Pablo io tsa en isla nani Malta
28
San saa da ndidaa da jukua sa niꞌitoꞌon da sa isla yukua nani Malta. 2 Ndidaa ñayii io jukua chintsee ñaꞌan ntseꞌe tsa d̶a ndidaa da, san choꞌon tsa ñuꞌu sa na nakuidi da ndidaa da, kuan víxi xiꞌin koon tikaya. 3 Teen Pablo en xido nduku yichi sa choꞌon tsa xiti ñuꞌu, san naduku niꞌno en koo ndaꞌa tsa, xíno te kída sa iꞌni. 4 Kuenta xíni ndidaa tsa io ñuu yaꞌa sa duꞌua kida koo san nda toꞌon tsa ndidaa mee tsa:—Seguru sa tsa yaꞌa kuu tsa en tsa saꞌni ndii, san kuani ti xiꞌi tsa xiti ndutsa doko ndios ndaka ndaa kuachi ti nchox ka sa koo tsa.
5 Danduu kidi tsa ndaꞌa tsa san kikagua niꞌno koo xiti ñuꞌu, doko atuu dana sa taꞌan Pablo. 6 San ndidaa tsa yaꞌa ntsatu tsa sa na kesaꞌa tsa kada uꞌu s-tsa adi kiki ni na ndugua tsa sa na kuu tsa. Doko ku naꞌa san atuu dana sa taꞌan tsa, san sani-ini tsa sa en ndios kuu Pablo ya.
7 Yachi jukua io en veꞌe kuu xaꞌan en tsa nani Publio en tsa kunaꞌnu isla yaꞌa. Tsa yaꞌa taj noo tsa xeꞌe tsa sa kendoo da san ío da uni kii. 8 San s-tata Publio kuꞌu s-tsa, san ñoꞌon ntseꞌe tsa kaꞌni xiꞌin koneꞌe ntseꞌe xiti tsa. Pablo sayii tsa sa koto ñaꞌan tsa san tuꞌu xikataꞌvi tsa sa saꞌa tsayee yaꞌa san sakindodo tsa ndaꞌa tsa d̶iki tsa yaꞌa san nduguaꞌa tsa. 9 Tuꞌu taꞌan jaꞌa, san ndidaa tsa io tsa kuꞌu xi io isla saꞌan tsa sa io Pablo ya san ndadaguaꞌa ñaꞌan s-tsa ndidaa tsa. 10 Ndidaa tsa yaꞌa xito ñaꞌan ntseꞌe tsa d̶a ndidaa da san kuaꞌa ntseꞌe sa taj s-tsa, san taꞌan kii kiꞌin da ndidaa da, san taj s-tsa ndidaa tsa sa nandeꞌe d̶a ichi kiꞌin.
Pablo saa tsa Roma
11 San yaꞌia uni yoo, san ku kee da ndidaa da en barku kuu ñuu Alejandria kuan jukua ín nee tiempu vixi san jnu xi kantsaa en x-imagen Cástor xiꞌin Pólux. 12 Saa da ñuu nani Siracusa, juan ío da uni kii. 13 Danduu saꞌan da ñuu nani Regio; yaꞌia en kii san kixi en tachi kaꞌnu ichi sur, san nduu uu kii saa da ñuu Pozzuoli. 14 Jukua naniꞌi da ndidaa da uu ku kiani ndo kána ñaꞌan tsa sa na kendoo da xiꞌin tsa en semana. Danduu saa da Roma. 15 San niꞌitoꞌon ndidaa ku kiano ndo io Roma san kix tsa ki natan ñaꞌan tsa ntsa Apio xiꞌin ntsa uni taberna d̶a ndidaa da. San xíni Pablo ya jaꞌa san sañaꞌan tsa taxaꞌvi xi Ndios, xiꞌin kukaꞌnu xanaa tsa. 16 Kuenta saa da Roma, semani ndidaa kustixa sa Pablo nakoo deen tsa en veꞌe san na kuntsaa ñaꞌan eni soldadu s-tsa.
