Tsandaꞌa ñaꞌan xi Pablo sa na kiꞌin tsa Roma
27
San kuenta ndatoꞌon tsa ndidaa tsa sa tsandaꞌa ñaꞌan tsa Italia d̶a nduu da, san na chiꞌi tsa Pablo ndaꞌa en centurión nani Juliu, tsa io batallon Augusto. 2 Kusaa da ndidaa da en barku ñuu Adramitio sa sa io sa kee kiꞌin Asia, kuaꞌan da ndidaa da xiꞌin Aristarco tsa kuu ñuu Tesalónica en ndaꞌa ñuu Macedonia. 3 Ndu enka kii saa da ndidaa da Sidón; san Juliu guaꞌa ntseꞌe ñayii kuu tsa xi Pablo, san semani tsa sa na kiꞌin tsa ku koto tsa ndidaa tsa mani xiꞌin tsa ñuu yaꞌa kuan na chintsee ñaꞌan tsa xiꞌin sa nandeꞌe xi Pablo. 4 San kee da ñuu Sidón san kuaꞌan da ntsaa ntsa enka ladu isla Chipre, kuan kana ntseꞌe tachi ichi enka ladu. 5 San danduu yaꞌia da xiti mar xiꞌin barku jnu ñuu Cilicia xiꞌin Panfilia, saa da ñuu nani Mira, sa kuu ndaꞌa ñuu Licia.6 Juan naniꞌi taꞌan Juliu tsa kuu centurión xiꞌin en barku Alejandrina sa saꞌan Italia, táꞌvichiion tsa sa nakaa da ndidaa da. 7 Kuaꞌa ntseꞌe kii ñoꞌon da barku xiti mar, kuan kueni kueni kuaꞌan, san uꞌu ntseꞌe saa da jnu ñuu nani Gnido, kuan niꞌi ntseꞌe kana tachi ichi kuaꞌan da sa ti kída sa kiꞌin niꞌi barku, yaꞌia da jnu ñuu nani Salmona san xiko nduu da isla Creta. 8 San táꞌan ntseꞌe tsa dakaka barku dana saa da ndidaa da en puertu nani puertu guaꞌa, sa io yachi jnu ñuu nani Lasea.
9 Kuaꞌa ntseꞌe tiempu xíta san i-ntseꞌe ii io xi ndidaa tsa kuaꞌan barku xiꞌin ndidaa sa ñoꞌon, kuan sa kuyachi sa vixi, juandiku Pablo kaꞌan tsa 10 san sadaa tsa:
—Xanii, ntsaꞌa da sa viaji yaꞌa ntseꞌe ii io, san ntseꞌe kuaꞌa kuita adii ni ndidaa sa neꞌe barku ya, maska sa ntsa ndeꞌe mee barku ya ii io sa tivi xiꞌin ntsandeꞌe mee ndo ndidaa ndo ii io sa kuu ndo.
11 Doko centurión kída tsa sa kachi s-toꞌo barku xiꞌin capitán, san ti i-nini tsa Pablo. 12 Kuan Puertu yukua ti guaꞌa sa yaꞌia ndo tiempu vixi, san ndidaa tsa kachi sa nakiꞌin tsa tu guaꞌani nasaa tsa Fenice, en puertu io isla Creta sa ntsaꞌa ichi suroeste xiꞌin noroeste, san jukua kendoo tsa ntsa na yaꞌia sa vixi.
Kaꞌnu kaꞌnu en davi koon kuenta io tsa xiti barku xiti mar
13 San sani-ini tsa ndidaa tsa sa guaꞌa ni kiꞌin tsa kuan kueni kueni kana tachi ichi sur san kee tsa x-costa Creta. 14 Danduu niꞌi ntseꞌe kana en tachi kaꞌnu ntseꞌe ichi nordeste san ñanintsaa ñaꞌan xi barku kuan. 15 San oni ñuꞌu ñaꞌan xi barku, san ti kachi yaꞌia barku ichi kana tachi juandiku dandoo tsa sa na kuñuꞌun ñaꞌan xi. 16 Yaꞌia da yachi isla nani Cauda, sa ti ndeꞌe kana tachi, san taꞌan ntseꞌe da ndidaa da sa dandaa da barku luchi ñuꞌu barku kaꞌnu kuan. 17 San kuenta tuꞌu dakaa tsa na kiꞌni ndodo kutu tsa barku. Doko yuꞌu tsa sa kukiten ñuꞌu kuchi nani Sirte juandiku noneꞌe tsa vela san dandoo tsa san na ku ntsaka ñaꞌan ndutsa xi barku kuan. 18 San nduu enka kii, koon ntseꞌe ka davi, san kesaꞌa tsa dakana tsa ndidaa sa ñoꞌon xiti barku, 19 nduu uni kii, xiꞌin ndaꞌa da ndidaa da dakana da sa senchiion tsa sa dakaka tsa barku. 20 Sa nisa ora san nisa chodini ti kee kuaꞌa ntseꞌe kii san ndidaa sa taꞌan ya sani-ini da ndidaa da sa ndeꞌe da.
