion Ndios sata xi san adi duꞌua nchóxi ndidaa jaꞌa maska sa Ndios duꞌua kída ia sa nakoo, doko ntsatu ndidaa sa io ñuyii yaꞌa, 21 sa nakuaka taꞌan xiꞌin ndidaa d̶aꞌa Ndios ndasa ma en ka kuu. 22 San ndidaa ndo xini, sa ndidaa sa kuguaꞌa ñuyii yaꞌa taꞌán ntseꞌe, kuenta taꞌan en ñadeꞌe sa io sa kaku daꞌa. 23 San adi ni ndidaa sa io ñuyii ya taꞌán ntseꞌe, ndidaa ndo duꞌua taꞌan tuku, ndidaa ntso kuenta guaꞌa io x-espíritu Ndios ku ndo, san x-espíritu Ndios ya kuu sa níꞌi ndo diꞌnaka, sa kuxi ndidaa ka sa kachi sa niꞌi ndo danduu. Neni ntsatu ndo sa na nakuaka ñaꞌan Ndios ku ndo kuenta d̶aꞌa ia, san duꞌua náyaa ndo ndidaa ndo ndaꞌa kuachi. 24 Kii niꞌi ndo sa nanitaꞌvi ndo, juan ñoꞌon ku kuanaa ndo sa dini niꞌi ndo, doko en sa ñoꞌon ku kuanaa ndo, tu io ku ndo san adi sakuntsatu ndo, kuan andu sakuntsatu sa niꞌi sa sa io xi? 25 Doko tu ntsatu ndo xi sa ti xini ndo, san na kuntsatu ndo kuani ncha na taꞌan ndo.
26 San duꞌua ni, x-espíritu Ndios chintsee ñaꞌan ku ndo ora ti kuyakui ndo; kuan ti xini ndo ncha kakataꞌvi ndo; doko x-espíritu Ndios xika sa saꞌa ndo xiꞌin toꞌon ti kachi kaꞌan ndo. 27 San Ndios ia xini ku kuanaa ndo, xini ia nasa nchu kadaa x-espíritu ia, kuan x-espíritu ia xika sa nchoxi Ndios, sa kuxi ndidaa ñayii kuu xuun ii ia.
Nisa en sa ma kadanar ñaꞌan ku ndo
28 Ndidaa sa taꞌan ñayii xinimani ñaꞌan xi Ndios kuu sa guaꞌa xi ñayii, san ndidaa ñayii yaꞌa kuu ñayii kána Ndios kuenta nchój mee ia. 29 Ntsa antika sa kuguaꞌa ñuyii, Ndios ndekaxaꞌan ia ndasa na ku kuu tsa ndidaa tsa kuenta D̶aꞌa ia, ndasa Jesucristu na ku kuu ia tsa kunaꞌnu s-tsa ndidaa tsa. 30 San ndidaa ñayii ndékaxi ia ntsa díꞌna, ndidaa ñayii yaꞌa kána ia tuku, san ndidaa ñayii kána ia, ndáda ñaꞌan ia ñayii ndaa s-tsa ndidaa tsa jnu ia; san ndidaa ñayii ndada ndaa ia, ndidaa ñayii yaꞌa kídakaꞌnu ia tuku.
31 Nasa ka kachi ndo tuda. Tu Ndios io ia xiꞌin ndo andu koo ku kontra ndo? 32 Tu Ndios nakua ñaꞌan ia D̶aꞌa ia sa na kuu ia sa saꞌa ndo ndidaa ndo, ama ma taxi ia ndidaa sa io xi ia ku ndo xiꞌin D̶aꞌa ia ña? 33 Andu kuu dakuido kuachi ñaꞌan xi ndidaa ñayii ndekaxi Ndios, ñayii kuu xaꞌan ia. Kuan mee ia kachi sa ñayii yaꞌa kuu ñayii ndaa. 34 Andu dakuidokuachi ñaꞌan xi ndidaa ñayii ndekaxi Ndios? Nisa en ñayii. Kuan Jesucristu xiꞌi ia sa saꞌa ndo ndidaa ndo, san nándoto ia, san intsaku ia ichi j-ladu kuaꞌa Ndios, san ndaka niꞌno ñaꞌan ia ku ndo jnu Ndios. 35 Andu dita sa xinimani ñaꞌan Jesucristu ku ndo? sa taꞌan ndo ña, sa sani-ini ndo ña, sa kuiko ñaꞌan ku ndo ña, dóko ña, sa ti io ku titsaa ndo ña, sa ii io sa taꞌan ndo ña, ña sa kaꞌni ñaꞌan ñayii xiꞌin machiti ku ndo. 36 Kuenta yodotuni:
Sa saꞌa dini san ndikii; ii io sa kuu da,
kuenta en ndikachi sa io sa kuu. b
37 Doko nisa en sa ma kadanar ñaꞌan ku ndo, kuan Jesucristu kuu ia chintsee ñaꞌan ku ndo, ia xinimani ñaꞌan ku ndo ndidaa ndo. 38 San xini ndaa da sa nisa sa kuu ndo, nisa ñuyii yaꞌa, nisa ángel, nisa sa tastuni sakakuiꞌia, nisa sa io vita, nisa sa kixi, 39 nisa sa io duku ntseꞌe, nisa sa io kono ntseꞌe, nisa en ka sa kuguaꞌa ñuyii ya dita sa xinimani ñaꞌan Ndios ku ndo sa saꞌa Jesucristu, ia kuu ku Toꞌo ndo.