Ndios ndaka ndaa ia kuachi
2
Nasa sani-ini ni ndidaa ni sa kuu ni? sani-ini ni sa guaꞌa ni ndakakuachi ni xi ñayii duꞌua kida kuaan ña? ñaꞌan, kuan dakuido kuachi ñaꞌan ni xi ñayii doko duꞌua ni kida mee ni tuku, juandiku sa xídokuachi ni;a kuan ndidaa sa kida tsa yukua kida ni tuku. 2 Doko sa xini ndo sa meni Ndios kuu ia ndakakuachi xi ndidaa ñayii duꞌua kida ya, san xini ndo sa Ndios kuu ia ndaka ndaa kuachi. 3 San dini ndidaa ni ora dakuido kuachi ni ñayii kida sa kuiꞌia, sani-ini ni sa Ndios ma ndaka ia kuachi jni ña? kuan duꞌua ni kida ni tuku. 4 Ndios guaꞌa ntseꞌe ia, san kaꞌnu ntseꞌe xanaa ia, san kuyakui ia ndidaa sa kuiꞌia kida ni ndidaa ni. Doko ma kani-ini ni ndidaa ni sa sa kida ni xan ti io xaꞌvi xi. Ndios taxi ia sa guaꞌa jni ndidaa ni, ndasa na naxikokagua xanaa ni san na na ta-uꞌu ni sa kida ni ndidaa sa kuiꞌia. 5 Doko tu na kada ntsee diki ni on ni, san kida ni sa kaya ni on x-kuachi ni, san taꞌan kii sa ndaka Ndios kuachi xi ndidaa ñayii, san taꞌán ntseꞌe ni kada ia. 6 Kuan kii yukua ndiden ndiden kuañaꞌan ia xaꞌvi ndidaa ñayii, nasa xu kada ñayiib. 7 Io ñayii nduku sa kada sa guaꞌa ndikii, xiꞌin nanduku ñayii sa kadakaꞌnu ñaꞌan ñayii xi Ndios, xiꞌin nduku ñayii en sa ma ndeꞌe, san ndidaa ñayii yaꞌa niꞌi ñuyii ma ndeꞌe; 8 Doko io ñayii nduku ni sa kuxi mee, san ti nchu kunchiko ñayii sa ndaa, san nchiko ñayii sa kuiꞌia sa duꞌua, ndidaa ñayii yaꞌa taꞌan ndidaa sa diko-ini Ndios; 9 Taꞌan ntseꞌe ndidaa ñayii kida sa kuiꞌia, ñayii kuu ñuu Israel xiꞌin ndidaa ñayii ti kuu ñuu Israel; 10 san ndidaa ñayii kida sa guaꞌa, Ndios kadakaꞌnu ñaꞌan ia, san na kininchisa ia sa guaꞌa kida ndidaa ñayii yaꞌa, san duꞌua niꞌi ñayii yaꞌa toꞌon kaꞌnu-ini, ñayii kuu ñuu Israel san duꞌua ni ñayii ti kuu ñuu Israel.11 Kuan jnu Ndios eni xaꞌvi ndidaa ñayii.c 12 Ndidaa ñayii xini ley san kida kuachi, xiꞌin ley ndakakuachi xi, san ndidaa ñayii kida kuachi san ti xini ley, ndakakuachi xi doko adi xiꞌin ley, 13 kuan adii ñayii ndaa ku ñayii sakunini ni ley, maska sa ñayii kida sa kachi. 14 Doko ndidaa ñayii ti kuu ñuu Israel kuani ti xini tsa ley doko xininchisa tsa kuan xinituni tsa nasa kuu sa guaꞌa xiꞌin nasa kuu sa kuiꞌia. 15 San duꞌua datuu tsa sa ley kuan yodotuni xanaa ndidaa tsa yaꞌa, kuan tu kida tsa nasa kida tsa san xini tsa tu kuu sa guaꞌa ña kuu sa kuiꞌia, san juan dakuido kuachi ñaꞌan s-tsa adi natavi ñaꞌan s-tsa, 16 kii na ndaka Ndios kuachi xi ndidaa sa kida ñayii ntsa sa sani-ini ñayii kuani yeguaꞌa, san toꞌon guaꞌa yaꞌa kuu sa kaꞌan da xi ndidaa ñayii, sa Ndios ndaka ia kuachi xi ñayii sa saꞌa Jesucristu.
Ndidaa ñayii Israel xiꞌin ley chidotuni Moisés
17 Dagua ni kaꞌan sa kuu ni ñuu Israel san kunaꞌnu ni kuan xini ni ley, juandiku ku-iꞌni ni xiꞌin Ndios. 18 San sani-ini ni sa xini ni sa nchoxi Ndios, kuan ndasa kaꞌvi ni j-ley Ndios kutuꞌua ka ni nasa kuu sa ndaa. 19 San sani-ini ni sa guaꞌa ni ndada ndaa ni ñayii ti xini ley xiꞌin ñayii ti xini xichi Ndios, 20 san ndani ka sa nundaꞌa ni ley, juandiku sani-ini ni sa xinika ni sa kuxi ñayii ti kachi kaꞌvi xiꞌin ti sakuituni xanaa xi, san sani-ini ni sa dini nika kuu ñayii kuu dadana ñaꞌan ndaa ley. 21 Doko naku nchu dakuaꞌa ni ñayii, san ti kutuꞌua mee ni diꞌna ka. Kuan kaꞌan ni sa ma duꞌu ñayii, san diꞌna ka mee ni kida. 22 San dakuaꞌa ñaꞌan ni sa ma koo ñayii xiꞌin ñayii ti kuu d̶eꞌe xi adi xee xi, sa diꞌna ka mee ni kida. Xini uꞌu ni ndidaa idolo, doko saꞌan ni sa duꞌu ni sa sañaꞌan ndidaa ñayii xi idolo. 23 Kunaꞌnu ni sa xini ni ley doko ti kida ni sa yodotuni, san kuu ni en sakanuu xi Ndios. 24 Kuan duꞌua yodotuni: “Ndidaa ñayii ti kuu ñuu Israel kaꞌan kuiꞌia xi Ndios sa saꞌa dini ndidaa ni”.
25 San circuncisión nandeꞌe tu kida ni sa taꞌvichiion ley, doko tu ti kida ni san kuani daa na kada circuncidard ni, ti nandeꞌe. 26 San tu ñayii ti io circuncidadu kida sa taꞌvichiion ley, san kuani ma kada circuncidare tsa, doko kida tsa sa taꞌvichiion ley. 27 Juandiku ñayii ti io circuncidadu san kida sa yodotuni ley, ñayii yukua ndakakuachi xi ndidaa dini ñayii io circuncidadu xiꞌin io ley kuan xi doko ti kida sa kachi. 28 Kuan adii ñayii ñuu Israel kuu ñayii danaꞌa sa kuu ñuu Israel, san nisa circuncisión kuu sa kida ñayii xi xikikoño ñayii, 29 kuan ñayii kuu nchisa ñuu Israel jnu Ndios kuu ñayii io ndaa kuenta nchoxi Ndios, san circuncisión nchisa kuu sa kida Ndios xanaa ñayii san adii sa kida ñayii xi xikikoño ñayii. San en ñayii nádama xanaa xi, nduku sa na kinimani ñaꞌan Ndios xi san adii sa na kinimani ñaꞌan ñayii.