Jesús nanuu ia jnu usa tsa nchiko ñaꞌan xi ia
21
Danduu Jesús nanuu nituku ia jnu ndidaa tsa nchiko ñaꞌan xi ia ndodo ndutsa Tiberias. San duꞌua taꞌan: 2 Io Simón Pedru xiꞌin Tomás tsa kaꞌan tsa tineꞌe xi, Natanael tsa kuu ñuu Caná xuun Galilea, ndidaa d̶aꞌa Zebedeu xiꞌin ubi ka tsa nchiko ñaꞌan xi ia. 3 Simón Pedru sadaa tsa:—Kiꞌin ntsu ku teen ntsu chaka.
San ndidaa tsa yaꞌa sadaa tsa:
—Kiꞌin ndo ndidaa ndo tuku.
San kukee tsa ndidaa tsa barku, doko niñu yukua ti niꞌi tsa nisadana chaka.a 4 Sa yeꞌe kuaꞌan, Jesús saa ia ndodo ndutsa, san ndidaa tsa nchiko ñaꞌan xi ia ti xini tsa sa Jesús kuu ia. 5 Danduu Jesús sadaa ia:
—Da, ti teen yo uu chaka ña?
San ndidaa tsa yaꞌa sadaa tsa:
—Ñaꞌan.
6 San sadaa ia:
—Choꞌon xonochaka xan ichi ladu kuaꞌa barku xan, san niꞌi yo chaka.
San duꞌua kída tsa san danduu ti kachi ka tagua tsa xonochaka, kuan kuaꞌa ntseꞌe chaka teen.b 7 Danduu tsa nchiko ñaꞌan xi Jesús tsa kida-ini ntseꞌe ia sadaa xi Pedru:
—¡Ku Toꞌo ndo kuu tsa!
San tsaku xi Simón Pedru sa Jesús kuu ia, san nakuiꞌno tsa d̶oꞌno tsa san ndagua niꞌno tsa xiti ndutsa (kuan díta tsa d̶oꞌno tsa sa kadachiion tsa). 8 Uu ka tsa nchiko ñaꞌan xi ia saa tsa ndodo ndutsa xiꞌin barku, ñuꞌu tsa xonochaka xiꞌin ndidaa chaka; kuan ti ndeꞌe xika io ntsa ndodo mar, ndaa en cientu metru ñuꞌu tsa. 9 Kée tsa xiti ndutsa san saa tsa ñuꞌu yichi, san xini tsa ñuꞌún ñoꞌon jukua xiꞌin en chaka kandodo te jnu ñuꞌu, xiꞌin ita-stila.
10 Sadaa Jesús:
—Taxi uu chaka dika teen yo xan.
11 Danduu saꞌan Simón Pedru ñuꞌu tsa xonochaka ntsaa jnu ñuꞌu san naꞌnu ntseꞌe chaka ñoꞌon, en yodo cientu xiꞌin uni chaka ñoꞌon san kuani duꞌua baa chaka ñoꞌon doko ti ndáta xonochaka. 12 Jesús sadaa ia:
—Naꞌa kadi-ini yo ndidaa yo.
San nisa en tsa nchiko ñaꞌan xi ia ti kuyee sa ndukutoꞌon: Andu kuu ni? kuan xini tsa sa Jesús kuu ia. 13 Danduu kuyachi Jesús san teen ia ita-stila san sañaꞌan ia s-tsa ndidaa tsa; san duꞌua ni kída ia xiꞌin chaka kuan tuku.
14 San jaꞌa kúu guelta ku uni nanuu ia jnu ndidaa tsa nchiko ñaꞌan xi ia ntsaa kii nandoto ia sa xiꞌi ia.
Jesús kaꞌan ia xiꞌin Simón tsa nani Pedru
15 Kuenta tuꞌu sadi-ini tsa ndidaa tsa san Jesús sadaa ia xi Pedru:
—Simón d̶aꞌa Jonás, Nchoxaꞌan ntseꞌe ka yo kuntsu sa kuxi ndidaa ka nuyaꞌa ña?
San sadaa tsa yaꞌa:
—Jon, Toꞌo xini ni, sa nchoxaꞌan da ni.
Jesús sadaa ia:
—Koꞌon jnu yo ndidaa ku ndikachi yiki liin ntsu ya.
16 San sadaa ni tuku ia guelta kuu uu:
—Simón d̶aꞌa Jonás, nchoxaꞌan yo kuntsu ña?
Sadaa Simón ya:
—Jon Toꞌo, xini ni sa nchoxaꞌan da jni.
Sadaa Jesús:
—Kadi ndidaa ku ndikachi liin ntsu ya.
17 Guelta ku uni sadaa ia:
—Simón d̶aꞌa Jonás, nchoxaꞌan yo kuntsu ña?
Uꞌu ntseꞌe taꞌan Pedru sa ndukutoꞌon ia uni guelta: Nchoxaꞌan yo kuntsu ña?
San sadaa tsa:
—Toꞌo, dini xini ni ndidaa. Dini xini ni sa nchoxaꞌan da jni.
Jesús sadaa ia:
—Kadi ku ndikachi ntsu. 18 Kachitoꞌon ndaa ntsu yo sa kuenta kuachi ka yo, xu nakuiꞌno yo d̶oꞌno yo san xu kiꞌin yo ami xu nchu kiꞌin yo; doko kii na yee yo, dakaa yo ndaꞌa yo, san enka ñayii dakuiꞌno ñaꞌan yo san kuntsaka ñaꞌan yo ami ti nchoj yo.
19 Kuenta kachi ia toꞌon yaꞌa, nchu kachi ia sa duꞌua kuu tsa xiꞌin sa duꞌua kadakaꞌnu ñaꞌan xi Ndios. San tuꞌu sadaa ia toꞌon yaꞌa san sadaa ia:
—Kunchiko ñaꞌan kuntsu.
Tsa nchiko ñaꞌan xi ia tsa xinimani ntseꞌe Jesús
20 Naxikokagua Pedru san xíni tsa sa nchiko ñaꞌan tsa nchiko ñaꞌan xi ia tsa kida-ini ntseꞌe ia. Dii ni tsa intsaku ntsataꞌan xiꞌin ia niñu pascua, tsa ndukutoꞌon: “Toꞌo, andu kuu tsa diko ñaꞌan ni”c 21 San kuenta xíni ñaꞌan Pedru san sadaa tsa xi Jesús:
—Toꞌo San nu xan kin, nasa taꞌan nu?
22 San Jesús sadaa ia:
—Tu ntsuꞌu nchoj ntsu san na kendoo nu ntsa na ndij ntsu, naku nchu kini yo? Yoꞌo kunchiko ñaꞌan kuntsu.
23 Juandiku niꞌitoꞌon ndidaa ka tsa yaꞌa sa tsa yaꞌa ma kuu tsa. Doko Jesús ti sadaa ia sa ma kuu tsa yaꞌa, sa sadaa ia kuu: “Tu nchoj ntsu sa na kendoo nu ntsa na ndij ntsu, naku nchu kini yo?”
24 Ntsuꞌu kuu tsa kaꞌan ndidaa toꞌon yaꞌa san chídotuni ntsu. San xini ntsu ndidaa ntsu sa sa ndaa kuu.
25 Io kuaꞌa ntseꞌe ka sa kída Jesús, sa tu na chidotuni ndidaa, tuj ntsu sa ma kuaꞌa nee ñuyii ya ndidaa tutu todotuni.