Pablo io tsa Roma
17 Yaꞌia uni kii io Pablo Roma san kána tsa ndidaa judiu kunaꞌnu io Roma, ndasa na kiꞌin tsa veꞌe io Pablo, san táka ndidaa tsa yaꞌa san sadaa Pablo:
—Xanii, dan ti kída da nisa dana xi ku kiun ndo san nisa ti díta x-costumbre ku tadeꞌe ndo, kuani atuu kuachi kída da doko ntsa Jerusalén kuyii da ndaꞌa ndidaa romanu ya. 18 Kuenta tuꞌu nanduku tsa x-kuachi da, nchú dayaa ñaꞌan tsa d̶a kuan ti io nisa en sa kída da sa nandeꞌe sa kuu da. 19 Doko ndidaa ñayii ñuu Israel dákuidokuachi ñaꞌan d̶a nchu kaꞌni ñaꞌan tsa, juandiku xíka da sa na danaꞌma ñaꞌan Cesar d̶a, doko atuu kuachi káꞌan da xi xuun da. 20 Juandiku kana ñaꞌan da jni sa na ndatoꞌon ndo, kuan sa xininchisa da sa sadaa Ndios sa kuañaꞌan ia xi ñuu Israel kida sa nuꞌni da xiꞌin cadena yaꞌa.
21 Danduu sadaa ndidaa tsa yaꞌa:
—Ti níꞌi da ndidaa da tutu sa kee ñuu Judea sa kaꞌan sa kuu ni, san nisa en ku kiani ndo tsa kee juan ti kaꞌan tsa nasa xidokuachi ni. 22 Doko nchu kunini da nasa sani-ini ni, kuan kuvaa sa ndidaa xichi kaꞌan kuiꞌia xi sa xininchisa ni.
23 San chikuꞌua tsa en kii, san saa kii yukua san kuaꞌa ntseꞌe ñayii saa sa io Pablo. San nenduu neyaka kaꞌan Pablo s-toꞌo Ndios xiꞌin sa tastuni ia ñayii, san kaꞌan tsa ntsa ley chidotuni Moisés xiꞌin ndidaa sa chidotuni ndidaa profeta, san kída tsa sa na kukuituni xanaa tsa yaꞌa ndidaa tsa andu kuu Jesús. 24 Dagua ñayii xíninchisa sa káꞌan Pablo, doko dagua ñayii ti xininchisa. 25 San ndidaa tsa yaꞌa taꞌantsa dagua tsa kuan tuku tuku sani ini tsa san kuenta kesaꞌa tsa ndutsa tsa ndidaa tsa, Pablo sadaa tsa enka toꞌon:
—Guaꞌa ntseꞌe kaꞌan Espíritu Santu xi Isaías x-profeta Ndios sa na kadaa tsa xi ku tadeꞌe ndo:
26 Kuaꞌan ñuu yaꞌa ku kadaa;
kuani daa na kunini yo ndidaa yo, san ma kukuituni xanaa yo;
san kuani daa na ntsaꞌa yo ndidaa yo, san ma kukuituni xanaa yo.
27 Kuan d̶iki ñuu yaꞌa ndu ntsee,
san sádi nu d̶oꞌo nu,
xiꞌin sádi nu nduchinuu nu ndasa ma tuu,
san ti tuu jnu nu,
xiꞌin ti tsaku d̶oꞌo nu,
san ti nchu kij nu,
ndasa na ndada guaꞌa ñaꞌan ntsu jnu.
28 Juandiku ntsaꞌa ni ka, ndidaa ñayii ti kuu ñuu Israel tsáku xi toꞌon guaꞌa yaꞌa, san ndidaa ñayii yaꞌa kuu sa kininchisa.
29 San tuꞌu kaꞌan Pablo toꞌon yaꞌa, san ndidaa judiu kesaꞌa tsa naa toꞌon tsa ndidaa mee tsa san guaꞌa ka ndútsa tsa.