21 San kuaꞌa ntseꞌe kii ti saj da ita-stila, Pablo kukuin tsa dagua dagua sa io ndidaa tsa yaꞌa san kachi tsa:
—Xanii, guaꞌa tu inini ñaꞌan ni d̶a san kadi ni na kendoo ndo Creta kuan naku, san ma kuita ndidaa sa xíta ya. 22 Doko vita kachi da jni sa ma kani-ini ni kuan ma kuita ni nisa en ni, kuan meni barku ya kuíta. 23 Kuan saniñu nanuu en x-ángel Ndios jnu da, ia ku s-Toꞌo da xiꞌin xinokuachi da xi, 24 san kachi: “Ma xuꞌu yo, Pablo. Kuan kiꞌin yo sa io Cesar, san sa saꞌa yoꞌo Ndios chintsee ñaꞌan ia xi ndidaa tsa vaxi xiꞌin yo. Duꞌua kachi d̶a” 25 Juandiku ma yuꞌu ni ndidaa ni vi xanii, kuan dan xininchisa da sa kachi Ndios, san taꞌan duꞌua kuenta kachi ia. 26 Doko kukotaꞌvi barku ya en isla.
27 Sa ku uxi kumi niñu, san ntsaka ñaꞌan ndutsa kuaꞌan xiti mar Adriático san kuenta dagua niñu ndidaa marineru sani-ini tsa sa kuyachi tsa jnu ñuꞌu yichi. 28 Teen kuꞌua tsa san kuu oko ndaꞌa. San taꞌa ka kandú teen kuꞌua nituku tsa san ku saꞌun ndaꞌa. 29 San yúꞌu tsa sa ñanintsaa tsa kagua juandiku choꞌon tsa kumi ancla ichi sata barku san xíka tsa xi Ndios sa na yeꞌe. 30 Ndidaa marineru kuan nchu kono tsa, san noneꞌe tsa en barku luchi san kida tsa sa ku choꞌon tsa ancla ichi jnu barku. 31 Doko Pablo sadaa tsa xi centurión xiꞌin ndidaa soldadu:
—Tu ma kendoo ndidaa tsa yaꞌa barku ya, san ntsa ndeꞌe mee ni ndidaa ni ndeꞌe tuku.
32 Danduu ndidaa soldadu saꞌntsa tsa ndidaa yoꞌo nuꞌni ndodo ndidaa barku lin ndasa na kikagua niꞌno xiti ndutsa san na kuita.
33 Sa io sa yeꞌe, Pablo sadaa tsa sa nakaj s-tsa ndidaa tsa en taꞌa ita-stila, san sadaa tsa:
—Jaꞌa ku uu semana ntsatu ni nasa na taꞌan, san ñoꞌon nchitsa ni. 34 Juandiku sakundaꞌvi da jnu ni, kaj ni kuani taꞌa dii ita-stila, kuan na kuyakui ni, kuan ma kuita nisa en idi d̶iki ni ndidaa ni.
35 San tuꞌu kaꞌan tsa toꞌon yaꞌa san teen tsa ita-stila san sañaꞌan tsa taxaꞌvi xi Ndios jnu ndidaa tsa yaꞌa san taꞌvi tsa san kesaꞌa tsa saj s-tsa. 36 San kukaꞌnu xanaa tsa ndidaa tsa, san sáj s-tsa ita-stila ndidaa tsa tuku. 37 San ndidaa ñayii ñoꞌon barku kuan kuu ubi yodo cientu xiꞌin oko iñu ñayii. 38 Danduu tuꞌu nachitu tsa saj s-tsa, san dakana tsa ndidaa trigu ñoꞌon xiti barku ndasa na nduu kama.
Duꞌua táꞌan kuenta dáꞌvi barku
39 San kuenta yeꞌe, ndidaa marineru ti nakini tsa ami io da ndidaa da; doko xíni tsa ndidaa tsa sa io ñuꞌu yichi san kachi tsa sa dakiꞌin yachi tsa barku jukua. 40 Diti tsa ndidaa ancla san kikagua niꞌno xiti mar. San dandatsa tsa sa yiten timón, san dandaa tsa vela san tachi ntsaka ñaꞌan xi barku kuan kuaꞌan ichi io ñuꞌu yichi. 41 Doko kuenta ñani ntsaa tsa en monton ñuꞌu kuchi san sakotaꞌvi barku san ti kánda ka, san sata xi ndata kuan niꞌi ntseꞌe ñani ntsa ndutsa mar. 42 Danduu ndidaa soldadu ndatoꞌon tsa sa kaꞌni tsa ndidaa tsa yeꞌe vekaa ntsaka tsa ndasa ma en kono. 43 Doko centurión ti nchoj s-tsa sa kuu Pablo juandiku ti semani tsa. San táꞌvichiion tsa sa ndidaa tsa kuu ndutsa na ke tsa xiti ndutsa san na ndutsa tsa ntsa ñuꞌu yichi; 44 san ndidaa tsa ti kachi ndutsa, na teen tsa tabla sa taꞌnu xi barku san na kandodo tsa kiꞌin. San duꞌua saa tsa ndidaa tsa ntsa ñuꞌu yichi.